Posts
 | yangonchronicle 2011 |
၁၉.၄.၂၀၁၁
ပြည်တွင်းသတင်းများ
MRTV-3 ရုပ်သံလိုင်းနှင့် အနုပညာရှင်များကြား ပဋိပက္ခဖြစ်ဟုဆို
နေပြည်တော်၊ ဧပြီ ၁၈။
ရွှေသံလွင်ကုမ္ပဏီပိုင် Myanmar International ရုပ်သံလိုင်း(MRTV-3) က ယခုနှစ် နေပြည်တော်သင်္ကြန်ကို တိုက်ရိုက်ထုတ်လွှင့် ပြသခဲ့ရာ ထုတ်လွှင့်နေစဉ်အတွင်း စီစဉ်သူများနှင့် အနုပညာရှင်များအကြား ပဋိပက္ခဖြစ်ပွားခဲ့ကြောင်း ယင်းကုမ္ပဏီ အသိုင်းအဝိုင်းနှင့် အနုပညာရှင်များ အသိုင်း အဝိုင်းတို့က စုံစမ်းသိရှိရသည်။
တီးဝိုင်းအဖွဲ့ဝင်တစ်ဦးက “ တိုက်ရိုက်လွှင့်မယ်ဆိုရင် အဆိုတော်တွေကို သီးသန့်အနုပညာကြေးထပ်ပေးရတယ်။ သူတို့တွေ သီချင်းဆိုတာက တစ်ဈေး၊ ရိုက်ကူးထုတ်လွှင့်က တစ်ဈေးပေါ့။ အစတုန်းကတော့ အဆင်ပြေအောင် ကြည့်လုပ်ပေးပါ့မယ်ဆိုပြီးတော့ ခေါ်လာတယ်။ တကယ် လွှင့်ခါနီး ကျတော့ ဟိုလွှဲချ၊ ဒီလွှဲချ လုပ်နေတယ်။ တချို့အဆိုတော်တွေက သူတို့ရဲ့ပုံကို ရိုက်ကူးခွင့်မပြုလို့ မလွှင့်ရတာရှိတယ် ” ဟု ပြောကြားသည်။
ယင်းအစီအစဉ်ကို ရန်ကုန်မှ ကြည့်ရှုသူတစ်ဦးက နေပြည်တော်ရှိမဏ္ဍပ်များအား တိုက်ရိုက်ထုတ်လွှင့်သည်ဟု ဆိုသော်လည်း Sky Net မဏ္ဍပ် တစ်ခုတည်းသာ အသားပေးထုတ်လွှင့်ကြောင်း၊ Max စသည့်မဏ္ဍပ်များကို ထုတ်လွှင့်ပေးသော်လည်း တပိုင်းတစသာ ဖြစ်ကြောင်း၊ တိုက်ရိုက်လွှင့် သည် ဟုဆိုသော်လည်း စီစဉ်ထုတ်လွှင့်မှုများ စနစ်မကျကြောင်း၊ ရုပ်နှင့်အသံ လွဲနေမှုများရှိကြောင်း ပြောကြားခဲ့သည်။
ထူးခြားချက်မှာ သင်္ကြန်အကျနေ့က Sky Net မဏ္ဍပ်တွင် ရန်အောင်သီဆိုဖျော်ဖြေနေချိန်တွင် ပရိတ်သတ်များမှ ရေသန့်ဘူးများဖြင့် ပစ်ပေါက်ခဲ့ ကြောင်း၊ ရန်အောင်က ထိုသို့မပြုလုပ်ရန် မေတ္တာရပ်ခံခဲ့ကြောင်း၊ ယင်းနောက် ဖိုးသောကြာက မင်းဘာလဲ၊ ငါဘာလဲ သီချင်းဖြင့် ဖျော်ဖြေသည့်အချိန်တွင် ပရိတ်သတ်များက ထိုသို့ထပ်မံပြုလုပ်ခဲ့ရာ ဖိုးသောကြာက တုန့်ပြန်ပြောဆိုနေစဉ်တွင် တိုက်ရိုက်ထုတ်လွှင့်မှု ပြတ်တောက်သွားခဲ့ပြီး Sky Net Logo ကိုသာ ၄မိနစ်ခန့် ပြသခဲ့ကြောင်း၊ နောက်ပိုင်းမှသာ တိုက်ရိုက်ပြန်လွှင့်ပေးခဲ့ကြောင်း၊ အလားတူ အကြိုနေ့ကလည်း သီရိဂျေမောင်မောင် သီဆိုနေချိန်တွင် ပိတောက်ပန်းပုံနှင့် အသံကိုသာ ထုတ်လွှင့်ခဲ့ကြောင်း၊ ယင်းကိစ္စများကြောင့် အနုပညာရှင်များနှင့် ရိုက်ကူးထုတ်လွှင့်သူများ၊ အာဏာပိုင်များအကြား တစ်စုံတစ်ရာ ပြဿနာရှိမည်ထင်ကြောင်း၊ သင်္ကြန်အကျနေ့က ထိုသို့ ပြဿနာဖြစ်ပြီးနောက် မဏ္ဍပ်ရှေ့တွင် ယာဉ်တစ်စီးစာနေရာ ချန်လှပ်ပြီး အတား အဆီးများဖြင့် ပတ်ပတ်လည် ကာရံခဲ့ကြောင်း၊ သို့သော် နောက်ပိုင်းရက်များတွင်လည်း ရေသန့်ဘူးများ၊ ဘီယာဘူးများဖြင့် ဆက်လက်ပစ်ပေါက်လျှက် ရှိသည်ကို တွေ့ရကြောင်း နေပြည်တော်တွင် သင်္ကြန်တွင်လည်ပတ်ခဲ့သူတစ်ဦးက ပြောကြားခဲ့သည်။
The CJs News
-----------------------------------------------------------------------------------------------------------------------------------
သင်္ကြန်ကာလ နေပြည်တော်၌ ဓါတ်ဆီတစ်ဂါလံ ကျပ် ၆,၀၀၀အထိ စံချိန်တင်မြင့်တက်
နေပြည်တော်၊ ဧပြီ ၁၇။
သင်္ကြန်တွင်းကာလတွင် ဆီဆိုင်များကို ပိတ်ရက်မရှိ ပုံမှန်ဈေးနှုန်းများဖြင့်သာ ရောင်းချရမည်ဟု ဆိုသော်လည်း ဝယ်ယူရာတွင် အခက်အခဲများ ရှိရာ ပြင်ပပေါက်ဈေးမှာ တစ်ဂါလံလျှင် ကျပ်၆,၀၀၀ အထိ မြင့်တက်ခဲ့ကြောင်း သင်္ကြန်ကာလတွင်း ရန်ကုန်မှ နေပြည်တော်သို့ ကိုယ်ပိုင်ယာဉ်ဖြင့် ခရီး သွားလာသူများနှင့် မြို့ခံများထံမှ သိရှိရသည်။
ယခင်က ဆီဈေးမှာ အမြင့်ဆုံး တစ်ဂါလံလျှင် ၄,၀၀၀ကျပ် ဝန်းကျင်ခန့်သာရှိကြောင်း၊ ယခင်နှစ်များကလည်း သင်္ကြန်ကာလအတွင်း ဈေးတက် သော်လည်း ယခုနှစ်မှာ အမြင့်ဆုံးဈေးဖြစ်ကြောင်း၊ ပုဂ္ဂလိကဆီဆိုင်များတွင် ဝယ်ယူရရှိနိုင်သည်ဟုဆိုသော်လည်း ယင်းဆိုင်များမှာ ညနေ ၆ နာရီတွင် ပိတ်သဖြင့် ညပိုင်းတွင် အခက်အခဲရှိကြောင်း၊ ပုဂ္ဂလိကသို့ ဆီဆိုင်များကို လွှဲပြောင်းလုပ်ကိုင်ခွင့်ပြုပြီးနောက်ပိုင်း ဈေးနှုန်းအတက်အကျကြမ်းမှုကြောင့် ခရီးသွားများမှာ များစွာနစ်နာမှု ရှိကြောင်း သတင်းဆန်းစစ်သူများနှင့် ခရီးသွားများထံမှ စုံစမ်းသိရှိရသည်။
နေပြည်တော်တွင် ဓါတ်ဆီဈေးမှာ သင်္ကြန်မတိုင်မီက တစ်ဂါလံလျှင် ကျပ်လေးထောင်ဝန်းကျင်ခန့်ရှိကြောင်း၊ လမ်းဘေးဆီဆိုင်အများစုမှာ ဆိုင်ကယ်များအတွက် တစ်လီတာပုလင်းများဖြင့် အသင့်ရောင်းချလေ့ရှိကြောင်း၊ သင်္ကြန်ကာလအတွင်း နေပြည်တော်ရှိ လမ်းဘေးဆီဆိုင်အများစု ပိတ် သည့်အတွက် ပျဉ်းမနားမြို့တွင်းအထိ သွားရောက်ဝယ်ယူရကြောင်း ရန်ကုန်-နေပြည်တော်သို့ ကိုယ်ပိုင်ကားဖြင့် ခရီးသွားလေ့ရှိသူတစ်ဦးက ဆိုသည်။
The CJs News
×××××××××××××××××××××××××××××××××××××××××××××××××××××××××××××××××
ပြည်တွင်းပါတီ၊ နိုင်ငံရေးသတင်းများ
နှစ်သစ်ကူးကာလ နိုင်ငံတော်သမ္မတ နှုတ်ခွန်းဆက် မိန့်ခွန်းပြောကြားခြင်းမရှိ
ရန်ကုန်၊ ဧပြီ ၁၈။
မြန်မာနှစ်သစ်သို့ ကူးပြောင်းသည့် အခါသမယတွင် ပြည်ထောင်စုသမ္မတ မြန်မာနိုင်ငံတော်၏ သမ္မတဖြစ်သူ ဦးသိန်းစိန်သည် ပြည်သူများသို့ နှုတ်ခွန်းဆက် မိန့်ခွန်းပြောကြားခြင်းမရှိကြောင်း လေ့လာသူများက ဆိုသည်။
ပြည်တွင်းအန်ဂျီအို ဝန်ထမ်းတစ်ဦးက “ အမေရိကန်မှာဆိုရင် New Year ဆို သမ္မတကိုယ်တိုင် ပြည်သူကို နှစ်သစ်ကူး မိန့်ခွန်းပြောတယ်။ ထိုင်း မှာဆိုလည်း ဘုရင်ကိုယ်တိုင် မိန့်ခွန်းပြောတယ်။ မြန်မာနိုင်ငံမှာဆိုလည်း သမ္မတနဲ့ဘာနဲ့ ဖြစ်လာပြီဆိုတော့ ဒီလိုမျိုးပြောဖို့သင့်တာပေါ့ ” ဟု ဆိုသည်။
နိုင်ငံတကာရေးရာဆန်းစစ်သူတစ်ဦးက ယင်းသို့ နှစ်သစ်ကူးမိန့်ခွန်းပြောကြားခြင်းသည် အများပြည်သူ ရွေးကောက်တင်မြှောက်ခြင်းခံရသည့် အစိုးရများရှိသည့် တိုင်းပြည်များတွင် အရေးကြီးသည့် ပြယုဂ်တစ်ခုဖြစ်ကြောင်း၊ ယင်းမှာ နိုင်ငံတော်၏ တာဝန်အရှိဆုံးပုဂ္ဂိုလ်က ပြည်သူများကို လေးစား သည့်သဘောလည်း သက်ရောက်သည့်အပြင် ပြည်သူများအတွက် လုပ်ဆောင်ရန်ရှိသည်များကိုလည်း ကတိပေးခြင်း၊ လက်တွေ့အကောင်အထည်ဖော် ဆောင်ရွက်ခြင်းများအတွက် တရားဝင်ထုတ်ဖော်ပြောကြားခြင်းလည်း ဖြစ်ကြောင်း၊ မြန်မာနိုင်ငံတွင်လည်း လက်တွေ့ကျသည့် အပြောင်းအလဲနှင့် တိုး တက်မှုများကို ဖော်ဆောင်မည့် အစိုးရသစ်ကို ပြည်သူများက ရွေးချယ်တင်မြှောက်ထားသည်ဟုဆိုပေရာ ပြည်သူများနှင့် အစိုးရကြား ဆက်ဆံမှု(PR) ကောင်းရန် လိုအပ်ကြောင်း၊ ထိုသို့ မိန့်ခွန်းပြောကြားခြင်းသည် အချိန်အားဖြင့် တစ်နာရီခန့်သာ ကြာမြင့်သော်လည်း အလွန်ကောင်းမွန်ထိရောက်သည့် PR တစ်ခုဖြစ်ကြောင်း သုံးသပ်ပြောကြားခဲ့သည်။
၂၀၁၁ခုနှစ် မတ်လ ၃၀ရက်နေ့မှ စတင်ပြီး တာဝန်ထမ်းဆောင်ခဲ့သော နိုင်ငံတော် သမ္မတ ဦးသိန်းစိန်သည် ယခု အချိန်ထိ မိန့်ခွန်းသုံးကြိ်မ် ပြော ကြားခဲ့ပြီးဖြစ်သော်လည်း ပြည်သူများနှင့် တိုက်ရိုက်သက်ဆိုင်သည့် အားလုံးစိတ်ဝင်စားမည့် နွေးထွေးသောမိန့်ခွန်းမျိုး မဟုတ်သေးကြောင်း လေ့လာသူ များကဆိုသည်။
The Cjs News
××××××××××××××××××××××××××××××××××××××××××××××××××××××××××××××××
သတင်းနှင့် ဆောင်းပါးများမှ ကောက်နှုတ်ချက်များ
"အထည်ချုပ်လုပ်ငန်းတွေရဲ့ အဓိကဈေးကွက်က ဥရောပနဲ့ဂျပန်ဈေးကွက်ပါ။ ဖိနပ်ဆိုရင် ဂျပန်ဈေးကွက်ကိုပဲ အဓိက တင်သွင်းရတာပါ။ အခုနောက်ပိုင်း ဂျပန်ဈေးကွက်က တစ်နှစ်ထက်တစ်နှစ် အမှာစာပိုများလာတယ်။ မြန်မာလက်ခစား အပ်ကုန်လုပ်ငန်းရဲ့ အဓိကအားသာချက်က ဈေးသက်သာမှု ဖြစ်ပါတယ်။ အရည်အသွေးနဲ့ နည်းပညာမြင့်မားလာရင် ဈေးကွက်ပိုရလာနိုင်ပါတယ်။ ဂျပန်ဈေးကွက်ကို ပထဆုံးစဝင်တယ်ဆိုရင် ဈေးရတာနည်းပါတယ်။ သူတို့လိုချင်တဲ့ အရည် အသွေးတွေကို ရအောင်လုပ်ပြီး တင်ပို့နိုင်မယ်ဆိုရင်တော့ ဈေးကိုတဖြည်းဖြည်း ပိုတိုးတောင်းနိုင်ပါတယ်။ ဂျပန်ဈေးကွက်ကို ရပြီးရင် ကျန်တဲ့နိုင်ငံတွေရဲ့ ဈေးကွက်ကိုလည်း တိုးရတာပိုလွယ်ပါတယ်။ အခုဂျပန်ဈေးကွက်ကို မြန်မာ့အထည်တွေ ပိုပို့လာတယ်။ လက်ခစားလုပ်ငန်း တွေရဲ့ အဓိကဈေးကွက်ကလည်း ဂျပန်နဲ့ ဂျာမနီ၊ တောင်ကိုရီးယား တို့ဖြစ်ပါတယ်"ဟု အထည်ချုပ်လုပ်ငန်းရှင်တစ်ဦးက ရှင်းပြပါသည်။
WEEKLY ELEVEN JOURNAL အတွဲ (၆)၊အမှတ် (၂၉) တွင်ပါရှိသည့် “ဂျပန်နိုင်ငံမှ အမှာစာပေးပို့မှု လျော့ကျခြင်း မရှိသောကြောင့် ပြည် တွင်းရှိ အထည်ချုပ်လုပ်ငန်းများအပါအဝင် လက်ခစား အပ်ကုန်စနစ်လုပ်ငန်းအများစု လုပ်ငန်းထိခိုက်မှုမရှိသေးကြောင်းသိရ” သတင်းမှ အထည်ချုပ်လုပ်ငန်းရှင်တစ်ဦး၏ပြောကြားချက်အား ကောက်နှုတ်ချက်
--------------------------------------------------------------------------------------------------------------------------------
"လုပ်ငန်းရှင်နဲ့ တောင်သူပူးပေါင်းရင် ပိုကောင်းမွန်တဲ့အတွက် ကန်ထရိုက်လယ်ယာစနစ်ကို ခွင့်ပြုလုပ်ကိုင်စေတာပါ။ တချို့ကုမ္ပဏီတွေက တောင်သူကို လျော်ကြေးပေးပြီး တောင်သူထွက်သွားအောင် လုပ်နေတာတွေရှိပါတယ်။ တချို့ ကုမ္ပဏီကျတော့လည်း တောင်သူတွေရဲ့ မိသားစုကျန်းမာရေး၊ ပညာ ရေး၊ နောက်တောင်သူကို စိုက်ပျိုးရေးနည်းပညာပါ ပေးနေကြပါတယ်။ တောင်သူထဲမှာလည်း တချို့အလုပ်တကယ် ပီပီပြင်ပြင်မလုပ်တဲ့ တောင်သူတွေ ရှိနိုင်ပါတယ်။ ကုမ္ပဏီတွေက တောင်သူတိုးတက်အောင် ဖော်ဆောင်ပေးပါ။ တောင်သူတွေကလည်း ကောင်းမွန်စွာလုပ်ကိုင်ပါ။ ပီပီပြင်ပြင် မလုပ်တဲ့ တောင်သူရှိရင် ကုမ္ပဏီဘက်က အထောက်အထားနဲ့တင်ပြပါ။ ဒီလိုပဲလျော်ကြေးပေးပြီး တောင်သူကို မောင်းထုတ်တဲ့ ကုမ္ပဏီမျိုးတွေ့ရှိရင် ကုမ္ပဏီကို ပြန်သိမ်းချင်သိမ်းသွားမှာပါ။ ကုမ္ပဏီတချို့က လယ်ယာစိုက်ပျိုးဖို့မလုပ်ဘဲ လတ်တလော ငါးဈေးကောင်းတယ်ဆိုရင် ငါးမွေးလုပ်တာမျိုးတွေရှိတယ်။ လ/န ၃၉ ကျပြီးမှ မွေးတာဟုတ်မဟုတ် ပြန်စစ် ပါမယ်။ ခွင့်မပြုနိုင်ပါဘူး။ တစ်ဧက စိုက်ပျိုးဖို့ကျန်ရင် တစ်ဧကထိခိုက်ပါတယ်။ တောင်သူတွေဆီကနေ ပေါက်ဈေးနဲ့ ပြန်ဝယ်ပါ။ တောင်သူနဲ့ကုမ္ပဏီ နှစ်ဖက်ပူးပေါင်းပြီး စက်မှုလယ်ယာစနစ်ကိုသွားမယ်။ လိုအပ်တဲ့ စက်ကိရိယာတွေ အတွက်လည်း တောင်သူ ၅၀၀ တစ်ဖွဲ့၊ ၅၀၀ တစ်ဖွဲ့ပုံစံမျိုးနဲ့ စက်မှုကုန်ထုတ်အသင်းဖွဲ့ပြီး လိုအပ်တဲ့စက်ကိရိယာတွေ တပ်ဆင်ဖို့လုပ်သွားပါမယ်။ စက်မှုလယ်ယာစနစ်ကို ရန်ကုန် တိုင်းဒေသကြီးကနေ စံပြအဖြစ်လုပ်ကိုင်သွားဖို့ရှိပါတယ်"ဟု အဆိုပါ တာဝန်ရှိသူက ပြောကြားခဲ့ပါသည်။
WEEKLY ELEVEN JOURNAL အတွဲ (၆)၊အမှတ် (၂၉) တွင်ပါရှိသည့် “ကန်ထရိုက်လယ်ယာစနစ် လုပ်ကိုင်သည့် ကုမ္ပဏီများ တောင်သူ တိုး တက်အောင် ဖော်ဆောင်ပေးခြင်းမရှိဘဲ လျော်ကြေးပေးကာ လယ်ယာမြေ သိမ်းယူခြင်း၊ လယ်မစိုက်ဘဲ ငါးကန်ကဲ့သို့ လတ်တလော အကျိုးရှိသည့်လုပ်ငန်းများ လုပ်ကိုင်းခြင်းမျိုးပြုလုပ်ပါက ကုမ္ပဏီအား ပြန်လည်ရုပ်သိမ်းသွားမည် ” သတင်းမှ ရန်ကုန်တိုင်းဒေသကြီးမှ တာဝန်ရှိသူတစ်ဦ၏ ပြောကြားချက်အား ကောက်နှုတ်ချက်
--------------------------------------------------------------------------------------------------------------------------------
“ထိုင်းအစိုးရအနေနဲ့ ပညာရေး၊ လူအရင်းအမြစ်ဖွံ့ဖြိုးရေး သင်တန်းတွေ ပေးသွားပါမယ်။ မြန်မာနိုင်ငံ ပြန်နိုင်ရန် ပြင်ဆင်ပေးတဲ့အနေနဲ့ သူတို့ရဲ့ ဘဝတွေ ကိုလည်း မြှင့်တင်ပေးသွားပါမယ်။ ဒါမှသာ မြန်မာနိုင်ငံကို ပြန်ရောက်တဲ့အခါမှာ တိုင်းပြည်အတွက် အပြုသဘောအခန်းကဏ္ဍကနေ ပါဝင်နိုင်မှာပါ”
ဧပြီ(၁၉)ရက်နေ့ထုတ် NEWSWEEK JOURNAL တွင်ပါရှိသည့် “ထိုင်း- မြန်မာ နယ်စပ်တလျှောက်ရှိ ဒုက္ခသည်စခန်း (၉)ခု ပိတ်သိမ်းရန် (၂)နိုင်ငံ နိုင်ငံခြားရေးဝန်ကြီးများ အလွတ်သဘောဆွေးနွေး” သတင်းမှ ထိုင်းနိုင်ငံခြားရေးဝန်ကြီး ကဆစ်ပီရုမ်း ၏ ပြောရေးဆိုခွင့်ရှိသူ ထာနီသုန်ပတ်ဒီက ပြောကြားချက်အားကောက်နှုတ်ချက်
--------------------------------------------------------------------------------------------------------------------------------
“အရင်တုန်းက ကိုရီးယားဗီဇာ ပြုလုပ်မယ်ဆိုရင် ဘဏ်အပ်ငွေ ၃လသက်တမ်းရှိတဲ့ US ဒေါ်လာတစ်ထောင်နဲ့ ညီမျှတဲ့ ငွေပမာဏကို ပြရတယ်။ အခု ၂လ သက်တမ်းရှိပြီး US ဒေါ်လာငါးရာနဲ့ ညီမျှတဲ့ ငွေပမာဏကို ပြရင်ရပြီ။ ဗီဇာတင်တဲ့အခါ သူ့ရဲ့ပိုင်ဆိုင်မှု လုပ်ငန်းအထောက်အထားတစ်ခုကို တင်ပြရ ပါမယ်။ အရင်က ဗီဇာတင်ချင်ရင် တောင်းတာတွေက များ တယ်၊ အခု တစ်မျိုးပဲ တောင်းပါတယ်။”
ဧပြီ(၁၉)ရက်နေ့ထုတ် NEWSWEEK JOURNAL တွင်ပါရှိသည့် “ကိုရီးယား ဗီဇာလျော့ချရေးအတွက် ကိုရီးယား- မြန်မာ ပူးပေါင်းစီစဉ်” သတင်းမှ တောင်ကိုရီးယား ကောင်စစ်ဝန် ကင်ဒုံဘယ်၏ ပြောကြားချက်အား ကောက်နှုတ်ချက်
×××××××××××××××××××××××××××××××××××××××××××××××××××××××××××××××
Google Docs makes it easy to create, store and share online documents, spreadsheets and presentations.
