Transparency Myanmar

transparency.myanmar@gmail.com

White House, From VOA News, By Dan Robinson, 24th September 2010

သမ္မတ Barak Obama သည် အရှေ့တောင်အာရှ နိုင်ငံများ အသင်း ASEAN မှ ခေါင်းဆောင် များနှင့် ကုလသမဂ္ဂ အထွေထွေ ညီလာခံ၏ အရန် တွေ့ဆုံမှုအဖြစ် နယူးယောက်တွင် တွေ့ဆုံခဲ့သည်။ အမေရိကန်နှင့် အာဆီယံသည် ဆက်ဆံရေး ပိုမို အားကောင်းရေးအတွက် ကတိပြုခဲ့ကြပြီး ဆက်ဆံရေး၏ မဟာဗျူဟာအရ ပိုမို အရေးကြီးလာမှုအား အလေးအနက် ထားခဲ့ကြသည်။

အိမ်ဖြူတော်က အမေရိကန်-အာဆီယံ ဒုတိယအကြိမ် တွေ့ဆုံမှုတွင် အဓိက အာရုံပြုမည့် ကိစ္စ များမှာ စီးပွားရေး ကိစ္စအပြင် ကမ္ဘာလုံး ဆိုင်ရာနှင့် ဒေသတွင်း ကိစ္စရပ်များတွင် နျူကလီယာ မပြန့်ပွားရေး၊ အကြမ်းဖက်မှု တန်ပြန် တိုက်ဖျက်ရေးနှင့် ရာသီဥတု ပြောင်းလဲမှုများ ဖြစ်သည်ဟု ကြေငြာခဲ့သည်။

ကြေညာချက်တွင် ဖော်ပြထားရာ အမေရိကန်နှင့် အာဆီယံတို့၏ ချမ်းသာ ကြွယ်ဝမှုသည် ပိုမို ယှက်နွယ်လာနေကြောင်း အာဆီယံ စီးပွားရေး တစ်ခုလုံးသည် အမေရိကန်၏ စတုတ္ထ အကြီးဆုံး ပို့ကုန် ဈေးကွက်ကြီး ဖြစ်ပြီး ၂၀၀၉ ခုနှစ်က ပို့ကုန်သွင်းကုန် တန်ဖိုး စုစုပေါင်း ဒေါ်လာ (၁၄၆) ဘီလီယံ ရှိခဲ့သည်ဟု ဖော်ပြထားသည်။

အာဆီယံ ခေါင်းဆောင်များက Obama အား ၂၀၁၅ ခုနှစ်တွင် ထုတ်လုပ်မှု အခြေပြု၊ ဈေးကွက် တစ်ခုတည်း ထူထောင်ရေး၊ အာဆီယံ စီးပွားရေး အသိုင်းအ၀ိုင်း (ASEAN Economic Community) အစီအစဉ်များကို ပြောကြားခဲ့သည်။ သမ္မတ အိုဘားမားကလည်း ထိုရည်မှန်းချက်အတွက် ထပ်တိုး ကူညီမည့် အစီအစဉ်များကို ပြောကြားခဲ့သည်ဟု ကြေညာချက်တွင် ဖော်ပြထားသည်။

အမေရိကန်သည် ပစိဖိတ်နိုင်ငံ တစ်ခုအနေဖြင့် ASEAN ဒေသတွင်းတွင် ကြီးမားသော ပါဝင်မှု ရှိကြောင်း သမ္မတကြီးက ပြောကြားခဲ့သည်။ "ကျွန်တော်တို့ရဲ့ စီးပွားရေး တိုးတက်မှု၊ နျူကလီယာ ပြန့်ပွားမှု ကာကွယ်ရေးနဲ့ ရာသီဥတု ပြောင်းလဲရေး စိန်ခေါ်မှုတွေကို ဖြေရှင်းနိုင်ဖို့ အာဆီယံနိုင်ငံများနဲ့ ကျွန်တော်တို့ ပါတနာရှစ်တစ်ခု လိုအပ်ပါတယ်။ သမ္မတ တစ်ဦးအနေနဲ့ ကျွန်တော် ရှင်းရှင်းလင်းလင်း ပြောရမယ်ဆိုရင် အမေရိကန်အနေနဲ့ အာရှမှာ ခေါင်းဆောင်မှု ကဏ္ဍကနေ ပါဝင်လှုပ်ရှားဖို့ ရည်ရွယ်ပါတယ်။ ဒါကြောင့် ကျွန်တော်တို့ဟာ မဟာမိတ်ဟောင်းများနဲ့ ပိုမို အားကောင်းစွာ ဆက်ဆံဖို့ လုပ်နေပါတယ်။ လုပ်ဖော်ကိုင်ဖက် အသစ်တွေကိုလဲ ရှာနေပါတယ်။ တရုတ်နဲ့လည်း လုပ်နေပါပြီ။ အာဆီယံ အပါအ၀င် ဒေသတွင်း အဖွဲ့အစည်းတွေနဲ့လည်း ပြန်လည် ဆက်ဆံဖို့ လုပ်နေပါတယ်'' ဟု အိုဘားမားက ပြောသည်။

ဂျာကာတာတွင် လာမည့် နှစ်တွင် ကျင်းပမည့် အရှေ့အာရှ ထိပ်သီး အစည်းအဝေးသို့ တက်ရောက်ရန် အာဆီယံ၏ ဖိတ်ကြားချက်အား လက်ခံကြောင်း အိုဘားမားက ပြောသည်။ အိုဘားမားသည် နိုဝင်ဘာလ၌ တောင်ကိုးရီးယားတွင် ပြုလုပ်မည့် G-20 ထိပ်သီး အစည်းအဝေး နှင့် ဂျပန်တွင် ပြုလုပ်မည့် APEC ထိပ်သီး အစည်းအဝေးသို့ အသွား ခရီးစဉ်တွင် အင်ဒိုနီးရှားသို့ ၀င်ရောက်ရန် စီစဉ်ထားရာ၊ အဆိုပါ ဖိတ်ကြားချက်အရ သွားရောက်ခြင်းသည် သမ္မတ တစ်ဦးအနေဖြင့် အင်ဒိုနီးရှားသို့ ဒုတိယအကြိမ် သွားရောက်ခြင်း ဖြစ်မည် ဖြစ်သည်။

ဗီယက်နမ် သမ္မတ Nguyen Minh Triet က လက်ရှိ အာဆီယံ ဥက္ကဌအဖြစ် စကားပြန်မှတဆင့် စကား ပြောကြားခဲ့သည်။ "ဗီယက်နမ်နဲ့ အာဆီယံဟာ အာဆီယံနဲ့ အမေရိကန်ကြားမှာ နှစ်နိုင်ငံ သော်လည်းကောင်း၊ နိုင်ငံပေါင်းစုံနှင့် လည်းကောင်း ဆက်ဆံရေး ပိုမိုနက်ရှိုင်းဖို့ အမြဲထောက်ခံ အားပေးခဲ့ပါတယ်။ ကျွန်တော်တို့ဟာ ငြိမ်းချမ်းရေး၊ တည်ငြိမ်ရေးနဲ့ ဒေသတွင်း ဖွံ့ဖြိုး တိုးတက်ရေး အတွက် ပိုမိုစည်းလုံးစွာ၊ ပိုမို နားလည်မှု ရှိစွာနဲ့ ဆက်ဆံရေးကို နောက်တစ်ဆင့် တက်လှမ်းလိုပါတယ်" ဟု ယင်းက ပြောသည်။

သို့သော် အများပြည်သူသို့ သောကြာနေ့က ပြောကြားချက်များ ထုတ်ပြန်ရာတွင် မြန်မာနိုင်ငံ နှင့် မြောက်ကိုးရီးယားတို့အပေါ် ပေါ်ပေါ်ထင်ထင် ဖော်ပြခြင်း မရှိခဲ့ပေ။

အိမ်ဖြူတော်က ပြောကြားရာတွင် အိုဘားမားသည် မြန်မာအစိုးရအား ဒေါ်အောင်ဆန်းစုကြည် အပါအ၀င် နိုင်ငံရေး အကျဉ်းသားများအား လွှတ်ပေးပြီး အမျိုးသား ပြန်လည် ပေါင်းစည်းရေး လုပ်ငန်းစဉ်ကို စတင် လုပ်ဆောင်ရန်နှင့် နိုဝင်ဘာလတွင် လွတ်လပ်တရားမျှတသော ရွေးကောက်ပွဲ ကျင်းပပေးရန် ထပ်မံတောင်းဆိုခဲ့သည်ဟု ဆိုသည်။

သီးခြား ပူးတွဲ ကြေညာချက်တွင် အာဆီယံ ခေါင်းဆောင်များသည် နိုင်ငံတကာ အသိုင်းအ၀ိုင်းက အသိအမှတ် ပြုရေးအတွက် မြန်မာနိုင်ငံ ရွေးကောက်ပွဲများသည် လွတ်လပ်တရားမျှတရန်နှင့် အားလုံးပါဝင်ရန်၊ ပွင့်လင်းမြင်သာအောင် ဆောင်ရွက်ရန် တောင်းဆိုခဲ့သည်။

ထို့အပြင် ယင်းတို့သည် အမေရိကန်၏ မြန်မာ စစ်အစိုးရနှင့် ဆက်ဆံရေးကို ကြိုဆိုခဲ့သည်။

မြောက်ကိုးရီးယားနှင့် ပတ်သက်အမေရိကန်နှင့် အာဆီယံသည် ကုလသမဂ္ဂ လုံခြုံရေး ကောင်စီ၏ ဆုံးဖြတ်ချက်များ အကောင်အထည် ဖော်ရေး အရေးကြီးပုံကို ပြန်လည် အသိအမှတ် ပြုခဲ့ကြသည်။ ပြုံးယမ်းအား IAEA ၏ သဘော တူညီချက်များ လိုက်နာရေး၊ နျူကလီယာ မပြန့်ပွားရေး စာချုပ်သို့ စောနိုင်သမျှ စောပြန်လာရေး၊ လက်ရှိ နျူကလီယာ အစီအစဉ်များနှင့် နျူကလီယာ လက်နက် အားလုံး ဖျက်သိမ်းရေးအတွက် ခြောက်နိုင်ငံ ဆွေးနွေးပွဲ ကတိက၀တ်များ အကောင်အထည် ဖော်ရေး ကို ယင်းတို့က တောင်းဆိုခဲ့သည်။

ပူးတွဲ ကြေညာချက်တွင် အိုဘားမားနှင့် အာဆီယံ ခေါင်းဆောင်များသည် ကုလသမဂ္ဂ ပင်လယ်ပြင်ဆိုင်ရာ ဥပဒေ ကွန်ဗင်းရှင်း (UNCLOS) နှင့် နိုင်ငံတကာ ရေကြောင်း ဥပဒေများ အပါအ၀င် နိုင်ငံတကာ ဥပဒေများအား လိုက်နာရေး၊ တည်ငြိမ်ရေး၊ ရေကြောင်း သွားလာရေး လွတ်လပ်ခွင့်၊ ဒေသတွင်း အငြင်းပွားမှုများအတွက် ငြိမ်းချမ်းသော ဆုံးဖြတ်ချက်များ၏ အရေးကြီးပုံတို့ကို သဘောတူကြောင်း ဖော်ပြထားသည်။ အိမ်ဖြူတော်မှ ထုတ်ပြန်သော အတိုချုပ်တွင် တောင်တရုတ် ပင်လယ်လည်း ပါဝင်သည်။

အောက်တိုဘာ လကုန်တွင် ဟနွိုင်းကျင်းပမည့် အရှေ့အာရှ ထိပ်သီးအစည်းအဝေး အစပြု အစည်းအဝေးတွင် နိုင်ငံရေးဝန်ကြီး ဟီလာရီကလင်တန် တက်ရောက်မည် ဖြစ်ကြောင်း အိမ်ဖြူတော်က ဆိုသည်။ လာမည့်လ ဟနွိုင်းတွင် ကျင်းပမည့် အာရှ-ပစိဖိတ် ကာကွယ်ရေး ၀န်ကြီးများ အစည်းအဝေးတွင် ကာကွယ်ရေး ၀န်ကြီး Robert Gates လည်း တက်ရောက်မည်ဟု သိရသည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

0 comments:

Post a Comment