Transparency Myanmar

transparency.myanmar@gmail.com

ရော့စ် ဒန်ကလေကို ရုံးထုတ်ပြီ

ဖေဖော်ဝါရီ ၂၅


လွန်ခဲ့သည့် ဖေဖော်ဝါရီလ ၁ဝ ရက်နေ့တွင် ဖမ်းဆီးခံခဲ့ရသည့် မြန်မာတိုင်းမ်ဂျာနယ် ထုတ်ဝေသူ သြစတြေးလျနိုင်ငံသား ရော့စ် ဒန်ကလေအား ကမာရွတ်မြို့နယ် အထူးတရားရုံးတွင် ဖေဖော်ဝါရီ ၂၄ ရက်နေ့က  ပထမဦးအကြိမ် ရုံးထုတ် စစ်ဆေးခဲ့သည်ဟု သတင်းရရှိသည်။

မစ္စတာဒန်ကလေအား စွဲချက်တင်သည့် ပုဒ်မများမှာ လူဝင်မှုကြီးကြပ်ရေး အရေးပေါ် ပြဋ္ဌာန်းချက် လဝက ပုဒ်မ ၁၃ (၁) အပြင်  နာကျင်စေမှု ပုဒ်မ ၃၂၃ ၊ တပါးသူအား မူယစ်ဆေးဝါး တိုက်ကျွေးမှု  ၃၂၈ ၊ ကာအိနြေ္ဒပျက်ယွင်းစေမှု ၃၅၂ နှင့် လွတ်လပ်စွာ သွားလာခွင့်ကို ပိတ်ပင်တားဆီးမှု ၃၄၁ တို့ ဖြစ်သည်ဟု သိရသည်။

အမှုများအားလုံးသည် အာမခံလျှောက်ထားနိုင်သည့် အမှုများဖြစ်သော်လည်း ကမာရွတ်မြို့နယ် တရားသူကြီးက အာမခံလျှောက်ထားမှုကို ပလပ်ခဲ့ကြောင်း သိရသည်။

တရားရုံးတွင် တရားလို အမျိုးသမီးဖြစ်သူ မခိုင်ဇာဝင်းနှင့် လဝက အရာရှိတစ်ဦးတို့ကို စစ်ဆေးခဲ့ပြီး မစ္စတာ ရော့စ် ဒန်ကလေကိုပါ တရားရုံးက ထွက်ဆိုစေခဲ့သည်။

အဆိုပါ အမှုအတွက် နောက်ထပ် ရုံးချိန်းကို မတ်လ ၃ ရက်နေ့တွင် ချိန်းဆိုလိုက်သည်ဟု သတင်းရရှိသည်။


--------------------------------------------------------------------------------------------------------------------------------------------------------------------------------------------


မြန်မာအထူးစီးပွားရေးဇုန်ဥပဒေအရ တည်ဆောက်နေမှုများအား ယာယီရပ်ဆိုင်း

ဖေဖော်ဝါရီ ၂၅


မြန်မာအထူးစီးပွားရေးဇုန်ဥပဒေပြဋ္ဌာန်းချက်များကို လုပ်ဆောင်အကောင်အထည်ဖော်ဆောင်ရွက်နိုင်ရန် မြန်မာနိုင်ငံ၌ လုပ်ကိုင်ဆောင်ရွက်လျှက်ရှိသည့် ထားဝယ်ရေနက်ဆိပ်ကမ်းနှင့် အထူးစီးပွားရေးဇုန်စီမံကိန်း တည်ဆောက်နေမှု များကို ယာယီရပ်နားထားရကြောင်း သတင်းရရှိသည်။

ထားဝယ်ရေနက် ဆိပ်ကမ်းနှင့် အထူးစီးပွားရေးဇုန်တည်ဆောက်နေမှုများကို Italian Thai Development Public ကုမ္ပဏီမှ တာဝန်ယူတည်ဆောက်လျှက်ရှိရာ ယခုအခါ အထူးစီးပွားရေးဇုန်ဥပဒေများ ပြဋ္ဌာန်းပြီးနောက် ၎င်းပြဋ္ဌာန်းချက်များနှင့်အညီ လုပ်ဆောင်နိုင်ရန်နှင့် ပြုပြင်ပြောင်းလဲမှုများ လုပ်ဆောင်နိုင်ရန် ထားဝယ် ရေနက်ဆိပ်ကမ်းနှင့် အထူးစီး ပွားရေးဇုန် တည်ဆောက်နေမှုများအား ယာယီရပ်နားထားရကြောင်း အထူးစီးပွားရေးဇုန်စီမံကိန်းမှ တာဝန်ရှိသူတစ်ဦးက ပြောပြခဲ့သည်။

Italian Thai Development Public ကုမ္ပဏီမှ တည်ဆောက်နေမှုများအား ယာယီရပ်နားထားရကြောင်း၊ ထားဝယ်ရေနက်ဆိပ်ကမ်းတည်ဆောက်မှုမှာ ကြီးကြပ်ရေးအဖွဲ့များ ဖွဲ့ရန်နှင့် ဥပဒေပါ သတ်မှတ်ချက်၊ ပြဋ္ဌာန်းမှုများကို လိုက်နာဆောင်ရွက်နိုင်ရန် ယာယီရပ်ဆိုင်းထားခြင်းဖြစ်ကြောင်း၊ လိုအပ်ချက်၊လုပ်ဆောင်ချက်များကို ပြုပြင်ပြီးချိန်မှ ပြန်လည် စတင်မည်ဖြစ်ကြောင်း အထူးစီးပွားရေးဇုန်တည်ဆောက်မှုနှင့် နီးစပ်သူတစ်ဦးမှ ပြောကြားခဲ့သည်။

မြန်မာအထူးစီးပွားရေးဇုန် ဥပဒေအား ပြဋ္ဌာန်းခဲ့ပြီးဖြစ်သည့်အတွက် ဥပဒေပါအတိုင်း တိတိကျကျ လိုက်နာဆောင်ရွက်ရန် ပြင်ဆင်မှုများပြုလုပ်ခြင်းဖြစ်သည်ပာု သုံးသပ်ရမည်ဖြစ်ကြောင်း၊ နိုင်ငံဖွံ့ဖြိုးတိုးတတ်ရန်သာမက နိုင်ငံသားများ၏ အလုပ်အကိုင် အခွင့်အလမ်းများပါ ကောင်းမည်ဖြစ်ကြောင်း၊ နိုင်ငံအတွင်းရှိ ပြည်တွင်းရှိ ကျွမ်းကျင်အလုပ်သမားများသာမက အခြေခံလုပ်သားများဖြစ်သည့် ကာယအလုပ်သမားများအတွက်ပါ အခွင့်အလမ်း ရှိလာတော့မည် ဖြစ်ကြောင်း၊ ယခုကဲ့သို့ ဥပဒေပါသတ်မှတ်ချက်များအတိုင်း တိတိကျကျလုပ်ဆောင်မည်ဖြစ်သည့်အတွက် ကြိုဆိုပါကြောင်း ပြည်တွင်းမှ လုပ်ငန်းရှင်တစ်ဦးကလည်း ပြောဆိုခဲ့သည်။

 

---------------------------------------------------------------------------------------------------------------------------------------------------------------------------------------------


ဂျီအက်စ်အမ် ငွေကြိုဖြည့်ကဒ်များ၌ အိတ်စ်စပိုင်ယာဒိတ် သတ်မှတ်ထား

ဖေဖော်ဝါရီ ၂၅

ငါးသိန်းတန် ဂျီအက်စ်အမ် ဖုန်းများအားကို ငွေကြိုဖြည့်ကဒ်နှင့် အသုံးပြုရမည်ပာု ကြေညာပြီးနောက် ဈေးကွက် အတွင်းသို့ ဂျီအက်စ်အမ် ငွေကြိုပေးကဒ်များ ဝင်ရောက်လာသည်။

၎င်း ငါးသိန်းတန်ဂျီအက်စ်အမ် ငွေကြိုဖြည့်ကဒ်များ၌ အိတ်စ်စပိုင်ယာဒိတ် ခြောက်လသတ်မှတ်ထားကြောင်း သိရသည်။

ယခု ငါးသိန်းတန် ဂျီအက်စ်အမ်ဖုန်း ငွေကြိုဖြည့်ကဒ်များသည် ခြောက်လအတွင်းသာ အသုံးပြု၍ရနိုင်မည်ဖြစ်ကြောင်း၊ ခြောက်လအတွင်း၌ ကဒ်များတွင် ငွေလက်ကျန်မကျန်ပါက အသုံးပြု၍မရတော့ပဲ အိတ်စ်စပိုင်ယာဒိတ်ဖြစ်သွား မည်ဖြစ်ကြောင်း ရန်ကုန်မြို့ ဖုန်းရောင်းဝယ်ရေးဆိုင်တစ်ဆိုင်မှ တာဝန်ရှိသူတစ်ဦးက ပြောကြားသည်။

ငါးသိန်းတန် ဂျီအက်စ်အမ် ငွေကြိုဖြည့်ကဒ်များ၌ လျှို့ဝှက်နံပါတ်ရိုက်ထည့်နည်း နှစ်နည်းရှိကြောင်း သိရသည်။ ပထမနည်းမှာ 123# ကိုအရင်နှိပ်၍ call ခလုတ်ကိုနှိပ်ပြီး ငွေကြိုသွင်းကဒ်ပေါ်မှ လျှို့ဝှက်နံပါတ်ကိုရိုက်ထည့်၍ ငွေကြို သွင်းရမည်ဖြစ်သည်။ ဒုတိယတစ်နည်းမှာ 123 ကိုနှိပ်၍ ဖုန်းခေါ်ဆိုသည့် call ကိုနှိပ်၍ ငွေဖြည့်ရန် 1 ကိုနှိပ်ပါဆိုသည့် စာ တန်းပေါ်လာပါက 1 ဆိုသည့်နံပါတ်ကိုနှိပ်၍ ငွေကြိုပေးကဒ်ပေါ်မှ လျှို့ဝှက်နံပါတ်များကို မှန်ကန်စွာရိုက်ထည့်၍ ဖုန်း အတွင်းသို့ငွေကြိုသွင်းရမည်ဖြစ်သည်။အကယ်၍ ငွေကြိုသွင်းကဒ်ပေါ်ရှိ နံပါတ်များကို ရိုက်ထည့်ရာ၌ မှားယွင်းမှု ငါးကြိမ်ဆက်တိုက်ဖြစ်ပါက နောက်နေ့မှ ထည့်လို့ရမည်ဖြစ်သဖြင့် နံပါတ်မှားယွင်းမှုမဖြစ်စေရန် အထူးဂရုပြု ရိုက်ထည့်ရမည်ဖြစ်သည်။

ငါးသိန်းတန်ဂျီအက်စ်အမ် ဖုန်းများမှာ ဈေးကွက်အတွင်း ဝင်ရောက်လာသည့် အချိန်မှစတင်၍ ရောင်းအားကောင်းကြောင်း လူကြီးမင်းဖုန်းဆိုင်မှ အရောင်းဝန်ထမ်းတစ်ဦးက ပြောကြားသည်။

 

----------------------------------------------------------------------------------------------------------------------------------------------------------------------------------------------

 

မြဝတီရုပ်မြင်သံကြားမှ ရုပ်သံလိုင်းခြောက်လိုင်းထပ်တိုးမည်

ဖေဖော်ဝါရီ ၂၅


လက်ရှိထုတ်လွှင့်နေသည့် မြဝတီ ရုပ်မြင်သံကြားမှ အစီအစဉ်သစ်များဖြင့် လအနည်းငယ်အတွင်းမှာပင် ရုပ်သံလိုင်း ခြောက်လိုင်းတိုးချဲ့ရန်စီစဉ်နေကြောင်း မြဝတီရုပ်သံ အစီအစဉ် ထုတ်လွှင့်ပြသသူတချို့ထံမှ သိရသည်။

ထပ်မံတိုးချဲ့မည် အစီအစဉ်များမှာ ထုတ်လွှင့်ဖို့ရန် အဆင်သင့်ဖြစ်နေပြီဖြစ်ကြောင်း၊ လအနည်းငယ်အတွင်းမှာပင် ထုတ်လွှင့်ဖို့ရန် မှန်းထားကြောင်း၊ ယခုထပ်မံတိုးချဲ့မည့် ချန်နယ်များ၌ ဒစ်ဂျစ်တယ်စနစ်ဖြင့် ပြသမည်ဖြစ်သဖြင့် set top box ဝယ်ရမည်ဖြစ်ကြောင်း၊ အိမ်အများစု၌ အသုံးပြုနေသော တီဗီများမှာ ဒစ်ဂျစ်တယ် တီဗီများ မပာုတ်သဖြင့် ကြားခံစနစ်တစ်ခု လိုအပ်ကြောင်း မာလ်တီမီဒီယာကုမ္ပဏီမှ ဦးကျော်ဆန်းက ပြောကြားသည်။

ယခုအသစ်ထပ်မံ ထုတ်လွှင့်မည့် ရုပ်သံလိုင်းခြောက်လိုင်းမှာ ၁။ mix ချန်နယ်၊ ၂။ မြန်မာဇာတ်လမ်းတွဲများသာ သီးသန့်ပြသမည့် ချန်နယ်၊ ၃။ နိုင်ငံခြားဇာတ်လမ်းတွဲချန်နယ်၊ ၄။ နိုင်ငံစုံရုပ်ရှင်ကားများကို ပြသသည့်ချန်နယ်၊ ၅။ ကာတွန်း၊ မြူးဇစ်နှင့် အားကစား ချန်နယ် ၆။ ဖျော်ဖြေရေး နှင့် Discovery ဇာတ်လမ်းတွဲမျိုး ပြသ သည့်ချန်နယ်တို့ဖြစ်ကြောင်း သိရသည်။

မြန်မာဇာတ်လမ်းတွေချန်နယ်၌ ရုပ်သံအစီအစဉ် ထုတ်လွှင့်သူများပေါင်း၍ မြန်မာဇာတ်လမ်းတွဲ အစီအစဉ်သစ်များဖြင့် ပြသသွားမည်ဖြစ်ကြောင်း သိရသည်။

နောက်တိုးချဲ့မည့် မြဝတီ ၂ ရုပ်သံလိုင်းများကို နေ့စဉ် တစ်နေ့သုံးကြိမ် ထုတ်လွှင့်မည်ဖြစ်ကြောင်း၊ နံနက် ၆း၀၀ မှ စတင်၍ မွန်းတည့် ၁၂း၀၀ အထိတစ်ကြိမ်၊ မွန်းတည့် ၁၂း၀၀ မှ ညနေ ၆း၀၀ အထိတစ်ကြိမ်နှင့် ညနေ ၆း၀၀ မှ ည ၁၂း၀၀ အထိ တစ်ကြိမ် သုံးကြိမ်တိုင်တိုင် ထပ်မံထုတ်လွှင့်သွားမည်ဖြစ်ကြောင်း မြဝတီ ရုပ်သံလိုင်းမီဒီယာ မှ တာဝန်ရှိသူတစ်ဦးက ပြောကြားသည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

ရွေးကောက်ပွဲကော်မရှင် ၆ ဦးကို ပြန်လည်ရွေးချယ်ရန် ဦးသိန်းစိန် အဆိုပြု

ဖေဖေါ်ဝါရီလ ၂၄


 နေပြည်တော်တွင် ပြုလုပ်လျက်ရှိသော ပြည်ထောင်စုလွှတ်တော် အစည်းအဝေး၏ ၁၂ ရက်နေ့မြောက်ဖြစ်သော ဖေဖေါ်ဝါရီလ ၂၄ ရက်နေ့တွင် ရွေးကောက်ပွဲကော်မရှင် အဖွဲ့ဝင် ၆ ဦး၏အမည်များကို နိုင်ငံတော်သမ္မတ ဦးသိန်းစိန်က တင်သွင်းခဲ့ကြောင်း သိရသည်။

၂ဝ၁ဝ ရွေးကောက်ပွဲအတွက် ဖွဲ့စည်းခဲ့သော ပြည်ထောင်စု ရွေးကောက်ပွဲကော်မရှင် အဖွဲ့ဝင်များဖြစ်ကြသည့် ဦးအောင်မြင့်၊ ဦးမြင့်နိုင်၊ ဒေါက်တာဒေါ်မြင့်ကြည်၊ ဦးသာဦး၊ ဦးဝင်းကြည်၊ ဦးညွန့်တင်တို့ကို ပြန်လည်ရွေးချယ်ရန် ဦးသိန်းစိန်က အဆိုပြုခြင်းဖြစ်ကြောင်း သိရသည်။

အသစ်ပေါ်ထွက်လာမည့် ရွေးကောက်ပွဲကော်မရှင်ဥက္ကဋ္ဌအဖြစ် ဗိုလ်ချုပ်ကြီးဟောင်း ဦးတင်အေးကို ရွေးချယ်ပြီး ဖြစ်သည်။

၂ဝ၁ဝ ရွေးကောက်ပွဲကော်မရှင် အတွင်းရေးမှူး ဦးဝင်းကိုနှင့် အဖွဲ့ဝင်များဖြစ်ကြသည့် ဦးအင်ဇော်နော်၊ ဦးခင်မောင်နု၊ ဦးစောဘလှိုင်၊ ဒေါက်တာဘမောင်၊ ဒေါက်တာစိုင်းခမ်းလှိုင်၊ ဒေါက်တာတင်အောင်အေး၊ ဒေါ်ခင်လှမြင့်၊ ဒေါက် တာမောင်ထူး၊ ဦးသာဌေးတို့ ပြန်မပါကြတော့ကြောင်း တွေ့ရှိရသည်။

အစိုးရသစ်ဖွဲ့ရန် ပြည်ထောင်စု ဝန်ကြီး ၃ဝ ဦး၊ ဝန်ကြီးဌာန ၃၄ ခု၊ ပြည်ထောင်စုရှေ့နေချုပ်၊ ပြည်ထောင်စု တရား သူကြီးချုပ်၊ ပြည်ထောင်စု စာရင်းစစ်ချုပ်၊ ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌနှင့် အဖွဲ့ဝင်များ၊ ဖွဲ့စည်းပုံ အခြေ ခံဥပဒေဆိုင်ရာခုံရုံး ဥက္ကဋ္ဌနှင့် အဖွဲ့ဝင်အရေအတွက်၊ ပြည်ထောင်စု တရားလွှတ်တော်ချုပ် တရားသူကြီးနှင့် အဖွဲ့ဝင်များ ကြေညာပြီးဖြစ်သည်။

သို့သော် လက်ကိုင်ဝန်ကြီးဌာနများတွဲ၍ မကြေညာနိုင်သေးသည့်ပြင် ဒုတိယဝန်ကြီးများ၊ ဒုတိယရှေ့နေချုပ်၊ ဒုတိယစာရင်းစစ်ချုပ်၊ ပြည်ထောင်စု ရာထူးဝန်အဖွဲ့ဥက္ကဋ္ဌနှင့် အဖွဲ့ဝင်များ၊ သမ္မတ အကြံပေးအဖွဲ့၊ သမ္မတပြောရေးဆိုခွင့်နှင့် သတင်းထုတ်ပြန်ရေးအဖွဲ့၊ အမျိုးသားကာကွယ်ရေးနှင့် လုံခြုံရေးကောင်စီ၊ ဘဏ္ဍာရေး ကော်မရှင်၊ နေပြည်တော်ကောင်စီ ဥက္ကဋ္ဌနှင့် ကောင်စီဝင်တို့ကို ထုတ်ပြန်ကြေညာရန် ကျန်ရှိနေသေးသည်ကို တွေ့ရှိရသည်။

-----------------------------------------------------------------------------------------------------------------------------------

သတင်းသမားတွေကို စစ်ဆေးပြီး သတင်းယူခွင့်ပေးသင့်တယ်


၂၀၁၀ ရွေးကောက်ပွဲအပြီး၌ လွှတ်တော်အသီးသီးပေါ်ပေါက်လာခဲ့သည်ဖြစ်ရာ ထိုလွှတ်တော်အတွင်း စည်းဝေးတိုင်ပင်မှုများကို သတင်းသမားများ၊ ဂျာနယ်လစ်များမှ သတင်းယူခွင့်မရှိသည့် ကိစ္စရပ်နှင့်ပတ်သတ်၍ ပြည်ထောင်စု လွှတ်တော်မှ လွှတ်တော်တတ်ရောက်လျှက်ရှိသည့် အမျိုးသားဒီမိုကရေစီအင်အားစုပါတီမှ ဦးဖုန်းမြင့်အောင်က ပြောကြားခဲ့သည်။

လွှတ်တော်အစည်းအဝေးစတင် တက်ရသည့်အတွေ့အကြုံနှင့် ပတ်သတ်၍မေးမြန်းရာ၌ ဦးဖုန်းမြင့်အောင်မှ မိမိသည် လွှတ်တော်တတ်ရသည်မှာ ပထမဆုံးအကြိမ်ပင်ဖြစ်ကြောင်း၊ လွှတ်တော်နိုင်ငံရေးမှာ နှစ်ငါးဆယ် အဆက်အသွယ်ပျက်နေသည့်အတွက် လွှတ်တော်စတင်တတ်ရောက်သည့်အချိန်၌ အနည်းငယ် စိတ်လှုပ်ရှားမှု ရှိကြောင်း၊ လွှတ်တော်၌ မဲခွဲသည့်အခါ၌ သူ့လူ ကိုယ့်လူ ခွဲခြား၍ မဲပေးသည့်အတွက် မဲရှုံးနိမ့်မှုများရှိခဲ့ကြောင်းပြောကြားခဲ့သည်။

           လွှတ်တော်အတွင်း သတင်းယူခွင့်မရှိသည့်ကိစ္စရပ်နှင့်ပတ်သတ်၍ ပြောကြားရာ၌ သတင်းသမားများ သတင်းယူခွင့်မရရှိသည့်အတွက် မိမိတို့မှာသာ အာပေါက်မတတ်သတင်းပေးဖြေရှင်းနေရကြောင်း၊ သတင်းသမားများကို လွတ်လွတ်လပ်လပ် သတင်းယူခွင့်ပေးထားပါက မိမိတို့သက်သာမည်ဖြစ်ကြောင်း၊ ထိုသို့ သတင်းယူခွင့် ရရှိရန် မိမိတို့မှ လွှတ်တော်အတွင်း၌ အဆိုပြုတင်သွင်းသွားမည်ဖြစ်ကြောင်း၊ နိုင်ငံတစ်ကာ၌လည်း သတင်းသမားများကို လွတ်လွတ်လပ်လပ် သတင်းယူခွင့်ပေးထားသည့်အတွက် မိမိတို့နိုင်ငံ၌လည်း သတင်းယူခွင့်ရရှိရန် ကြိုးစားသွားမည်ဖြစ်ကြောင်း၊ လုံခြုံရေးအရ စစ်ဆေးရမည့်ကိစ္စရပ်များကို စစ်ဆေး၍ မီဒီယာ လွတ်လပ်စွာသတင်း ယူခွင့် ပြုရမည်ဖြစ်ကြောင်း၊ ပြည်သူများအမြင် မှားယွင်းမှုမရှိစေရန် မီဒီယာများကသာ လမ်းပြနိုင်မည်ဖြစ်သည့်အတွက် မီဒီယာများအားသတင်းယူခွင့်ပေးသင့်ကြောင်း အမျိုးသားဒီမိုကရေစီအင်အားစုပါတီမှ ဦးဖုန်းမြင့်အောင်မှ ပြောကြားခဲ့သည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.