Posts
 | yangonchronicle2011 Op-Ed |
၁၈.၃.၂၀၁၂
ဆောင်းပါးကဏ္ဍ
- ရွေးကောက်ပွဲဆိုင်ရာ ပြစ်မှုများ
*****************************************
ဆောင်းပါးကဏ္ဍ
ရွေးကောက်ပွဲဆိုင်ရာ ပြစ်မှုများ
ဦးမောင်မောင်ဝင်း(တရားလွှတ်တော်ရှေ့နေ)
(မတ် ၁၅ ထုတ် Popular News အတွဲ (၄) အမှတ် (၁၁) မှ ထုတ်ယူဖော်ပြသည်။)
ရွေးကောက်ပွဲများ လွတ်လပ်ပြီး တရားမျှတတဲ့ ရွေးကောက်ပွဲဖြစ်စေဖို့ ရွေးကောက်ပွဲဆိုင်ရာ ပြစ်မှုများကို ရွေးကောက်ပွဲကော်မရှင် ဥပဒေ အခန်း (၁၃)မှာ ပြဋ္ဌာန်းထားပါတယ်။ ယင်းပြဋ္ဌာန်းချက်များဟာ ပြစ်မှုများ (Offences) ဖြစ်ကြပြီး ရဲအရေးပိုင်ခွင့်ရှိသော ပြစ်မှုများဖြစ်ကြပါတယ်။ ဒါကြောင့် မည်သူမဆို ရွေးကောက်ပွဲဆိုင်ရာပြစ်မှုများ ကျူးလွန်ပါက ပြစ်မှုကြောင်းအရ အရေးယူခံရမည်ဖြစ်ပြီး ထောင်ဒဏ်၊ ငွေဒဏ်များချမှတ် ခံရနိုင်ပါတယ်။ ဒါကြောင့် လာမည့် ကြားဖြတ်ရွေးကောက်ပွဲမှာ မဲဆွယ်စည်းရုံးကြရာမှာ ရှောင်ကြဉ်ရမယ့် ပြုလုပ်မှုများ ဖြစ်ပါတယ်။ ဒီပုဒ်မများအရ မည်သူမဆို ကျူးလွန် ဖောက်ဖျက်ပါက အရေးယူခံရနိုင်ပါတယ်။ ယင်းရွေးကောက်ပွဲဆိုင်ရာ ပြစ်မှုများကတော့ -
(၁) ပုဂ္ဂိုလ်တစ်ဦးရဲ့ ဆန္ဒမဲပေးပိုင်ခွင့်နှင့် ရွေးကောက်တင်မြှောက်ခံပိုင်ခွင့်ကို ကျင့်သုံးခြင်းမပြုနိုင်စေရန် အကြမ်းဖက်ခြင်း၊ ခြိမ်းခြောက်ခြင်း၊ မလျော်သြဇာ သုံးခြင်း၊ လိမ်လည်လှည့်ဖြားခြင်း၊ လာဘ်ပေးခြင်း၊ လာဘ်ယူခြင်း။
(၂) ရွေးကောက်ပွဲဆိုင်ရာ အခွင့်အရေးကို မတရားသဖြင့် ရရှိစေရန် လည်းကောင်း၊ ရရှိခဲ့ခြင်းအတွက် ကျေးဇူးတုံ့ပြန်သည့်အနေဖြင့် ငွေ၊ ပစ္စည်း၊ အစားအသောက်၊ ရာထူး၊ အလုပ်အကိုင်နေရာ ပြောင်းရွှေ့မှု သို့မဟုတ် အခြားအခွင့်အရေး တစ်ခုခုကို အသုံးပြုပြီး လာဘ်ပေး၊ လာဘ်ယူပြုခြင်း။
(၃) ရွေးကောက်ပွဲဆိုင်ရာ အခွင့်အရေးကို လွတ်လပ်စွာ မကျင့်သုံးနိုင်စေရန် လွှတ်တော်ကိုယ်စားလှယ်လောင်း တစ်ဦးဦးကိုသော် လည်းကောင်း၊ ဆန္ဒမဲ ပေးပိုင်ခွင့်ရှိ သူတစ်ဦးဦးကို သော်လည်းကောင်း ခြိမ်းခြောက်ခြင်း။
(၄) လူမျိုးရေး၊ ဘာသာရေးအကြောင်းပြ၍ မဲပေးရန်၊ မဲမပေးရန် ပြောဆိုခြင်း၊ ဟောပြောခြင်း၊ ကြေညာချက်ထုတ်ခြင်း၊ ယင်းသို့ပြုရန် အားပေး လှုံ့ဆော် ခြင်း။
(၅) ဆန္ဒမဲပေးခြင်း ပျက်ပြားစေရန်၊ ရွေးကောက်ပွဲပျက်ပြားစေရန် စည်းဝေးဟောပြောခြင်း၊ လှုံ့ဆော်ခြင်း၊ ရေးသားခြင်း၊ ဖြန့်ချိခြင်း၊ ပိုစတာများ အသုံးပြု ခြင်း သို့မဟုတ် အခြား နည်းတစ်နည်းနည်းဖြင့် အားထုတ်ခြင်း။
(၆) ကော်မရှင်နှင့် ကော်မရှင်အဖွဲ့ခွဲများက ထုတ်ပြန်ထားသော စာရင်း၊ အကြောင်းကြားစာ၊ အခြား စာရွက်စာတမ်းများကို တမင်ကြံရွယ်ချက်ဖြင့် ဖျက်ဆီးခြင်း၊ ဖတ်ရှုမရအောင် ပြုလုပ်ခြင်း။
(၇) မဲစာရင်း၊ မဲလက်မှတ်၊ ကြို တင်မဲလက်မှတ်ကိုလည်းကောင်း၊ ယင်းတို့ပေးပို့ရာ၌ သုံးသော စာအိတ်၊ အထုပ်များကို တမင်ကြံရွယ်၍ ဖျက်ဆီးခြင်း၊ ရေးသွင်းထားခြင်းများကို ဖတ်ရှုမရစေရန်ပြုလုပ်ခြင်း။
(၈) ဆန္ဒမဲလက်မှတ်၊ ကြိုတင်ဆန္ဒ မဲလက်မှတ်ကို မသမာသောနည်းဖြင့် အခြားသူတစ်ဦးအား ပေးခြင်း။
(၉) မဲဆန္ဒလက်မှတ်မှအပ အခြား ပစ္စည်းတစ်ခုခုကို မဲပုံးအတွင်းသို့ ထည့်ခြင်း။
(၁ဝ) အသုံးပြုဆဲမဲပုံးများကို အခွင့် အာဏာမရှိဘဲ ဖွင့်ခြင်း၊ ဆန္ဒမဲလက် မှတ်များကို ဖျက်ဆီးခြင်း။
(၁၁) လွှတ်တော်မဲဆန္ဒနယ် တစ်နယ်ထက်ပိုသော မဲဆန္ဒနယ်များ အတွက် မဲပေးခြင်း။
(၁၂) မဲပေးပိုင်ခွင့်ရှိသော လွှတ်တော် မဲဆန္ဒနယ်အတွက် တစ်ကြိမ်ထက်ပို ၍ ဆန္ဒမဲပေးခြင်း။
(၁၃) သူတစ်ပါးအယောင်ဆောင်၍ ဆန္ဒမဲလက်မှတ် သို့မဟုတ် ကြိုတင် ဆန္ဒမဲလက်မှတ်ကို တောင်းဆိုခြင်း သို့မဟုတ် ဆန္ဒမဲပေးခြင်း။
(၁၄) ရွေးကောက်ပွဲကျင်းပနေစဉ် မဲရုံအတွင်းသို့ ဝင်ခွင့်မရှိဘဲ ဝင်ရောက်ခြင်း။
(၁၅) အတုပြုလုပ်ထားသော ဆန္ဒမဲကို မဲပုံးအတွင်းသို့ ထည့်ခြင်း။
(၁၆) ဆန္ဒမဲပေးပိုင်ခွင့်ရှိသူ တစ်ဦးဦးကို ဆန္ဒမဲပေးခြင်း မပြုနိုင်စေရန် နှောင့်ယှက်ခြင်း၊ ယင်းပြုလုပ်မှုကို အားပေးကူညီ ခြင်း။
(၁၇) ရွေးကောက်ပွဲကျင်းပသည့်နေ့တွင် မဲရုံအတွင်း၌ဖြစ်စေ၊ မဲရုံမှ ကိုက် ၅ဝဝ အကွာအတွင်း၌ဖြစ်စေ၊ အောက်ပါပြုလုပ် မှု တစ်ရပ်ရပ်ကို ကျူးလွန်ခြင်း။
(က) မဲဆွယ်ခြင်း။
(ခ) လွှတ်တော်ကိုယ်စားလှယ် လောင်းတစ်ဦးဦးကို မဲဆန္ဒပေးရန် တောင်းဆိုခြင်း၊ တိုက်တွန်းခြင်။
(ဂ) ဆန္ဒမဲပေးရန်သော်လည်းကောင်း၊ မပေးဘဲနေရန်သော်လည်းကောင်း တိုက်တွန်းသွေးဆောင်ခြင်း။ (ဤကိစ္စ၌ အခြားနေရာများ၌ ရွေးကောက်ပွဲနှင့် သက်ဆိုင်သော ကြော်ငြာ၊ စာရွက်စာတမ်းစသည်တို့ကပ် ထားခြင်း၊ ချိတ်ဆွဲထားခြင်းတုိ့ မပါဝင်ပါ)
(၁၈) ရွေးကောက်ပွဲကျင်းပသည့်နေ့တွင် ဆန္ဒမဲပေးရန် လာရောက်သူများ စိတ်ငြိုငြင်စေရန် သို့မဟုတ် မဲရုံတွင် တာဝန်ကျသော မဲရုံမှူးနှင့် မဲရုံအဖွဲ့ဝင်များ ဝတ္တရားဆောင်ရွက်ခြင်းကို အနှောင့်အယှက်ဖြစ်စေရန် မဲရုံအတွင်း၌ဖြစ်စေ၊ မဲရုံမှ ကိုက် ၅ဝဝ အတွင်း၌ဖြစ်စေ၊ အသံချဲ့စက် အစရှိသော အသံကျယ် အောင် ပြုလုပ်သည့် ကိရိယာတန်ဆာပလာ သုံးစွဲခြင်း၊ အော်ဟစ်ခြင်းအစရှိသော စည်းကမ်းမဲ့ အပြုအမူကို ပြုလုပ်ခြင်း။
(၁၉) မဲဆန္ဒပေးရန် သတ်မှတ်ထား သော အချိန်အတွင်း မဲရုံ၌ မဖွယ်မ ရာသော အမှုပြုခြင်း သို့မဟုတ် မဲ ရုံမှူးက မိမိ တာဝန်ဝတ္တရားအရ ပေးသည့်အမိန့်ကို မနာခံခြင်း၊ မဲရုံမှူး သို့မဟုတ် မဲရုံမှူး၏ အခွင့်အာဏာအရ မဲရုံအဖွဲ့ဝင်တစ်ဦး၏ အမိန့်အရ တာဝန်ကျရဲတပ်ဖွဲ့ဝင် သို့မဟုတ် အခြားလုံခြုံရေး တာဝန်ရှိသူက မဲရုံမှ ဖယ်ရှားခံရပြီးနောက် မဲရုံမှူး၏ ခွင့်ပြုချက် မရှိဘဲ မဲရုံသို့ ပြန် လည်ဝင်ရောက်လာခြင်း။
(၂ဝ) ရွေးကောက်ပွဲဆိုင်ရာ ပြစ်မှုများ နှင့် စပ်လျဉ်း၍ လိမ်လည်စွပ်စွဲတိုင် တန်းခြင်း။
ရွေးကောက်ပွဲဆိုင်ရာ ပြစ်မှုများနှင့် စပ်လျဉ်း၍ သက်ဆိုင်ရာ မဲဆန္ဒနယ်တွင် မဲဆန္ဒ ပေးပိုင်ခွင့်ရှိသူ၊ လွှတ်တော် ကိုယ်စားလှယ်လောင်း၊ ရွေးကောက်ပွဲကိုယ်စားလှယ်၊ တာဝန်ယူဆောင်ရွက်နေသော ကော်မရှင်အဖွဲ့ခွဲ၊ မဲရုံတစ်ခုခုတွင် ပါဝင်သော အဖွဲ့ဝင်တို့သည် အထောက်အထား ခိုင်လုံစွာ ဖြင့် ရွေးကောက်ပွဲမကျင်းပမီသော်လည်း ကောင်း၊ ကျင်းပနေစဉ် သော်လည်းကောင်း၊ ရွေးကောက်ပွဲ ကျင်းပသောနေ့မှ (၁၅)ရက်အတွင်းသော်လည်း ကောင်း၊ ဥပဒေနှင့်အညီ တိုင်တန်းနိုင်ပါသည်။ ယင်းပြစ်မှုများကို ရွေးကောက်ပွဲကျင်းပနေသော နေ့မှ (၁၅)ရက်အတွင်းသာ တိုင်ကြားရမည်ဟု ကာလ စည်းကမ်း သတ်မှတ်ချက်ကိုလည်း သတိပြုဖို့ လိုပါသည်။
ထို့ပြင် ရွေးကောက်ပွဲဥပဒေ အခန်း(၁၄)၌ တရားမဲ့ပြုကျင့်မှုများ (Malpractices) ပြဋ္ဌာန်းထားပါသည်။ ယင်း တရားမဲ့ပြုကျင့်မှုများသည် ပြစ်မှုများ (Offences) မဟုတ်ပါ။ ရွေးကောက်ပွဲဆိုင်ရာ ပြစ်မှုများသည် မည်သူမဆို ပြစ်မှုကျူးလွန်ပါက ရဲအရေးပိုင်သောအမှုအဖြစ် အရေးယူမှာ ဖြစ်ပါတယ်။ တရားမဲ့ပြုကျင့်မှုများကိုတော့ ရဲစခန်းကသော်လည်းကောင်း၊ တရားရုံး များကသော်လည်းကောင်း တရားမဲ့ပြုကျင့်မှုများ ရွေးကောက်ပွဲဥပဒေ အခန်း(၁၄)ရဲ့ ကျူးလွန်ကြောင်းကို ဆုံးဖြတ်နိုင်မည်မဟုတ်ပါ။ ရွေးကောက်ပွဲကော်မရှင်သို့ ရွေးကောက်ပွဲကန့်ကွက်လွှာအဖြစ် တင်သွင်းရပါမယ်။ ရွေးကောက်ပွဲ ကော်မရှင်က ခုံရုံးဖွဲ့ပြီး ဆုံးဖြတ်ပါတယ်။ (ရွေးကောက်ပွဲကန့်ကွက်လွှာ ပြင်ဆင်မှု အမှတ် ၉၊ ဦးကျော်ထွန်းအောင်နှင့် ဦးဦးစောလှ)
အချုပ်အားဖြင့်တော့ အထက်ပါ ရွေးကောက်ပွဲဆိုင်ရာပြစ်မှုများကို မည်သူမဆို ကျူးလွန်ပါက ရဲ အရေးပိုင်သော အမှုအဖြစ် သတ်မှတ်အရေးယူမှု များဟာ လွတ်လပ်၍ တရားမျှတသော ရွေးကောက်ပွဲ အောင်မြင်စွာ ကျင်းပနိုင်ရေး အတွက် ဥပဒေပြဋ္ဌာန်းချက်များဖြစ်လို့ သတိချပ်သင့်ကြောင်း တင်ပြ အပ်ပါတယ်။
**********************************************************************************
Google Docs makes it easy to create, store and share online documents, spreadsheets and presentations.
