Transparency Myanmar

transparency.myanmar@gmail.com

yangonchronicle 2011
yangonchronicle 2011

၈.၈.၂၀၁၁

ပြည်တွင်းသတင်းများ

ပြည်တွင်းငြိမ်းချမ်းရေးအတွက် ဒဂုန်တာရာ ပြည်သူများကို ပန်ကြား

ပြည်သူများအနေဖြင့် ငြိမ်းချမ်းရေး ဖွဲ့စည်းဆောင်ရွက်မှုများကို နိုးနိုးကြားကြား၊ ကျယ်ကျယ်ပြန့်ပြန့်၊ အနယ်နယ် အရပ်ရပ် လုပ်ကိုင်ကြရန် စာရေးဆရာကြီး ဒဂုန်တာရာက သြဂုတ်လ ၇ ရက်စွဲဖြင့် ပန်ကြားလွှာ လက်ကမ်းစာရွက်များ ဝေငှနေကြောင်း ရန်ကုန်မြို့တွင်း နေထိုင်သူများက ပြောကြားသည်။

၂၀၁၁ နွေရာသီသို့ ရောက်လာသည်နှင့် တပြိုင်နက် ပြည်ထောင်စု မြန်မာနိုင်ငံရှိ ပြည်တွင်းစစ်မီးသည် အရှိန်တိုး၍ ပြန်လည် တောက်လောင်လာခဲ့ကြောင်း ကချင်ပြည်နယ်၊ ရှမ်းပြည်နယ်၊ ကရင်ပြည်နယ်တို့တွင် လက်နက်ကိုင် တိုက်ပွဲ များ ပိုမိုများပြား ပိုမိုပြင်းထန်လာခဲ့ကြောင်း အသက်များစွာသေဆုံးနေရကြောင်းလည်း ယင်းကြေငြာချက်တွင် ဖော်ပြပါ ရှိသည်။

ဆက်ပြီး ပြည်တွင်းစစ်မီးသည် ပိုမိုပြင်းထန် ပိုမိုကျယ်ပြန့် ပိုမိုအသက်သေကြေ၊ အိုးအိမ်၊ ပစ္စည်း၊ ဥစ္စာပျက်စီးစေမည့် အန္တရာယ်ကို ပေးတော့မည်ဟု အမှန်တကယ်စိုးရိမ်လာကြရကြောင်း သေဆုံးသူများမှာ ပြည်ထောင်စု မြန်မာနိုင်ငံသား များ ဖြစ်ကြပြီး အိုးအိမ်၊ ပစ္စည်း၊ ဥစ္စာများ ပျက်စီးဆုံးရှုံးရသည်မှာလည်း နိုင်ငံသားများ၏ အိုးအိမ် ပစ္စည်း၊ ဥစ္စာများသာဖြစ်ကြောင်း ထို့ကြောင့် ပြည်တွင်းစစ်မီးတွင် သေကြေရသမျှ အသက်ဆုံးရှုံးရသမျှ အိုးအိမ်ပစ္စည်း ဥစ္စာတို့သည် ပြည်ထောင်စု မြန်မာနိုင်ငံ၏ အသွေးအသားများဖြစ်ကြောင်း ထပ်ဆင့်ဖော်ပြထားသည်။

ထိုဆုံးရှုံးမှုများကို ဆက်ပြီးမခံ ကြရစေရန် အချင်းချင်း တိုက်ခိုက်မှုများကို အမြန်ဆုံးရပ်စဲပစ်ကြဖို့ မလုပ်မဖြစ်လို အပ်နေပြီး  သက်ဆိုင်ရာအားလုံး အချင်းချင်း အပစ်အခတ်ရပ်ရန် တွေ့ဆုံဆွေးနွေးပြီး ခိုင်မြဲသော ငြိမ်းချမ်းရေးကို တည်ဆောက်ကြပါရန် အလေးအနက် မေတ္တာရပ်ခံထားကြောင်း ယင်းပန်ကြားလွှာ တွင်ဖော်ပြထားသည်။

အဆုံးတွင် “ကျည်ဆန်ခြုံ၍ မလုံ- မေတ္တာခြုံမှ လုံလိမ့်မည်” ဒဂုန်တာရာ ၇.၈.၂၀၁၁ အောင်ပန်းမြို့ ရှမ်းရဠ ဟု ပါရှိသည်။

NZ

-----------------------------------------------------------------------------------------------------------------------

ကျပ်ငါးသိန်းသို့ ဒုတိယအကြိမ်ထပ်မံလျော့ချခဲ့သည့် ADSL အင်တာနက်လိုင်း

ရတနာပုံတယ်လီပို့စ် ကုမ္ပဏီလီမိတက် ဒါရိုက်တာအဖွဲ့ အစည်းအဝေးကို နေပြည်တော်တွင် သြဂုတ်လ ၆ ရက်နေ့က ကျင်းပခဲ့ရာ  အစည်းအဝေးသို့တက်ရောက်လာသော ဒါရိုက်တာအဖွဲ့က Asymmetric Digital Subscriber Line (ADSL) အင်တာနက်လိုင်းများကို ကျပ် ၅ သိန်းဖြင့်ရောင်းချရန် ဆုံးဖြစ်ခဲ့ကြောင်း သိရသည်။

အဆိုပါ (ADSL) အင်တာနက်လိုင်းများကို ယခင်က ကျပ် ၁၅ သိန်းဖြင့်ရောင်းချခဲ့ရာ ၂၀၁၁ ခုနှစ် ဇူလိုင်လ ၂၀ ရက်နေ့တွင် ကျပ် ၇ သိန်းဖြင့်ရောင်းချရန် တရားဝင်သတ်မှတ်ခဲ့ပြီး ဝယ်ယူသူနည်းပါ သဖြင့် သြဂုတ်လ ၆ ရက်နေ့က နေပြည်တော်တွင် ကျင်းပခဲ့သည့် ရတနာပုံတယ်လီပို့ ကုမ္ပဏီလီမိတက် ဒါရိုက်တာအဖွဲ့ အစည်းအဝေးတွင် ကျပ် ၅ သိန်း သို့ ဒုတိယအကြိမ်ဈေးထပ်မံလျော့ချခဲ့ ခြင်းဖြစ်သည်။

အဆိုပါ (ADSL) အင်တာနက်လိုင်းတွင် အင်တာနက်မြန်နှုန်း 128 Kb, 256 Kb နှင့် 512 Kb ဟူ၍ သုံးမျိုးရှိကြောင်း သိရသည်။ ယခုအချိန်တွင် FTTX အင်တာနက်လိုင်းဝယ်ယူလိုသူများ အနေဖြင့် အင်တာနက်နှင့် ဖုန်းဝန်ဆောင်မှုများအတွက် ကျပ် ၇ သိန်းခွဲဖြင့် ဝယ်ယူနိုင်ကြောင်း သတင်းရရှိသည်။ မကြာမီကာလများတွင် ထွက်ပေါ်လာရန်ရှိသည့် ငါးသိန်းအောက် တန်ဖိုးနည်း ဂျီအက်အမ်ဖုန်းများတွင်လည်း အင်တာနက် အသုံးပြုနိုင်သည့် ဝန်ဆောင်မှုကို တစ်ခါတည်း ထည့်သွင်းပေးသွား ရန်ရှိသည်ဟု သိရသည်။

YC

-----------------------------------------------------------------------------------------------------------------------

လျှပ်စစ်မီတာခနှင့် ရေခွန်များကို အွန်လိုင်းမှပေးဆောင်နိုင်တော့မည်

လျှပ်စစ်မီတာခနှင့် ရေခွန်အစရှိသော အခွန်အခများကို သက်ဆိုင်ရာဌာနများသို့ လူကိုယ်တိုင်သွားရောက်တန်းစီ ပေးသွင်းနေရခြင်းများမှ အွန်လိုင်းမှပေးသွင်နိုင်ရန် စီစဉ်နေကြောင်း ရတနာပုံဝက်ဘ်ပေါ်တယ်မှ အမှုဆောင်အရာရှိချုပ် ဦးတင်အောင်မှ ပြောကြားသည်။

လျှပ်စစ်မီတာခနှင့် ရေခွန်အစရှိသော အခွန်အခများကို အွန်လိုင်းမှ ပေးသွင်းနိုင်ရန် ကြားခံအဖြစ် ဘဏ်စနစ်ကို အသုံးပြုသွားမည်ဖြစ်ရာ အွန်လိုင်းမှငွေပေးသွင်းလိုသူများအနေဖြင့် မြန်မာ့စီးပွားရေးဘဏ်နှင့် အာရှစိမ်းလန်းမှု ဖွံ့ဖြိုးရေး(AGD)ဘဏ် တို့တွင် ငွေစာရင်းစာအုပ် ပြုလုပ်ထားရန် လိုအပ်ကြောင်း သိရသည်။ ထို့နောက် ငွေစာရင်းစာအုပ်တွင် မိမိ ပေးသွင်းရမည့် ငွေပမာဏကို ထည့်သွင်းထားရမည်ဖြစ်ကာ ဘဏ်မှပေးသော Pin Code နံပါတ်ဖြင့် ရတနာပုံပေါ်တယ် ဝက်ဆိုဒ်ပေါ်မှ အခွန်ငွေများ ပေးဆောင်နိုင်တော့မည်ဖြစ်ကြောင်း သိရသည်။

ယခုအချိန်တွင် ရတနပုံပေါ်တယ်ဝက်ဆိုဒ်ကို အသုံးပြုကာ အွန်လိုင်းပေါ်မှ ဂျီအက်အမ် အော်တိုတယ်လီဖုန်းများ၏ အခွန်ငွေ ပေးဆောင်ခြင်းလုပ်ငန်းကို မြန်မာ့ဆက်သွယ်ရေးလုပ်ငန်း၊ ရတနာပုံဝက်ဘ်ပေါ်တယ်၊ မြန်မာ့စီးပွားရေးဘဏ်နှင့် အာရှစိမ်းလန်းမှုဖွံ့ဖြိုးရေး(AGD)ဘဏ် တို့ ပူးပေါင်း ဆောင်ရွက်လျက်ရှိကြောင်း သတင်းရရှိသည်။

အာရှစိမ်းလန်းမှုဖွံ့ဖြိုးရေးဘဏ်မှ အုပ်ချုပ်မှုဒါရိုက်တာ ဦးရဲမင်းဦးက ဖုန်းဘေလ်ဆောင်မှုလုပ်ငန်းအတွက် ဝန်ဆောင်ခကို ဖုန်းအခွန် ၁ ကြိမ် ပေးဆောင်လျှင် ၅၀၀ ကျပ်ဖြင့် ဆောင်ရွက်ပေးလျက်ရှိကြောင်း ပြောကြားသည်။

                                                                                                                Ref : Flower News

×××××××××××××××××××××××××××××××××××××××××××××××××××××××××××××××××

ပြည်တွင်းပါတီ၊ နိုင်ငံရေးသတင်းများ

အာဆီယံအဖွဲ့ဝင် နိုင်ငံများ၏ သံရုံးများ အာဆီယံအလံလွှင့်တင်အစီအစဉ် ထိုင်းမပါဝင်

ရန်ကုန်၊ သြဂုတ် ၈။

              အင်ဒိုနီးရှားနိုင်ငံတွင် ပြုလုပ်ခဲ့သည့် အာဆီယံ နိုင်ငံခြားရေးဝန်ကြီးများ အစည်းအဝေးမှ အာဆီယံအလံ စတင် အသုံးပြုရန် လမ်းညွှန်မှုအရ အာဆီယံအဖွဲ့ဝင် နိုင်ငံများတွင်ဖွင့်လှစ်ထားသော အာဆီယံအဖွဲ့ဝင်နိုင်ငံများ၏ သံရုံများတွင် အာဆီယံအလံ စတင်လွှင့်ထူခြင်း အခမ်းအနားကို  သြဂုတ်လ ၈ ရက်နေ့အထိ ကျင်းပပြုလုပ်ခဲ့ကြောင်း သတင်းရရှိသည်။

အာဆီယံအဖွဲ့တည်ထောင်ပြီး ၄၄ နှစ်အကြာတွင် အာဆီယံအဖွဲ့ကိုယ်စားပြုအလံကို သီးခြားသတ်မှတ်နိုင်ခဲ့ကြောင်း သိရသည်။ အာဆီယံအဖွဲ့ကိုယ်စားပြုအလံကို အပြာရောင်အောက်ခံထားကာ ယခင်အာဆီယံအမှတ်တံဆိပ်ဖြင့် ဖန်တီးထားခြင်းဖြစ်ပြီး အလံတွင်ပါရှိသော အပြာ၊ အနီ၊ အဖြူနှင့် အဝါရောင်တို့သည် အာဆီယံအဖွဲ့ဝင် ၁၀ နိုင်ငံ၏ နိုင်ငံတော်အလံများမှ အဓိကအရောင်များကို အသုံးပြုထားခြင်း ဖြစ်ကြောင်း အာဆီယံဝက်ဘ်ဆိုက်တွင် ဖော်ပြထားကြောင်း သိရသည်။

မြန်မာနိုင်ငံတွင် ဖွင့်လှစ်ထားသော အာဆီယံသံရုံးများအနေဖြင့် အင်ဒုိုနီးရှားသံရုံးမှစတင်ကာ အာဆီယံအလံ လွှင့်တင်ခြင်း အခမ်းအနားကို သြဂုတ်လ ၃ ရက်နေ့က ရန်ကုန်မြို့ပြည်ထောင်စု ရိပ်သာလမ်းရှိ အင်ဒိုနီးရှားသံရုံးတွင် ကျင်းပခဲ့သော်လည်း အာဆီယံနိုင်ငံ တစ်နိုင်ငံဖြစ်သည့် ထိုင်းသံရုံးတွင်မူ သြဂုတ်လ (၈) ရက်နေ့အထိ အာဆီယံအလံ လွှင့်ထူခြင်းမရှိသည့် အပြင်  ထိုင်းနိုင်ငံအလံကိုပါ တစ်ဝက်သာ လွှင့်ထူထားကြောင်းတွေ့ရပြီး မည်သည့်အတွက် ထိုသို့ လွှင့်ထူထားကြောင်းကို မသိရချေ။

Moe Z

-----------------------------------------------------------------------------------------------------------------------

ဒေါ်အောင်ဆန်းစုကြည်ကို လှုပ်ခွင့် ပိုပေးသင့်ဟုဆို

ရန်ကုန်၊ သြဂုတ် ၇။

လက်ရှိ အစိုးရအနေနှင့် ဒေါ်အောင်ဆန်းစုကြည်ကို ပိုမိုလှုပ်ရှားခွင့်ပေးကာ နှစ်ဦးနှစ်ဖက် ဆက်လက် ဆွေးနွေး သွားသင့်ကြောင်း ဟောင်ကောင် စီးတီးတက္ကသိုလ်၊ နိုင်ငံရေးသိပ္ပံ တွဲဖက် ပါမောက္ခ ဒေါက်တာ ကျော်ရင်လှိုင်က ပြောကြားသည်။

ယမန်နေ့က ပြည်ထောင်စု သမ္မတ မြန်မာနိုင်ငံ ကုန်သည်များနှုင့် စက်မှုလက်မှုလုပ်ငန်းရှင်များအသင်းချုပ် တွင် ကျင်းပသော ဒီမိုကရေစီ အသက်သွင်းရေး ဟောပြောပွဲတွင် တက်ရောက်လာသူများကို ယင်းကဲ့သို့ ဖြေကြားလိုက်ခြင်း ဖြစ်သည်။

“တွဲပြီးလုပ်လို့ရတာ အများကြီးပါ။ ဒါကြောင့် အစိုးရဲ့နဲ့ ငြင်းစရာရှိတာ ဆက်ငြင်း၊ အစိုးရက လုပ်ခွင့်ပြုသင့်တာ ဆက်လုပ်ခွင့်ပေးသင့်တယ်”ဟု ဒေါက်တာကျော်ရင်လှိုင်က ဆိုသည်။

ဒေါ်အောင်ဆန်းစုကြည်သည် နိုဝင်ဘာလအတွင်းက လွတ်မြောက်ပြီးနောက်ပိုင်း လူမှုရေးလုပ်ငန်းများကိုအသားပေး လုပ်ကိုင်နေပြီး ပြီးခဲ့သည့် လပိုင်းက ရှေးဟောင်းနယ်မြေ ပုဂံသို့ ပုဂ္ဂိုလ်ရေး အလည်အပတ် ခရီးထွက်ခွာခဲ့သည်။

ဒေါ်အောင်ဆန်းစုကြည်သည် ပြီးခဲ့သည့် ရက်သတ္တပတ်အတွင်း မြန်မာအစိုးရ အလုပ်သမားဝန်ကြီး ဦးအောင်ကြည်နှင့် တွေ့ဆုံခဲ့သော်လည်း ဆွေးနွေးသည့်အကြောင်းအရာများကို မသိရသဖြင့် အမျိုးသားပြန်လည် သင့်မြတ်ရေး အနာဂတ်အလားအလာနှင့် ပက်သက်၍ သုံးသပ်ရန် ခက်ခဲကြောင်း ပြောကြားသည်။

“ဒိုင်ယာလော့ဆိုတာက နှစ်ဦးနှစ်ဘက် အပေးအယူရှိမှရမှာ”ဟု ၎င်းက ဆိုသည်။

ဒေါ်အောင်ဆန်းစုကြည်၏ အမျိုးသားဒီမိုကရေစီအဖွဲ့ချုပ်သည် စစ်ဗိုလ်ချုပ်ဟောင်း ဦးတင်အေး ဦးဆောင်သော ရွေးကောက်ပွဲ ကော်မရှင်ထံ နိုင်ငံရေးပါတီအဖြစ် မှတ်ပုံတင်ရန်၊ လူမှုရေးလုပ်ငန်းများ လုပ်ကိုင်လိုပါက လူမှုရေးအသင်း အဖွဲ့အဖြစ် မှတ်ပုံတင်ရန် အစိုးရ၏ ဖိအားပေးခြင်း ခံနေရသည်။

အသင်းချုပ်တွင် ပြုလုပ်ရန်စီစဉ်ခဲ့ဖူးသော ဒေါက်တာကျော်ရင်လှိုင်၏ နိုင်ငံရေး သိပ္ပံသင်တန်း၊ မြန်မာသမ္မတ အကြံပေး ဒေါက်တာဦးမြင့်၏ ဆင်းရဲမှုဆိုင်ရာ အလုပ်ရုံဆွေးနွေးပွဲ တို့သည်လည်း အာဏာပိုင်များ၏ ဖိအားပေးမှုကြောင့် ပျက်ပြယ်ခဲ့ရဖူးသည်။

“ဒေါ်အောင်ဆန်းစုကြည်အနေနဲ့ ဒီထက်ပိုလုပ်ခွင့်ရှိသင့်တယ်ဆိုတာကိုတော့ လက်ခံပါတယ်။ သူမ အနေနဲ့ နိုင်ငံ ရေးပိုလုပ်ခွင့်ရအောင် နိုင်ငံရေး ပါတီမှာ မှတ်ပုံတင်သင့်တယ် ထင်တာပဲ”ဟု အသက် ၂၅ နှစ် အရွယ် လူငယ်တစ်ဦးက မှတ်ချက်ပြုသည်။

ဒေါ်အောင်ဆန်းစုကြည်သည် ပဋိပက္ခဖြစ်ပွားနေသော တိုင်းရင်းသားများနှင့် ညှိနှိုင်းအဖြေရှာရန် ပန်ကြားထားသည်။

အမျိုးသားဒီမိုကရေစီအဖွဲ့ချုပ် (NLD) က တရားဝင်ရပ်တည်ရေးကိစ္စကို ကမ္ဘာ့ကုလသမဂ္ဂ လူ့အခွင့်အရေး ကောင်စီသို့ မကြာမီ တင်ပြသွားရန် ရှိကြောင်း ပါတီက သတင်းထုတ်ပြန်ထားပြီး ဖြစ်သည်။

TH

-----------------------------------------------------------------------------------------------------------------------

စီးပွားရေးပိတ်ဆို့မှုများကို နိုင်ငံရေးပါတီအချို့ ကန့်ကွက်ရှုတ်ချ

ဇူလိုင်လ ၂၀ ရက်နေ့တွင် ကျင်းပခဲ့သော အမေရိကန်အောက်လွှတ်တော်အမတ်များ အစည်းအဝေးတွင် မြန်မာနိုင်ငံအား စီးပွားရေးပိတ်ဆို့မှု တစ်နှစ်ထပ်မံတိုးမြှင့်ရန် အဆိုတင်သွင်းခဲ့ခြင်းကို ပြည်တွင်း နိုင်ငံရေးပါတီအချို့မှ ကန့်ကွက် ရှုတ်ချကြောင်း သိရသည်။

မြန်မာနိုင်ငံအား လက်နက်များတင်ပို့မှုကို ၁၉၉၃ ခုနှစ်တွင် စတင်ပိတ်ပင်ခဲ့ပြီး ၁၉၉၇ ခုနှစ်တွင် ရင်းနှီးမြှုပ်နှံမှု အသစ်များ မပြုလုပ်ရန်တာမြစ်ခဲ့ပြီး ၂၀၀၃ ခုနှစ်နှစ်တွင် ပိတ်ဆို့မှုများကို ပိုမိုပြုလုပ်ခဲ့ကာ စီးပွားရေးပိတ်ဆို့မှုများအား တစ်နှစ်တစ်ကြိမ် သက်တမ်းတိုးမြှင့်ခဲ့ရာ ဇူလိုင်လ ၂၈ ရက်နေ့တွင် သက်တမ်းကုန်ဆုံးခဲ့ပြီး နောက်တစ်နှစ်ထပ်မံ သက်တမ်းတိုးရန် အမေရိကန်သမ္မတ ဘားရက်အိုဘားမား အတည်ပြု လက်မှတ်ရေးထိုးပြီးပါက စီးပွားရေးပိတ်ဆို့မှုဆက်လက် တည်ရှိနေမည်ဖြစ်ကြောင်း သိရသည်။

ဒီမိုကရက်တစ်ပါတီ(မြန်မာ)မှ ဒေါ်ချိုချိုငြိမ်းက ၎င်းတစ်ယောက်တည်းအနေဖြင့် စီးပွားရေးပိတ်ဆိုနေမှု Sanction ကိုမထောက်ခံကြောင်း ပြောကြားခဲ့သည်။ လသာမြို့နယ် ပြည်သူ့လွှတ်တော်အမတ် ဦးကြည်းမြင့်က ပိတ်ဆို့ အရေးယူမှုများကို ပြန်လည်ရုပ်သိမ်းနိုင်ရန် ညှိနှိုင်း ဆောင်ရွက်သွားမည်ဖြစ်ကြောင်း ပြောကြားသည်။

ဇူလိုင်လ ၂၇ ရက်နေ့က နေပြည်တော်တွင် ပထမဆုံးအကြိမ်ကျင်းပသော ပြည်ထောင်စု ရွေးကောက်ပွဲကော်မရှင်ဥက္ကဋ္ဌ နှင့် နိုင်ငံရေးပါတီများ တွေ့ဆုံပွဲကို တရားဝင်နိုင်ငံရေးပါတီ ၃၇ ခုရှိသည့်အနက် နိုင်ငံရေးပါတီ ၃၆ ခု တက် ရောက်ခဲ့ပြီး အဆိုပါတွေ့ဆုံပွဲတွင် ပြည်ထောင်စုရွေးကောက်ပွဲ ကော်မရှင် ဥက္ကဋ္ဌ ဦးတင်အေးက ပြည်ပနိုင်ငံအချို့မှ မြန်မာနိုင်ငံအပေါ် စီးပွားရေးပိတ်ဆို့မှုများ ပြုလုပ်နေခြင်းကို ဝိုင်းဝန်းကန့်ကွက်ကြရန် တိုက်တွန်း ပြောကြားခဲ့သည်။

Ref        :

×××××××××××××××××××××××××××××××××××××××××××××××××××××××××××××××××

သတင်းနှင့် ဆောင်းပါးများမှ ကောက်နှုတ်ချက်များ

"ဘဏ္ဍရေးနဲ့ ငွေရေးကြေးရေးကဏ္ဍကို ပြုပြင်ပြောင်းလဲမှု လုပ်သင့်တာ ကြာပါပြီ။ နိုင်ငံတစ်ခုရဲ့ နိုင်ငံခြားငွေ လဲလှယ်နှုန်း က ခေတ်နဲ့လျော်ညီတဲ့ အခြေအနေ ဖြစ်သင့်ပါတယ်။ နိုင်ငံတစ်နိုင်ငံရဲ့ ငွေကြေးတန်ဖိုး သတ်မှတ်တဲ့ နေရာမှာ အမျိုးမျိုး ရှိပေမယ့် အဓိကနှစ်မျိုးရှိပါတယ်။ တစ်ခုက နှုန်းတစ်ခုသတ်မှတ်ပြီး ခိုင်မာတယ်လို့ သတ်မှတ်ထားတဲ့ နိုင်ငံခြားငွေကြေး တစ်ခုနဲ့ တွဲချိတ်ထားတဲ့နည်းပါ။ နောက်တစ်နည်းက နှုန်းထားတစ်ခု မသတ်မှတ်ဘဲ ကုန်သွယ်ဘက်နိုင်ငံတွေနဲ့ နှိုင်းယှဉ်ပြီး သီးခြားလွတ်လပ်စွာ တွက်တဲ့နည်းပါ။ ဘယ်လိုနည်းပဲဖြစ်ဖြစ်ထိန်း ကျောင်းနိုင်တဲ့ ကျွမ်းကျင်မှုရှိဖို့လိုပါတယ်။ ဈေးကွက် အခြေအနေနဲ့ ဝယ်လိုအား၊ ရောင်းလိုအားအပေါ် မူတည်ပြီး အမျိုးမျိုးပြောင်းလဲမှုတွေနဲ့ လိုက်လျောညီထွေ ဖြစ်နိုင်ရပါမယ်။ ဘဏ်တိုးနှုန်း၊ နိုင်ငံခြားငွေလဲနှုန်း၊ အခွန်၊ ငွေကြေးစီးဆင်းမှု၊ နိုင်ငံခြားရင်းနှီးမြှုပ်နှံမှု စတာတွေက အားလုံးနဲ့ စပ်ဆက်နေတာပါ။ တစ်ခုလုံးကို ခြုံငုံစဉ်းစားဖို့ လိုပါတယ်။ စီးပွားရေးပြုပြင်ပြောင်းလဲမှုမှာ ဘဏ္ဍရေးနဲ့ ငွေရေးကြေးရေး ကဏ္ဍကို အရင်ပြောင်းနိုင်ဖို့လိုပါတယ်။ ဒီကဏ္ဍကို ပြုပြင်ပြောင်းလဲမှုမလုပ်နိုင်ရင် ကျန်တဲ့ပြောင်းလဲမှုတွေမှာ ထိရောက်မှု နည်းသွားမှာဖြစ်ပါတယ်"

ဇူလိုင် ၁၀ ထုတ် Weekly ELEVEN အတွဲ (၆) အမှတ် (၄၅) တွင်ပါသည့်"နိုင်ငံခြားငွေလဲနှုန်းနှင့် ဘဏ်တိုးနှုန်း အပါအဝင် ဘဏ္ဍရေးနှင့် ငွေရေးကြေးရေးကဏ္ဍ ပြုပြင်ပြောင်းလဲမှုများ ပြုလုပ်နိုင်ရန် သမ္မတအကြံပေးအဖွဲ့နှင့် ပညာရှင်များအစုအဖွဲ့ ပူးပေါင်းဆောင်ရွက်နေ" သတင်းမှ ပုဂ္ဂလိကဘဏ်တစ်ခုမှ ဒုတိယဥက္ကဋ္ဌတစ်ဦး၏ပြော ကြားချက်အပေါ် ကောက်နှုတ်ချက်

-----------------------------------------------------------------------------------------------------------------------

"စဉ်းစားထားတာတွေကို လွှတ်တော်မှာတင်ပြပြီး နိုင်ငံတော်က လုပ်မှရမှာပေါ့။ လယ်သမားတွေရဲ့ အခွင့်အရေးနဲ့ ပတ်သက်ပြီးတင်မှာပါ။ လယ်သမားတွေအခွင့်အရေးမရှိရင် အနိုင်ကျင့်ခံရမှာပေါ့"

သြဂုတ် ၈ ထုတ် The Messenger အတွဲ (၂) အမှတ် (၁၂) တွင်ပါသည့် "လယ်ယာမြေအငြင်းပွားမှုများအတွက် လယ်သမားများ နစ်နာမှုမရှိစေရန် မြေယာဥပဒေနှင့်ပတ်သက်၍ လိုအပ်သည့်များကို ပြင်ဆင်ရန်စဉ်းစားနေ" သတင်းမှ ပြည်ထောင်စုကြံ့ခိုင်ရေး နှင့်ဖွံ့ဖြိုးရေးပါတီအတွင်းရေးမှူး ဦးဌေးဦး၏ ပြောကြားချက်အပေါ် ကောက်နှုတ်ချက်

-----------------------------------------------------------------------------------------------------------------------

"ကျွန်တော်တို့ဆီမှာက Consultant ကုမ္ပဏီတွေကို မသုံးတတ်သေးတာလည်းပါတယ်။ သုံးတက်တဲ့လုပ်ငန်းတွေလည်း ရှိပါတယ်။ ဒါပေမဲ့ အရေအတွက်အားဖြင့်တော့ အရမ်းကို နည်းပါတယ်။ ဒီလို Consultant တွေသုံးရခြင်းရဲ့ အကျိုးကျေးဇူးက ကုမ္ပဏီပိုင်ရှင်တွေ အနေနဲ့ အစစအရာရာ သိစရာမလိုဘူး။ ကျွန်တော်တို့က မှန်ကန်တဲ့ နည်းလမ်းနဲ့ လမ်းပြပေးတယ်၊ အကြံပေးတယ်။ လုပ်ငန်းလုပ်တဲ့နေရာမှာ ကျွန်တော်တို့က ကိုယ့်အပိုင်းလိုက် ကျွမ်းကျင်သူတွေဆိုတော့ သေချာပေါက် လုပ်ငန်းလည်ပတ်မှု မြန်တယ်၊ အားနည်းချက်ရှိတာက အကြံပေးအဖွဲ့တွေက နောက်ပိုင်းမှာ ပွဲစားဆန်ဆန်  လုပ်တာတွေ ရှိလာတော့ image မကောင်းတော့ဘူးပေါ့"

သြဂုတ် ၈ ထုတ် The Messenger အတွဲ (၂) အမှတ် (၁၂) တွင်ပါသည့် "ပြည်တွင်းကုမ္ပဏီများ အကြံပေးပညာရှင်အဖွဲ့ ဌားရမ်းမှုနည်းပါး" သတင်းမှ စီးပွားရေးလုပ်ငန်းဆိုင်ရာနှင့် ကုမ္ပဏီတည်ထောင်မှုဆိုင်ရာ အကြံပေးဦး ဌေးအောင်မိုး၏ ပြောကြားချက်အပေါ် ကောက်နှုတ်ချက်

-----------------------------------------------------------------------------------------------------------------------

"နိုင်ငံတစ်နိုင်ငံမှာ အဂတိလိုက်စားမှုကို ဖြစ်စေမယ့်အချက်သုံးချက်ရှိတယ်။ ပထမအချက်က နိုင်ငံတစ်နိုင်ငံမှာ အုပ်ချုပ် တဲ့သူ စည်းမျဉ်းစည်းကမ်းတွေ၊ ဥပဒေတွေအများကြီးရှိနေမယ်။ အဲဒါဆိုရင် Economic Rank တွေများ လာပြီး အဂတိ လိုက်စားမှုတွေ များမှာပဲ။ နောက်ဒီဟာတွေကို အကောင်အထည်ဖော်တဲ့အခါမှာလည်း ပွင့်လင်းမှု မရှိဘူးဆိုရင် အဂတိ လိုက်စားမှု များမှာပါပဲ။ နောက်ဒုတိယအချက်က လုပ်ပိုင်ခွင့်တွေ အများကြီးပေးထားမယ် ဆိုရင်လည်း အဂတိ လိုက်စားမှုဟာ အကြီးအကျယ်ဖြစ်မှာပဲ။ နောက်တတိယအချက်က ဘာလဲဆိုတော့ ဒီဟာကို တာဝန်ခံမယ့်လူတွေအတွက် စည်းမျဉ်း စည်းကမ်းတွေလည်း ထုတ်မထားဘူးဆိုရင်သွားပြီ။ အဲဒီတိုင်းပြည်ဟာ အဂတိလိုက်စားမှု အကြီးအကျယ်ဖြစ်ပြီ။ Comple tely ပဲ"

သြဂုတ် ၁၀ ထုတ် The Myanmar Post အတွဲ (၃) အမှတ် (၃၀) တွင်ပါသည့် "သမ္မတအကြံပေးဆရာကြီး ဦးမြင့် ဟော ပြောသော အကျင့်ပြတ်ခြစားမှုအကြောင်း" မှ ဦးမြင့်၏ ပြောကြားချက်အပေါ် ကောက်နှုတ်ချက်

×××××××××××××××××××××××××××××××××××××××××××××××××××××××××××××××

ဆောင်းပါးကဏ္ဍ

ဒီမိုကရေစီနှင့်သမူဟ

ဒီမိုကရေစီသည် တကမ္ဘာလုံးမှ ကျင့်သုံးနေသည့် နိုင်ငံရေးစနစ်တစ်ခုဖြစ်သည်နှင့်အညီ ဒီမိုကရေစီသ အခြေခံ ဘောတရားများနှင့် အဆိုးဘက်မျက်နှာစာကို ယခုအချိန်ထိ အငြင်းပွားနေရဆဲပင် ဖြစ်လေသည်။ နာမည်ကျော် နိုင်ငံရေး သိပ္ပံပညာ ရှင်တစ်ဦးဖြစ်သူ ဖရန်စစ်ဖူးကူးယားမားက လစ်ဘရယ်ဒီမိုကရေစီနှင့် ဈေးကွက်စီးပွားရေးစနစ်မှာ ကွန်မြူနစ် စနစ်နှင့် စီမံကိန်းစီးပွားရေးစနစ်ကို အပြီးတိုင် အနိုင်ရသွားခဲ့ပြီ၊ ထိုကြောင့် လူသားများမှာ အခြားရွေးချယ် စရာမရှိတော့ပြီ၊ လစ်ဘရယ်ဒီမိုကရေစီနှင့် ဈေးကွက်စီးပွားရေးစနစ်ကိုသာ နောက်ဆုံးရွေးချယ်ရမည်ဖြစ်ကြောင်း အကောင်းမြင် ရှုထောင့် က ထုတ်ဖော်ရေးသား သွားခဲ့လေသည်။

သို့သော် ဆိုဗီယက်ယူနီယမ်ကြီး ပြိုကွဲပြီးနောက်ပိုင်း ဒီမိုကရေစီအနာဂတ်မှာ အကောင်းဘက်သို့ချည်းပင် ဦးတည်သွားသည်တော့ မဟုတ်ပါ။ ဥပမာ ယဲလ်ဆင်ခေတ်က ရုရှားမှာ နိုင်ငံရေးလွတ်လပ်ခွင့် ရှိသလောက် ယခု မတ်ဗီဒတ် လက်ထက် ရုရှားမှာ လွတ်လပ်ခွင့် နည်းပါးသွားခဲ့လေသည်။ ဒီမိုကရတစ် အင်စတီကျူးရှင်းများ အခိုင်အခန့်ရှိပါသည်ဟု ဆိုသော အမေရိကန်နိုင်ငံရေးမှာပင်လျှင် အစွန်းနှစ်ဖက် နိုင်ငံရေးစနစ်မျိုး မဖြစ်ပေါ်စေရန် ပညာရှင်များက ဝိုင်းဝန်းဝေဖန် ထောက်ပြခြင်းမျိုးလည်း ရှိလေသည်။ ထို့အပြင် ဒီမိုကရေစီမှာ အနောက် စက်မှုဖွံ့ဖြိုးပြီးနိုင်ငံများတွင် အဆက်အဟပ် တည့်သလောက် ဖွံ့ဖြိုးဆဲနိုင်ငံများ တွင်တော့ ဒီမိုကရတစ် အလေ့အကျင့်များ ဖြစ်ပေါ်လာဖို့ အခက်အခဲများနှင့် အကန့် အသတ်များ ရှိနေဆဲပင် ဖြစ်လေသည်။

ဒီမိုကရေစီကို နိုင်ငံရေးသိပ္ပံပညာရှင်များ၊ အတွေးအခေါ် ပညာရှင်များက အဓိပ္ပာယ်များစွာ (ခန့်မှန်းချိန် ၁၅၀) ဖွင့်ဆိုထားသော်လည်း ယနေ့အထိ ပညာရှင်အများစု လက်ခံထားသော ဖွင့်ဆိုချက်မှာ By the people, Of the people, For the people ဟူ၍ဖြစ်လေသည်။ သီအိုရီအရတွင်တော့ လူထုမှ မိမိအကျိုးစီးပွားကို ဆောင်ရွက်ပေးမည့် လူထု ကိုယ်စားလှယ်ကို ရွေးချယ်တင်မြောက်ပေးခြင်းဖြင့် အုပ်ချုပ်စေခြင်းမျိုး ဖြစ်လေသည် စံနှုန်းအခြေပြု ချဉ်းကပ်မှုမျိုး အလွယ်ကူဆုံး နားလည်၍ ရနိုင်လေသည်။ သို့သော် လက်တွေ့အာဏာ နိုင်ငံရေးဖြစ်စဉ်မှာတော့ မိမိအာဏာတည်မြဲရေးအတွက် ညစ်နည်းပေါင်းစုံဖြင့် ညစ်လာကြပြီး လူထုအကျိုးကို အမှန်တကယ် မဆောင်ရွက်နိုင်သည့်အခါ ဘောဂဗေဒဘာသာရပ် သဘောတရားတစ်ခု ဖြစ်သည့် Priciple-agent problem မျိုး ပေါ်ပေါက်လာရတော့သည်။ လုပ်တတ်ကိုင်တတ်သည့် လူနည်းစုက ကိုယ့်ကျိုးစီးပွား အတွက် ဆောင်ရွက်လာကြသောအခါ ဒီမိုကရေစီစနစ်မှာ ရင့်ကျက်ပြည့်ဝမှုသို့ ရောက်ရှိ မသွားဘဲ အော်လီဂါခီစနစ်ထဲမှာပင် တဝဲဝဲလည်ကာ နိုင်ငံဖွံ့ဖြိုးရေး တိုးတက်ရေးအတွက် အဟန့်အတားများ ဖြစ်ပေါ်လာ ရလေသည်။ ယင်းကို ဖွံ့ဖြိုးဆဲနိုင်ငံများ၏ ဒီမိုကရက်တစ် နိုင်ငံရေးဖြစ်စဉ်များတွင် အများဆုံးတွေ့မြင်ရလေသည်။ ဥပမာ အားဖြင့် ဖိလစ်ပိုင်မှာ အမေရိကန်ကိုလိုနီဖြစ်ခဲ့စဉ်က အမေရိကန်နိုင်ငံအနေဖြင့် ဒီမိုကရက်တစ် အင်စတီကျူးရှင်း တစ်ခု ဖြစ်သော လွှတ်တော်ကိုသာစနစ်တကျ တည်ဆောက်ပေးသွားခဲ့သည့်အတွက် ကျန်သည့် အင်စတီကျူးရှင်းများ အားနည်းကာ တည်ငြိမ်သည့် ဒီမိုကရေစီစနစ်ကို ယခုထက်တိုင်မရေးတက်သေးဖြစ်နေရလေသည်။ ထို့အပြင် ဖိလစ်ပိုင် နိုင်ငံရေး အထက်တန်းလွှာ အသိုင်းအဝိုင်းမှာ ကြွယ်ဝချမ်းသာသည့် မြေရှင်မျိုးရိုးမှ ဆင်းသက်လာသူများ ဖြစ်လေရာ အခြားသော လူမှုလူတန်းစားများမှာ နိုင်ငံရေးတွင် အထက်တန်းသို့ ရောက်နိုင်ရန် အခွင့်အလမ်း နည်းပါးလေသည်။

ဒီမိုကရေစီအသီးအပွင့်များကို အမှန်တကယ် ခံစားလိုလျှင် ပြည်သူအများအား နိုင်ငံရေး၊ စီးပွားရေးနှင့် ဆိုင်သော အသိပညာများကို တက်နိုင်သမျှ ရရှိအောင် ဖန်တီးဆောင်ရွက်ပေးခြင်း ဖြစ်လေသည်။ သို့မှသာ ပြည်သူများမှာ နိုင်ငံသား လှုပ်ရှားမှုဖြစ်စဉ်များ၊ အာဏာနိုင်ငံရေးမဟုတ်သည့် နိုင်ငံအရေးလှုပ်ရှားမှု ဖြစ်စဉ်များတွင် တက်တက်ကြွကြွ ပါဝင်ပတ် သက်လာမှာ ဖြစ်လေသည်။ ကျန်းမာရေးစနစ်၊ ဆေးရုံစနစ် ကောင်းမွန်လာစေရေးအတွက် ဆရာဝန်များမှ မြန်မာနိုင်ငံ ဆရာဝန်များအသင်းမှတစ်ဆင့် ပြည်သူ့ကျန်းမာရေးစနစ် ယခုထက်ပိုမို ကောင်းမွန်အောင် အလုပ်ရုံ ဆွေးနွေးမှုများ ပြုလုပ်ခြင်း၊ အချိန်ပိုင်း အခမဲ့ဆေးကုသပေးခြင်းမျိုး ဆောင်ရွက်ခြင်း၊ အမြဲရှုံးနေသော မြန်မာ့လက်ရွေးစင် ဘောလုံးအသင်း ပိုမို ကောင်းမွန်လာစေရန် ဘောလုံးဝါသနာပါသော လူငယ်၊ လူလတ်၊ လူကြီးများမှ တစ်နိုင်ငံလုံးအနှံ့ ရပ်ကွက်ပွဲများ၊ မြို့နယ်ပွဲ များကို ကျင်းပစေ၍ ယင်းမှ ထူးချွန်သူများကို မြန်မာ့လက်ရွေးစင် ဘောလုံးအသင်းသို့ ခေါ်ရန် မြန်မာနိုင်ငံ ဘောလုံးအဖွဲ့ချုပ်ကို တိုက်တွန်းနှိုးဆော်စေခြင်းတို့ ဖြစ်လေသည်။

မြန်မာနိုင်ငံသည် ယခင် ပါလီမန်ဒီမိုကရေစီခေတ်ကို ဖြတ်သန်းခဲ့ဖူးသော်လည်း ဆိုရှယ်လစ်စနစ်၊ အာပိုင်စနစ်နှင့် နှစ်ပေါင်း ၅၀ နီးပါး ယဉ်ပါးလာခဲ့ပြီးမှ ယခုမှတဖန် ဒီမိုကရေစီနိုင်ငံရေးစနစ်ကို ပြန်လည်ကျင့်သုံးမည်ဖြစ်ရာ ဒီမိုကရက်တစ် အလေ့အကျင့်များ ကြွယ်ဝမှု ရှိမည်တော့မဟုတ်။ ယခုအချိန်အခါသည် မြန်မာနိုင်ငံအဖို့ စီးပွားရေးဖွံ့ဖြိုးတိုးတက်ရန်၊ ဒီမိုကရေစီ ဖွံ့ဖြိုးရန်အတွက် လမ်းဆုံလမ်းဂွရောက်နေသည့် အခြေအနေမျိုး ဖြစ်လေသည်။ ယခုအချိန်မှစတင်၍ Stake holder ပြည်သူအပေါင်း နိုင်ငံရေး၊ စီးပွားရေးအင်စတီကျူးရှင်းများကို စနစ်တကျတည်ဆောက်သွားဖို့ အထူးပင် လိုအပ်ပါသည်။ သို့မှသာ ဖြစ်ပေါ်လာဖွယ်ရှိသည့် မတည်ငြိမ် မှုများကို ထိခိုက်နစ်နာမှု အနည်းဆုံး ဖြေရှင်းသွားနိုင်ဖို့ပင် ဖြစ်လေသည်။(ဥပမာ ငွေကြေးလဲလှယ်နှုန်းကိစ္စရပ်မျိုး) ဒီမိုကရေစီဆိုသည်မှာ စနစ်တကျ အသုံးချတတ်လျှင် အခြားသော စနစ် များထက် မညီမျှမှုများကို ညီမျှမှုရှိလာအောင် ဆောင်ရွက်၍ ရနိုင်ခြင်း၊ နိုင်ငံသားအခွင့်အရေးများကို အခြေခံဥပဒေဘောင်အတွင်း ပြည့်ပြည့်ဝဝအသုံးချနိုင်ခြင်း အစရှိသည့် အကျိုးကျေးဇူးများ ရှိပါသည်။ မြန်မာနိုင်ငံတွင် အစိုးရရော၊ ပြည်သူရော ဒီမိုကရက်တစ် အလေ့အကျင့်များကို တာဝန်ယူမှုအပြည့်၊ တာဝန်ခံမှုအပြည့် ကျင့်သုံးသွားမည်ဆိုပါက တရားဥပဒေ စိုးမိုးမှုရှိသော ဒီမိုကရေစီနိုင်ငံတော်ကို များမကြာမီကာအတွင်း တွေ့မြင်လာနိုင်မည်ဖြစ်ပါကြောင်း.........။

×××××××××××××××××××××××××××××××××××××××××××××××××××××××××××××××

 

 


Google Docs makes it easy to create, store and share online documents, spreadsheets and presentations.
Logo for Google Docs