Transparency Myanmar

transparency.myanmar@gmail.com

Document yangonchronicle2011
yangonchronicle2011

၃၀. ၄.၂၀၁၂

ပြည်တွင်းသတင်းများ

  1. ဇွန်လအတွင်း ကမ္ဘာ့ဘဏ် ရုံးခွဲများ ပြန်ဖွင့်မည်
  2. ပထမဆုံးအကြိမ် မကွေး လယ်သမားသမဂ္ဂဖွဲ့စည်း

ပြည်တွင်းပါတီ၊ နိုင်ငံရေးသတင်းများ

  1. ကုလအတွင်းရေးမှူးချုပ် နေပြည်တော်သို့ ရောက်ရှိ
  1. ပြည်သူနှင့်မဟာမိတ်တို့ကို လေးစားသဖြင့် လွှတ်တော်တက်ကြောင်း ဒေါ်ဆောင်ဆန်းစုကြည်ဆို
  2. NLD လွှတ်တော်တက်ခြင်းကို ပြည်ခိုင်ဖြိုးကြိုဆို

သတင်းနှင့် ဆောင်းပါးများမှ ကောက်နှုတ်ချက်များ

*****************************************

ပြည်တွင်းသတင်းများ

ဇွန်လအတွင်း ကမ္ဘာ့ဘဏ် ရုံးခွဲများ ပြန်ဖွင့်မည်

၂၀၁၂ ဇွန်လအတွင်း မြန်မာနိုင်ငံ၌ ကမ္ဘာ့ဘဏ်ရုံးခွဲများ ပြန်လည်ဖွင့်လှစ်သွားမည်ဖြစ်ကြောင်း ကမ္ဘာ့ဘဏ်၏ အရှေ့ဘာရှ၊ ပစိဖိတ်ဒေစဆိုင်ရာ တာဝန်ရှိသူတစ်ဦးက ပြောကြားသည်။

“လာမယ့် ဇွန်လအတွင်းမှာကို မြန်မာနိုင်ငံမှာ ကမ္ဘာ့ဘဏ်ရုံးခွဲတစ်ခု ဖွင့်သွားမယ်လို့ ကြားပါတယ်။ မြန်မာနိုင်ငံရဲ့ စီးပွားရေးဖွံ့ဖြိုးမှု အလား အလာကောင်းတွေကို စမြင်နေရပါပြီ”ပာု မြန်မာ့အရေးလေ့လာနေသူတစ်ဦးက ဆိုသည်။

မြန်မာနိုင်ငံအတွင်း ယခုကဲ့သို့ ကမ္ဘာ့ဘဏ်ရုံးခွဲ လာရောက်ဖွင့်လှစ်ရခြင်းမှာ မြန်မာနိုင်ငံရှိ ပြည်သူများအား ကူညီနိုင်ရန်နှင့် လူထုဝန်ဆောင် မှုလုပ်ငန်းများ၊ ဖွံ့ဖြိုးတိုးတက်ရေးဆိုင်ရာ လုပ်ငန်းများအတွက် မြန်မာအစိုးရနှင့် ပူးပေါင်းဆောင် ရွက်သွားနိုင်ရန်အတွက်ဖြစ်ကြောင်း အထက်ပါပုဂ္ဂိုလ်က ဆက်လက်ဆိုသည်။

“လက်ရှိ မြန်မာနိုင်ငံရဲ့ အဓိက လိုအပ်ချက်ကတော့ နိုင်ငံဖွံ့ဖြိုးရေးအတွက် နိုင်ငံတကာ အကူအညီတွေ၊ ရသုံးမှန်းခြေ ငွေစာရင်းနဲ့ စီးပွားရေးရာ ကိစ္စတွေပဲဖြစ်ပါတယ်။ ဒီကိစ္စရပ်တွေကို ကမ္ဘာ့ဘဏ်ကျွမ်းကျင်သူတွေက ကူညီသွားမှာပါ”ပာု ကမ္ဘာ့ဘဏ်၏ တာဝန်ရှိသူတစ်ဦးက ဆိုသည်။

ကမ္ဘာ့ဘဏ်မှ မြန်မာနိုင်ငံအတွင်း ရုံးခွဲများလာရောက်ဖွင့်လှစ်မည်ဖြစ်သော်လည်း မြန်မာနိုင်ငံအနေဖြင့် ကမ္ဘာ့ဘဏ်အား ပေးချေရန် ကျန်ရှိနေ သေးသည့် အကြွေး အမေရိကန်ဒေါ်လာ ၃၉၃ သန်းနှင့် အာရှဖွံ့ဖြိုးရေးဘဏ်အား ပေးချေရန်ရှိသည့် အကြွေးအမေရိကန် ဒေါ်လာ သန်း ၅၀၀ ကို ပေး ချေရမည်ဖြစ်ပြီး ကမ္ဘာ့ဘဏ်အနေဖြင့် မြန်မာနိုင်ငံအတွင်း ဆင်းရဲမွဲတေမှု လျှော့ချရေး၊ အလုပ်အကိုင် ဖန်တီးရေးများအတွက် တာဝန်ရှိသူများနှင့် ပူးပေါင်း ပါဝင်ဆောင်ရွက်သွားရန် ဆန္ဒရှိနေကြောင်း သိရသည်။ထို့ပြင် မြန်မာနိုင်ငံ၏ လက်ရှိ ကြွေးမြီပြဿနာရပ်များအတွက် ဇွန်လအတွင်း ကမ္ဘာ့ဘဏ်၏ အရှေ့ အာရှ၊ ပစိဖိတ်ဒေသဆိုင်ရာ ဒုဥက္ကဋ္ဌ Pamela cox မှ မြန်မာနိုင်ငံသို့ လာရောက်မည်ဖြစ်ကြောင်း သိရသည်။

ကမ္ဘာ့ဘဏ်သည် မြန်မာနိုင်ငံအား ငွေချေးမှုများကို ၁၉၈၇ ခုနှစ်တွင် ရပ်တန့်ခဲ့ကြောင်း သိရသည်။

YC

-----------------------------------------------------------------------------------------------------------------------------------

ပထမဆုံးအကြိမ် မကွေး လယ်သမားသမဂ္ဂဖွဲ့စည်း

တောင်သူလယ်သမားများ လက်ရှိ ရင်ဆိုင်ကြုံတွေ့နေရသည့် အခက်အခဲများ၊ အကြပ်အတည်းများကို စုပေါင်း ဖြေရှင်းဆာင်ရွက်နိုင်ရန် မကွေး တိုင်းဒေသကြီး၊ အောင်လံမြို့နယ်အတွင်းရှိ ကျေးရွာအုပ်စုပေါင်း ၁၀၀ မှ တောင်သူလယ်သမားများမှ စုပေါင်း၍ ပထမဆုံးအကြိမ်အဖြစ် လယ်သမား သမဂ္ဂကို စတင် ဖွဲ့စည်းလိုက်ပြီ ဖြစ်ကြောင်း မကွေး တိုင်းဒေသကြီးမှ တောင်သူတစ်ဦးက ပြောကြားသည်။

“မကွေးတိုင်းဒေသကြီးထဲမှာရှိတဲ့ တောင်သူတွေရဲ့ အခက်အခဲတွေကို ဒီလယ်သမားသမဂ္ဂက စုပေါင်းပြီး ဖြေရှင်းနိုင်ဖို့အတွက် ဖွဲ့လိုက်တာပါ။ ဒီလယ်သမားသမဂ္ဂက လယ်သမားတွေရဲ့ အခွင့်အရေး အပြည့်အဝ ရရှိဖို့အတွက် ဦးစားပေးလုပ်ဆောင်သွားမှာပါ”ပာု မကွေးလယ်သမားသမဂ္ဂမှ တာဝန် ရှိသူတစ်ဦးက ပြောကြားသည်။

လက်ရှိအချိန်တွင် မကွေးလယ်သမားသမဂ္ဂအဖြစ် တရားဝင်မှတ်ပုံတင်နိုင်ရန် အောင်လံမြို့နယ်အတွင်းရှိ ကျေးရွာအုပ်စုပေါင်း ၁၀၀ မှ ကိုယ်စား လှယ်များ စီစဉ်ဆောင်ရွက်လျက်ရှိပြီး ဇူလိုင်လအတွင်း လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန၊ လွှတ်တော်အဆင့်ဆင့်နှင့် နိုင်ငံတော်သမ္မတ ထံသို့ တင်ပြနိုင်ရန် ဆောင်ရွက်လျက်ရှိကြောင်း တောင်သူတစ်ဦးက ဆိုသည်။

“မြန်မာနိုင်ငံရဲ့ အဓိကထွက်ကုန်တွေကို စိုက်ပျိုးနေတဲ့ တောင်သူတွေမှာ လက်ရှိ အခက်အခဲအများကြီးကို ကြုံတွေ့နေရပါတယ်။ ဒီတောင်သူ တွေရဲ့ အခက်အခဲတွေကို လွှတ်တော်ထဲမှာလည်း ကျယ်ကျယ်ပြန့်ပြန့်ဆွေးနွေးနေတာ မတွေ့ရသေးပါဘူး။ ဒီကိစ္စတွေကို ပြေလည်စေနိုင်ဖို့အတွက် လယ်သမားသမဂ္ဂကို ဖွဲ့စည်းလိုက်ရတာပါ။ တစ်နိုင်ငံလုံးမှာလည်း ဒီလိုမျိုး လယ်သမားသမဂ္ဂတွေ များများပေါ်ပေါက်လာဖို့ လိုအပ်ပါတယ်”ပာု မကွေး လယ်သမားသမဂ္ဂမှ တာဝန်ရှိ သူတစ်ဦးက ပြောကြားသည်။

မြန်မာနိုင်ငံရှိ တောင်သူများသည် လက်ရှိအချိန်တွင် အဓိကအခက်အခဲများအဖြစ် လယ်ယာမြေမှတ်ပုံတင်ခြင်း၊ ချေးငွေလုံလောက်စွာမရရှိခြင်း၊ ရာသီဥတုဖောက်ပြန်မှုများ ကြုံတွေ့ရခြင်း၊ လယ်ယာမြေလုပ်သား ရှားပါးခြင်း၊ တောင်ယာအထွက်နှုန်း လျော့ကျခြင်းများကို ခံစားရလျက်ရှိကြောင်း သိရ သည်။

YC

 *****************************************

ပြည်တွင်းပါတီ၊ နိုင်ငံရေးသတင်းများ

ကုလအတွင်းရေးမှူးချုပ် နေပြည်တော်သို့ ရောက်ရှိ

မြန်မာနိုင်ငံသမ္မတ ဦးသိန်းစိန် ဖိတ်ခေါ်ချက်ဖြင့် ရောက်ရှိလာသည့် ကုလသမဂ္ဂအတွင်းရေးမှူးချုပ် မစ္စတာ ဘန်ကီမွန်းသည် ဧပြီ ၃၀ ရက်နေ့ မနက် ကိုးနာရီက သမ္မတအိမ်တော်တွင် သမ္မတဦးသိန်းစိန် ခေါင်းဆောင်သည့်   ပြည်ထောင်စု အစိုးရအဖွဲ့ဝင်များနှင့် တွေ့ဆုံခဲ့သည်။

အဆိုပါတွေ့ဆုံမှုတွင် ပြည်ထောင်စုအစိုးရအဖွဲ့မှ ပြည်ထဲရေးဝန်ကြီး ဒုတိယဗိုလ်ချုပ်ကြီး ကိုကို၊ ယဉ်ကျေးမှုနှင့် ပြန်ကြားရေးဝန်ကြီး ဦးကျော် ဆန်း၊ လူဝင်မှုကြီးကြပ်ရေးဝန်ကြီး ဦးခင်ရီနှင့်အခြားသော ပြည်ထောင်စုဝန်ကြီးသုံးဦး တက်ရောက်ခဲ့ပြီး မြန်မာနိုင်ငံတွင် ဖြစ်ပေါ်ပြောင်းလဲနေသည့် နိုင်ငံ ရေး အခြေအနေများကို ဦးစားပေးဆွေးနွေးခဲ့ကြောင်း သိရသည်။

ကုလအတွင်းရေးမှူးချုပ် မစ္စတာ ဘန်ကီမွန်းသည် ယင်းနေ့ ၁၀ နာရီခန့်မှာ ပြည်သူ့လွှတ်တော်သို့ သွားရောက်ပြီး ပြည်သူ့လွှတ်တော်ဥက္ကဋ္ဌ သူရဦးရွှေမန်း၊ အမျိုးသားလွှတ်တော်ဥက္ကဋ္ဌ ဦးခင်အောင်မြင့်တို့နှင့် တွေ့ဆုံခဲ့ပြီး၊ တတိယအကြိမ် ပြည်ထောင်စုလွှတ်တော် ပထမပုံမှန်အစည်းအဝေးတွင် နာရီဝက်ကြာ မိန့်ခွန်းပြောခဲ့သည်။

ယင်း၏မိန့်ခွန်းတွင့် မြန်မာသမ္မတသိန်းစိန်အနေဖြင့် နိုင်ငံရေးအကျဉ်းသားအားလုံးကို လွှတ်ပေးလိမ့်မည်ဟု မိမိမျှော်လင့်ထားကြောင်း၊ ကရင် များနှင့် အပစ်အခတ်ရပ်ဆဲရေးကိစ္စ အောင်မြင်စွာ လုပ်ဆောင်နေသည်ကို မိမိတို့ကြိုဆိုပါကြောင်း၊ ကချင်များနှင့် ပတ်သက်၍မှု မည်သည့်အတွက်ကြောင့် အပစ်အခတ် မရပ်ဆဲနိုင်သည်ကို မိမိတို့ စိတ်မကောင်းဖြစ်မိပါကြောင်း ပါရှိသည်။

ဆက်လက်၍ ကုလသမဂ္ဂအနေဖြင့် မြန်မာအစိုးရ၏ ပြန်လည်သင့်မြတ် စည်းလုံးရေးလုပ်ငန်းစဉ်အတွက် ပံ့ပိုးပေးနိုင်သည့် ကိစ္စမှန်သမျှအတွက် ပံ့ပိုးပေးသွားမည်ဖြစ်သည့် မိမိတို့အနေဖြင့် မြန်မာနိုင်ငံ အမျိုးသားလူ့အခွင့်အရေးကော်မရှင်၏ လုပ်ငန်းများ အပြည့်အ၀ ဆောင်ရွက်နိုင်မည်ဟု မျှော်လင့် ထားကြောင်း ပြောကြားသွားသည်။

မစ္စတာ ဘန်ကီမွန်းသည် မြန်မာနိုင်ငံတွင် သုံးရက်ကြာနေထိုင်မည်ဖြစ်သည့်အပြင် အမျိုးသားဒီမိုကရေစီအဖွဲ့ချုပ်ဥက္ကဋ္ဌ ပြည်သူ့လွှတ်တော် ကိုယ်စားလှယ် ဒေါ်အောင်ဆန်းစုကြည်နှင့် မေလ ၁ရက်နေ့တွင် တွေ့ဆုံရန် ရှိကြောင်း သိရသည်။

 -----------------------------------------------------------------------------------------------------------------------------------

ပြည်သူနှင့်မဟာမိတ်တို့ကို လေးစားသဖြင့် လွှတ်တော်တက်ကြောင်း ဒေါ်ဆောင်ဆန်းစုကြည်ဆို

ကြားဖြတ်ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်အား ထောက်ခံမဲပေးခဲ့သည့် ပြည်သူလူထုနှင့် လွှတ်တော်အတွင်း NLD ကို စောင့် ကြိုနေသည့် မဟာမိတ်တို့ကို လေးစားသဖြင့် လွှတ်တော် အစည်းအဝေးများကို တက်ရောက်မည်ဖြစ်ကြောင်း အမျိုးသားဒီမိုကရေစီအဖွဲ့ချုပ်ဥက္ကဋ္ဌ ကော့မှုးမြို့နယ် ပြည်သူ့လွှတ်တော်ကိုယ်စားလှယ် ဒေါ်အောင်ဆန်းစုကြည်က ဧပြီလ ၃၀ရက်နေ့ အမျိုးသားဒီမိုကရေစီအဖွဲ့ချုပ်တွင် ပြုလုပ်သည့် သတင်းစာရှင်းလင်းပွဲတွင် ပြောကြားသည်။

ဒေါ်အောင်ဆန်းစုကြည် ဦးဆောင်သည့် အမျိုးသားဒီမိုကရေစီအဖွဲ့ချုပ်အနဖြင့် လွှတ်တော်တွင်းသို့ ရောက်သည့်အခါ ဗမာပါတီများ၊ တိုင်းရင်း သားပါတီများနှင့် လက်တွဲ၍ ပြည်တွင်းငြိမ်းချမ်းရေးနှင့် တရားဥပဒေစိုးမိုးရေး၊ ဖွဲ့စည်းပုံ အခြေခံဥပဒေပြင်ဆင်ရေး ကိစ္စရပ်များကို လုပ်ဆောင်ရန်ရှိ ကြောင်း သိရသည်။

"အစကတည်းက ကျွန်မတို့က ပါတီမှတ်ပုံတင်ဥပဒေနဲ့ ရွေးကောက်ပွဲဥပဒေတွေမှာ စာသားတွေပြင်ဖို့ ပြောတုန်းက ကျွန်မတို့ တစ်ချိန်တည်း မှာ ဒီဇယားထဲမှာပါတဲ့ ကျမ်းကျိန်လွှာကိစ္စကို ကိုင်တွယ်ဖို့ ကျွန်မအနေနဲ့ လစ်ဟင်းခဲ့ပါတယ်။ အဲဒီတော့ ဒါကို ကျွန်မ တာဝန်ယူတယ်။ ကျွန်မရဲ့ လစ်ဟင်း ချက် တစ်ခုကြောင့်မို့လို့ ပြည်သူရဲ့ဆန္ဒနဲ့ ကျွန်မတို့ မဟာမိတ်တွေရဲ့ဆန္ဒကို ထိပါးတဲ့အခြေအနေမျိုး လုံးဝမဖြစ်စေချင်ဘူး"ဟု ဒေါ်အောင်ဆန်းစုကြည်က သတင်းထောက်များကို ပြောကြားသည်။

တတိယအကြိမ် ပထမပုံမှန်ပြည်ထောင်စုလွှတ်တော် အစည်းအဝေးသည် ဧပြီ ၃၀ ရက်နေ့တွင် ရပ်နားလိုက်သော်လည်း၊ ပြည်သူ့လွှတ်တော် အစည်းအဝေးမှာမှု မေလ ၂ ရက်နေ့အထိ ကျင်းပမည်ဖြစ်ကြောင်း သိရသည်။

ပြည်သူ့ လွှတ်တော်အစည်းအဝေး တက်ရောက်မည့်အမျိုးသားဒီမိုကရေစီအဖွဲ့ချုပ်၏လွှတ်တော်ကိုယ်စားလှယ်များသည် မေလ ၁ရက်နေ့တွင် နေပြည်တော်သို့ ရောက်ရှိလာမည် ဖြစ်သည်။

KP

 -----------------------------------------------------------------------------------------------------------------------------------

NLD လွှတ်တော်တက်ခြင်းကို ပြည်ခိုင်ဖြိုးကြိုဆို

လွှတ်တော်ကိုယ်စားလှယ်အဖြစ် လွှတ်တော်အစည်းအဝေး တက်ရောက်ရာတွင် ရွတ်ဆိုရမည့် ကျမ်းကျိန်စာသားကြောင့် လွှတ်တော်တက် ရောက်ရန် ဆိုင်းငံ့နေသည့် အမျိုးသားဒီမိုကရေစီ အဖွဲ့ချုပ်သည် မေလ ၂ ရက်နေ့တွင် ကျင်းပမည့် လွှတ်တော်အစည်းအဝေးများကို တက်ရောက်မည် ဖြစ်ကြောင်း ဆုံးဖြတ်လိုက်သည်ကို လွှတ်တော်တွင်း အင်အားကြီးပါတီဖြစ်သည့် ပြည်ခိုင်ဖြိုးပါတီက ကြိုဆိုပါကြောင်း ယင်းပါတီ၏ ဦးဆောင်ပုဂ္ဂိုလ် အထွေထွေအတွင်းရေးမှူး ဦးဌေးဦးက ဆိုသည်။

ယင်းတို့ပါတီသည်လည်း ပြည်သူ့အကျိုးရှေ့ထား၍ လွှတ်တော်တွင်း နိုင်ငံရေးလုပ်ငန်းများကို လုပ်ဆောင်နေခြင်းကြောင့် မူဘောင်ထဲမှနေ၍ NLD လွှတ်တော်တက်ခြင်းကို ကြိုဆိုကြောင်း ၎င်းက ဆက်လက်ပြောကြားသည်။

ဒေါ်အောင်ဆန်းစုကြည်အနေဖြင့် လွှတ်တော်တက်ရောက်မည်ဟု ပြောကြားသော်လည်း ၂၀၀၈ ဖွဲ့စည်းပုံ အခြေခံဥပဒေတွင် ပြင်ဆင်သင့်သည် များရှိကြောင်း ဆိုသည်။

"ဖွဲ့စည်းပုံအခြေခံဥပဒေထဲမှာ တစ်ခုနဲ့တစ်ခု မဆီလျော်တဲ့ စကားလုံးတွေ အများကြီး ရှိပါတယ်။ ဖွဲ့စည်းပုံအခြေခံဥပဒေနဲ့ ပတ်သက်လို့ လွှတ် တော်ကိုယ်စားလှယ်များ ကျမ်းကျိန်တဲ့အခါ သုံးရတဲ့စကားလုံးနဲ့ သမ္မတကြီး ကျမ်းကျိန်တဲ့အခါ သုံးရတဲ့ စကားလုံးနဲ့ စကားတွေကလည်း မတူပါဘူး။ အဲ ဒါကြောင့်မို့လို့ ဥပဒေစိုးမိုးရေး သဘောတရားအရ ဥပဒေရဲ့ လုပ်ထုံးလုပ်နည်းအရ ပြင်ဆင်စရာတွေ အများကြီးရှိတယ် ဆိုတာကို ဥပဒေရှုထောင့်ကနေ လေးလေးနက်နက် ပြောချင်ပါတယ်"ဟု ၎င်းက ဆိုသည်။

ကြားဖြတ်ရွေးကောက်ပွဲတွင် အနိုင်ရခဲ့သည့် အမျိုးသားဒီမိုကရေစီအဖွဲ့ချုပ် ကိုယ်စားလှယ် ၄၃ ယောက်သည် ပြည်သူတို့အကျိုးမရှိသည့် ဥပဒေ များကို ပြင်ဆင်ရန်အတွက် အခြားသော လွှတ်တော်ကိုယ်စားလှယ်များနှင့် ပူးပေါင်းဆောင်ရွက်မည်ဖြစ်ကြောင်း ထုတ်ပြန်ထားသည်။

KP

****************************************

သတင်းနှင့် ဆောင်းပါးများမှ ကောက်နှုတ်ချက်များ

“လောလောဆယ်တော့ အရင်တုန်းက ငွေလွှဲကောင်တာ ငွေလွှဲခွင့်မရတာတွေ အခုဆိုရင်တော့ LC တွေကိုတိုက်ရိုက် ဖွင့်လာနိုင်မယ်။ Transaction Cost တွေလျှော့ချလာနိုင်မယ်၊ Sanction တွေ လျော့လာတယ်ဆိုပေမယ့်လည်း မြန်မာ့စီးပွားရေး လုပ်ငန်းရှင်တွေအနေနဲ့ အဆင်သင့် မဖြစ်သေးတာများတယ်။ နိုင်ငံတကာစံနှုန်းနဲ့ညီတဲ့ စီးပွားရေး အလေ့အကျင့်ကလည်း မရှိသေးဘူးဆိုတော့ အဓိကကတော့ Transaction Cost ပါပဲ။ နိုင်ငံခြား ရင်းနှီးမြုပ်နှံမှုက တော့ ချက်ချင်း တက်လာဦးမှာမဟုတ်ဘူး။ တစ်နှစ်လောက်တော့ ကြာဦးမှာပါ”

ဧပြီ ၃၀ ထုတ် The Voice Weekly အတွဲ (၈) အမှတ် (၁၉) တွင်ပါသည့် “နိုင်ငံကြီးများ၏ အရေးယူပိတ်ဆို့မှု လျှော့ချလိုက်၍ မြန်မာ့ စီးပွား ရေးစိန်ခေါ်မှု များလာနိုင်” သတင်းမှ ပြည်ထောင်စုသမ္မတ မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များအသင်းချုပ် (UMFCCI) မှ တွဲဖက်အထွေထွေ အတွင်းရေးမှူး ဦးအောင်ခင်မြင့်၏ ပြောကြားချက်အပေါ် ကောက်နှုတ်ချက်

-----------------------------------------------------------------------------------------------------------------------------------

“မြန်မာ့နိုင်ငံရေး၏ Mainstream Politics ခေါ် ပင်မနိုင်ငံရေးလမ်းကြောင်းသည် လွှတ်တော်နိုင်ငံရေး ဖြစ်လာပြီဖြစ်၍ လက်ရှိဂိမ်းတွင်ရှိနေသော ဂိမ်းစည်းမျဉ်းများကို ပြင်ဆင်မှသာဂိမ်းအတွင်း ပါဝင်မည်ဟူသော တွေးဆချက်များကိုလည်း သတိဖြင့်ဆင်ခြင်နိုင်ကြရန် လိုအပ်သည်။ မိမိစိတ်ကြိုက် မဟုတ်သော အခင်းအကျင်းဖြစ်ရေးထက် မိမိစိတ်ကြိုက် မဟုတ်သော ဂိမ်းတွင် ပါဝင်ပြီးနောက် ဂိမ်းစည်းမျဉ်းများ အပြောင်းအလဲ ဖြစ်လာစေရန် ကြိုးစား ရေးကိုသာ သုံးသပ်ကြရန် ဖြစ်သည်။ ကြားဖြတ်ရွေးကောက်ပွဲများကို ဝင်ရောက်ယှဉ်ပြိုင်ခဲ့သည့် မူလရည်မှန်းချက်မှာ လွှတ်တော်တွင်းရောက်ရှိပြီး ဂိမ်း စည်းမျဉ်းများ အပြောင်းအလဲဖြစ်စေရန် ကြိုးပမ်းမည်ဟု သဘောရသောကြောင့် လွှတ်တော်တွင်းရောက်ရှိရေးအတွက် ကြိုးစားခဲ့ရသည်များကို ‘စကား လုံးအသုံးအနှုန်း’ အချို့ကြောင့် သဲထဲရေသွန် မလုပ်ဆောင်ခြင်းသည် သန်း ၆၀ နှင့် ကင်းကွာနေကြောင်းသတိပြုမိစေလိုသည်။

ဧပြီ ၃၀ ထုတ် The Voice Weekly အတွဲ (၈) အမှတ် (၁၉) တွင်ပါသည့်ဆောင်းပါးရှင် ထက်ခိုင်၏ “ ကြားဖြတ် ရွေးကောက်ပွဲအလွန် နိုင်ငံတည် ဆောက်ရေး” ဆောင်းပါးမှ ကောက်နှုတ်ချက်

-----------------------------------------------------------------------------------------------------------------------------------

အခြေခံဥပဒေကို ကာကွယ်စောင့်ရှောက်တာကို ဆရာ့အနေနဲ့ ဘယ်လိုအဓိပ္ပါယ်ဖွင့်မလဲ။

အခြေခံဥပဒေရဲ့ လိုအပ်တဲ့အချက်တွေကို ပြင်ဆင်တာကလည်းကာကွယ်စောင့်ရှောက်တာပဲ။ ကျွန်တော်တို့နေတဲ့ အိမ်ကြီးတစ်အိမ်မှာ ခေါင်းမိုးပျက် တယ်။ အဲဒါကြောင့် ပြင်တယ်။ ကာကွယ်စောင့်ရှောက်တာ မဟုတ်လား။ အဲဒီအိမ်ကြီးကို ဖျက်ပြီး တခြားအိမ်သွားဆောက်တာက ကာကွယ်စောင့်ရှောက် တာမဟုတ်ဘူး။ နောက် ငါးနှစ်၊ ဆယ်နှစ်၊ ဒီနေ့ ဒီအခြေအနေနဲ့ မလုံလောက်ဘူး။ မညီညွတ်ဘူးဆိုရင် လိုအပ်လို့ ပြင်ဆင်တယ်။ ပြင်ဆင်တဲ့အခါမှာ နည်းလမ်း၊ ဥပဒေနဲ့ ပြင်ဆင်တယ်။ လေးစားလိုက်နာတာလည်း ဒါပဲ၊ ကာကွယ်စောင့်ရှောက်တာလဲ ဒါပဲ၊ ငါပြောတိုင်း ဖြစ်ရမယ်ဆိုတာကတော့ အာဏာ ရှင်ဆန်သွားပြီပေါ့။ အာဏာရှင်ကို တိုက်နေတဲ့ လူထုက အာဏာရှင်ဆန်တဲ့ အာဏာရှင်မျိုးဆက်အသစ်တွေကို မလိုလားဘူး။

မေ ၁ ထုတ် The Street View အတွဲ (၁) အမှတ် (၁၆) တွင်ပါသည့် “ဥပဒေပညာရှင် ဦးသန်းမောင်နှင့် အင်တာဗျူး” ကောက်နှုတ်ချက်

**************************************

 


Google Docs makes it easy to create, store and share online documents, spreadsheets and presentations.
Logo for Google Docs

0 comments:

Post a Comment