Transparency Myanmar

transparency.myanmar@gmail.com

yangonchronicle2011 Op-Ed
yangonchronicle2011 Op-Ed

၈.၁.၂၀၁၂

ဆောင်းပါးကဏ္ဍ

  1. မြန်မာနိုင်ငံနှင့် ဆင်းရဲနွမ်းပါးမှုလျော့ကျရေး ရည်မှန်းချက်

*******************************

ဆောင်းပါးကဏ္ဍ

မြန်မာနိုင်ငံနှင့် ဆင်းရဲနွမ်းပါးမှုလျော့ကျရေး ရည်မှန်းချက်

စန္ဒာလွင်

(ဇန်နဝါရီ ၆ ထုတ် Myanmar Times  အတွဲ(၂၈) အမှတ် (၅၅၁) မှ ထုတ်ယူဖော်ပြသည်။)

နိုင်ငံရဲ့ဆင်းရဲနွမ်းပါးပုံ အခြေအနေကို တရားဝင် အသိအမှတ်ပြုလိုက်ခြင်းနဲ့အတူ အစိုးရသစ်ဟာ နိုင်ငံသစ်တည်ရေး ရည်ရွယ်ချက်ချကာ ငါးနှစ် သက်တမ်းကို စခဲ့တယ်။အစိုးရသစ် ဘာလုပ်မလဲလို့ စောင့်ကြည့်နေကြစဉ်မှာပဲ သမ္မတကြီးဦးသိန်းစိန် ဦးဆောင်တဲ့အစိုးရသစ်ဟာ မေလ ၂၀ ရက်ကနေ ၂၂ ရက် အထိ 'ဆင်းရဲနွမ်းပါးမှု' စကားလုံးကို ပွင့်ပွင့်လင်းလင်း ခေါင်းစဉ်တင်ထားတဲ့ ကျေးလက်ဒေသ ဖွံ့ဖြိုးရေးနှင့်ဆင်းရဲနွမ်းပါးမှု လျော့ကျရေး အမျိုးသားအဆင့် အလုပ်ရုံဆွေးနွေးပွဲကို ကျင်းပခဲ့တယ်။

သမ္မတကြီးဦးသိန်းစိန်ကိုယ်တိုင်လည်း အလုပ်ရုံဆွေးနွေးပွဲ အဖွင့်မိန့်ခွန်းမှာ ဆင်းရဲနွမ်းပါးမှုဆိုတဲ့ စကားလုံးတွေကို သုံးခဲ့သလို တက်ရောက်သူ တွေကလည်း ဖြိုင်ဖြိုင်သုံးနှုန်း ပြောခဲ့ကြတယ်။  တိုင်းပြည်ရဲ့ ဆင်းရဲနွမ်းပါးမှု အခြေအနေကို ထင်ဟပ်တဲ့ ဒီလိုပြောဆိုမှုတွေဟာ တစ်ချိန်က ပြည်နှင်ဒဏ်ထိုက်တဲ့ အသုံးအနှုန်းတွေ ဖြစ်ခဲ့တယ်မဟုတ်လား။၂၀၀၇ ခုနှစ်တုန်းက ဒီလိုပြောဆိုချက်တွေကြောင့် ကုလသမဂ္ဂ resident coordinator မစ္စတာ ချားလ်စ်ပက်ထ်ရီဟာ မြန်မာနိုင်ငံကနေ ပြည်နှင်ဒဏ်ခံ ခဲ့ရဖူးပါတယ်။

နိုင်ငံသားတွေရဲ့ ဆင်းရဲမှုပကတိ အခြေအနေကို အရှိအတိုင်း လက်ခံကိုင်တွယ်ဆောင်ရွက်လိုက်တဲ့ အစိုးရသစ်ရဲ့ ဒီအပြုအမူကို ပြည်တွင်းကရော ပြည်ပကပါ ချီးကျူးခဲ့ကြပြီး နိုင်ငံပြုပြင် ပြောင်းလဲရေးမျှော်လင့်ချက် ပိုအားကောင်းစေခဲ့တယ်။ ဒီအသိအမှတ်ပြုမှုဟာပဲ ဆင်းရဲနွမ်းပါးမှုပြဿနာ ကြီးမားနေတဲ့ နိုင်ငံရဲ့လက်ရှိအခြေအနေကနေ တိုးတက်လာနိုင်ရေး၊ ၂၀၁၁ ခုနှစ် အတွင်း သိသာပေါ်လွင်မှုအရှိဆုံး လုပ်ဆောင်ချက်ဖြစ်ခဲ့တယ်လို့ ဆိုချင်တယ်။

ဒီအလုပ်ရုံဆွေးနွေးပွဲအပြီးမှာ ဆင်းရဲ နွမ်းပါးမှုလျှော့ချရေး ပန်းတိုင်အဆင့်တစ်ရပ်နဲ့ အဲဒီအဆင့်ရောက်အောင် လုပ်ဖို့အတွက် အချက်ရှစ်ချက်ပါတဲ့ လုပ်ငန်းအစီအစဉ် ဖော်ထုတ်ခဲ့တယ်။ ဒါပေမယ့် အကောင်အထည်ပေါ်မှုအပိုင်းမှာတော့ လုပ်ငန်းအကောင်အထည်မြင်ရခြင်းမရှိဘဲ အနာဂတ်စိတ်ကူးတွေ အတွက် အခြေခံချခြင်းနဲ့၊ ဆင်းရဲနွမ်းပါးမှု လျော့ကျရေးအပေါ်လည်း လွှမ်းခြုံအကျိုးသက်ရောက်မယ့် နိုင်ငံအတွင်း စီးပွားဖွံ့ဖြိုးရေးနဲ့ နိုင်ငံတကာ အကူအညီများ ရရေး ပိုချောမွေ့စေမယ့် နိုင်ငံရေးအခြေအနေ ဖော်ဆောင်ခြင်းများကိုပဲ ၂၀၁၁ ခုနှစ်ဟာ တွေ့မြင်ခဲ့ရတယ်။

"(ဆင်းရဲနွမ်းပါးမှုလျှော့ချရေး) ကျွန်မတို့လုပ်ငန်းတွေအတွက် ၂၀၁၂ ခုနှစ် လုပ်ငန်းအစီအစဉ်ကို ရေးဆွဲနေပါတယ်" လို့ ဒီဇင်ဘာလ ၆ ရက်နေ့က ရန်ကုန်မြို့၊ အင်းလျားလိတ်ဟိုတယ်မှာ နိုင်ငံတကာရန်ပုံငွေ အဖွဲ့အစည်းတစ်ရပ်ဖြစ်တဲ့ Livelihood and Food Security Trust (LIFT) က ကျင်းပတဲ့ ကျေးလက်ဒေသဖွံ့ဖြိုးရေး ဖိုရမ်မှာ အမျိုးသား စီမံကိန်းနှင့် စီးပွားရေးဖွံ့ဖြိုး တိုးတက်မှုဝန်ကြီးဌာန ညွှန်ကြားရေးမှူးချုပ် ဒေါ်မြတ်မြတ်စိုးက ပြောတယ်။  ဘယ်လို စီမံကိန်းတွေ၊ လုပ်ငန်းတွေ ၀န်ကြီးဌာနက စီစဉ်နေတယ်ဆိုတာကိုတော့ ပြောဖို့ သူကငြင်းတယ်။

ဆင်းရဲနွမ်းပါးမှုလျှော့ချရေးနဲ့ ပတ်သက်ပြီး အစိုးရအဖွဲ့အစည်းများအပိုင်းက သိသာပေါ်လွင်တဲ့ လုပ်ဆောင်မှု အနေနဲ့ နိုင်ငံအတွင်းမှာ ဘယ်သူတွေဟာ ဆင်းရဲနွမ်းပါးနေသလဲဆိုတာကို သတ်သတ်မှတ်မှတ် ခွဲခြားမြင်နိုင်ခဲ့တယ်။ အခြေအနေနဲ့ကိုက်ညီပြီး အောင်မြင်နိုင်ခြေများတဲ့ ဦးတည်ချက် ချမှတ်ပြီး လုပ်ငန်း အစီအစဉ်နဲ့ အလေးထား အကောင်အထည်ဖော်မယ့် နယ်ပယ်တွေကို သတ်မှတ်နိုင်ခဲ့တယ်။

ကျေးလက်နဲ့ နယ်စပ်ဒေသက ပြည်သူ ၁၅ သန်းကျော်ကို ဆင်းရဲနွမ်းပါးသူများ အဖြစ်သတ်မှတ်ပြီး သူတို့ကို ဆင်းရဲတွင်းက လွတ်စေဖို့ စိုက်ပျိုးရေး၊ မွေးမြူရေး၊ ငါးလုပ်ငန်းကဏ္ဍတွေမှာ ကုန်ထုတ်လုပ်မှုမြှင့်တင်ဖို့၊ ကျေးလက်ကုန် ထုတ်လုပ်မှုနဲ့ အိမ်တွင်းမှုလုပ်ငန်းတွေ၊ အသေးစား ငွေစုငွေချေးလုပ်ငန်းတွေ၊ ကျေးလက်လူမှုစီးပွား၊ ကျေးလက်စွမ်းအင် ရရှိရေး၊ ကျေးလက်သမ၀ါယမနဲ့ သဘာဝပတ်ဝန်းကျင်ထိန်းသိမ်းရေး လုပ်ငန်းတွေကို ဖော်ထုတ်ဖို့ ဦးတည်ချက် ထားခဲ့ တယ်။ ကုလသမဂ္ဂထောင်စုနှစ် ရည်မှန်းချက်တွေနဲ့အညီ ဆင်းရဲနွမ်းပါးမှုနှုန်းကို လက်ရှိလူဦးရေရဲ့ ၂၆ ရာခိုင်နှုန်းကနေ ၂၀၁၅ ခုနှစ်မှာ ၁၆ ရာခိုင်နှုန်းကို လျှော့ချဖို့ ဦးတည်ချက်ချထားတယ်။

ဒီအစီအစဉ်တွေကိုလည်း ပါဝင်လုပ်ဆောင်မယ့်သူအားလုံး လက်ခံနိုင်ခဲ့တယ်။ လုပ်ငန်းအကောင်အထည်ဖော်မယ့်အဖွဲ့ အဖြစ် ကျေးလက်ဒေသ ဖွံ့ဖြိုးရေးနှင့် ဆင်းရဲနွမ်းပါးမှုလျှော့ချရေး ဗဟိုကော်မတီကို သမ္မတကြီး ဦးဆောင်ပြီး ဖွဲ့စည်းတယ်။ အမျိုးသားစီမံကိန်းနှင့် စီးပွားရေး ဖွံ့ဖြိုးတိုးတက်မှုဝန်ကြီးဌာန၊ ပြည်ထောင်စုဝန်ကြီး ဦးတင်နိုင်သိန်းက အတွင်းရေးမှူးအဖြစ် ပါဝင်တယ်။ သက်ဆိုင်ရာဝန်ကြီးဌာန ပြည်ထောင်စုဝန်ကြီးတွေ ပါဝင်တဲ့ ကော်မတီများလည်း ဖွဲ့ထားတယ်။ ဒါပေမယ့် အထက်မှာဆိုခဲ့သလိုပဲ လုပ်ငန်းအကောင်အထည်ဖော်မှုအပိုင်းမှာ သိသာထင်ရှားတဲ့ လုပ်ဆောင်ချက်တွေကို ၂၀၁၁ ခုနှစ်အတွင်း၊ ပိုတိတိကျကျပြောရင်တော့ အစီအစဉ်ရေးခဲ့တဲ့ မေလနောက်ပိုင်း ခုနစ်လခန့်အတွင်း မတွေ့မြင်ခဲ့ရဘူး။ အစိုးရအဖွဲ့အစည်းများအတွက် လုပ်ငန်း အကောင် အထည်ဖော်ရေးဟာ အခြေခံဥပဒေသစ်အရ အစိုးရအဖွဲ့ ယန္တရားအပြောင်းအလဲ ဖော်ဆောင်ရေးကာလနဲ့ တိုက်ဆိုင်နေတဲ့အတွက် နှောင့်နှေးမှုတချို့ ဖြစ်ပေါ်ဟန်ရှိတယ်။

အခြေခံဥပဒေသစ်အရ တိုင်းဒေသကြီးနဲ့ ပြည်နယ်တွေမှာ သီးခြားအစိုးရ အဖွဲ့များရှိပြီး အခြေခံဥပဒေက ခွင့်ပြုတဲ့လုပ်ငန်းတွေကို တိုင်းဒေသကြီးနဲ့ ပြည် နယ်တစ်ခုစီအလိုက် သီးခြားဥပဒေများနဲ့ ဖော်ဆောင်မှာ ဖြစ်ပါတယ်။ ဥပမာ အသေးစားငွေချေးလုပ်ငန်းကို တိုင်းဒေသကြီးနဲ့ ပြည်နယ်လွှတ်တော်တွေက သီးခြားစီပြဋ္ဌာန်းတဲ့ ဥပဒေတွေနဲ့ ဆောင်ရွက်မှာ ဖြစ်တယ်။

"အစိုးရအဖွဲ့အစည်းတွေမှာ ယန္တရားက မပီပြင်သေးတော့ သူတို့နဲ့ဆက်ဆံပြီး အလုပ်လုပ်ရတာ နှောင့်နှေးမှုတွေ ဖြစ်တယ်" လို့ အစိုးရမဟုတ်တဲ့ နိုင်ငံတကာ အဖွဲ့အစည်းတစ်ခုက အရာရှိတစ်ဦးက ပြောတယ်။ "ဒါပေမယ့် အရင်ကနဲ့စာရင်တော့ အင်န်ဂျီအိုတွေအပေါ် ပိုဖော်ဖော်ရွေရွေ ဖြစ်လာတယ်" လို့ သူက ဆက်ပြောတယ်။

ဒေါ်မြတ်မြတ်စိုးက ဝန်ကြီးဌာနအနေနဲ့ တိုင်းဒေသကြီးနဲ့ ပြည်နယ်အစိုးရ အဖွဲ့တွေနဲ့ ညှိနှိုင်းနေတယ်လို့ ဖိုရမ်မှာ ပြောတယ်။ "အစိုးရယန္တရားလည်း ပြောင်းတဲ့အတွက် ပြည်ထောင်စုအဆင့်မှာတင် မဟုတ်ဘဲ ဒေသဆိုင်ရာအဆင့်မှာပါ ကျွန်မတို့ ညှိနှိုင်းနေပါတယ်။ ဒေသဆိုင်ရာ အဆင့်ဆိုတာ တိုင်းဒေသကြီးနဲ့ ပြည်နယ်ဝန်ကြီးချုပ်တွေကို ပြောတာဖြစ်ပါတယ်" လို့ ဒေါ်မြတ်မြတ်စိုးက ပြောတယ်။

အစိုးရမဟုတ်တဲ့ အဖွဲ့အစည်းတွေ ဘက်မှာတော့ မြန်မာနိုင်ငံမှာ ရှိတဲ့ အရပ်ဘက်အဖွဲ့အစည်း ၅၀ ခန့်ဟာ ဆင်းရဲနွမ်းပါးမှု ခံစားနေရတဲ့ လူဦးရေ ၁၅ သန်းအနက်က လူဦးရေ ခန့်မှန်းတစ်သန်းကျော်ကို လွှမ်းခြုံနိုင်မယ့် ကူညီပံ့ပိုးရေးစီမံကိန်းတွေကို အဖွဲ့အလိုက်အသီးသီး အကောင်အထည် ဖော်နေကြတယ်။ ဆင်းရဲနွမ်းပါးမှုလျှော့ချရေးအောင်မြင် ဖို့အတွက် အရေးကြီးတဲ့အစိုးရမဟုတ်တဲ့ အဖွဲ့တွေနဲ့ အစိုးရအဖွဲ့အစည်းတွေ ညှိနှိုင်းချိတ်ဆက်မှုကောင်းဖို့အတွက် ၂၀၁၂ ခုနှစ် လုပ်ငန်းအချိန်ဇယားကို အမျိုးသားစီမံကိန်းနဲ့ စီးပွားရေး ဖွံ့ဖြိုးတိုးတက်မှုဝန်ကြီးဌာနက ဒီဇင်ဘာလ ၉ ရက်နေ့က ညှိနှိုင်းရေးဆွဲခဲ့တယ်လို့လည်း အစိုးရထုတ်သတင်းစာများမှာ ဖော်ပြထားတယ်။

ဆင်းရဲနွမ်းပါးမှုလျှော့ချရေးနဲ့ ပတ်သက်ပြီး အစိုးရအဖွဲ့အစည်းများရဲ့ တိုက်ရိုက်လုပ်ဆောင်ချက်တွေကို မမြင်တွေ့ခဲ့ရပေမယ့် နိုင်ငံတကာ အသိုင်းအဝိုင်းနဲ့ ဆက်ဆံရေးပိုကောင်းမွန်စေခြင်း၊ နိုင်ငံမှာ စီးပွားရေးဖွံ့ဖြိုးမှု ရစေခြင်းတို့အားဖြင့် ဆင်းရဲနွမ်းပါးမှု လျှော့ချရေးအပေါ် လွှမ်းခြုံအကျိုးသက်ရောက် စေမယ့် နိုင်ငံရေး၊ စီးပွားရေး အခြေအနေများကို ဖော်ဆောင်ခဲ့တာတွေ့ရတယ်။ ဥပမာ ကဏ္ဍအားလုံးအပေါ်လွှမ်းခြုံ အကျိုးသက်ရောက်မယ့် အမျိုးသား စည်းလုံး ညီညွတ်မှုရရှိရေး၊ နယ်စပ်ဒေသများ ငြိမ်းချမ်းရန် လက်နက်ကိုင်ပဋိပက္ခ ဖြေရှင်းနိုင်ရေးများ ကြိုးပမ်းဆောင်ရွက်ခဲ့တာကို ၂၀၁၁ ခုနှစ်က တွေ့မြင်ခဲ့ရပါတယ်။ နယ်စပ်ဒေသငြိမ်းချမ်းရေးအစီအစဉ်နဲ့ ဆက်နွှယ်တဲ့ ဖွံ့ဖြိုးရေးလုပ်ငန်းတွေအားဖြင့် လည်း နယ်စပ်ဒေသရှိ ဆင်းရဲ နွမ်းပါးမှုကို လျော့ကျစေဦးမှာဖြစ်တယ်။

လူတိုင်းသိရှိထားသလိုပဲ၊ ဆင်းရဲနွမ်းပါးမှုလျော့ကျရေး ဦးတည်ချက်ဟာ တစ်နိုင်ငံလုံး ညီညီမျှမျှ စီးပွားရေး တိုးတက်မလာဘဲ၊ လူလတ်တန်းစားများ ပေါ်ထွန်းမလာဘဲ၊ အလုပ်အကိုင်အခွင့်အလမ်းများ ပေါ်ထွန်းမလာဘဲ မအောင်မြင်နိုင်တဲ့အတွက် နိုင်ငံမှာ စီးပွားရေး တိုးတက်ဖွံ့ဖြိုးစေဖို့ စီးပွားရေးကဏ္ဍကို ပြုပြင်နိုင်မယ့် နည်းလမ်းများရှာဖွေ တာကို ၂၀၁၁ ခုနှစ်အတွင်းမှာပဲ တွေ့မြင် ခဲ့ရပါတယ်။

ဒါကြောင့် ၂၀၁၁ ခုနှစ်အဖို့ ဆင်းရဲ နွမ်းပါးမှုလျော့ကျရေးအတွက် လူဆင်းရဲတွေကို တိုက်ရိုက်ကူညီပံ့ပိုးမှု လုပ်ဆောင်ချက်တွေ သိသိသာသာ မတွေ့ခဲ့ရသော်လည်း ရှေ့ဆက်လုပ်ရေး အခြေခံများချပြီး တခြားလွှမ်းခြုံအကျိုး သက်ရောက်မယ့် အရေးကြီးလုပ်ဆောင်ချက်များကို မြင်တွေ့ခဲ့ရတဲ့အတွက် ကျေနပ်မယ်ဆို ကျေနပ်ဖွယ်ရာ ဖြစ်နိုင်လိမ့်မယ်လို့ ယူဆမိပါတယ်။

******************************************************

 

 


Google Docs makes it easy to create, store and share online documents, spreadsheets and presentations.
Logo for Google Docs

yangonchronicle2011
yangonchronicle2011

၈.၁.၂၀၁၂

ပြည်တွင်းသတင်းများ

  1. ပြည်ထဲရေးဝန်ကြီးဌာန လက်အောက်ခံတပ်ဖွဲ့များ အာဏာပြိုင်
  2. ကူးတို့ဆိပ် မီးလောင်ပေါက်ကွဲမှုအား စစ်ဆေးနေဆဲဖြစ်
  3. သွင်းကုန်၊ ပို့ကုန် ဘဏ်ဖွင့်လှစ်တော့မည်

ပြည်တွင်းပါတီ၊ နိုင်ငံရေးသတင်းများ

  1. NLD ပါတီဝင်လျှောက်လွှာများကို တစ်စောင်တစ်ရာနှုန်းဖြင့်ရောင်းချမည်
  2. အဖြူရောင်တနင်္ဂနွေ လှုပ်ရှားမှုစတင်

သတင်းနှင့် ဆောင်းပါးများမှ ကောက်နှုတ်ချက်များ

*****************************************

ပြည်တွင်းသတင်းများ

ပြည်ထဲရေးဝန်ကြီးဌာန လက်အောက်ခံတပ်ဖွဲ့များ အာဏာပြိုင်

ပြည်ထဲရေးဝန်ကြီးဌာန ကွပ်ကဲမှုအောက်ရှိ တပ်ဖွဲ့များဖြစ်ကြသည့် အင်းစိန်မှုခင်းတပ်ဖွဲ့နှင့် ကြိုးမဲ့ကြေးနန်းနှင့် ယာဉ်ထိန်းတပ်ဖွဲ့တို့သည် ယင်းတို့၏ လုပ်ပိုင်ခွင့်များနှင့် ပတ်သက်၍ အာဏာပြိုင်ဆိုင်မှု အပြင်းအထန် ဖြစ်ပွားနေကြောင်း သိရသည်။

ယင်း ဖြစ်ရပ်တို့၏အစမှာ ပြီးခဲ့သည့် ၂၀၁၁ ခုနှစ်၊ ဒီဇင်ဘာလက ရန်ကုန်တိုင်းဒေသကြီး၊ ဗဟန်းမြို့နယ်တွင် ဦးသန်းရွှေ၏ မြေးဖြစ်သူ နေရွှေသွေးအောင် (ခ) ဖိုးလပြည့်မောင်းနှင်လာသေ မော်တော်ယာဉ်နှင့် အင်းစိန်မှုခင်းတပ်ဖွဲ့ (အောက်မြန်မာပြည်)၏ ဒုတိယမှုခင်းတပ်ဖွဲ့မှူးတို့ စီးနင်းလာသည့် မော်တော်ယာဉ်တို့ တိုက်မိရာမှ ဖြစ်ကြောင်း သိရသည်။

“တပ်ချုပ်ကြီးရဲ့မြေးကားနဲ့ တိုက်မိတယ်ဆိုပေမယ့် ကျွန်တော်တို့က ရဲမှူးကြီးကို ယာဉ်တိုက်မှုနဲ့ အရေးမယူပါဘူး။ ကားမှန်မှာ စတစ်ကာ ကပ်မှုနဲ့ပဲ အရေးယူလိုက်ပါတယ်။ ဒါပေမယ့် ဒီလိုအရေးယူလိုက်တဲ့ ဖြစ်ရပ်ရဲ့ နောက်ဆက်တွဲကတော့ ဆိုးလွန်းပါတယ်”ဟု ရန်ကုန်တိုင်း ဒေသကြီး၊ ယာဉ်ထိန်းတပ်ဖွဲ့မှ ရဲအရာရှိတစ်ဦးက ဆိုသည်။

အင်းစိန်မှုခင်းတပ်ဖွဲ့မှ ရဲမှူးကြီးအား ယင်းသို့ အရေးယူခြင်းကြောင့် မှုခင်းတပ်ဖွဲ့မှ ယာဉ်ထိန်းရဲများအား ပြစ်ချက်ရှာဖွေ၍ ဖမ်းဆီးခြင်းများကို လုပ်ဆောင်ခဲ့ခြင်းကြောင့် ယာဉ်ထ်ိန်းနယ်မြေ(၁)မှ တပ်ဖွဲ့ဝင်လေးဦးနှင့် အခြားယာဉ်ထိန်းနယ်မြေမှ တပ်ဖွဲ့ဝင်သုံးဦးတို့မှာ တိုင်ကြားစာရောက်ရှိသည် ဆိုသည့် တိုင်တန်းချက်ဖြင့် ဒီဇင်ဘာ တတိယရက်သတ္တပတ်က ဖမ်းဆီးခံခဲ့ရကြာင်း သိရသည်။

“အင်းစိန်မှုခင်းတပ်ဖွဲ့က ယာဉ်ထိန်းကိုဖမ်းတယ်။ ယာဉ်ထိန်းတပ်ဖွဲ့က သူ့လူတွေထိလို့ဆိုပြီး မြို့နယ်ရဲတွေ၊ တိုင်းရဲတွေ၊ ရဲထောက်လှမ်းရေးတွေ ဆိုင်ကယ်ရှိရင် ဖမ်းတယ်။ ဖြစ်ပုံက ဂျာအေးသူ့အမေရိုက်နေသလိုပဲ”ဟု ပန်းဘဲတန်းမြို့နယ်မှ ရဲအရာရှိတစ်ဦးက ဆိုသည်။

YC(KS)

-----------------------------------------------------------------------------------------------------------------------------------

ကူးတို့ဆိပ် မီးလောင်ပေါက်ကွဲမှုအား စစ်ဆေးနေဆဲဖြစ်

ရန်ကုန်မြို့တစ်မြို့လုံး သိမ့်သိမ့်တုန်သွားသည့် မင်္ဂလာတောင်ညွှန့်မြို့နယ်၊ ကူးတို့ဆိပ်ရပ်ကွက် မီးလောင်ပေါက်ကွဲမှု၏ အဓိက အကြောင်းရင်းကို စစ်ဆေးနေဆဲဖြစ်ကြောင်း ရန်ကုန်တိုင်းဒေသကြီးအစိုးရအဖွဲ့၏ လူမှုရေးရာဝန်ကြီး ဒေါက်တာမြင့်သိန်းက ဆိုသည်။

ဒီဇင်ဘာ ၂၉ ရက်နေ့၊ မနက်က မင်္ဂလာတောင်ညွှန့်မြို့နယ်၊ ကူးတို့ဆိပ်ရပ်ကွက်၊ မေတ္တာမွန် ဂိုထောင်ဝင်းအတွင်းရှိ အီလက်ထရောနစ် ပစ္စည်းများ ထားရှိသည့် ဂိုထောင်အမှတ်(၇၉)မှ မီးစတင်လောက်ကျွမ်းရာ ပရဆေးပစ္စည်းများ ထားရှိသည့် ဂိုထောင်အမှတ်(၈၀)သို့ ကူးစက်ကာ ပေါက်ကွဲမှု ဖြစ်ပွားခဲ့ပြီး မီးသတ်တပ်ဖွဲ့ဝင်များနှင့် ရပ်ကွက်နေပြည်သူ ၂၀ကျော်တို့ အသက်ဆုံးရှုံးခဲ့ရသည်။

အဆိုပါမီးလောင်မှုကြောင့် ယင်းဂိုထောင်နှစ်လုံး၏ ပိုင်ရှင်နှစ်ဦးကို ညတွင်းချင်းဖမ်းဆီးခဲ့ပြီး ပေါက်ကွဲမှုဖြစ်သည့် အကြောင်းရင်းကို စုံစမ်းစစ်ဆေးနေဆဲ ဖြစ်ကြောင်း မင်္ဂလာတောင်ညွှန့်မြို့နယ် ရဲတပ်ဖွဲ့မှ တာဝန်ရှိသူတစ်ဦးက ပြောကြားသည်။

“မီးလောင်တာကတော့ ဝါယာရှော့ပဲ။ မီးက ပရဆေးတွေကို ကူးရင်းနဲ့ ပေါက်ကွဲမှုဖြစ်တာ ဒါပေမယ့် အခုပေါက်ကွဲမှုဖြစ်ပွားတဲ့ တွင်းနဲ့ အနီးတဝိုက်မှာ ယမ်းစိမ်းတွေ၊ ဆာလဖျူရစ်အက်ဆစ်အရည်တွေ၊ ကွန်ဆိုနီယမ်တွေ တွေ့နေတော့ ပရဆေးကြောင့်ဖြစ်တယ် ပြောဖို့တောင် ခက်နေပြီ”ဟု ယင်းဖြစ်ရပ်အား စုံစမ်းစစ်ဆေးရာတွင် ပါဝင်သည့် မီးသတ်အရာရှိတစ်ဦးက ပြောကြားသည်။

အဆိုပါမီးလောင်ပေါက်ကွဲမှုနှင့် ပတ်သက်၍ အထူးစုံစမ်းစစ်ဆေးရေးဦးစီးဌာနနှင့် အင်းစိန်မှုခင်းတပ်ဖွဲ့မှ တာဝန်ယူဖော်ထုတ် စစ်ဆေးနေကြောင်း သိရသည်။

“ဒီဖြစ်ရပ်ရဲ့ နောက်ကွယ်မှာလဲ တစ်ချို့ဆက်စပ် ဖြစ်ရပ်တွေရှိနေတဲ့အတွက် အထက်လူကြီးတွေကို တင်ပြပြီးမှ မီဒီယာကို ဖြေလို့ရမှာပါ။ လက်ရှိ ပြောနိုင်တာကတော့ ကျွန်တော်တို့ရဲ့ ရှာဖွေတွေ့ရှိချက်တွေဟာ သတင်းစာမှာ ထုတ်ပြန်ထားတဲ့ အချက်တွေနဲ့တော့ ကွာခြားပါတယ်”ဟု မှုခင်းတပ်ဖွဲ့(CID)မှ ရဲအရာရှိတစ်ဦးက ပြောကြားသည်။

YC(KS)

-----------------------------------------------------------------------------------------------------------------------------------

သွင်းကုန်၊ ပို့ကုန် ဘဏ်ဖွင့်လှစ်တော့မည်

မြန်မာနိုင်ငံအတွင်း အစိုးရသစ်လက်ထက်မှ စတင်၍ နိုင်ငံ၏ကုန်သွယ် စီးပွားရေးဖွံ့ဖြိုးတိုးတက်မှုများအတွက် နိုင်ငံတကာကဲ့သို့ သွင်းကုန်၊ ပို့ကုန် ဘဏ်ကို မြန်မာနိုင်ငံတွင် ယခုနှစ်အတွင်း ဖွင့်လှစ်တော့မည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ တာဝန်ရှိသူတစ်ဦးက ပြောကြား ခဲ့သည်။

မြန်မာနိုင်ငံ၏ ကုန်သွယ်ရေးကဏ္ဍများ တိုးမြှင့်ဆောင်ရွက်နိုင်စေရန်နှင့် မြန်မာနိုင်ငံအတွင်း ကုန်သွယ်ရေးကို အားပေးသည့် သီးသန့်ဘဏ်များ မရှိသည့် အတွက် ယခုကဲ့သို့ တည်ထောင်ရခြင်းဖြစ်ကြောင်းသိရသည်။

၎င်း သွင်းကုန်၊ ပို့ကုန်ဘဏ်အား မြန်မာနိုင်ငံအတွင်း တည်ထောင်ရန် နိုင်ငံတော်သမ္မတထံသို့ ခွင့်ပြုချက် တောင်းခံထားလျက်ရှိပြီး မြန်မာနိုင်ငံ ဗပိာုဘဏ်နှင့်လည်း ညှိနှိုင်းနေဆဲဖြစ်ကြောင်း သိရသည်။

နိုင်ငံတကာ၌ ဖွင့်လှစ်ထားရှိသည့် သွင်းကုန်၊ ပို့ကုန်ဘဏ်(EXIM Bank) များမှာ နိုင်ငံတွင်းရှိ ပို့ကုန်လုပ်ငန်းများ၊ သွင်းကုန်လုပ်ငန်းများကို ကုန်သွယ်မှု တိုးတက်လာနိုင်စေရန် ငွေကြေးစိုက်ထုတ်ပေးခြင်း(ချေးခြင်း)ဖြင့် နိုင်ငံတကာနှင့် ယှဉ်ပြိုင်နိုင်စေရန် လုပ်ဆောင်ပေးလေ့ရှိကြောင်း Export-Import ဘဏ်ဖွင့်ရန် လွန်ခဲ့သည့် ၂ နှစ်မှ စတင်ကာ အကြံပေး ခဲ့သည့် ဘဏ္ဍာရေးနှင့် အခွန်ဝန်ကြီးဌာန အကြံပေးအဖွဲ့ခေါင်းဆောင် ဦးသန်းလွင်က ပြောကြားခဲ့သည်။

ထို့ပြင် အာဆီယံနိုင်ငံအတွင်း လွတ်လပ်စွာကုန်သွယ်ခွင့်များ ပြုလုပ်သည့်အချိန်တွင် မြန်မာနိုင်ငံရှိ စီးပွားရေး လုပ်ငန်းရှင်များအနေဖြင့် နိုင်ငံတကာနှင့် ရင်ဘောင်တန်း၍ စီးပွားရေးယှဉ်ပြိုင်နိုင်ရန်နှင့် ပို့ကုန်၊ သွင်းကုန်လုပ်ငန်း လုပ်ကိုင်လိုသော်လည်း ငွေအရင်းအနှီးမရှိသူသည့် လုပ်ငန်းရှင်များအတွက် ရည်ရွယ်၍ ပို့ကုန်၊ သွင်းကုန်(EXIM Bank) ဘဏ် ကိုတည်ထောင်ရခြင်းဖြစ်ကြောင်း သိရသည်။

၂၀၁၁ ခုနှစ် ဒီဇင်ဘာလ ၃၀ ရက်နေ့တွင် နေပြည်တော်၌ ကျင်းပသော ကုန်စည်ထုတ်လုပ်မှုနှင့် ကုန်သွယ်မှု ဖွံ့ဖြိုးတိုးတက်ရေး ညှိနှိုင်း အစည်းအဝေး တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ တာဝန်ရှိသူတစ်ဦးက မြန်မာနိုင်ငံတွင် ပို့ကုန်၊သွင်းကုန်ဘဏ် ဖွင့်လှစ်မည်ဖြစ်ကြောင်း ပြောကြားခဲ့သည်။

Ref: The Voice

***********************************************************

ပြည်တွင်းပါတီ၊ နိုင်ငံရေးသတင်းများ

NLD ပါတီဝင်လျှောက်လွှာများကို တစ်စောင်တစ်ရာနှုန်းဖြင့်ရောင်းချမည်

အမျိုးသားဒီမိုကရေစီအဖွဲ့ချုပ်၏ နိုင်ငံရေးပါတီအဖြစ် ပါတီမှတ်ပုံတင်ခြင်းကို ပြည်ထောင်စု ရွေးကောက်ပွဲကော်မရှင်က ခွင့်ပြုလိုက်ပြီ ဖြစ်သဖြင့် လာမည့် ဇန်န၀ါရီလ ၉ ရက်နေ့မှစတင်ကာ NLD ပါတီဝင် လျှောက်လွှာများကို မြန်မာတစ်နိုင်ငံလုံးသို့ ဖြန့်ဝေတော့မည်ဖြစ်ကြောင်း ယင်းပါတီ၏ ပြောရေး ဆိုခွင့်ရှိသူ ဦးအုန်းကြိုင်က ဆိုသည်။

မကြာခင်ရက်ပိုင်းအတွင်း ဖြန့်ဝေမည့် ပါတီဝင်လျှောက်လွှာများတွင် ထူးခြားသော ဖြည့်စွက်ဖော်ပြစရာများ ပါဝင်မည်မဟုတ်ကြောင်း၊ ကိုယ်ရေးရာဇဝင် အကျဉ်းကဲ့သို့သော အကြောင်းအခြင်းရာများသာ  ပါဝင်မည် ဖြစ်ကြောင်းကို ယင်းက ဆက်လက်ပြောကြားသည်။

“ကျွန်တော်တို့ အမြတ်မယူဘဲ၊ စာရွက်ဖိုးနဲ့ ရိုက်နှိပ်ခကိုသာ ယူမှာပါ။တစ်စောင်ကို တစ်ရာနဲ့ရောင်းမှာပါ”ဟု ယင်းကဆက်လက် ပြောကြားသည်။

NLD ပါတီဝင်အဟောင်းများသည် အသစ်တည်ထောင်လိုက်သည့် ပါတီတွင် ပါတီဝင်အဖြစ် ပြန်လည်လျှောက်ထားရမည် ဖြစ်ကာ ပါတီဝင် လျှောက်လွှာ များကို ပထမဆုံးအနေဖြင့် တစ်သန်းနီးပါး ဖြန့်ဝေမည် ဖြစ်ကြောင်း သိရသည်။

“ပါတီတည်ထောင်သူတွေကလွဲရင် အကုန်ပြန်လျှောက်ရမှာပါ”ဟု ယင်းပါတီ၏ပြောရေးဆိုခွင့်ရှိသူ ဦးဥာဏ်ဝင်းက  ပြောကြားသည်။

NLD ပါတီ ပြန်လည်မှတ်ပုံတင်ကာ ရွေးကောက်ပွဲဝင်မည့် သမိုင်းဝင် ဆုံးဖြတ်ချက်အား ၂၀၁၁ခုနှစ် နိုဝင်ဘာ ၁၈ရက်နေ့တွင် ချမှတ်ခဲ့သည်။

YC(KS)

-----------------------------------------------------------------------------------------------------------------------------------

အဖြူရောင်တနင်္ဂနွေ လှုပ်ရှားမှုစတင်

နိုင်ငံရေးအကျဉ်းသားများ လွတ်မြောက်ရေး အတွက် ဇန်န၀ါရီလ ၈ ရက်နေ့မှ စတင်ကာ နိုင်ငံရေးအကျဉ်းသား မိသားစုများကို အားပေးကူညီသည့် အဖြူရောင် တနင်္ဂနွေလှုပ်ရှားမှုကို စတင်လိုက်ပြီဖြစ်ကြောင်း ယင်းလှုပ်ရှားမှု၏ ပြောရေးဆိုခွင့်ရှိသူ ဒေါ်မီးမီးက ဆိုသည်။

ယင်းလှုပ်ရှားမှုတွင် နိုင်ငံရေး အကျဉ်းသားမိသားစုကွန်ရက်၊ Generation Wave၊ နိုင်ငံရေး အကျဉ်းသားဟောင်းများ၊ ၈၈ မျိုးဆက် ကျောင်းသားများ အဖွဲ့၊ ဗမာနိုင်ငံလုံးဆိုင်ရာ ကျောင်းသားများသမဂ္ဂ (ဗကသ)တို့ ပူးပေါင်းပါဝင်ကြောင်း ယင်းပြောရေးဆိုခွင့်ရှိသူက ဆက်လက် ပြောကြားသည်။

အဖြူရောင်တနင်္ဂနွေလှုပ်ရှားမှုအား ဇန်နဝါရီလ ၈ ရက်နေ့ မနက် ၉ နာရီတွင် တာမွေပလာဇာရှေ့မှ စတင်ပြီး တာမွမြို့နယ် အတွင်းရှိ နိုင်ငံရေး အကျဉ်းသားမိသားစုဝင်များနှင့် သွားရောက်တွေ့ဆုံအားပေးစကား ပြောကြားခဲ့ကြောင်း သိရသည်။

ယင်းလှုပ်ရှားမှုသည် မကြာမီက ထုတ်ပြန်လိုက်သည့်  တတိယအကြိမ် လွတ်ငြိမ်းချမ်းသာခွင့်အမိန့်သည် ပြည်သူများ မျှော်လင့်နေသည်ကို ဖြည့်ဆည်း ပေးနိုင်ခြင်းမရှိကြောင်းကို ပြသသည့် သဘောထားဖြစ်ကြောင်း ယင်း လှုပ်ရှားမှုတွင် ပါဝင်သူများက တစ်ညီတစ်ညွတ်တည်းဆိုကြသည်။

“နောက်အပတ်တွေလည်း ကျွန်တော်တို့ လှုပ်ရှားမှုတွေ၊ နယ်အနှံ့က နိုင်ငံရေးအကျဉ်းသားဟောင်းတွေ၊ ဒီချုပ်ကလူတွေနဲ့ ပူးပေါင်းပြီး လုပ်ဆောင် အုံးမှာပါ”ဟု ၈၈ မျိုးဆက်ကျောင်းသားအဖွဲ့မှ ကိုစိုးထွန်းက ပြောကြားသည်။

YC(KS)

                                        *******************************

သတင်းနှင့် ဆောင်းပါးများမှ ကောက်နှုတ်ချက်များ

“တုံ့ပြန်မှုကို ကျွန်တော်တို့ စောင့်ကြည့်နေမှာပါ။ လောလောဆယ်အခြေအနေကတော့ ကောင်းပါတယ်။ နိုင်ငံတော် အကြီးအကဲရဲ့ စေတနာပေါ့။ ပြည်သူ့ဆန္ဒနဲ့ နိုင်ငံတော်အကြီးအကဲရဲ့ စေတနာ၊ အဲဒီနှစ်ခုပေါင်းစပ်ရင် အဓိကထား ပဉ္ဓမမဏ္ဍိုင်ဖြစ်တဲ့ ပြည်သူတွေ ဖြစ်တယ်။ နိုင်ငံတော်သမ္မတဆိုခဲ့တဲ့ နိုင်ငံတော် စီးပွားရေး ဖွံ့ဖြိုးတိုးတက်စေရန် လမ်းညွှန်ချက် 3PS ဆိုတာရှိပါတယ်။ မတ်လလောက်ဆိုရင် ငါးထောင်နဲ့ တယ်လီဖုန်းဖြစ်လာနိုင်တယ်။ မြန်မာပြည်ရဲ့ ဆက်သွယ်ရေး ကဏ္ဍ တိုးတက်လာပြီ၊ ပုဂ္ဂလိကကဏ္ဍ ပါဝင်လာနိုင်ပြီလို့ ပြောလို့ရပါတယ်။ ဒီနှစ်ထဲမှာထွက်မှာပါ”

ဇန်နဝါရီ ၈ ထုတ် နေပြည်တော်တိုင်း(မ်) အတွဲ (၁) အမှတ် (၈)တွင်ပါသည့် “ကျပ်ငါးထောင်ဖြင့် ဖုန်းပိုင်ဆိုင်ခွင့် မကြာမီ ကာလအတွင်း အကောင်အထည် ဖော်မည်” သတင်းမှ “ရွှေပြည်တံခွန်” တယ်လီကွန်းဝန်ဆောင်မှု လုပ်ငန်းတာဝန်ရှိသူ ဦးလွင်နိုင်ဦး၏ ပြောကြားချက်အပေါ် ကောက်နှုတ်ချက်

-----------------------------------------------------------------------------------------------------------------------------------

‘အဲဒါကောင်းတာပေါ့။ ပြည်သူ့အသံကို သူတို့နားထောင်လာတဲ့ သဘောပေါ့။ ပြည်သူ့အသံကို လူကြီးတွေ ဂရုစိုက်လာတဲ့ သဘောပေါ့။ အဲဒါက ဒီမိုကရေစီ ထွန်းကားရေးအတွက် အခြေခံပဲ။ လူထုရဲ့ အသံကိုနားထောင်တယ်ဆိုတာ ဒါအခြေခံပဲ။ အဲဒီစနစ်လေးကို အန်တီတို့က ပျိုးထောင်ပြီး ပေါင်းသင်ပေးရမှာပေါ့။ အဲဒီလိုစနစ်လေးတွေ စပေါ်လာတယ်ဆိုရင် နိုင်ငံတော် တော်များများမှာအဲဒီအစိုးရအဖွဲ့အတွင်းမှာရှိတဲ့ Hard liner (သဘောထားပြင်းထန်တဲ့ လူတွေ) က သူတို့အချင်းချင်းထဲက သဘောထားပျော့ပျောင်းတဲ့လူတွေကို ထုတ်ပယ်ဖို့တို့ အပြီးသတ်ဖို့ တို့ကြိုးစားကြတာ။ တခြားနိုင်ငံတွေမှာကိုပြောတာပါ။ အဲဒီလိုမျိုး ဖြစ်ခဲ့တဲ့အစဉ် အလာတွေရှိတော့ အဲဒါမျိုးမဖြစ်အောင် အန်တီတို့က သဘောထားပျော့ပျောင်းတဲ့ အုပ်စုတွေကို အန်တီတို့ကဝိုင်းပြီးအားပေးရမယ်”

ဇန်နဝါရီ  ၆ ထုတ် မြန်မာပို့စ်ဂလိုဘယ် အမှတ် (၄၂) တွင်ပါသည့် “ပြည်သူ့အသံကို အစိုးရအဖွဲ့အဆင့်ဆင့် တုံ့ပြန်မှုအပေါ် အမြင်များ”သတင်းမှ ဒေါက်တာ ညိုညိုသင်း (ရန်ကုန်တိုင်းဒေသကြီး ပြည်သူ့လွှတ်တော် ကိုယ်စားလှယ်၊ ဒီမိုကရက်တစ်ပါတီ) ပြောကြားချက်အပေါ် ကောက်နှုတ်ချက်

-----------------------------------------------------------------------------------------------------------------------------------

“အခုဆိုရင် ယုံကြည်ချက်ကြောင့် အကျဉ်းကျခံနေရတဲ့ နိုင်ငံရေးအကျဉ်းသားတွေလည်း ပြန်လွတ်လာတော့မှာပါ။ မှန်ကန်ပါလျက်နဲ့ နစ်နာမှုတွေရှိခဲ့တဲ့ အမှုဟောင်းတွေကို ကျွန်တော်တို့ဆီကို ပြန်တင်ပေးပါ။ ဆက်ပြီးတော့ ဆောင်ရွက်ပေးပါမယ်။ အဲဒီအမှုဟောင်းတွေက ငါးနှစ်ပဲကြကြာ၊ ၁၀ နှစ်ပဲကြာကြာ ပြန်တင် ပေးပါ။ တစ်ခုတော့ရှိပါတယ်။ ကာလစည်းကမ်းသတ်မှတ်ချက်ရှိတဲ့ တရားမမှုမျိုး၊ စည်ပင်သာယာ အက်ဥပဒေနဲ့ဆိုင်တဲ့ ဥပမာ-လမ်းပိတ်ဆို့မှုမျိုး စတာတွေက လွဲရင် ဘယ်အမှုဟောင်းတွေပဲဖြစ်ဖြစ် တင်ပေးလာရင် ဆောင်ရွက်ပေးပါမယ်”

ဇန်နဝါရီ ၆ ထုတ် မြန်မာတိုင်း (မ်) အတွ (၂၈ အမှတ် (၅၅၁) တွင်ပါသည့် “ခိုင်လုံလျှင် ယခင်အစိုးရလက်ထက် အမှုဟောင်း များတိုင်ကြားနိုင်” သတင်းမှ ပြည်သူ့ လွှတ်တော် တရားစီရင်ရေးနှင့် ဥပဒေရေးရာကော်မတီဥက္ကဋ္ဌ သူရဦးအောင်ကို၏ ပြောကြားချက်အပေါ် ကောက်နှုတ်ချက်

**************************************************


Google Docs makes it easy to create, store and share online documents, spreadsheets and presentations.
Logo for Google Docs