Transparency Myanmar

transparency.myanmar@gmail.com

Monsters and Critics, 21st October 2010

မြန်မာ အစိုးရ အနေဖြင့် နိုဝင်ဘာ ၇ ရက် အထွေထွေ ရွေးကောက်ပွဲတွင် အတိုက်အခံ ခေါင်းဆောင် ဒေါ်အောင်ဆန်းစုကြည် ပါဝင်နိုင်အောင် လွှတ်ပေးခြင်းဖြင့် ဒီမိုကရေစီကို အားပေး ထောက်ခံ ပံ့ပိုးသင့်ကြောင်း ကုလသမဂ္ဂ အထွေထွေ အတွင်းရေးမှူးချုပ် ဘန်ကီမွန်းက ဗုဒ္ဓဟူးနေ့တွင် ပြောကြားလိုက်သည်။

ဘန်ကီမွန်းသည် ရွေးကောက်ပွဲတွင် ဒေါ်အောင်ဆန်းစုကြည် ပါဝင်နိုင်ရေးကို ထပ်မံ တောင်းဆိုခဲ့ခြင်းမှာ မြန်မာနိုင်ငံမှ စစ်ဖက် အစိုးရက လွတ်လပ်၍ မျှတသော ရွေးကောက်ပွဲများ ကျင်းပပေးမည်ဟု တာဝန် ခံထားသောကြောင့် ဖြစ်သည်။ အနှစ် ၂၀ အတွင်း ပထမဆုံး ရွေးကောက်ပွဲများသည် ဒီမိုကရေစီ လုပ်ငန်းစဉ် အတွင်းမှ အုပ်စု အချို့ အတွက် နိုင်ငံရေး နယ်ပယ်ကို ဖြည့်ဆည်းပေးထားသည်။

အားလုံးနှင့် သက်ဆိုင်ခြင်း၊ လက်ခံ ယုံကြည်ထိုက်ခြင်း၊ ပါဝင် ယှဉ်ပြိုင်သင့်ခြင်း၊ ပွင့်လင်း မြင်သာခြင်း စသော အတိုင်းအတာများဖြင့် ရွေးကောက်ပွဲများကို ကျင်းပခြင်း ဖြစ်ကြောင်း သေချာအောင် ပြုလုပ်ရေးမှာ လက်ရှိ အာဏာပိုင်များ အတွက် အလိုအပ်ဆုံး ဖြစ်သည်ဟု မြန်မာနိုင်ငံမှ လူ့အခွင့်အရေး အနေအထား အစီရင်ခံစာကို ကုလသမဂ္ဂ အထွေထွေ ညီလာခံသို့ တင်ပြရာတွင် ဘန်ကီမွန်းက ပြောကြားခဲ့သည်။

"ဒီကိစ္စနဲ့ ပတ်သက်လို့ ဒေါ်အောင်ဆန်းစုကြည် အပါအဝင် နိုင်ငံရေး အကျဉ်းသား အားလုံးကို လွှတ်ပေးဖို့ ကျွန်တော့်ရဲ့ တောင်းဆိုချက်ကို ထပ်မံ ပြောကြားလိုပါတယ်၊ သူတို့ ပြောထားတဲ့ တာဝန်မှုတွေကို ထင်ထင်ရှားရှား သက်သေပြတဲ့ အနေနဲ့ပေါ့" ဟု ဘန်ကီမွန်းက ပြောကြားသည်။

အမျိုးသား ဒီမိုကရေစီ အဖွဲ့ချုပ် ခေါင်းဆောင် ဒေါ်အောင်ဆန်းစုကြည်က လာမည့် ရွေးကောက်ပွဲမျးကို သပိတ်မှောက်ရန် ဆုံးဖြတ်ထားသည်။ ၁၉၉၀ ရွေးကောက်ပွဲတွင် သူမ၏ ပါတီ အနိုင် ရရှိခဲ့ပြီးနောက် စစ်ဖက် အုပ်ချုပ်သူများက သူမအား အနှစ် ၂၀ နီးပါး အကျယ်ချုပ် ထိန်းသိမ်းထားခဲ့သည်။ ငြိမ်းချမ်းရေး နိုဘယ်ဆုကို ၁၉၉၁ တွင် သူမ ရရှိခဲ့ခြင်း ဖြစ်သည်။

မြန်မာ အစိုးရ အနေဖြင့် နိုဝင်ဘာလတွင် လက်ခံ ယုံကြည် ထိုက်သော ရွေးကောက်ပွဲများကို ဖော်ဆောင်ရန် ပျက်ကွက်ခဲ့ပါက အမျိုးသား ပြန်လည် ပေါင်းစည်းမှု ဖြစ်ပေါ်ရေးနှင့် နိုင်ငံရေး လူမှုရေး၊ စီးပွားရေး ပြုပြင် ပြောင်းလဲရေး အတွက် လက်ခံ ယုံကြည်နိုင်မှုကို ထိခိုက်စေလိမ့်မည်ဟု ဘန်ကီမွန်းက ပြောကြားလိုက်သည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

The Straits Times, 21st  October 2010

ကုလသမဂ္ဂ အထူး ကိုယ်စားလှယ် တစ်ဦးသည် မြန်မာနိုင်ငံတွင် မကြာမီ ကျင်းပတော့မည့် ရွေးကောက်ပွဲများအတွက် ပြည်သူများအပေါ် မသေချာ မရေရာမှု အချက်အလက် သစ်များ အကြောင်း ဗုဒ္ဓဟူးနေ့က ပြောကြားခဲ့သည်။ စစ်တပ် အုပ်ချုပ်သော တိုင်းပြည်တွင် ထောင်ထဲ၌ နှိပ်စက် ညှင်းပမ်းမှုများ၊ သတ်ဖြတ်မှုများနှင့် အဓမ္မ လုပ်အားပေး စေခိုင်းမှုများနှင့် ပတ်သက်သော အမှုသစ်များကို ပြောကြားခဲ့သည်။

သို့သော် မြန်မာ အစိုးရသည် ကုလသမဂ္ဂ အစီရင်ခံစာ အပေါ် ပြင်းထန်စွာ ငြင်းဆိုခဲ့ပြီး၊ အပြစ်ရှိမရှိ မသေချာဘဲ ဖမ်းထားသော အကျဉ်းသားများ မရှိကြောင်း ငြင်းဆိုခဲ့သည်။ နိုဝင်ဘာ (၇) ရက် မတိုင်မီ အတိုက်အခံ ခေါင်းဆောင် ဒေါ်အောင်ဆန်စုကြည်အား နေအိမ် အကျယ်ချုပ် ဖမ်းဆီးထားခြင်းနှင့် အတူ မြန်မာနိုင်ငံ၏ လူ့အခွင့်အရေး ကိစ္စများအတွက် အထူး ကိုယ်စားလှယ် Tomas Ojea Quintana က ပြောကြားရာတွင် ယခုကဲ့သို့သော အခြေအနေများ အောက်တွင် စစ်မှန်သော ရွေးကောက်ပွဲအတွက် အခြေအနေများသည် အကန့်အသတ်များ ရှိနေကြောင်း ဆိုခဲ့သည်။

၎င်းက ဖြည့်စွက် ပြောကြားရာတွင် နိုင်ငံရေး ပါတီ အများအပြားသည် ၎င်းတို့အပေါ် ထိပါးမှုများ၊ ခြိမ်းခြောက်မှုများ ရှိကြောင်း ကန့်ကွက်မှုများ ရှိခဲ့သည်ဟု ဆိုသည်။ ကုလသမဂ္ဂ ကိုယ်စားလှယ်က မြန်မာနိုင်ငံ အနှံ့အပြားရှိ ထောင်များတွင် အပြစ် မရှိဘဲ ဖမ်းဆီးထားသူ အကျဉ်းသား (၂၁၀၀) ခန့် ရှိမည်ဟု ခန့်မှန်းထားသည်။ ထိုအထဲတွင် ၁၉၈၈ ခုနှစ်မှ စ၍ထောင်ထဲတွင် သေဆုံးသူ အနည်းဆုံး (၁၄၄) ဦးခန့်ရှိပြီး (၁၃၈) ဦးမှာ ကျန်းမာရေး အတွက် ဆေးကုသရန် လိုအပ်လျက် ရှိသည်ဟု Quintana က ပြောသည်။

မြန်မာ အာဏာပိုင်များသည် ဖမ်းဆီးခံရသူများကို စနစ်တကျ နှိပ်စက်မှု ပုံစံများ ဖြစ်သော၊ ခန္ဓာကိုယ်အား နှိပ်စက်ခြင်း၊ စိတ်ပိုင်းဆိုင်ရာ နှိပ်စက်ခြင်းနှင့် လိင်ပိုင်းဆိုင်ရာ နှိပ်စက်ခြင်း များဖြင့် ကျူးလွန်ခဲ့ကြောင်း အစီရင်ခံစာများအရ လည်းကောင်း၊ တိုက်ရိုက် တွေ့ရှိချက် များအရ လည်းကောင်း သိရှိရသည်။ ၎င်းက အစိုးရ မဟုတ်သော Human Rights Defenders and Promoters Network မှ အဖွဲ့ဝင် တစ်ဦး ဖြစ်သော အသက် (၃၉) နှစ်ရှိ ကိုကျော်စိုးသည် ယခုနှစ် မေလ (၁၉) ရက်နေ့က မြင်းခြံထောင်တွင် သေဆုံးခဲ့ခြင်းအား မီးမောင်းထိုး ဖော်ပြခဲ့သည်။

ကိုကျော်စိုးကို နိုဝင်ဘာ ၂၀၀၈ ခုနှစ်က တရားမဝင် အဖွဲ့အစည်း ဥပဒေ ချိုးဖောက်မှု၊ လူဝင်မှု ကြီးကြပ်ရေး ဥပဒေတို့အရ ထောင်ဒဏ် (၁၀) နှစ် ချမှတ်ခဲ့ခြင်း ဖြစ်သည်။

၎င်းမှာ စစ်ဆေး မေးမြန်းစဉ် အတွင်း နှိပ်စက် ညှဉ်းပမ်း ခံရရာ အရိုက်ခံရခြင်း၊ စီးကရက်မီးနှင့် တို့ခြင်းနှင့် လျှပ်စစ်ဓါတ်ဖြင့် တို့ခြင်းများ ခံခဲ့ရကြောင်း အစီရင်ခံစာတွင် ဖော်ပြထားသည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

Bangkok Post, 21st October 2010

မြန်မာ နိုင်ငံ၏ လာမည့် ရွေးကောက်ပွဲများ အပေါ် တစ်ကမ္ဘာလုံးက အကြီးအကျယ် ပြစ်တင်နေမှုကို နိုဘယ်ဆုရ စီးပွားရေး ပညာရှင် Amardxa Sen က ဗုဒ္ဓဟူးနေ့တွင် ကာကွယ် ထုချေ ပြောကြားခဲ့ပြီး အဆိုပါ ရွေးကောက်ပွဲသည် ဒီမိုကရေစီရေး ကြိုးပမ်း အားထုတ်မှုများကို အကြီးအကျယ် နှောင့်နှေး စေလိမ့်မည်ဟု သတိပေး ပြောကြားလိုက်သည်။

မြန်မာ နိုင်ငံတွင် ကလေးဘ၀ကို ဖြတ်သန်းခဲ့ဖူးသော နာမည်ကျော် စီးပွားရေး ပညာရှင်က ရွေးကောက်ပွဲ အပေါ် တစ်ကမ္ဘာလုံးက ဂရုတစိုက် မရှိခြင်းကို ယင်းတွေ့မြင် ရသည့်အတိုင်း ပြစ်တင် ဝေဖန်လိုက်ပြီး သူ၏ စူးရှသော စကားလုံးများကိုမူ သူ၏ ဇာတိ အိန္ဒိယနိုင်ငံ၏ သဘောထား အတွက် "ချန်"ထားလိုက်ပုံ ရသည်။

ယခင်က BURMA ဟုသာ သိရှိထားကြသော မြန်မာနိုင်ငံမှ စစ်ဖက် အစိုးရက နှစ်ပေါင်း ၂၀ အတွင်း ပထမဆုံး ရွေးကောက်ပွဲများကို နိုဝင်ဘာ ၇ ရက်တွင် ပြုလုပ်ရန် စီစဉ်နေသည်။ ယင်းတို့က နိုင်ငံခြားမှ စောင့်ကြည့် လေ့လာသူများနှင့် ပြည်ပ မီဒီယာများကို ပိတ်ပင် ထားသည့်အပြင် အတိုက်အခံ  ခေါင်းဆောင် ဒေါ်အောင်ဆန်းစုကြည်ကိုလည်း အကျယ်ချုပ် ဆက်လက် ထိန်းသိမ်းထားသည်။

လာမည့် ရွေးကောက်ပွဲတွင် မဲလိမ်မှုများ ရှိလာမည့် အတွင်း သရုပ် သဏ္ဍာန်ကို တစ်ကမ္ဘာလုံးက လူသိရှင်ကြား ဆွေးနွေး ကြခြင်းထက် ရွေးကောက်ပွဲ အတု ကျင်းပမည့် နေ့ရက် နီးကပ်လာခြင်းကြောင့် ယခုအချိန်တွင် ပို အရေးကြီးသည့် အရာ မရှိနိုင်တော့ဟု Harvard University ပါမောက္ခက ဆိုသည်။

ရွေးကောက်ပွဲ အပြီး အရာရာ ပြောင်းလဲသွားနိုင်သည်ဟု ကံကြမ္မာ မျှော်လင့်မှုကို ထုတ်ဖော် ပြောဆိုမှုများသည် မြန်မာနိုင်ငံတွင် ဖြစ်ပျက်နေသည့် အပေါ် အကြောင်းရင်း ခွဲခြမ်း စိတ်ဖြာ လေ့လာမှုနှင့် လုံးဝ ဆန့်ကျင်နေသည်ဟု Amartya Sen က Johns Hopkins University တွင် ဟောပြော ပို့ချစဉ် ပြောကြားခဲ့သည်။

"အခု အချိန်မှာ မြန်မာနိုင်ငံမှာ ဒီမိုကရေစီ ရေပြင်ကို ရေနောက် ဖြစ်အောင် လုပ်နေတဲ့ စစ်အစိုးရရဲ့ ၀ါဒဖြန့် အောင်ပွဲကြောင့် အရာရာဟာ အကြီးအကျယ် နောက်ဆုတ်သွားနိုင်ပါတယ်" ဟု Sen က ဆိုသည်။

တိုင်းရင်းသား ကျေးရွာပေါင်း ထောင်နှင့် ချီ ဖျက်ဆီးကာ တိုင်းရင်းသား မျိုးနွယ် မိန်းကလေး များကို မတရား ကျင့် စစ်လက်နက် တစ်ခုသဖွယ် အသုံးပြုခဲ့ခြင်းကြောင့် စွပ်စွဲခံနေရသည့် စစ်အစိုးရ၏ လူသား မျိုးနွယ်အပေါ် ကျူးလွန်သော ရာဇ၀တ်မှုများအပေါ် ကုလသမဂ္ဂ စုံစမ်း စစ်ဆေးမှု အမြန်ဆုံး စတင်ရန် Sen က တောင်းဆိုလိုက်သည်။

အမေရိကန် ပြည်ထောင်စု သမ္မတ ဘားရက် အိုဘားမား အစိုးရက ကုလသမဂ္ဂ စုံစမ်း စစ်ဆေးမှုကို ယေဘုယျအားဖြင့် ထောက်ခံကြောင်း ပြောကြားခဲ့သော်လည်း စစ်အစိုးရအပေါ် နှစ်ပေါင်းများစွာ ပစ်ပယ်ထားခဲ့ခြင်းသည် ရလဒ်ကောင်း မထွက်ပေါ်ခဲ့ဟု ဆိုကာ စစ်အစိုးရနှင့် ဆွေးနွေး ညှိနှိုင်းရန် ယခင် နှစ်က ချမှတ်ခဲ့သော မူဝါဒ ဖက်မှ ရပ်တည်လျက် ရှိသည်။

အိန္ဒိယ ၀န်ကြီးချုပ် မန်မိုဟန်ဆင်းက မြန်မာ စစ်ဖက် ခေါင်းဆောင် ဗိုလ်ချုပ်မှူးကြီး သန်းရွှေအား ဇူလိုင်လက လက်ခံ ကြိုဆိုခဲ့ခြင်းကိုလည်း Amartya Sen က ပြစ်တင် ဝေဖန်လိုက်သည်။ မဟတ္တမ ဂန္ဓီ၏ နိုင်ငံသည် တရုတ်သြဇာ ကြီးလာခြင်းကို စိုးရိမ် ပူပန်ခြင်းကြောင့် ကွန်မြူနစ် တိုင်းပြည်ကို အားကျမခံ အတုယူခဲ့ပြီး အိန္ဒိယ နိုင်ငံ၏ ၀ါဒရေးရာ ဆုံးရှုံးခဲ့ရသည်ဟု Sen က ပြောကြားသည်။

ကမ္ဘာပေါ်ရှိ လူသားဆန် ကရုဏာ အကြီးဆုံး နိုင်ငံရေး ခေါင်းဆောင်များထဲမှ တစ်ဦး ဖြစ်သော၊ မိမိ၏ ဇာတိ ဒီမိုကရေစီ နိုင်ငံမှ ၀န်ကြီးချုပ်က မြန်မာနိုင်ငံမှ ရက်စက် ကြမ်းကြုတ်သော သားသတ်သမား များကို ကြိုဆိုကာ ရင်းနှီးဖော်ရွေ နီးစပ်သော ပုံစံကို မြင်တွေ့ရသည်မှာ မိမိ၏ နှလုံးသားကို နာကျင်စေသည်ဟု Sen က ပြောကြားသည်။

"ကမ္ဘာကို ကျွန်တော်တို့ (အိန္ဒိယ) လွှမ်းမိုးနိုင်မှု ပါဝါ သုညအဆင့်ကို ရောက်နေချိန်မှာ ကျွန်တော်တို့က ဂုဏ်သိက္ခာ တရားနဲ့ ပတ်သက်ပြီး ကမ္ဘာကို ဟောပြောရင်း အချိန်ကုန်ခဲ့ပါတယ်။ တရုတ်နိုင်ငံလောက် မများပေမယ့် လွှမ်းမိုးနိုင်တဲ့ ပါဝါ အနည်းငယ် ရလာချိန်မှာတော့ တာဝန်ရှိမှုကို လုံးဝ လစ်လျူရှုလိုက်ရတော့မှာ ဖြစ်ပါတယ်" ဟု ယင်းက ဆက်လက် မှတ်ချက် ပေးခဲ့သည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

VOA News, 20th October 2010

ရဝမ်ဒါ၊ ယီမင်နှင့် ဆီးရီးယား တို့သည်လည်း မြန်မာ၊ မြောက်ကိုးရီးယားနှင့် Eritrea တို့နှင့် အတူ ကမ္ဘာပေါ်တွင် မီဒီယာများအပေါ် အရက်စက် အကြမ်းကြုတ်ဆုံး အုပ်စုသို့ ဝင်ရောက်လာပြီ ဖြစ်ကြောင်း Reporter's Without Borders 2010 Press Freedom Index အရ သိရှိရသည်။

Reporter's Without Borders က ပြောကြားရာတွင် ၎င်း၏ စာရင်းရှိ အောက်ဆုံး ဆယ်နိုင်ငံတွင် စာနယ်ဇင်း လွတ်လပ်ခွင့်မှာ ပိုမို ဆိုးရွားလျက် ရှိကြောင်း ဆိုသည်။ အဆိုပါ နိုင်ငံများအနက် မည်သည့် နိုင်ငံက ပိုမို၍ ပြဿနာများကြောင့် ပြောရန် ခက်ခဲကြောင်း၊ အဘယ်ကြောင့် ဆိုသော် ထိုနိုင်ငံ အားလုံးသည် မီဒီယာအား နှိပ်ကွပ်လျက် ရှိပြီး သတင်းများနှင့် သတင်း အချက်အလက်များကို ၎င်းတို့ ပြည်သူများထံ မရောက်ရှိအောင် ပိတ်ဆို့လျက် ရှိသည်ဟု ၎င်းက ဆိုသည်။

ရဝမ်ဒါသည် ရာဇဝတ်မှု ကျူးလွန်သော အဆိုးဆုံး ဆယ်နိုင်ငံတွင် အပါအဝင် ဖြစ်သည်ဟု အစီရင်ခံစာ အရ သိရှိရသည်။ မီဒီယာ စောင့်ကြည့်ရေး အဖွဲ့မှ သုတေသန ဒါရိုက်တာ Gilles Lordet က ပြောကြားရာတွင် ရဝမ်ဒါ အစိုးရသည် ယခုနှစ် အစောပိုင်း ရွေးကောက်ပွဲတွင် မီဒီယာများကို နှိပ်ကွပ်ခဲ့သည်ဟု ဆိုသည်။

"ဒီနှစ် ဂျာနယ်လစ် တစ်ယောက် အသတ်ခံရပြီး၊ ဂျာနယ်လစ် အတော်များများ ထောင်ထဲ ရောက်နေပါတယ်" ဟု Lordet က ပြောသည်။ "သတင်းနဲ့ အင်တာနက်ဆိုဒ် တော်တော်များများကို ပိတ်ထားပြီး၊ ဂျာနယ်လစ်တွေဟာ အိမ်နီးချင်း နိုင်ငံတွေကို ထွက်ပြေး ခိုလှုံကြရပါတယ်။ ဒါတွေကို သမ္မတ Paul Kagame ကိုယ်တိုင် တိုက်ရိုက် စီမံနေတာကို ကျွန်တော်တို့ တွေ့ရပါတယ်" ဟု ၎င်းက ပြောသည်။

ရဝမ်ဒါ အစိုးရကမူ ၎င်းတို့သည် စာနယ်ဇင်း လွတ်လပ်ခွင့်များကို ချိုးဖောက်နေသည် ဆိုသည့် စွပ်စွဲချက်များကို အကြိမ်ကြိမ် ငြင်းဆိုခဲ့သည်။ အစိုးရက ပြောကြားရာတွင် တိုင်းပြည်တွင် လုံခြုံရေးက အရေးကြီးသဖြင့် မီဒီယာများ အနေဖြင့် သွေးထွက်သံယို ရက်စက်မှုများကို မြှောက်ပင့် မပေးနိုင်ရန် လွတ်လပ်ခွင့် ပေးမထားခြင်း ဖြစ်ကြောင်း ဆိုသည်။

တရုတ်ပြည် သည်လည်း အဆိုးဆုံး စာရင်းတွင် ပါဝင်နိုင်သော နိုင်ငံ ဖြစ်သည်။ အစီရင်ခံစာတွင် တရုတ်နိုင်ငံ ထောင်ထဲတွင် ရှိနေသော ပူပူနွေးနွေး ငြိမ်းချမ်းရေး နိုဘယ်ဆုရှင် လူ့အခွင့်အရေး လှုပ်ရှားသူ Lu Xiaobo ကို လွှတ်ပေးရန် တောင်းဆိုထားသည်။

သို့သော် တရုတ်နိုင်ငံ၏ အခြေအနေမှာ စာရင်း အောက်ခြေရှိ အခြား နိုင်ငံများလောက် မဆိုးရွားသေးကြောင်း Lordet က ပြောသည်။

"ဘလော့ဂါတွေရဲ့ အရွေ့ကို ကျွန်တော်တို့ ပိုပိုပြီး တွေ့လာရပါတယ်။ လူတွေလည်း  အင်တာနက်မှာ တက်ကြွနေပါတယ်။ အင်တာနက်မှာ သတင်းအတွက် လုပ်နေတဲ့ ဂျာနယ်လစ်တွေ ပြည်သူတွေဟာ အလွန်တရာ စတင် တက်တက်ကြွကြွ ရှိလာတာကို တွေ့ရပါတယ်" ဟု Lordet က ဖြည့်စွက် ပြောသည်။

အာရှ၏ ကွန်မြူနစ် နိုင်ငံ လေးနိုင်ငံသည် အစီရင်ခံစာ အောက်ဆုံး စာရင်း (၁၅) နိုင်ငံတွင် ပါဝင်လျက် ရှိပြီး၊ မြောက်ကိုးရီးယားသည် အောက်ဆုံးရှိ Eritrea နိုင်ငံ ပြီးလျှင် ဒုတိယ အဆိုးရွားဆုံး နိုင်ငံ ဖြစ်သည်။

အာဖရိက၏ ဆိုမာလီယာ နိုင်ငံသည်လည်း ရာဇဝတ်မှု ကျူးလွန်သော အဆိုးဆုံး နိုင်ငံ (၂၀) တွင် ပါဝင်သည်ဟု Lordet က ပြောသည်။

"ဆိုမာလီယာမှာ ရှိတဲ့ စာနယ်ဇင်းနဲ့ သတင်းစာ ဆရာတွေ အကြောင်း စဉ်းစားလိုက်ရင်၊ စိတ်ကုန်ဖို့ ကောင်းပါတယ်။ ဘာလို့လဲဆို စစ်ဖြစ်နေသလိုပဲ။ ဖရိုဖရဲနဲ့။ သတင်းစာ ဆရာတွေကို အကာအကွယ် ပေးဖို့ ကြီးမားတဲ့ ပြဿနာပဲ။ အခု လောလောဆယ်တော့ ဖြေရှင်းဖို့ မလွယ်သေးပါဘူး" ဟု Lordet က ပြောသည်။

Reporter's Without Borders 2010 Press Freedom Index ကို ၂၀၀၂ ခုနှစ်က စတင် ထုတ်ဝေပြီး ၎င်းသည် ၁၇၈ နိုင်ငံကို အဆင့် သတ်မှတ်ထားသည်။ ဥရောပ မြောက်ပိုင်း ခြောက်နိုင်ငံ ဖြစ်သော ဖင်လန်၊ အိုက်စလန်၊ နယ်သာလန်၊ နော်ဝေ၊ ဆွီဒင်နှင့် ဆွစ်ဇာလန်တို့သည် စတင် ထုတ်ဝေသော ၂၀၀၂ ကတည်းက စာရင်းတွင် အဆင့် သတ်မှတ်ချက် ထိပ်ပိုင်းတွင် ရှိနေခဲ့သည်။ ယခုနှစ်တွင် ပထမဦးဆုံး အကြိမ်အဖြစ် ကျူးဘားသည် အောက်ဆုံး ဆယ်နိုင်ငံ စာရင်းမှ လွတ်မြောက်ခဲ့သည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

AFP, 20th October 2010

မြောက်ကိုးရီးယားသည် နျူကလီယာ ဆွေးနွေးပွဲများသို့ ပြန်လာရန် အသင့် ရှိသည်ဟု ကြေညာပြီး ရက်မကြာမီတွင်ပင် တတိယအကြိမ် နျူကလီယာ စမ်းသပ်မှုများ ပြုလုပ်ရန် ပြင်ဆင်နေပုံ ရသည်ဟု တောင်ကိုးရီးယား သတင်းစာက သတင်း ဖော်ပြခဲ့သည်။

သို့သော် တောင်ကိုးရီးယား အစိုးရ တာဝန်ရှိသူများက ပြောကြားရာတွင် ပြုံးယမ်း အနေဖြင့် စမ်းသပ်ရန် အဆင်သင့် ဖြစ်ကြောင်း ခိုင်မာသည့် သက်သေ မရှိသေးကြောင်း ဆိုသည်။ ဆိုးလ်နှင့် ယင်း၏ မဟာမိတ်များသည် မြောက်ကိုးရီးယား၏ နျူကလီယာ ဆိုင်ရာများ၏ တိုးတက် ဖြစ်ပေါ်မှုများကို အနီးကပ် စောင့်ကြည့်နေကြောင်း ပြောသည်။

အမေရိကန် ဂြိုဟ်တုသည် မြောက်ကိုးရီးယားတွင် 2006 ခုနှစ်နှင့် 2009 ခုနှစ်များက နျူကလီယာ စမ်းသပ်မှုများ ပြုလုပ်ခဲ့သည့် နေရာတွင် လူများနှင့် ယာဉ်များ ရွေ့လျားနေသည်ကို ထောက်လှမ်း တွေ့ရှိရသည်ဟု တောင်ကိုးရီးယား အကြီးဆုံးနှင့် အရောင်းရဆုံး သတင်းစာ Chosun Ilbo ၏ အဆိုအရ သိရှိရသည်။

"မကြာသေးမီက ထောက်လှမ်း တွေ့ရှိချက်များအရ Punggye-ri မှာ လူတွေ ယဉ်တွေ ပျားပန်းခတ်မျှ အလုပ်ရှုပ်နေတာ တွေ့ရပါတယ်" ဟု အတည် မပြုနိုင်သော အစိုးရ သတင်း တစ်ခု၏ ပြောဆိုမှုကို Chosum က ကိုးကား ဖော်ပြခဲ့သည်။

မြောက်ကိုးရီးယားသည် ပထမ စမ်းသပ်မှု နှစ်ခု ပြုလုပ်စဉ်က ဖျက်သိမ်းခဲ့သော ဥမင်လိုဏ်များအား ပြန်လည် ဖော်ထုတ်နေပုံ ရသည်ဟု အဆိုပါ သတင်း ရင်းမြစ်၏ အဆိုအရ သိရှိရသည်။

"ဒါပေမယ့် သူတို့ ချက်ခြင်းတော့ ဘာမှ လုပ်မယ့်ပုံ မပေါ်သေးပါဘူး။ တတိယအကြိမ် စမ်းသပ်မှု အတွက် ပြင်ဆင်မှု အသင့်ဖြစ်ဖို့ နောက်ထပ် သုံးလလောက် အချိန် ယူရမယ်လို့ မျှော်လင့်ရပါတယ်"ဟု အဆိုပါ သတင်းက ဆိုသည်။

သို့သော် တောင်ကိုးရီးယား၏ ပူးတွဲ စစ်ဦးစီး အရာရှိချုပ်များ ပြောခွင့်ရ ပုဂ္ဂိုလ်က ပြောကြားရာတွင် ထိုသို့ ပြင်ဆင်နေကြောင်း အထောက်အထားများ မတွေ့ရဟု ပြောဆိုခဲ့သည်။

"အဲဒီသတင်းမှန်တယ်လို့ ပြောဖို့ ခိုင်မာတဲ့ အထောက်အထား မရှိသေးပါဘူး"ဟု ယင်းက သတင်းထောက်များသို့ ပြောသည်။ "ကျွန်တော်တို့ဟာ မြောက်ကိုးရီးယားရဲ့ နျူကလီယာ အဆောက်အဦတွေရဲ့ တိုးတက်မှုတွေကို အနီးကပ် စောင့်ကြည့်နေပါတယ်။ ဒီကိစ္စကို စိုးရိမ်တဲ့ အခြား နိုင်ငံတွေနဲ့လည်း သတင်း ဖလှယ်ပါတယ်"ဟု ယင်းက ပြောသည်။

အမည် မဖော်လိုသူ တောင်ကိုးရီးယား ကာကွယ်ရေး ၀န်ကြီးဌာန တာဝန်ရှိ ပုဂ္ဂိုလ်တစ်ဦးက AFP သို့ ပြောကြားရာတွင် ထိုသို့သော လှုပ်ရှားမှုများမှာ အမြဲတစေ တွေ့ရလေ့ ရှိကြောင်း၊ မဟာဗျူဟာ ကျသော စက်အစိတ် အပိုင်းများကို နေ့စဉ် ပြုပြင် ထိန်းသိမ်းခြင်းပင် ဖြစ်မည် ထင်ကြောင်း ပြောခဲ့သည်။

မြောက်ကိုးရီးယားသည် ပထမအကြိမ် နျူကလီယာ စမ်းသပ်မှုကို ၂၀၀၆ ခုနှစ်၊ အောက်တိုဘာတွင် လည်းကောင်း၊ ဒုတိယအကြိမ် စမ်းသပ်မှုကို ၂၀၀၉ ခုနှစ် မေလတွင် လည်းကောင်း၊ အရှေ့ မြောက်ပိုင်း Hamgyong နယ်ရှိ Punggye-ri တွင် ပြုလုပ်ခဲ့သည်။

Chosun မှ သတင်းသည် လာမည့် လတွင် အမေရိကန် သမ္မတ Barak Obama အပါအ၀င် ကမ္ဘာ့ ခေါင်းဆောင်များ တက်ရောက်မည့် G-20 အစည်းအဝေးအတွက် ဆိုးလ်က ပြင်ဆင်နေချိန်တွင် ထွက်ပေါ်လာခြင်း ဖြစ်သည်။

မြောက်ကိုးရီးယားက စနေနေ့က ပြောကြားရာတွင် ယင်းသည် ခြောက်နိုင်ငံ နျူကလီယာ လက်နက် ဖျက်သိမ်းရေး အစည်းအဝေးသို့ ပြန်လည် ကျင်းပရန် ဆန္ဒရှိကြောင်း သို့သော် အမေရိကန်နှင့် အခြား နိုင်ငံများ အဆင်သင့် မရှိသေးသောကြောင့် အလျင်အမြန် မဖြစ်နိုင်သေးကြောင်း ပြောခဲ့သည်။

အမေရိကန် ပြည်ထောင်စုက ပြောကြားရာတွင် မြောက်ကိုးရီးယား အနေဖြင့် တောင်ကိုးရီးယားနှင့် ဆက်ဆံရေးကို ပြင်ရမည် ဖြစ်ကြောင်း၊ အခြားညှိနှိုင်းမှုများ မစတင်မှီ နျူကလီယာ လက်နက် ဖျက်သိမ်းရေးနှင့် ပတ်သက် ရိုးသားမှု ရှိရမည် ဖြစ်ကြောင်း ပြောခဲ့သည်။

တောင်ကိုးရီးယား နိုင်ငံခြားရေး ၀န်ကြီးဌာန အကြီးတန်း တာဝန်ရှိသူ တစ်ဦးက ဗုဒ္ဓဟူးနေ့က ပြောကြားရာတွင် မြောက်ကိုးရီးယား အနေဖြင့် ယင်း၏ နျူကလီယာ အဆောက်အဦများသို့ စစ်ဆေးသူများ ခွင့်ပြုသင့်ပြီး၊ ခြောက်နိုင်ငံ ဆွေးနွေးပွဲ မတိုင်မီ နျူကလီယာ လှုပ်ရှားမှုများ ရပ်ဆိုင်းထားကြောင်း ကြေညာရမည် ဖြစ်ကြောင်း ပြောဆိုခဲ့သည်။

ယမန်နှစ်က သမ္မတ Lee Myung-bak က မြောက်ကိုးရီးယားကသာ နျူကလီယာများ လုံးဝ ဖျက်သိမ်းခဲ့မည် ဆိုပါက ကြီးမားသော စီးပွားရေး အကူအညီများ ပေးမည်ဟု ကမ်းလှမ်းချက်မှာ အသက်ဝင်လျက် ရှိနေသေးကြောင်း အမည်မဖော်လိုသူ တာဝန်ရှိသူ တစ်ဦးက ပြောကြားခဲ့သည်ဟု Yonhap သတင်း အေဂျင်စီက ပြောသည်။

မြောက်ကိုးရီးယား၏ တစ်ခုတည်းသော မဟာမိတ်နှင့် စီးပွားရေးအရ မှီခိုမှု ပြုရသော တရုတ်ကလည်း ၂၀၀၃ ခုနှစ်က စတင် ကျင်းပခဲ့သော ခြောက်နိုင်ငံ အစည်းအဝေး ပြန်စရန် ဖိအားပေးလျက် ရှိသည်။

ညှိနှိုင်းမှုများ ပြန်လည် ပြုလုပ်ရေး အတွက် အလားအလာများမှာ တောင်ကိုးရီးယားနှင့် အမေရိကန်တို့က ဆိုးလ်၏ စစ်သင်္ဘောကို မြောက်ကိုးရီးယား၏ တိုပီဒိုက ပစ်ခတ်ခြင်း ဖြစ်ကြောင်း စွပ်စွဲခဲ့ခြင်း အကြောင်းကြောင့် မှေးမှိန်လျက် ရှိသည်။ ထိုကိစ္စကို မြောက်ကိုးရီးယားက ငြင်းဆိုခဲ့သည်။

၁၉၅၀-၅၃ ကိုးရီးယား စစ်ပွဲမှာ တရားဝင် ငြိမ်းချမ်းရေး စာချုပ် မရှိဘဲ အပစ်အခတ် ရပ်ရန် သဘော တူညီမှုဖြင့်သာ ပြီးဆုံးခဲ့ခြင်း ဖြစ်သည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

ယန်းငွေ တန်ဖိုး ဆက်လက် မြင့်မားနေမှုနှင့် ပတ်သက်သော စိုးရိမ်မှုများကြောင့် လက်ရှိ ဂျပန် စီးပွားရေးမှာ လုံးလုံးလျားလျား ရပ်တန့်နေကြောင်း အောက်တိုဘာလ ၁၉ ရက်နေ့တွင် ဂျပန် အစိုးရက ပြောကြားသည်။ စီးပွားရေးတွင် ပြန်လည် နာလန်ထူအောင် လုပ်ဆောင်မှုများ ရပ်တန့်လျက် ရှိသည်ဟုလည်း ဂျပန် ကက်ဘိနက် အဖွဲ့က ကြေညာချက် ထုတ်ပြန်သည်။

အဆိုပါ ကြေညာချက်သည် နှစ်နှစ်တာ ကာလအတွင်း ဂျပန် စီးပွားရေးနှင့် ပတ်သက်၍ အစိုးရ၏ အဆိုးမြင်သော ကြေညာချက် တစ်ရပ်လည်း ဖြစ်သည်။ ယန်းငွေ တန်ဖိုး မြင့်တက်ပြီး ဂျပန် ထုတ်ကုန် ပစ္စည်းများအပေါ် ကမ္ဘာလုံး ဆိုင်ရာ ဝယ်လိုအား ကျဆင်းလာခြင်းကြောင့် စီးပွားရေး ကျဆင်းရခြင်း ဖြစ်သည်ဟု ဆိုသည်။

လတ်တလော လများအတွင်း ဂျပန် စီးပွားရေးကို အဖတ်ဆယ် နိုင်သည်ဟု အစိုးရက ဆိုသော်လည်း ယခု ထုတ်ပြန်သော ကြေညာချက်အရ စီးပွားရေး အင်အား ဆက်လက် ချည့်နဲ့နေဆဲ ဖြစ်သည်။ ပြည်ပသို့ ကုန်ပစ္စည်း တင်ပို့မှု အလွန်အမင်း လျော့ကျမှုသည် အဓိက ပြဿနာ ဖြစ်သည်ဟု ဆိုသည်။

ထို့ပြင် အာရှဒေသသို့ ကုန်ပစ္စည်း တင်ပို့မှုမှာလည်း လျော့နည်းလာရာ ပို့ကုန် စီးပွားရေး သမားများ ထိခိုက် နစ်နာရကြောင်း၊ အကြောင်းမှာ ယန်းငွေတန်ဖိုး မြင့်တက် နေသောကြောင့် ဖြစ်ကြောင်း ကြေညာချက်က ဆိုသည်။

ဂျပန် ယန်းငွေနှင့် အမေရိကန် ဒေါ်လာ လဲလှယ်မှု နှုန်းတွင် ယန်းငွေသည် နှစ်ပေါင်း ၁၅ နှစ်တာ ကာလအတွင်း အမြင့်ဆုံးသို့ ရောက်ရှိခဲ့သည်။ ပြီးခဲ့သည့် စက်တင်ဘာ လအတွင်း ဂျပန် ဘဏ္ဍာရေး ဝန်ကြီးဌာနက နှစ်ပေါင်း ခြောက်နှစ်အတွင်း ငွေကြေး ဈေးကွက်ကို ပထမဆုံး ဝင်ရောက် ထိန်းချုပ်မှုများ ပြုလုပ်ခဲ့သော်လည်း ယန်းငွေတန်ဖိုး ပြန်လည် ကျဆင်းမှု မရရှိခဲ့ပေ။

ဂျပန်ဝန်ကြီးချုပ် နာတိုကန်က ငွေကြေး လဲလှယ်မှုနှုန်း နိမ့်ကျမှုနှင့် ရင်ဆိုင်နေရသော ပို့ကုန် သမားများ ခုသာခံသာ ရှိစေရေး အတွက် ယန်းငွေ ၅ ဒဿမ ၁ ထရီလီယံ (ဒေါ်လာ ၆၃ ဘီလီယံ) ကို အရေးပေါ် နာလန်ထူရေး အစီအစဉ်အဖြစ် ထုတ်ပေးခဲ့သည်။ အောက်တိုဘာလ ၁၉ ရက်၊ တိုကျို ငွေကြေး ဈေးကွက် ပေါက်ဈေးအရ အမေရိကန် တစ်ဒေါ်လာလျှင် ဂျပန် ၈၁ ဒဿမ ၄၄ ယန်း ရှိသည်။ အစိုးရ အရာရှိကြီးများ အဆိုအရ စီးပွားရေး ကျဆင်းမှုသို့ ဆိုက်ရောက်သွားနိုင်ကြောင်း သတိပေး ပြောကြားသည်။

BBC သတင်းကို ဘာသာ ပြန်ဆိုသည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

မြန်မာ နိုင်ငံမှ ကချင် တိုင်းရင်းသား လက်နက်ကိုင် တပ်ဖွဲ့ ဖြစ်သော ကချင် လွတ်လပ်ရေး တပ်ဖွဲ့ (KIA) နှင့် မြန်မာ စစ်တပ်အကြား လိပ်ခဲတည်းလည်း အခြေအနေ ဆိုက်ရောက်ကာ တင်းမာမှုများ ဖြစ်ပေါ်နေကြောင်း သိရသည်။ မြန်မာ စစ်တပ်က KIA အဖွဲ့ဝင် သုံးဦးကို ဖမ်းဆီး ထိန်းသိမ်း လိုက်ပြီးနောက် ယခုကဲ့သို့ အခြေအနေမျိုးနှင့် ရင်ဆိုင်နေရခြင်း ဖြစ်သည်။

KIA ရုံးခွဲများ အနက်မှ ရုံးခွဲတစ်ခုအား မြန်မာ စစ်တပ်က ဝိုင်းရံထားကြောင်း၊ တရုတ်-မြန်မာ နယ်စပ်ဒေသ အနီးရှိ မြန်မာ စစ်စခန်း တစ်ခုကိုလည်း မိမိတို့ လက်နက်ကိုင် တပ်ဖွဲ့များက ပြန်လည် ဝိုင်းရံထားကြောင်း BBC မြန်မာပိုင်း ဆိုင်ရာ သတင်းဌာနက ဆိုသည်။

KIA သည် မြန်မာ စစ်အစိုးရနှင့် နှစ်ပေါင်း ၁၆ နှစ်ကြာ အပစ်အခတ် ရပ်စဲရေး ပြုလုပ်ခဲ့ပြီး ကချင် ပြည်သူများ ကိုယ်ပိုင် အုပ်ချုပ်ခွင့် ရရှိရေး အတွက် ကြိုးပမ်းလျက် ရှိသော လက်နက်ကိုင် တပ်ဖွဲ့ တစ်ခုလည်း ဖြစ်သည်။ မြန်မာ စစ်အစိုးရ၏ ကမ်းလှမ်းချက် ဖြစ်သော နယ်ခြား ဒေသစောင့် တပ်ဖွဲ့ ပြောင်းလဲ ဖွဲ့စည်းရေး စာချုပ် ချုပ်ဆိုရန် KIA က ငြင်းပယ်ထားသည်။

သို့သော် စစ်အစိုးရနှင့် ပြုလုပ်ထားသော အပစ်အခတ် ရပ်စဲရေး သဘော တူညီချက်အရ KIA နှင့် မဟာမိတ် အရပ်ဖက် အဖွဲ့အစည်း အနေဖြင့် မြန်မာနိုင်ငံ မြောက်ပိုင်းဒေသ အတော်များများကို အုပ်ချုပ်ခွင့် ရရှိထားသည်။

၎င်းတို့က တရုတ်ပြည်နှင့် ပြုလုပ်သော ကုန်သွယ်ရေး၊ ကျောက်မျက်နှင့် ရွှေတူးဖော်ရေး၊ သစ်ထုတ်လုပ်ရေး အစရှိသည့် လုပ်ငန်းများမှ ရရှိသော အခွန်ဖြင့် ကချင်ပြည်နယ်တွင်း လျှပ်စစ်မီး သွယ်တန်းခြင်း၊ လမ်းဖောက်လုပ်ခြင်း၊ စာသင်ကျောင်း ရန်ပုံငွေ ရှာဖွေခြင်း တို့ကို ထောက်ပံ့ပေးလျက် ရှိသည်။

သို့သော် နယ်ခြား ဒေသစောင့် တပ်ဖွဲ့ ပြောင်းလဲ ဖွဲ့စည်းပေးရမည့် နောက်ဆုံး သတ်မှတ်ရက် ကျော်လွန်သွားပြီ ဖြစ်သောကြောင့် မြန်မာစစ်တပ်နှင့် စစ်မက်ရေးရာ ပဋိပက္ခ ဖြစ်ပေါ်လာမည်ကို စိုးရိမ်လျက် ရှိသည်။ မြန်မာနိုင်ငံ မြောက်ပိုင်း၊ ကချင်ပြည်နယ်၊ Laiza မြို့သို့ BBC သတင်းထောက် Alastair Leithead သွားရောက်၍ KIA မှ ဗိုလ်ချုပ်ကြီးများနှင့် တွေ့ဆုံ မေးမြန်းတွင် ၎င်းတို့က အဆိုးဆုံး အခြေအနေ အတွက် ပြင်ဆင်ထားကြောင်း ပြောကြားသည်။

"ဒီမှာ စစ်ဖြစ် လာလိမ့်မယ် လို့တော့ ကျွန်တော်တို့ သေချာပေါက် မပြောနိုင်ပါဘူး။ ဒါပေမဲ့ အစိုးရက ကျွန်တော်တို့ကို ဒီလ နောက်ဆုံးထားပြီး နယ်ခြား ဒေသစောင့် တပ်အဖြစ် ပြောင်းလဲ ဖွဲ့စည်းစေချင်နေပါတယ်" ဟု KIA ၏ စစ်ဦးစီးချုပ် ဗိုလ်ချုပ် Gen Gam Shawng က ဖေဖော်ဝါရီလတွင် ပြောကြားသည်။

"ကျွန်တော်တို့ အနေနဲ့ အဲဒီလို လက်နက်ချပြီး နယ်ခြား ဒေသစောင့်တပ် ပြောင်းဖွဲ့မှာ မဟုတ်ပါဘူး။ သူတို့အနေနဲ့ ကချင်ပြည်နယ်ကို ၁၉၄၇ ခုနှစ်မှာ သဘော တူညီခဲ့တဲ့ ဖက်ဒရယ် ပြည်ထောင်စုနဲ့ တိုင်းရင်းသား အခွင့်အရေးတွေ ရရှိတဲ့ ဒေသ တစ်ခုအဖြစ် မသတ်မှတ် ပေးသရွေ့ပေါ့" ဟု ၎င်းက ဆိုသည်။ ယခင် သတင်း ပေးပို့ချက်များ အရ ကချင် ပြည်နယ်တွင်း တင်းမာမှုများ လျော့နည်းလာသည့် သဘောတွင် ရှိသည်။ BBC သတင်းထောက် အဆိုအရ အိမ်နီးချင်း တရုတ်နိုင်ငံ၏ ဖိအားပေးမှုကြောင့် KIA၊ ညီညွတ်သော ဝ တပ်ဖွဲ့ (UWSA) နှင့် မြန်မာ စစ်တပ်အကြား တင်းမာမှုများ လျော့ကျလာသည်ဟု ယူဆရသည်။

မြန်မာ နိုင်ငံတွင် တိုင်းရင်းသား လက်နက်ကိုင် တပ်ဖွဲ့ပေါင်း ၂၅ ဖွဲ့ခန့် ရှိပြီး အများစုမှာ နယ်စပ်ဒေသနှင့် တောင်ထူထပ်သော နေရာများတွင် အခြေစိုက် လှုပ်ရှားလျက် ရှိသည်။ အင်အား အကြီးဆုံး တိုင်းရင်းသား လက်နက်ကိုင် တပ်ဖွဲ့ကြီးများတွင် KIA လည်း အပါအဝင် ဖြစ်သည်။ KIA တပ်ဖွဲ့မှူးများ အဆိုအရ စစ်သည် အင်အား ၁၀၀၀၀ နှင့် အရန်စစ်သည် ၁၀၀၀၀ ခန့် ရှိသည်ဟု ခန့်မှန်းရသည်။

အာရှတွင် အင်အား အကြီးဆုံးသော စစ်တပ်များ စာရင်းတွင် မြန်မာ စစ်တပ်လည်း ပါဝင်သည်။

BBC သတင်းကို ဘာသာ ပြန်ဆိုသည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.