Transparency Myanmar

transparency.myanmar@gmail.com

နှစ်ပေါင်း ၂၀ အတွင်း ပထမဆုံးအကြိမ် ကျင်းပ ပြုလုပ်မည့် မြန်မာနိုင်ငံ ရွေးကောက်ပွဲတွင် အတိုက်အခံ နိုင်ငံရေး ပါတီဝင်များ အားလုံးနှင့် တိုင်းရင်းသား လူနည်းစု အုပ်စုများ အားလုံး ပါဝင် ယှဉ်ပြိုင်ခွင့် ပေးရန် လာမည့် ရက်သတ္တပတ်တွင် မြန်မာ စစ်ခေါင်းဆောင်များအား ဖိအားပေး တိုက်တွန်းမည် ဖြစ်ကြောင်း ထိုင်းနိုင်ငံခြားရေး ဝန်ကြီးက ပြောကြားလိုက်သည်။

"မြန်မာနိုင်ငံရဲ့ နိုင်ငံရေး လုပ်ငန်းစဉ် တစ်ရပ်လုံး ချောမွေ့စေရေး အပါအဝင် အမျိုးသား ပြန်လည်သင့်မြတ်ရေး ပေါ်ပေါက်စေဖို့ပဲ ကျွန်တော်တို့က အာရုံစိုက်ပါတယ်" ဟု ထိုင်း နိုင်ငံခြားရေး ဝန်ကြီး Kasit Piromya က AP သတင်းဌာနနှင့် တွေ့ဆုံရာတွင် ပြောကြားသည်။

မြန်မာ အတိုက်အခံ ခေါင်းဆောင် ဒေါ်အောင်ဆန်းစုကြည်က စစ်အစိုးရ ထုတ်ပြန်လိုက်သော ရွေးကောက်ပွဲ ဥပဒေသည် ဒီမိုကရေစီ နည်းလမ်း မကျသောကြောင့် ရွေးကောက်ပွဲကို သပိတ် မှောက်ကြောင်း ပြီးခဲ့သည့် ရက်သတ္တပတ်က ပြစ်တင် ရှုတ်ချခဲ့သည်။ ဒေါ်စုကြည်၏ နိုင်ငံရေးပါတီ ဖြစ်သော အမျိုးသား ဒီမိုကရေစီ အဖွဲ့ချုပ် (NLD) က မိမိတို့ ပါတီ အနေဖြင့် ရွေးကောက်ပွဲသို့ ဝင်ရောက် ယှဉ်ပြိုင်မည် မဟုတ်ကြောင်း မတ်လ ၂၉ ရက်နေ့တွင် ထုတ်ပြန် ကြေညာခဲ့သည်။ သို့အတွက်ကြောင့် NLD သည် ယခုအခါ ပါတီ ဖျက်သိမ်းခံရမည့် အခြေအနေနှင့် ရင်ဆိုင်နေရသည်။

"သူတို့ဟာ သူတို့ရဲ့ ပါတီ အရေးကိစ္စကို လွတ်လွတ်လပ်လပ် ဆုံးဖြတ်ပိုင်ခွင့် ရှိပါတယ်။ သူတို့ရဲ့ ဆုံးဖြတ်ချက်ကို ကျွန်တော်အနေနဲ့ ဂုဏ်လည်း ယူတယ်။ လေးလည်း လေးစားပါတယ်" ဟု မစ္စတာ Kasit Piromya က ပြောသည်။

စစ်အစိုးရ၏ ရွေးကောက်ပွဲ ဥပဒေ ထွက်ရှိလာပြီးနောက် NLD က ယင်းသို့ ဆုံးဖြတ်ခဲ့ခြင်း ဖြစ်ကြောင်း၊ အကြောင်းမှာ အဆိုပါ ရွေးကောက်ပွဲ ဆိုင်ရာ ဥပဒေသည် စစ်တပ် ဦးဆောင်မှုကိုသာ အသားပေးထားပြီး အတိုက်အခံ ပါတီများဘက်ကို အလေး မထားသည်မှာ ထင်ရှားနေ၍ ဖြစ်ကြောင်း ၎င်းက ဆိုသည်။

"NLD ပါတီက ဆုံးဖြတ်လိုက်တဲ့ ကိစ္စဟာ မှန်ကန်မှု ရှိပြီး မျှတတယ်လို့ ယူဆပါတယ်" ဟု နိုင်ငံခြားရေး ဝန်ကြီး Kasit Piroma က ပြောသည်။

"နိုင်ငံရေးအရ ပြစ်မှု ဖြစ်ပွားခဲ့ရင် လွတ်ငြိမ်း ချမ်းသာခွင့် ဆိုတာ ရှိနေတော့ မြန်မာ့ လူ့အဖွဲ့အစည်း အနေနဲ့ နိုင်ငံရေး လမ်းစဉ်ထဲမှာ လူတိုင်း လိုက်ပါ ဆောင်ရွက်ခွင့် ဆိုတာလည်း ရှိမယ်လို့ မျှော်လင့်ပါတယ်" ဟုလည်း ဆက်လက် ပြောကြားသည်။

မစ္စတာ Kasit Piroma က မြန်မာ့ နိုင်ငံရေး ဖြစ်စဉ်ကို ထိုင်းနိုင်ငံ အနေနှင့် အလေးထား စိတ်ဝင်စားမှု ရှိကြောင်းလည်း ပြောဆိုသည်။ ထို့ပြင် ၎င်းသည် မြန်မာ နိုင်ငံခြားရေး ဝန်ကြီး နှင့် မဲခေါင်မြစ်ဝှမ်း ဒေသ ကော်မရှင် အစည်းအဝေးတွင်လည်း တွေ့ဆုံဦးမည် ဖြစ်သည်။

လာမည့် ရက်သတ္တပတ်တွင် ဟနွိုင်းမြို့၌ ကျင်းပမည့် အာဆီယံထိပ်သီး အစည်းအဝေးတွင် မြန်မာ ခေါင်းဆောင်များနှင့် တွေ့ဆုံရာ၌ ထိုင်းဝန်ကြီးချုပ် အဘီဇစ်က မြန်မာ့ နိုင်ငံရေး ကိစ္စရပ်များကို ဦးစားပေး ပြောဆိုသွားမည်ဟုလည်း သိရသည်။

AP သတင်းကို ဘာသာပြန်ဆိုသည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

0 comments:

Post a Comment