Transparency Myanmar

transparency.myanmar@gmail.com

Bernama News, 19th June 2010

မြန်မာနိုင်ငံတွင် အမျိုးသား ပြန်လည် ပေါင်းစည်းမှု ရရှိသည်ကို မလေးရှားက မြင်တွေ့လိုသည်ဟု ဒါတွတ် ဆရီ နာဂျစ် တွန် ရာဇတ်က ပြောကြားလိုက်ပြီး ဤကိစ္စ အောင်မြင်စေရန် မည်သည့်အရာများ လုပ်ဆောင်ရန် လိုအပ်သည်ကို ထိုနိုင်ငံမှ အစိုးရ (မြန်မာအစိုးရ) က သိရှိနားလည်ပြီး ဖြစ်သည်ဟု ၎င်းက ပြောဆိုခဲ့သည်။

"မြန်မာနိုင်ငံက အမျိုးသား ပြန်လည် ပေါင်းစည်းမှုကို ကျွန်တော် တွေ့မြင်ချင်တဲ့ ဆန္ဒရှိပါတယ်။ နိုင်ငံတကာရဲ့ ယုံကြည်မှုနဲ့ အားပေး ထောက်ခံမှု ရအောင် ဘာတွေ လုပ်ဖို့ လိုသလဲ ဆိုတာကို အဲဒီအစိုးရ နားလည် သိရှိလိမ့်မယ်လို့ ကျွန်တော်ထင်ပါတယ်" ဟု မလေးရှား ဝန်ကြီးချုပ်က ပြောဆိုလိုက်သည်။

စနေနေ့တွင် ကျရောက်သော မြန်မာ အတိုက်အခံ ခေါင်းဆောင် ဒေါ်အောင်ဆန်းစုကြည်၏ ၆၅ နှစ်မြောက် မွေးနေ့ အခါသမယနှင့် တိုက်ဆိုင်သော အချိန်တွင် မြန်မာနိုင်ငံအပေါ် မည်သို့ ဆန္ဒရှိပါသနည်းဟု ၎င်းအား မေးမြန်းရာတွင် ယင်းသို့ ပြောကြားခဲ့ခြင်း ဖြစ်သည်။

အာဆီယံ အနေဖြင့် မြန်မာနိုင်ငံ ကိစ္စကို ကိုင်တွယ်ရာတွင် မည်သည်ကို ပြုလုပ်သင့်ပါသနည်း ဟူသော နောက်ထပ် မေးခွန်းတစ်ခုကို ဖြေကြားရာတွင် "နာဂျစ်" က မြန်မာအစိုးရ၏ ဒီမိုကရေစီ လမ်းညွှန် မြေပုံတွင် အားလုံးနှင့် သက်ဆိုင်သည့် အဖြေတစ်ခု မလွဲမသွေ ပါဝင်လိမ့်မည်ဟု အာဆီယံ အဖွဲ့ဝင် ၁ဝ နိုင်ငံက မျှော်လင့်ထားကြသည်ဟု ပြောကြားခဲ့သည်။

"ဒါက အာဆီယံ နိုင်ငံတွေရဲ့ မျှော်လင့်ချက်ပါ" ဟု ၎င်းက ဆိုသည်။

Barisan Nasional ၏ ဥက္ကဋ္ဌ ဖြစ်သူ နာဂျစ်က ပူထရာ ကမ္ဘာ့ကုန်သွယ်ရေး စင်တာတွင် ကျင်းပသော People's Progressive Party (PPP) ၏ ၅၇ ကြိမ်မြောက် နှစ်လည် အထွေထွေ ညီလာခံကို စောစောပိုင်းက ဖွင့်လှစ်ပေးခဲ့သည်။

၁၉၆၂ ကစ၍ စစ်ဖက်မှ အုပ်ချုပ်ခဲ့သော မြန်မာနိုင်ငံတွင် ယခု နှစ်ကုန် ရွေးကောက်ပွဲများ ကျင်းပရန် "ဒီမိုကရေစီ လမ်းညွှန် မြေပုံ" က လမ်းခင်းပေးခဲ့ခြင်း ဖြစ်သည်။

လမ်းညွှန်မြေပုံ၏ အဆင့်နံပါတ် (၇) မှာ ငြိမ်းချမ်းသော၊ ခေတ်မီသော ဒီမိုကရေစီ နိုင်ငံတော်သစ်ကို တည်ဆောက်ရန် ရည်ရွယ်သည်ဟု ဆိုသည်။

ငြိမ်းချမ်းရေး နိုဘယ်ဆုရှင် ဒေါ်အောင်ဆန်းစုကြည်သည် ဒီမိုကရေစီအတွက် တိုက်ပွဲ ဝင်ခဲ့ခြင်းကြောင့် ၁၅ နှစ်ခန့် ထိန်းသိမ်းခြင်း ခံခဲ့ရပြီး လက်ရှိ အချိန်ထိ အကျယ်ချုပ် ကျခံနေရဆဲ ဖြစ်သည်။

သူမ၏ NLD ပါတီက ၁၉၉ဝ ရွေးကောက်ပွဲတွင် ပြည်လုံးကျွတ် အောင်ပွဲခံခဲ့သော်လည်း တပ်မတော်က အာဏာလွှဲပေးရန် ငြင်းဆန်ခဲ့သည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

0 comments:

Post a Comment