Transparency Myanmar

transparency.myanmar@gmail.com

Irrawaddy News, 10th March 2010

နိုင်ငံပိုင် လုပ်ငန်းများကို ပုဂ္ဂလိက လက်သို့ ရောင်းချနေသော အစိုးရ၏ ဝန်ကြီးဌာန အသီးသီးထံမှ စီးပွားရေး လုပ်ငန်းများကို မြန်မာ့စီးပွားရေး ဦးပိုင်လီမိတက် MEHC က တိုက်ရိုက် လွှဲပြောင်းရယူနေသည်ဟု သတင်းများ ကြားသိရသည်။

မြန်မာ့တပ်မတော်ကို အသုံးစရိတ်နှင့် ရန်ပုံငွေများ ထောက်ပံ့ပေးနေသော မြန်မာ့ဦးပိုင် MEHC သည် ပုဂ္ဂလိက ကဏ္ဍသို့ လတ်တလော လွှဲပြောင်းမှုများတွင် ကြီးမားသော နိုင်ငံပိုင် လုပ်ငန်းများနှင့် မြေနေရာများကို ရယူသွားခဲ့သည်။

ဦးပိုင်က ရယူသွားသော လုပ်ငန်းများမှာ လောင်စာဆီလုပ်ငန်း၊ ပင်လယ်ကူး သင်္ဘောများ၊ ဆိပ်ကမ်း ဝန်ဆောင်မှုများ၊ ပို့ဆောင်ရေး လုပ်ငန်းများ၊ သွင်းကုန် ထုတ်ကုန်လုပ်ငန်းများ၊ ကုန်တိုက်များ၊ ရွှေနှင့်ကျောက်မျက် တူးဖော်ခြင်း လုပ်ငန်းနှင့် ဘဏ်လုပ်ငန်းများ ပါဝင်သည်။ မြန်မာ့ဦးပိုင် MEHC သည် အဆိုပါ လုပ်ငန်းနယ်ပယ်များမှ အကျိုးအမြတ်များကို လက်ဝါးကြီး အုပ်ခဲ့သည်မှာ နှစ်ပေါင်း အတန်ကြာခဲ့ပြီ ဖြစ်သည်။

လတ်တလော လေလံတင်ခဲ့သော ဓာတ်ဆီဆိုင် ၂၄၆ ဆိုင်အနက် ဦးပိုင်က တစ်ဝက်ကျော် ရယူသွားခဲ့သည်ဟု ဦးပိုင်နှင့် နီးစပ်သော သတင်းရပ်ကွက်က ပြောကြားသည်။

"ရန်ကုန်၊ မန္တလေးနဲ့ တခြား နယ်မြို့ကြီးတွေမှာ ရှိတဲ့ လောင်စာဆီ အရောင်းဆိုင်တွေကို ဦးပိုင်က ထိန်းချုပ်ပြီး တခြား ပုဂ္ဂလိကဆိုင်တွေလိုပဲ ဓာတ်ဆီ၊ ဒီဇယ်ဆီတွေ ရောင်းပါလိမ့်မယ်" ဟု ဦးပိုင်နှင့် ပုံမှန် အဆက်အသွယ်ရှိသော ဝန်ကြီးဌာန ညွှန်ကြားရေးမှူး တစ်ဦးက ပြောကြားခဲ့သည်။

မြန်မာ့ စီးပွားရေးဦးပိုင် MEHC သည် ပင်လယ်ကူး သင်္ဘောများ၊ တရုတ်မှ မှာယူထားသော ကွန်တိန်နာ သင်္ဘောများအပြင် မြန်မာ့ကြယ်ငါးပွင့် လုပ်ငန်းမှ လက်ရှိ သင်္ဘောအချို့နှင့် ဝန်ထမ်းများကိုပါ ရယူသွားသည်ဟု သိရှိရသည်။

တရုတ်နိုင်ငံတွင် တည်ဆောက်ပြီး မြန်မာ့ ကြယ်ငါးပွင့် သင်္ဘောလုပ်ငန်းသို့ ၂၀၀၉ နိုဝင်ဘာ ၂၀ တွင် ရန်ကုန်ဆိပ်ကမ်း၌ လွှဲပြောင်းခဲ့သော ကွန်တိန်နာ ၅၀၀ တင်ဆောင်နိုင်သော Delppni Alpha သင်္ဘောကိုလည်း မြန်မာ့ဦးပိုင်က ရယူသွားသည်ဟု ဆိုသည်။

ဝန်ကြီးဌာနက လေလံတင်ခဲ့သော ဆိပ်ကမ်း ၅ ခုအနက် အကြီးဆုံး ဆိပ်ကမ်းကို ဦးပိုင်လီမိတက်ပိုင် သင်္ဘောများ အသုံးပြုရန်အတွက် ဦးပိုင်က ယူလိမ့်မည်ဟု ပို့ဆောင်ရေး ဝန်ကြီးဌာန သတင်းရပ်ကွက်မှ သိရသည်။

"အဆင်သင့် အသုံးပြုနိုင်တဲ့ ဆိပ်ကမ်းကို ဦးပိုင်က ယူမယ်ဆိုတဲ့ သတင်းက သေချာပါတယ်" ဟု မြန်မာ့ဆိပ်ကမ်း အာဏာပိုင်မှ အရာရှိ တစ်ဦးက ပြောသည်။

ဦးပိုင်လီမိတက် MEHC ၏ ကုမ္ပဏီခွဲတစ်ခု ဖြစ်သော ဗန္ဓုလ ပို့ဆောင်ရေး ကုမ္ပဏီ BTC မှ အရာရှိတစ်ဦးက ပြောကြားရာတွင် နိုင်ငံတစ်ဝှမ်း ပြေးဆွဲနေသော အဝေးပြေး ဘတ်စ်ကားလိုင်းများကို တိုးချဲ့သွားရန် အစီအစဉ်ရှိပြီး ငှားရမ်းခြင်း လုပ်ငန်းအတွက် မော်တော်ယာဉ် ရာပေါင်းများစွာ တင်သွင်းရန် စီစဉ်နေသည်ဟုလည်း ဆိုသည်။

ဗန္ဓုလ ကုမ္ပဏီ BTC သည် မြန်မာနိုင်ငံတဝှမ်းတွင် ပြည်တွင်း အဝေးပြေးလိုင်း ၁၄ လိုင်းကို ဆောင်ရွက်နေပြီး ရန်ကုန်မြို့တော်၌ ကားငှားရမ်းခြင်း လုပ်ငန်းကို ပါရမီ နှင့် အဓိပတိ နာမည်များဖြင့် လုပ်ကိုင်နေသည်။ အထက်ပါ အဝေးပြေး ယာဉ်လိုင်းများတွင် ရွှေမန်းသူ၊ ရွှေမြိုင်သူ၊ ရှမ်းမလေး နှင့် ပုသိမ်သူ ယာဉ်လိုင်းများ ပါဝင်သည်။ ဘတ်စ်ကားကြီးများ တင်သွင်းခြင်းအပြင် ဇိမ်ခံကားများကိုလည်း တင်သွင်း ရောင်းချလျက် ရှိသည်။

ဦးပိုင်လီမိတက် MEHC သည် ယခုအခါ မြဝတီ ထရေးဒင်းနှင့် ဖိုက်ဖိုးဆဲဗင်း ကုမ္ပဏီ နာမည်များဖြင့် ၎င်း၏ ထုတ်ကုန် ပစ္စည်းများ ရောင်းချခြင်းနှင့် ဝန်ဆောင်မှု လုပ်ငန်းများကို လုပ်ကိုင်နေသည်။

ရန်ကုန်မှ စီးပွားရေး လုပ်ငန်းရှင် တစ်ဦးက ပြောကြားရာတွင် မြန်မာ့ဦးပိုင်သည် ရန်ကုန်မြို့ပေါ်ရှိ အစိုးရပိုင်မြေနှင့် အဆောက်အဦး ပေါင်းစုံကို ရယူထားပြီး အဆင့်မြင့် ကုန်တိုက်ကြီးများ၊ လက်လီ အရောင်းဈေးများ၊ အခြား စီမံကိန်းများ ဆောက်လုပ်မည်ဟု ဆိုသည်။

ထို့အပြင် တောင်ဥက္ကလာပ ဂန္ဓမာလမ်းနှင့် ဝေဇယန္တာလမ်းထောင့်တွင် မော်တော်ကား အရောင်းစင်တာ ပါဝင်သည့် ခေတ်မီ အဆင့်မြင့် ဈေးကြီးကိုလည်း ဦးပိုင်လီမိတက်က တည်ဆောက်မည်ဟု ယုံကြည်ရသည်။

ဤမျှ မကသေးဘဲ ရန်ကုန်မြို့ရှိ ဗဟိုဘဏ်နေရာကိုပါ ဦးပိုင်လီမိတက်၏ မြဝတီဘဏ်က ၎င်း၏ ရုံးချုပ် ပြုလုပ်ရန် အတွက် ရယူမည် ဖြစ်ပြီး နိုင်ငံတဝှမ်းတွင် ဘဏ်ခွဲများ ဖွင့်လှစ်ရန် စီစဉ်နေသည်ဟုလည်း သိရသည်။

လတ်တလောတွင် မြဝတီဘဏ်သည် ဘုရင့်နောင်၊ မန္တလေး၊ မုံရွာ၊ နေပြည်တော်၊ ပျဉ်းမနား၊ ဖားကန့်၊ တောင်ကြီး နှင့် ပုသိမ်မြို့များတွင် ဘဏ်ခွဲ ၇ ခု ဖွင့်လှစ် ဆောင်ရွက် နေသည်။

ရွှေနှင့် ကျောက်မျက် တူးဖော်ရေး ကဏ္ဍတွင်လည်း မြန်မာ့ဦးပိုင်က ပုဂ္ဂလိကများသို့ မြေနေရာများ ငှားရမ်း လိုင်စင်ချပေးနေပြီး ဖက်စပ် လုပ်ငန်းများကိုလည်း လုပ်ကိုင်နေသည်။

မြန်မာ့စီးပွားရေး ဦးပိုင်လီမိတက်၏ လက်ရှိ ဆောင်ရွက်မှုများကို နိုင်ငံတော် ဓားပြတိုက်မှု အဖြစ် ယူဆနိုင်သည်ဟု ပြောကြားသူမှာ မြန်မာနိုင်ငံမှ စီးပွားရေး ပညာရှင် တစ်ဦး ဖြစ်သည်။

"အမျိုးသား အမွေအနှစ်လို့ ပြောလို့ရတဲ့ စီးပွားရေးလုပ်ငန်းတွေကို တပ်မတော်က ခွဲစိတ်ယူနေတာပါ။ တိုင်းပြည်ကို ဘယ်သူပဲ အုပ်ချုပ်ပါစေ။ ကိစ္စ မရှိတော့ဘူးလေ။ ဒီလုပ်ငန်းတွေကနေ စစ်တပ် အသိုင်းအဝိုင်း အတွက် ဝင်တွေကောင်းကောင်း ရှာနိုင်သွားပြီကိုး" ဟု ၎င်းက ပြောကြားသည်။

အာဏာရှင် အစိုးရများ အားလုံးသည် ၎င်းတို့၏ စီးပွားဘက်များ၊ ဆွေမျိုးများ၊ မိသားစုများထဲသို့ အမြတ်အစွန်း ကြီးမားသော စီးပွားရေး လုပ်ငန်းများ၊ နေရာကောင်းများကို လွှဲပြောင်းပေးခြင်းသည် အစဉ်အလာ ထုံးစံပင် ဖြစ်သည်ဟု ရန်ကုန် စီးပွားရေး တက္ကသိုလ်မှ ပါမောက္ခ တစ်ဦးက ပြောကြားသည်။

"အာဏာရှင်တွေ အားလုံးဟာ သူတို့ ကိုယ်ကျိုး စီးပွားအတွက် ဦးပိုင်လီမိတက်လို ကုမ္ပဏီမျိုးတွေ ထောင်ကြတာဟာ ထုံးစံပါပဲ။ အင်ဒိုနီးရှားမှာဆိုရင် စစ်အစိုးရ လက်ထက်တုန်းက စစ်တပ် နောက်ခံ ကုမ္ပဏီတွေ အများကြီး ရှိခဲ့တယ်" ဟု ၎င်းက သုံးသပ် ပြောကြားခဲ့သည်။

 

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

0 comments:

Post a Comment