Posts
 | yangonchronicle2011 Op-Ed |
၁၄.၅.၂၀၁၂
ဆောင်းပါးကဏ္ဍ
- သားရွှေအိုးထမ်းလာခြင်းသာ……
*****************************************
ဆောင်းပါးကဏ္ဍ
သားရွှေအိုးထမ်းလာခြင်းသာ……
မိုးမြင့်ငြိမ်း
နိုင်ငံတိုင်းရှိ နိုင်ငံတော်အစိုးရများသည် ၎င်းတို့နိုင်ငံ၏ နိုင်ငံရေး၊ စီးပွားရေး၊ လူမှုရေး တည်ငြိမ်မှုများရရှိအောင်တနည်း လုံခြုံမှုရှိအောင် ဆောင် ရွက်ခြင်းကို တာဝန်တစ်ရပ်အနေဖြင့် ထမ်းရွက်မြဲဖြစ်သည်။ ပြည်တွင်းရေးရာမူဝါဒများ၊ နိုင်ငံခြားရေးမူဝါဒများကို ချမှတ်ရာတွင် နိုင်ငံတော်လုံခြုံရေး အတွက်တနည်း တည်ငြိမ်ရေးကို ထည့်သွင်းစဉ်းစားမြဲဖြစ်သည်။ ထို့အပြင် စီးပွားရေးအကျပ်အတည်းကြောင့် လူမှုရေးမတည်မငြိမ် ဖြစ်ပေါ်ခြင်းမရှိ အောင်တနည်း တည်ငြိမ်မှုရှိအောင် ဆောင်ရွက်ခြင်းသည် နိုင်ငံတော်လုံခြုံရေးအတွက်ပင် ဖြစ်သည်။ မြန်မာနိုင်ငံသည် တပ်မတော်အစိုးရလက်ထက်က အာဏာရှင်စနစ်ဖြစ်သည်နှင့်အညီ အရာရာကို နိုင်ငံတော်လုံခြုံရေးရှုထောင့်မှ စဉ်းစားခဲ့သည့်အတွက် တံခါးဖွင့်ဝါဒကို ကျင့်သုံးအကောင်အထည်ဖော်ခဲ့ ခြင်းမရှိ။ ထိုအတွက်ကြောင့် ပြဿနာကို ဖြေရှင်းခြင်းထက် နိုင်ငံရေး၊ လူမှုရေး တင်းမာမှုများကို ဖုံးဖိထားနိုင်သလို စီးပွားရေးစီမံခန့်ခွဲမှု အမှားများသည် လည်း ပြည်သူတို့၏ နေ့စဉ်ဘဝကို မသိမသာတိုက်စားလာခဲ့ရာဆင်းရဲတွင်း အတော်ကြီးနက်ခဲ့ပါသည်။
၂၀၁၀ အထွေထွေရွေးကောက်ပွဲကြီးအပြီး ဒီမိုကရေစီအစိုးရသစ်မှ အပြောင်းအလဲများကို အထူးသဖြင့် နိုင်ငံရေးအပြောင်းအလဲ ဆက်တိုက်ဆို သလို လုပ်ဆောင်ခဲ့သည်။ အသစ်ပေါ်ထွန်းလာခဲ့သည့် လွှတ်တော်၊ နိုင်ငံရေးပါတီ အစရှိသည့် နိုင်ငံရေးအင်စတီကျူးရှင်းများလည်း ပေါ်ပေါက်ခဲ့သလို အဆိုပါ အင်စတီကျူးရှင်းများ အလုပ်ဖြစ်အောင်လည်း ဆောင်ရွက်လာကြပြီဖြစ်သည်။ ကြားဖြတ်ရွေးကောက်ပွဲအပြီး အဓိကအတိုက်အခံပါတီဖြစ်သော NLD ပါတီမှ ရွေး ကောက်ပွဲနိုင် လွှတ်တော်ကိုယ်စားလှယ်များ လွှတ်တော်သို့ ဝင်ရောက်လာပြီဖြစ်သည့်အတွက် နောင်ကျင်းပမည့် လွှတ်တော်အစည်း အဝေးများမှာ အသံပိုမြိုင်လာနိုင်သည်။ အရေးကြီးသည်မှာ နိုင်ငံရေးအင်စတီကျူးရှင်းများ၏ တောင့်တင်းခိုင်မာမှုတနည်း ဒီမိုကရက်တစ် လက်တွေ့လုပ် ထုံးလုပ်နည်းများကို အသက်ဝင်အောင် စနစ်တကျဆောင်ရွက်နိုင်မှုဖြစ်သည်။
ဆိုခဲ့ပြီးသည့်အတိုင်း အာဏာပိုင်စနစ်မှ ဒီမိုကရေစီစနစ်သို့ အပြောင်းတွင် ယခင်ကလို သတင်းများ ဖုံးအပ်ထား၍မရသလို ဖွဲ့စည်းပုံက ပေးအပ် ထားသော နိုင်ငံသားအခွင့်အရေးများကို နည်းဥပဒေပေါ်မလာသေးသည့်တိုင် ပစ်ပယ်ထားပြီး ဖိနှိပ်ထားလို့ မဖြစ်တော့ကြောင်းကို စတင်နားလည် သဘောပေါက်လာမှ မှန်ကန်မှုဘက်သို့ ဦးတည်နိုင်မည်။ ထိုသို့ သတင်းမီဒီယာအပေါ် တင်းကျပ်ထားမှု ဖြေလျော့လာမှုနှင့်အတူ လူ့အဖွဲ့အစည်းအတွင်း ပုံသဏ္ဍန်မျိုးစုံ၊ အကြောင်းအရာ မျိုးစုံသော ပဋိပက္ခပုံစံမျိုးစုံကို တွေ့မြင်လာရသည်။ နိုင်ငံသားအခွင့်အရေးများကြောင့် အလုပ်သမားသမဂ္ဂ ဖွဲ့စည်းနိုင်ခွင့် များရရှိလာလေရာ လုပ်ခလစာ တစ်ကိုယ်ရပ်တည်မှုတောင်မရသည့် အလုပ်သမားများမှာ ၎င်းတို့၏ အထွေထွေအရေးအတွက် တောင်းဆိုခွင့်ရှိသည့် လမ်း ကြောင်းများ ပေါ်ထွန်းလာနေပြီဖြစ်သည်။ ဒီမိုကရက်တိုက်ဇေးရှင်းနှင့် ပတ်သက်၍ ပညာရှင်များ၏ ရေးသားပို့ချချက်များတွင် ဒီမိုကရေစီ အသွင်ကူး ပြောင်းသည့် နိုင်ငံများမှာ နိုင်ငံရေး၊ စီးပွားရေး၊ လူမှုရေး အပြောင်းအလဲများကြောင့် တည်ငြိမ်မှု တစ်စုံတစ်ရာကျသွားသည်ဟု ဆိုသည်။ ထိုသို့ တည်ငြိမ်မှု ကျသွားခြင်းကို ကျော်လွှားသွားနိုင်မှု ရှိ၊ မရှိဆိုသည်မှာ အင်စတီကျူးရှင်များ၏ ခိုင်မာမှု ရှိ၊ မရှိပေါ် မူတည်နေသည်။ အင်စတီကျူးရှင်းကို ကားတစ်စီး ရှော့ဘားနှင့်နှိုင်းယှဉ်၍ ဥပမာပေးကြသည်။ ဒီမိုကရက်တိုက်ဇေးရှင်းဟူသော ချိုင့်ခွက်များဖြင့် မညီမညာ မဖြောင့်ဖြူးသည့် လမ်းမကြီးတွင် နိုင်ငံတော် ဟူသော မော်တော်ကားမှ မောင်းသည့်အခါ အတက်အကျမကြမ်းအောင် အလှုပ်အရမ်းနည်းအောင် အင်စတီကျူးရှင်းဟူသော ရှော့ဘားကောင်းရှိမှ တည် တည်ငြိမ်ငြိမ်ဖြင့် ဖြတ်သန်းနိုင်မည်ဖြစ်သည်။ အင်စတီကျူးရှင်း ခိုင်မာအားကောင်းမှု မရှိလျှင်တော့ ဒီမိုကရက်တိုက်ဇေးရှင်း ခရီးရှည်ကြီးမှ နောက် ကြောင်းပြန်သွားနိုင်သည်။
မြန်မာနိုင်ငံမှာ ဒီမိုကရက်တိုက်ဇေးရှင်း လမ်းကြမ်းကြီးတွင် စိန်ခေါ်မှုအပြည့်ဖြင့် နိုင်ငံတည်ဆောက်ရေးကို ဆောင်ရွက်နေရသလို တစ်ဖက်တွင် လည်း ဆယ်စုနှစ်ချီဖြစ်ပွားခဲ့သည့် ပြည်တွင်းစစ်ကြီးကို အဆုံးသတ်နိုင်ရန်နှင့် တိုင်းရင်းသား လက်နက်ကိုင်အဖွဲ့အစည်းများနှင့် ထာဝရငြိမ်းချမ်းရေးရ သည်အထိ အစိုးရသစ်မှ နည်းအမျိုးမျိုးဖြင့် ကြိုးပမ်းမည်ဖြစ်သည်။ လောလောဆယ်ကာလတွင် အားထုတ်မှု၏ ရလဒ်အဖြစ် တိုင်းရင်းသား လက်နက်ကိုင် အဖွဲ့အစည်း ၁၀ ဖွဲ့နှင့် ပြည်နယ်အဆင့်တွေ့ဆုံမှုများ ဆောင်ရွက်နိုင်ခဲ့ပြီဖြစ်သည်။ ယင်းမှာ နိုင်ငံတော်၏ ထာဝငြိမ်းချမ်းရေး ဖော်ဆောင်ရေးလမ်းပြ မြေပုံ၏ ပထမအဆင့်သာ ရှိပါသေးသည်။ ဒုတိယအဆင့်တွင် ပြည်ထောင်စုအဆင့် ဆွေးနွေးပွဲများကို ကျင်းပမည်ဖြစ်ပြီး တတိယအဆင့်တွင် နိုင်ငံရေး တွင် ကိုယ်တိုင်ပါဝင်နေသူအားလုံး လွှတ်တော်တွင် လက်မှတ်ရေးထိုးကြရန် ဖြစ်သည်။ ထိုအတွက်ကြောင့် နိုင်ငံတော်သမ္မတ ဦးဆောင်မှုဖြင့် ပြည်ထောင် စုငြိမ်းချမ်းရေး ဖော်ဆောင်ရေးဗဟိုကော်မတီ ဖွဲ့စည်းခဲ့ပြီး ဒုတိယသမ္မတ ဒေါက်တာစိုင်းမောက်ခမ်း ဦးဆောင်မှုဖြင့် ပြည်ထောင်စုငြိမ်းချမ်းရေး ဖော် ဆောင်ရေးလုပ်ငန်းကော်မတီကိုလည်း ဖွဲ့စည်းခဲ့သည်။ အသစ်ဖွဲ့စည်းလိုက်သည့် ပြည်ထောင်စုငြိမ်းချမ်းရေး ဖော်ဆောင်ရေးဗဟိုကော်မတီသည် သမ္မတ ရုံးညွှန်ကြားရေးမှူးချုပ် ဦးမင်းဇော် (ကော်မတီအတွင်းရေးမှူး)၊ ပြည်ထောင်စုရှေ့နေချုပ် ဒေါက်တာထွန်းရှင် (ကော်မတီအဖွဲ့ဝင်)မှအပ ကျန်ပုဂ္ဂိုလ်များမှာ အမျိုးသားကာကွယ်ရေးနှင့် လုံခြုံရေးကောင်စီ အဖွဲ့ဝင်အများစုပါဝင်နေသည်။ ကာ/လုံမှ ဒုတိယ တပ်မတော်ကာကွယ်ရေးဦးစီးချုပ်နှင့် နိုင်ငံခြားရေးဝန် ကြီးတို့နှစ်ဦးသာ ယင်းကော်မတီတွင်မပါဝင်ချေ။
မြန်မာနိုင်ငံ၏ နိုင်ငံတကာအသိုင်းအဝိုင်းတွင် တရားဝင်မှုသည့် ပြည်တွင်းရေးရာမူဝါဒ မှန်ကန်မှုရှိအောင် ဆောင်ရွက်နိုင်မှုအပေါ်တွင် မူတည် သည်။ သမ္မတဦးသိန်းစိန်သည် ပဋိပက္ခလွန် နိုင်ငံတည်ဆောက်ရေးကို အကောင်အထည်ဖော်ရာတွင် မတည်မငြိမ် ဖြစ်ပေါ်လာနိုင်မှုကို တွက်ဆ၍ ကာ/လုံ အဖွဲ့ဝင်များဖြင့် ဖွဲ့စည်းလိုက်ခြင်းဖြင့် လုံခြုံရေးနှင့် တည်ငြိမ်မှုကို ဆောင်ကြဉ်းပေးနိုင်အောင် ဆောင်ရွက်တော့မည်ဖြစ်သည်။ ပြည်ထောင်စုအဆင့် ငြိမ်းချမ်းရေးဆွေးနွေးပွဲများသည် တကယ့်ကို အကဲဆတ်မည့်သဘောတွင် ရှိသည်။ ပြည်ထောင်စုမှ လုံးဝမခွဲထွက်ရန်၊ ဒို့တာဝန်အရေးသုံးပါးကို လက်ခံ ရန်၊ စီးပွားရေးနှင့် ဖွံ့ဖြိုးတိုးတက်ရေးလုပ်ငန်းများတွင် နှစ်ဖက်ပူးပေါင်းဆောင်ရွက်ရန်၊ မူးယစ်ဆေးဝါးနှင့် စိတ်ကိုပြောင်းလဲစေတတ်သော ဆေးဝါးများကို တိုက်ဖျက်ရေး ပူးပေါင်းဆောင်ရွက်ရန်၊ နိုင်ငံရေးပါတီများ ထူထောင်၍ နိုင်ငံရေးဖြစ်စဉ်တွင် ပါဝင်ရန်၊ လွှတ်တော်တွင်းတွင် အခြားသော တိုင်းရင်းသား များနှင့် ညှိနှိုင်းပြီး ဖွဲ့စည်းပုံအခြေခံဥပဒေ ပြင်ဆင်ရန်နှင့် ဖွဲ့စည်းပုံအခြေခံဥပဒေနှင့်အညီ တစ်ခုတည်းသော လက်နက်ကိုင်တပ်မတော် ဖြစ်ထွန်းလာဖို့ ညှိနှိုင်းရန်တို့ဖြစ်သည်။ လုံခြုံ ရေးနှင့် ပဋိပက္ခသဘောတရားကို ပိုင်ပိုင်နိုင်နိုင်နှင့် ကျွမ်းကျွမ်းကျင်ကျင်နားလည်မှ ဖြေရှင်းနိုင်မည့်ပြဿနာမျိုး ဖြစ်သည်။ နိုင်ငံတော်၏ ထာဝရငြိမ်းချမ်းရေးဖော်ဆောင်မှုလမ်းပြမြေပုံအတိုင်း အကောင်အထည်ဖော် ဆောင်ရွက်နိုင်ပြီဆိုပါက ငြိမ်းချမ်းရေးနှင့် ဖွံ့ဖြိုးမှုကို ရရှိမှာ ဖြစ်သလို စစ်ဘက်-အရပ်ဘက် ဆက်ဆံရေး နားလည်မှုနှင့် ယုံကြည်မှုပိုမိုရှိလာမှာလည်း ဖြစ်သောကြောင့် သားရွှေအိုးထမ်းလာခြင်းသာဖြစ်ပါကြောင်း။
*****************************************
Google Docs makes it easy to create, store and share online documents, spreadsheets and presentations.
