yangonchronicle2011
၆.၃.၂၀၁၂
ပြည်တွင်းသတင်းများ
- ပို့ဆောင်ရေးလုပ်ငန်းအား အများပိုင်အဖြစ်ပြောင်းလဲရေး ဝန်ထမ်းများလက်မခံ
- ဂလိုဘယ်ဖန်း၏ ကူညီမှုရပ်ဆိုင်းသည့်အတွက် HIV/AIDS ဝေဒနာရှင်များ အခက်ကြုံ
ပြည်တွင်းပါတီ၊ နိုင်ငံရေးသတင်းများ
- နေပြည်တော်ရှိ တပ်မတော်သားများအား ပြည်သူများ၏ ချစ်ခင်မှုရရှိစေရန် NLDသို့ မဲပေးကြပါဟု ဒေါ်စုပြောကြား
- အလုပ်သမားအခွင့်အရေး ဆုံးရှုံးနစ်နာမှုများကို NNDP ပါတီသို့ တိုင်ကြား
- တစည ကိုယ်စားလှယ်တစ်ဦး ပယ်ဖျက်ခံရ
သတင်းနှင့် ဆောင်းပါးများမှ ကောက်နှုတ်ချက်များ
*****************************************
ပြည်တွင်းသတင်းများ
ပို့ဆောင်ရေးလုပ်ငန်းအား အများပိုင်အဖြစ်ပြောင်းလဲရေး ဝန်ထမ်းများလက်မခံ
ပို့ဆောင်ရေး ဝန်ကြီးဌာန လက်အောက်ရှိ လုပ်ငန်းခွဲ လေးခုအား အများပိုင်ကုမ္ပဏီအဖြစ် ကူးပြောင်းမည့် ကိစ္စရပ်ကို ဝန်ထမ်းအများစုမှ သဘောတူညီခြင်း မရှိကြောင်း သိရသည်။
ပြည်တွင်းရေကြောင်းပို့ဆောင်ရေး၊ မြန်မာ့လေကြောင်း၊ မြန်မာ့သဘောင်္ကျင်းလုပ်ငန်းနှင့် မြန်မာ့ဆိပ်ကမ်း အာဏာပိုင်လုပ်ငန်းများအား အပိုင်းလိုက်ဖြစ်စေ တစ်ခုလုံးဖြစ်စေ ဖက်စပ်ဖြစ်စေ အများပိုင်ကုမ္မဏီဖြစ်စေ ပြင်ဆင်ဖွဲ့စည်းရန် စီစဉ်နေသည်ဟု သတင်းများ ထွက်ပေါ်လာပြီးနောက် အဆိုပါ လုပ်ငန်းဌာနများတွင် တာဝန်ထမ်းဆောင်လျက်ရှိသည့် ဝန်ထမ်းများအနေနှင့် ယင်းကိစ္စရပ်အပေါ်ထားရှိသည့် ဝန်ထမ်းထု၏ သဘောထားအား ပြည်ထောင်စုအစိုးရအဖွဲ့ထံ တင်ပြသွားရန် စီစဉ်လျက်ရှိကြောင်း ပြည်တွင်းရေကြောင်းပို့ဆောင်ရေးဌာနတွင် လုပ်ကိုင်နေသူ အသက် ၅၀၀န်းကျင်ရှိ အမျိုးသမီးတစ်ဦးက ရန်ကုန်ခရော်နီကယ်သို့ ထုတ်ဖော် ပြောကြားသည်။
ယင်းကဲ့သို့ အစိုးရဌာနမှ အများပိုင်ကုမ္ပဏီအဖြစ် ပြင်ဆင်ဖွဲ့စည်းသွားပါက အဆိုပါဌာနမှ ဝန်ထမ်းများသည် ပုဂ္ဂလိကဝန်ထမ်းများ အဖြစ် ပြောင်းလဲသွားမည်ဖြစ်ကာ၊ ပြည်သူ့လွှတ်တော်ဥက္ကဋ္ဌ သူရဦးရွှေမန်းမှ အစိုးရဝန်ထမ်း လစာတိုးမြှင့်ရေးအဆိုအား လွှတ်တော် အစည်းအဝေးတွင် တင်သွင်းခဲ့ သော်လည်း နိုင်ငံ့ဝန်ထမ်းများအား ၂၀၁၄ခုနှစ်နောက်ပိုင်းမှသာ လစာတိုးမြှင့်ရေးကိစ္စရပ်ကို စီစဉ်ပေးမည်ဟု ဘဏ္ဍာရေးနှင့် အခွန်ဝန်ကြီးဌာန ပြည်ထောင်စု ဝန်ကြီး ဦးလှထွန်းက ထုတ်ဖော်ပြောဆိုခဲ့သဖြင့် ပုဂ္ဂလိကဝန်ထမ်းဖြစ်သွားပါက ၂၀၀၄ခုနှစ် နှောင်းပိုင်းတွင်စတင်မည့် တိုးမြှင့်လစာနှင့် ပင်စင်လစာ ခံစားခွင့်များ ဆုံးရှုံးသွားနိုင်ခြင်းတို့ကြောင့် အများပိုင် ကုမ္ပဏီအဖြစ် ပြင်ဆင်ဖွဲစည်းမည်ကို ဝန်ထမ်းများက လက်မခံနိုင်ခြင်းဖြစ်ကြောင်း အဆိုပါဌာနမှ ဝန်ထမ်းများ၏ ပြောကြားချက်များ အရသိရသည်။
“ကျွန်တော်တို့က အများပိုင်ပြောင်းလဲ တိုးမြှင့်လစာကို ခံစားခွင့်ရှိမယ်။ ပင်စင်လစာအစား အခြားစားရိတ် တစ်ခုလည်း စီစဉ်ပေးမယ်ဆိုရင်တော့ အများပိုင်ပြောင်းဖို့ကို လက်ခံနိုင်ဖွယ် ရှိပါတယ်”ဟု ပြည်တွင်းလေကြောင်း ပို့ဆောင်ရေးဌာနမှ အရာထမ်းတစ်ဦးက ဆိုသည်။
ပို့ဆောင်ရေးဝန်ကြီးဌာနအောက်ရှိ ဌာနခွဲများတွင် ပြည်တွင်းရေကြောင်းပို့ဆောင်ရေးနှင့် ပြည်တွင်းလေကြောင်း ပို့ဆောင်ရေးမှာ အရှုံးပေါ်နေ သည့် လုပ်ငန်းများ ဖြစ်ကြောင်း သိရသည်။
KP
-----------------------------------------------------------------------------------------------------------------------------------
ဂလိုဘယ်ဖန်း၏ ကူညီမှုရပ်ဆိုင်းသည့်အတွက် HIV/AIDS ဝေဒနာရှင်များ အခက်ကြုံ
မြန်မာနိုင်ငံရှိ HIV/AIDS ဝေဒနာရှင်များအတွက် ကူညီထောက်ပံ့မှုများပေးနေသော ဂလိုဘယ်ဖန်းရန်ပုံငွေ ကို နှစ်နှစ်ရပ်ဆိုင်းလိုက်သည့်အတွက် နိုင်ငံရှိ HIV/AIDS ဝေဒနာရှင်များမှာ အခက်အခဲကြုံတွေ့နေရကြောင်း သိရသည်။
“မြန်မာနိုင်ငံမှာရှိတဲ့ HIV/AIDS ဝေဒနာရှင် တွေအတွက် ကူညီထောက်ပံ့နေတဲ့ ဂလိုဖန်းရန်ပုံငွေ Round 11 ကို ရပ်လိုက်တာပါ။ ဒီလို ရပ်လိုက်တဲ့အတွက် HIV/AIDS ဝေဒနာရှင်တွေ လိုအပ်တဲ့ ARV ဆေးမလုံလောက်တော့ဘူး ဖြစ်နေတယ်”ပာု မြန်မာနိုင်ငံ ပြည်တွင်းပြည်ပ HIV/AIDS ကွန်ရက်အသင်းမှ တာဝန်ရှိသူတစ်ဦးက ပြောကြားသည်။
မြန်မာနိုင်ငံရှိ HIV/AIDS ဝေဒနာရှင်များအတွက် ဂလိုဘယ်ဖန်းရန်ပုံငွေ Round 13 ကို လာမည့် ၂၀၁၆ ခုနှစ်တွင်မှ ပြန်လည်ပေးအပ်နိုင်ရန် စဉ်းစားသွားမည်ဖြစ်ပြီး ၎င်းကြားကာလများတွင် ဂလိုဘယ်ဖန်း၏ ရန်ပုံငွေအကူအညီများ မရရှိနိုင်သည့်အတွက် မြန်မာနိုင်ငံရှိ HIV/AIDS ဝေဒနာရှင်များမှာ အခက်အခဲများစွာ ကြုံတွေ့နိုင်မည်ဖြစ်ကြောင်း သိရသည်။
“မြန်မာနိုင်ငံက HIV/AIDS ဝေဒနာရှင်တွေအတွက် အစိုးရထောက်ပံ့တဲ့စရိတ်က အရမ်းနည်းတယ်။ ဒီတော့ ပုဂ္ဂလိက အလှူရှင်တွေ များများ ပေါ်လာဖို့ပဲ မျှော်လင့်ရမယ်။ အရင်က ဂလိုဘယ်ဖန်းရဲ့ကူညီမှုနဲ့ နိုင်ငံတွင်း HIV/AIDS ဝေဒနာရှင် ၄၂၀၀၀ ကိုဆေးတိုက်နိုင်ခဲ့ပေမယ့် ကျန်တဲ့ ၇၀၀၀၀ ကျော်ကတော့ ဆေးဝါးလိုအပ်နေတုန်းပဲ”ပာု အထက်ပါ ပုဂ္ဂိုလ်က ဆက်လက်ဆိုသည်။
၂၀၁၀ ပြည့်စာရင်းများအရ မြန်မာနိုင်ငံ၌ HIV/AIDS ဝေဒနာရှင် နှစ်သိန်းသုံးသောင်းကျော်ရှိသည့် အနက် လေးသောင်းကျော်သာ ဆေးဝါး သောက်သုံးနေရကြောင်း သိရသည်။
YC
*****************************************
ပြည်တွင်းပါတီ၊ နိုင်ငံရေးသတင်းများ
နေပြည်တော်ရှိ တပ်မတော်သားများအား ပြည်သူများ၏ ချစ်ခင်မှုရရှိစေရန် NLDသို့ မဲပေးကြပါဟု ဒေါ်စုပြောကြား
မတ်လ ၆ရက်နေ့ မနက်ပိုင်းတွင် အမျိုးသားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်မှ နေပြည်တော်ရှိ ပုဗ္ဗသီရိမြို့နယ်နှင့် ဥတ္တရသီရိ မြို့နယ်တို့၌ ပါတီစည်းရုံးရေးအတွက် ဟောပြောပွဲ ပြုလုပ်ခဲ့သည်ဟု သတင်းရရှိသည်။
ထိုဟောပြောမှုတွင် ဒီချုပ်ဥက္ကဋ္ဌ ဒေါ်အောင်ဆန်းစုကြည်မှ နေပြည်တော်တွင် တာဝန်ထမ်းဆောင်လျက်ရှိသည့် တပ်မတော်များအား ပြည်သူများ၏ ယုံကြည်မှုနှင့် ချစ်ခင်မှုအား ပြန်လည်ရယူရန်အတွက် NLDပါတီသို့ မဲထည့်ပေးကြရန် ပြောဆိုသွားကြောင်း သတင်းထောက်တစ်ဦး၏ ပြောပြချက်အရ သိရသည်။
“ဒေါ်စုက သူ့ရဲ့ဖခင် ဗိုလ်ချုပ်အောင်ဆန်းတုန်းက ခေတ်မှာဆိုရင်ပေါ့ တပ်မတော်သားတွေကလည်း ပြည်သူလူထုက သိပ်ချစ်ကြကြောင်းနဲ့ ပြည်သူတွေကလည်း တပ်မတော်သားတွေကို ယုံကြည်ကြတယ်ပေါ့။ အဲဒါကြောင့် အခု တပ်မတော်သားတွေကလည်း ပြည်သူတွေ အားကိုးပြီး ပြည်သူတွေ အပေါ် စိုးမိုးချင်တဲ့ စိတ်မရှိစေဖို့ NLDပါတီကို မဲထည့်ဖို့ ပြောသွားပါတယ်”ဟု နေပြည်တော်မှ ဒေသခံတစ်ဦးက ပြောကြားသည်။
ယင်းပုဗ္ဗသီရိမြို့နယ်တွင် အဆိုတော် ဇေယျာသော်မှ ဝင်ရောက်ယှဉ်ပြိုင်ရန်ကြေငြာပြီး မကြာသေးခင်အချိန်တွင် NLDဆိုင်းဘုတ် ဖျက်ဆီးခံခဲ့ရ ခြင်းနှင့်လည်း ပတ်သက်၍ ဒီချုပ်ဥက္ကဋ္ဌမှ ထိုလုပ်ရပ်မှာ အောက်တန်းကျသည့် လုပ်ရပ်တစ်ခုဖြစ်ကြောင်း ဝေဖန်ပြောဆိုသွားခဲ့ပြီး ဇဗ္ဗူသီရိမြို့နယ်တွင် လျှပ်စစ်မီးနှင့် ဒီမိုကရေစီ၊ စာသင်ကျောင်း အဆောက်အဦးနှင့် ဒီမိုကရေစီအား လဲလှယ်ခြင်း မပြုလုပ်ကြရန် ပြောကြားသွားခဲ့သည်ဟု သတင်းများအရ သိရသည်။
“ပုဗ္ဗသီရိမြို့နယ်မှာ ဟောပြောပွဲလုပ်တော့ ဇေယျာသော်ကို သီချင်းတစ်ပုဒ်လောက် ဆိုပြဖို့ အောက်က လူထုက တောင်းဆိုကြတယ်ဗျ။ အဲဒါနဲ့ ဇေယျာသော်က ဗမာ့သူရဲကောင်းသီချင်းကို စပြီးဆိုပြတော့ လူထုက အောက်ကနေအားပေးကြတယ်။ လိုက်ဆိုကြတယ်။ ပြီးတော့ သူက လူထုကို ခင်ဗျားတို့ ဘာလိုချင်တာလဲလို့ မေးလိုက်တော့ ဒီမိုကရေစီစနစ် ဆိုပြီး အတိုင်အဖောက်တွေညီနေကြတယ်”ဟု NLDအဖွဲ့ဝင်တစ်ဦးမှ ပြောကြားသည်။
ထို့ပြင် ယင်းနေ့ မနက်စောပိုင်းတွင် နေပြည်တော်ရှိ အမျိုးသားလွှတ်တော်၊ ပြည်သူ့လွှတ်တော်တို့မှ တိုင်းရင်းသား ကိုယ်စားလှယ် အချို့နှင့်လည်း ၎င်းတည်းခိုသည့် Royal Kumudra Hotel တွင် တွေ့ဆုံခဲ့သေးသည်ဟု သတင်းရရှိသည်။
ထို့နောက် ၎င်းတို့အဖွဲ့သည် နေ့လည်တွင် တောင်ငူမြို့နယ်နှင့် ထန်းထပင်မြို့နယ်များသို့ ဆက်လက်သွား ရောက်ခဲ့ပြီး ပါတီစည်းရုံးရေးအတွက် ဟောပြောပွဲများ ပြုလုပ်သွားမည်ဟုလည်း သတင်းရရှိသည်။
ATM
-----------------------------------------------------------------------------------------------------------------------------------
အလုပ်သမားအခွင့်အရေး ဆုံးရှုံးနစ်နာမှုများကို NNDP ပါတီသို့ တိုင်ကြား
ရန်ကုန်တိုင်းဒေသကြီး လှိုင်မြို့နယ် အမှတ်၃ ရပ်ကွက် ဘုရင့်နောင်လမ်း အမှတ် ၂၅၊ ၂၆ CLIENT FOCUS TECHNOLOGY GROUP CO,LTD ရှိ ဝန်ထမ်းများသည် အလုပ်သမားအခွင့်အရေး ဆုံးရှုံးနစ်နာမှုများနှင့် ရင်ဆိုင်နေကြရာ သင်္ဃန်ကျွန်းမြို့နယ် ပြည်သူ့လွတ်တော်ကိုယ်စာလှယ် ဦးသိန်းညွှန်သို့ တိုင်ကြားထားကြောင်း သတင်းရရှိသည်။
ယင်းသို့ တိုင်ကြားရာတွင် ဝန်ထမ်းအစမ်းခန့်ကာလ ၃ လ ပြီးဆုံးသွားသော်လည်းလုပ်သက် ၁ နှစ်မပြည့်မခြင်း မည်သည့်ခွင့်မျှ မရရှိခြင်း လုပ်သက်၁ နှစ်ပြည့်ပြီးသေား ဝန်ထမ်းများမှာလည်း လုပ်သက်ခွင့် ၁၀ ရက်မှလွဲ၍ ဖျားနာခွင့်နှင့် ရှောင်တခင်ခွင့်များကို ခွင့်အဖြစ် အသိအမှတ်မပြုဘဲ နေ့တွက်ခနှင့် လစာ၏ ၁၀ ရာခိုင်နှုန်း အားဖြတ်တောက်ခြင်း၊ အချိန်ပိုကြေးအား တရားမျှတမှုမရှိစွာ တွက်ချက်ခြင်းစသည့် မကျေနပ်ချက် ၁၀ ချက်ဖြင့် တိုင်ကြားထားကြောင်း သိရသည်။
ကုမ္ပဏီမှ ထုတ်ပြန်ထားသော စည်းကမ်းချက်များအား ၂၀၁၁ အောက်တိုဘာလတွင် ပြုလုပ်သော လပတ်အစည်းအဝေး၌ Administration manager ဦးဘိုဘိုနိုင်ထံသို့ အလုပ်သမားများက သဘောမတူကြောင်း တင်ပြခဲ့သော်လည်း တစုံတရာ ပြင်ဆင်မှု မရှိကြောင်း သိရသည်။
“ကျွန်တော်တို့ကို အကူအညီ တောင်းထားပါတယ်။ ကျွန်တော်တို့က အဆင့်ကျော်ပြီး မလုပ်ချင်တော့ သူတို့ကို လမ်းညွှန်မှုပေးလိုက်တယ်။ သက်ဆိုင်ရာ အလုပ်သမားအဖွဲ့တွေနဲ့ ဆွေးနွေးပါလို သက်ဆိုင်ရာ လွှတ်တော်ကိုယ်စားလှယ်တွေနဲ့တိုင်ပင်ဖို့ အကယ်၍ သူတို့တွေက မဖြေရှင်းဘူးဆိုရင် ကျွန်တော်က လုပ်ဆောင်ပေးသွားမှာပါ” ဟု အမျိုးသား ဒီမိုကရေစီပါတီသစ်မှ တာဝန်ရှိသူတစ်ဦးဖြစ်သည့် ဦးကျော်က ဆိုသည်။
မကြာခဏဖြစ်ပေါ်လျက်ရှိသော အလုပ်သမားအခွင့် အရေးဆုံးရှုံးမှုများနှင့်ပတ်သက်ပြီး လွှတ်တော်ကိုယ်စားလှယ်များမှတစ်ဆင့် လုပ်ဆောင်ပါက ပိုမိုထိရောက်နိုင်မည် ဖြစ်ကြောင်း ပြည်သူ့လွှတ်တော်ကိုယ်စားလှယ် တစ်ဦးက သုံးသပ်ပြသည်။
အလုပ်သမားအခွင့်အရေး ဆုံးရှုံးနစ်နာနေရခြင်းမှာစီးပွားရေးပိတ်ဆို့ခြင်းနှင့် တိုက်ရိုက်သက်ဆိုင်နေကြောင်း ဦးကျော်က ဆက်လက် သုံးသပ် သည်။
KP
-----------------------------------------------------------------------------------------------------------------------------------
တစည ကိုယ်စားလှယ်တစ်ဦး ပယ်ဖျက်ခံရ
ရန်ကုန်တိုင်းဒေသကြီးရွေးကောက်ပွဲကော်မရှင်မှ တိုင်းရင်းသား စည်းလုံးညီညွှတ်ရေး ပါတီ(တစည)၏ လွှတ်တော်ကိုယ်စားလှယ်လောင်း တစ်ဦးအား အရည်အချင်း မညီညွတ်သည့်အတွက် ပယ်ဖျက်လိုက်ကြောင်း သိရသည်။
ရန်ကုန်တိုင်းဒေသကြီး ရွေးကောက်ပွဲကော်မရှင်မှ ဧပြီလ ၁ ရက်နေ့၌ ကျင်းပမည့် ကြားဖြတ်ရွေးကောက်ပွဲများတွင် တစညပါတီ ကိုယ်စားပြုအဖြစ် မင်္ဂလာတောင်ညွှန့်မဲဆန္ဒနယ်မှ ဝင်ရောက်ယှဉ်ပြိုင်မည့် လွှတ်တော်ကိုယ်စားလှယ်လောင်း ဒေါ်စန္ဒာမြင့်အား ကိုယ်စားလှယ်လောင်းအရည်အချင်း ပျက်ယွင်း သည်ပာုဆိုကာ ရွေးကောက်ပွဲယှဉ်ပြိုင်ရန် ပယ်ဖျက်ခဲ့ကြောင်း သိရသည်။
"ဒီလို ကော်မရှင်က လွှတ်တော်ကိုယ်စားလှယ်လောင်းအဖြစ်ကနေ ပယ်ဖျက်လိုက်တဲ့ကိစ္စကို ပြည်ထောင်စုအဆင့်အထိ ရောက်အောင် အဆိုပြု လွှာတွေတင်ဖို့ ဆုံးဖြတ်ထားပါတယ်။ ကော်မရှင်ရဲ့ ဒီလိုလုပ်ရပ်ပာာ ကိုယ်စားလှယ်လောင်း ဒေါ်စန္ဒာမြင့်သာမကဘူး။ ပါတီရဲ့ ဂုဏ်သိက္ခာပိုင်းမှာလည်း ထိခိုက်နစ်နာမှုတွေ ရှိပါတယ်"ပာု တိုင်းရင်းသား စည်း လုံးညီညွှတ်ရေးပါတီမှ တာဝန်ရှိသူတစ်ဦးက ဆိုသည်။
ဧပြီလ ၁ ရက်နေ့၌ ကျင်းပမည့် ကြားဖြတ်ရွေးကောက်ပွဲ၌ တစညပါတီ ကိုယ်စားပြုအဖြစ် ဝင်ရောက်ယှဉ်ပြိုင်မည့် ကိုယ်စားလှယ်လောင်း ဒေါ်စန္ဒာမြင့်အား ကော်မရှင်မှ ပယ်ဖျက်ရခြင်းမှာဒေါ်စန္ဒာမြင့်၏ မှတ်ပုံတင်နံပါတ်များ မှားယွင်းနေခြင်း၊ ၎င်း၏ မိဘနှစ်ပါးစလုံးမှာ ၎င်း မွေးဖွားစဉ်က မြန်မာ နိုင်ငံသား မပာုတ်သေးခြင်းတို့ကြောင့်ဖြစ်ကြောင်း သိရသည်။
"တစညပါတီက ရန်ကုန်တိုင်းဒေသကြီးမှာ ၂ နေရာပဲဝင်ပြိုင်တာပါ။ ပြီးတော့ ကြားဖြတ် ရွေးကောက်ပွဲ ဝင်ရောက်ယှဉ်ပြိုင်တဲ့ ကိုယ်စားလှယ်တွေရဲ့ အချက်အလက်တွေအားလုံးကို သေချာစိစစ်ပြီးမှ ကော်မရှင်ကို တင်လိုက်တာပါ။ ဒီတော့ ကျွန်တော်တို့ပါတီအနေနဲ့ကတော့ မမှားနိုင်ပါဘူး။ အဓိကအနေနဲ့ ကတော့ ဖွဲ့စည်းပုံအခြေခံဥပဒေနဲ့ ပြည်သူ့လွှတ်တော် ဥပဒေနဲ့မှာ လွဲနေတာ။ အခုရွေးကောက်ပွဲမှာ ဝင်ရောက်ဖို့ အခွင့်အရေး မရှိတော့ပေမယ့် ဒီကိစ္စကို ပြည်ထောင်စု အဆင့်ထိရောက်အောင် အဆင့်ဆင့် ဆောင်ရွက်သွားမှာပါ"ပာု ၎င်းက ဆက်လက်ပြောကြားသည်။
ထို့ပြင် ပြီးခဲ့သည့် ၂၀၁၀ ရွေးကောက်ပွဲတွင် တစညပါတီ၏ ပယ်ဖျက်ခံလွှတ်တော်ကိုယ်စားလှယ် ဒေါ်စန္ဒာမြင့်သည် လသာမဲဆန္ဒနယ်မှ ဝင်ရောက် ယှဉ်ပြိုင်ရာတွင် ရှုံးနိမ့်ခဲ့ရပြီး ၎င်း၏ အကိုနှစ်ဦးမှာလည်း ကော်မရှင်၏ ပယ်ဖျက်ခြင်းကို ခံခဲ့ရကြောင်း သိရသည်။
YC
****************************************
သတင်းနှင့် ဆောင်းပါးများမှ ကောက်နှုတ်ချက်များ
စွမ်းရည်နည်းတာ၊ အရည်အချင်းနည်တာကို အပြစ်လို့ သိပ်မမြင်ချင်ပါဘူး၊ စွမ်းရည်မြင့်ချင်၊ အရည်အချင်းမြင့်ချင်ရင် တော်သေးတယ်။ လေ့လာချင်၊ သိချင်၊ တတ်ချင်၊ ဆည်းပူးချင်တဲ့စိတ်ရှိရင် သင်ပေးလို့ရတယ်။ အရည်အချင်း မြင့်အောင် ကြိုးစားချင်တဲ့စိတ်ရှိရင် ဖြစ်တယ်။ ဒါပေမဲ့ အရည်အချင်း မမြင့်ချင်တဲ့အခါ သူရဲ့စွမ်းရည်မမြင့် နိုင်သလို သက်ဆိုင်တဲ့ အဖွဲ့အစည်းတွေရဲ့ စွမ်းရည်လည်းမြင့်မလာနိုင်ပါဘူး။
မတ် ၆ ထုတ် The Street View အတွဲ (၁) အမှတ် (၉) တွင်ပါသည့်“ရှားပါးတာတွေ” အယ်ဒီတာအာဘော်မှ ကောက်နှုတ်ချက်
-----------------------------------------------------------------------------------------------------------------------------------
မေး- အခုလိုဒေါ်အောင်ဆန်းစုကြည်ကို ကန့်ကွက်တဲ့အတွက် အခြားပါတီ ဒါမှမဟုတ် ပြည်သတွေဆီက ထိုးနှက် မှုတွေများရှိပါသလား။
ဖြေ- မရှိပါဘူး။ နိုင်ငံရေးလောကထဲမှာ ကျင်လည်နေတဲ့ သဘောပေါက်နေတဲ့ လူတွေကတော့ ကျွန်တော်တို့ဟာ ဖွဲ့စည်းပုံအခြေခံဥပဒေကို high light လုပ်ပြနေတယ်။ ဥပဒေအထက် မည်သူမျှမရှိရဘူးဆိုတဲ့ ခေါင်းစဉ်ကို လူထုသိအောင် ပြနေတယ်ဆိုတာ သိကြပါတယ်။ နိုင်ငံရေးလုပ်တယ်ဆိုတာ ပြည်သူ့ အတွက် တာဝန်ကျေအောင် လုပ်တာပါ။ ဘယ်သူကိုမှ ချစ်လို့မုန်းလို့ မဟုတ်ပါဘူး။
မတ် ၅ ထုတ် Favourite News အတွဲ(၃) အမှတ် (၁၄၀) တွင်ပါသည့် “ကော့မှူးမဲဆန္ဒနယ်မှ လွှတ်တော် ကိုယ်စားလှယ်လောင်း ဦးတင်ရီနှင့် အင်တာဗျူး” ကောက်နှုတ်ချက်
-----------------------------------------------------------------------------------------------------------------------------------
“အန်တီက တိုင်းရင်းသားတွေ အခုတောင်းဆိုနေတဲ့ အခွင့်အရေး တန်းတူညီတူ ရရှိရေးဆိုတာကို ကျွန်မ လုံးဝသဘောတူတယ်။ လုံးဝလက်ခံတယ်။ စစ်မှန်တဲ့ ဒီမိုကရေစီပြည်ထောင်စုဖြစ်ဖို့ဆိုရင် အားလုံးက တန်းတူညီတူ အခွင့်အရေး ရရှိရမယ်။ တိုင်းင်းသားလို့ပြောတဲ့အခါမှာ ဗမာမပါသလို ဖြစ်နေတယ်။ ကျွန်မ အမြဲသတိပေးနေတယ်။ ဗမာကလည်း တိုင်းရင်းသားတစ်မျိုးပဲ ဖြစ်တယ်”
မတ် ၇ ထုတ် The Myanmar Post အတွဲ(၄) အမှတ် (၁၀) တွင်ပါသည့်“တိုင်းရင်းသားအားလုံး တန်းတူညီတူ အခွင့်အရေး ရရှိမှသာလျှင် စစ်မှန်သော ဒီမိုကရေစီနိုင်ငံတစ်ခုကို တည်ဆောက်နိုင်မည်ဖြစ်ကြောင်း ကလောမဲဆွယ်စည်းရုံးပွဲတွင် ဒေါ်အောင်ဆန်းစုကြည်ပြောကြား” သတင်းမှ ကောက်နှုတ်ချက်
**************************************
Posts
