INTERNATIONAL MEDIA (2)
ဘာသာပြန်သတင်းများ (၂)
- မြန်မာနိုင်ငံတွင် စွမ်းဆောင်ရည် တည်ဆောက်ရေး သြစတြေးလျ ကူညီ
( 8 August 2013 ရက်စွဲပါ The Age မှ David Scott ရေးသားသော Building capacity in Myanmar ကို ဘာသာပြန်ဆိုသည်)
- မြန်မာနိုင်ငံတွင် နိုင်ငံခြားအစားအသောက်နှင့် အဖျော်ယမကာဆိုင်များ ရေပန်းစား
(CNA မှ 8 August 2013 ရက်စွဲပါ Foreign F&B outlets gaining popularity
in Myanmar ကိုဘာသာပြန်ဆိုသည်)
မြန်မာနိုင်ငံတွင် စွမ်းဆောင်ရည် တည်ဆောက်ရေး သြစတြေးလျ ကူညီ
( 8 August 2013 ရက်စွဲပါ The Age မှ David Scott ရေးသားသော Building capacity in Myanmar ကို ဘာသာပြန်ဆိုသည်)
မြန်မာနိုင်ငံတွင် ပြောင်းလဲမှုအတွက် လမ်းကြောင်းမှာ ရိုးစင်းသော လမ်းတစ်ခုတော့ မဟုတ်ခဲ့ပေ။ 2011 ခုနှစ် ပြုပြင် ပြောင်းလဲရေး လုပ်ငန်းစဉ် စကတည်းက အဓိကရုဏ်းများ ၊ ဘာသာရေးနှင့် ပြုပြင်ပြောင်းလဲရေးသမား များ၏ စိတ်ကူးများကြား ပွင့်ပွင့်လင်းလင်း ရန်ဖြစ်ကြမှုများ မကြာခဏ ဖြစ်ပွားနေပါသည်။ ထိုသို့ ပြောင်းလဲရေး လမ်းကြောင်း တွင် အဖုအထစ်များ ရှိသော်လည်း အမှန်တကယ် တိုးတက်မှုများကိုလည်း လုပ်ဆောင်နိုင်ခဲ့ ပါသည်။ မဲလ်ဘုန်း တက္ကသိုလ် ကဲ့သို့သော ပြင်ပအဖွဲ့အစည်းများသည် မြန်မာနိုင်ငံတွင် စွမ်းဆောင်ရည် တည်ဆောက်ရေးများ၌ ကူညီ လျက်ရှိပါသည်။
ပညာရေးသည် တိုင်းပြည်၏ လုံခြုံရေး နှင့် ဖွံ့ဖြိုးတိုးတက်မှုအတွက် သော့ချက်ကျသော အရာထဲမှ တစ်ခု ဖြစ်ကြောင်း အတိုက်အခံခေါင်းဆောင် ဒေါ်အောင်ဆန်းစုကြည်က မကြာခဏ ဖော်ပြခဲ့ပါသည်။ သြစတြေးလျ နိုင်ငံခြားရေးဝန်ကြီး Bob Carr က နောက်ထပ် ခြေလှမ်းလှမ်းလျက် သြစတြေးလျသည် ပညာရေးကို များစွာ အာရုံပြုမည့် အစီအစဉ်များဖြင့် မြန်မာနိုင်ငံအပေါ် အကူအညီပေးမည့် အကြီးဆုံး အလှူရှင်ဖြစ်ရမည်ဟု ကြေညာခဲ့ပါသည်။
Pro – Vice Chancellor ( International ) ပါမောက္ခ Simon Evans က ပြောကြားရာတွင် မြန်မာနိုင်ငံ ပညာသင် ကြားရေးနှင့် ပတ်သက်၍ လက်ရှိနှင့် အနာဂတ် အခွင့်အလမ်းများကို အနီးကပ် ကြည့်ရှုရန် ဖြစ်လာကြောင်းပြောပါသည်။
“ကျွန်တော်တို့ တက္ကသိုလ်ဟာ မြန်မာနိုင်ငံမှာ သုတေသန နှင့် စွမ်းရည်တည်ဆောက်ရေး လုပ်ငန်းတွေမှာ အကူအညီ ပေးဖို့ အကောင်းဆုံး အနေအထားမှာ ရှိနေပါတယ်။ အဲဒီလိုကူညီဖို့ လက်တွေ့လုပ်ဆောင်နေတဲ့ ဖွံ့ဖြိုးရေးအေဂျင်စီ တွေနဲ့ ပူးပေါင်းဆောင်ရွက်မဲ့သူတွေကို ကျွန်တော်တို့ရဲ့ သုတေသနပြုသူများရဲ့ ဆက်ဆံရေး မှ တဆင့် လုပ်ဆောင် သွားပါမယ်။ ဒါ့အပြင် Asialink နဲ့ သူ့ရဲ့ Myanmar Business Taskforce တို့ ထူထောင် ထားတဲ့ ဆက်ဆံရေးက တဆင့်လည်း သွားပါမယ်” ဟု ၎င်းက ဆိုပါသည်။
“နောက်ထပ် စိတ်လှုပ်ရှားဖို့ ကောင်းတဲ့ တိုးတက်မှုတစ်ခုကတော့ Australia Myanmar Institute ပဲ ဖြစ်ပါတယ်။ သူက သြစတြေးလျနိုင်ငံရဲ့ ကျယ်ပြန့်တဲ့ အဆင့်မြင့် ပညာရေးကဏ္ဍကနေ တဆင့် ဆက်ဆံရေး ဖြစ်မြောက်အောင် ကြိုးစားလုပ်ဆောင်သွားမှာပါ” ဟု ဆိုပါသည်။
တက္ကသိုလ်၏ တုန့်ပြန်မှုအစိတ်အပိုင်းအနေဖြင့် မြန်မာနိုင်ငံတွင် စွမ်းရည်တည်ဆောက်ရေး အစီအစဉ်များဖြင့် ချိတ်ဆက်ရန် စိတ်အားထက်သန်သည့် မဲလ်ဘုန်း ပညာရေးဆိုင်ရာများကို အထောက်အကူပြုမည့် ငွေကြေးထောက်ပံ့မှု အစီအစဉ်များ ဖန်တီးပေးခြင်း ပါသည့် ပရောဂျက်ငါးခုအတွက် ရန်ပုံငွေများ ရရှိထားရာ သုတေသနနယ်ပယ် အတော်များများ အကြုံးဝင်ပြီး ဆရာအတတ်သင် ပညာရေးနှင့် ဘူမိဗေဒ မှသည် ကလေး ကျန်းမာရေးနှင့် ဥပဒေ အဆုံး ပါဝင်ပါသည်။
“ခြုံပြီး ပြောရမယ်ဆိုရင် တိုင်းပြည်ထဲကရော နိုင်ငံတကာကပါ ပါဝင်တဲ့ stakeholders တွေထဲက အပေါင်း လက္ခဏာ ဆောင်တဲ့ တုန့်ပြန်မှုတွေ ရပါတယ်။” ဟု ထောက်ပံ့ငွေ ရရှိသူ မဲလ်ဘုန်း ဥပဒေကျောင်းမှ ပါမောက္ခ Tim Lindsey က ပြောပါသည်။ ၎င်းသည် ထိုကျောင်းမှ ကျောင်းသားဟောင်း Dr Melissa Crouch နှင့် တွဲဖက်၍ မြန်မာနိုင်ငံတွင် တရားဥပဒေစနစ် မကြာခင်က ပြုပြင်ပြောင်းလဲမှုများနှင့် သက်ရောက်မှုများ စာအုပ်ကို တွဲဖက်၍ တည်းဖြတ် နေသူဖြစ်ပါသည်။
“ဒီမိုကရေစီ ဆိုတာ ရွေးကောက်ပွဲတွေ အကြောင်းချည်း မဟုတ်ပါဘူး။ လူ့အဖွဲ့အစည်းက ဘယ်လို အမှန် တကယ် အသွင်ပြောင်းသွားတယ်ဆိုတာ ဖော်ထုတ်ဖို့ တရားဥပဒေစနစ်ကို ကြည့်ဖို့လည်း လိုအပ်ပါတယ်။ ဒီစာအုပ်ဟာ လိုနေတဲ့ အဲ့ဒီ ကွက်လပ်ကြီးကို ဖြည့်ဖို့ ကြိုးစားထားပါတယ်။ လက်တွေ့ လူတွေရဲ့ ဘ၀ထဲမှာ ဥပဒေနဲ့ မူဝါဒတွေ ဘယ်လိုဖြစ်နေတယ်ဆိုတာ အသေးစိတ် ကြည့်ဖို့ လိုအပ်လှပါတယ်” ဟု ၎င်းက ပြောပါသည်။
အဆိုပါစာအုပ်သည် ဥပဒေပြုသူများသာမက မြန်မာနိုင်ငံ၏ ပြုပြင်ပြောင်းလဲရေး လုပ်ငန်းစဉ်တွင် ပါဝင် ပတ်သက်သူတိုင်း အသုံးဝင်လိမ့်မည်ဟု မျှော်လင့်ကြောင်း ပါမောက္ခ Lindsey က ပြောပါသည်။
“နိုင်ငံရေးသမားတွေ ၊ အကူအညီပေးရေး လုပ်သားတွေ ၊ နိုင်ငံခြားရင်းနှီးမြှုပ်နှံသူတွေ ၊ ပညာရှင်တွေ ၊ ဥပဒေ ပညာရှင်တွေ အားလုံးအတွက် ရည်ရွယ်ပါတယ်။ သူတို့ဟာ ဆုံးဖြတ်ဖို့ လိုအပ်တာရှိရင် ဒီစာအုပ်ကို ကိုင်ပြီး ကိုးကားနိုင်ဖို့ ရည်ရွယ်ပါတယ်” ဟု ဆိုပါသည်။
တိရစ္ဆာန် မွေးမြူရေးနှင့် ဆေးကုသရေးဆိုင်ရာ ပညာရှင် ဘုတ်အဖွဲ့၏ Dr Angus Campbell ဦးဆောင်သော Mackinnon ပရောဂျက်သည်လည်း ခွင့်ပြုငွေရရှိသော ပရောဂျက်ဖြစ်ပြီး သားငါး ထုတ်လုပ်ရေးနှင့် ရောဂါ ထိန်းချုပ်ရေး တိုးတက်မှုအတွက် စွမ်းဆောင်ရည်တည်ဆောက်ရေး ပရောဂျက်အတွက် ဖြစ်ပါသည်။
“အဆိုပါ အထောက်အပံ့ကြောင့် ကျွန်တော်တို့ကို မြန်မာနိုင်ငံက ဒီမွေးမြူရေး အလုပ်ကို အမှန်တကယ် လုပ်ကိုင် သူတွေကို စုစည်းပေးရာမှာ ပိုမို လွယ်ကူစေပြီး၊ သူတို့ အတွေ့အကြုံတွေ ဖလှယ်နိုင်မှာပါ။” ဟု Dr Campbell က ပြောပါသည်။
မြန်မာနိုင်ငံရှိ တိရစ္ဆာန် မွေးမြူရေးနှင့် လယ်သမားများအတွက် အကြီးဆုံးစိန်ခေါ်မှုများမှ တစ်ခုမှာ သိုး နှင့် ဆိတ် ထုတ်လုပ်ရေးတွင် တိရစ္ဆာန် ဆေးကုသရေး အစီအစဉ်ပါဝင်မှု လုံးဝမရှိခြင်း ဖြစ်ပါသည်။ ထိုကဏ္ဍကို တိုးတက်စေခြင်းဖြင့် အိမ်သုံးကုန် ပစ္စည်း ထုတ်လုပ်မှုကို တိုးတက်စေခြင်း ဖြစ်ကြောင်း ပြောပါသည်။
“ကျွန်တော်တို့ရဲ့ အိုင်ဒီယာကတော့ ဒီပညာရှင်တွေကို အတူတကွ စုစည်းပေးခြင်းအားဖြင့် တိရစ္ဆာန် မွေးမြူ ထုတ်လုပ်ရေးမှာ အရင်းအမြစ်တွေနဲ့ နည်းပညာ ပညာရှင်တွေ တိုးတက်လာနိုင်ပါတယ်” ဟု Dr Campbell ကပြော ပါသည်။ ၎င်း၏ ပရောဂျက်သည် မြန်မာနိုင်ငံမှ တိရစ္ဆာန် မွေးမြူရေးနှင့် ဆေးကုသရေး တက္ကသိုလ်နှင့် မွေးမြူရေး နှင့် ရေလုပ်ငန်း ၀န်ကြီးဌာနကိုလည်း တိုးတက်မှုရှိစေမည် ဖြစ်ပါသည်။
“ဒါဟာ အရေးကြီးတဲ့ လုပ်ငန်းဖြစ်ပါတယ်။ မြန်မာပြည် အလယ်ပိုင်းက ခြောက်သွေ့တဲ့ ဒေသဟာ ရာသီဥတု ဆိုးရွားပြီး စိုက်ပျိုးနိုင်တဲ့ ရာသီက တိုတော့ ၊ သူတို့မှာ ငွေပေါ် ကောက်ပဲသီးနှံ အချို့ကိုသာ စိုက်နိုင်ပါတယ်။ ရာသီဥတု ပြောင်းလဲ လာမှုကြောင့် စားနပ်ရိက္ခာ လုံခြုံမှုကို ခြိမ်းခြောက်လာပါတယ်။” ဟု ၎င်းက ပြောပါသည်။
“ကျွန်တော် အလုပ်လုပ်ဖို့ ရည်ရွယ်ထားတဲ့ ရွာတော်တော်များများ ကို စစ်တမ်းကောက်ယူမှု လုပ်ဆောင်ပြီးပါပြီ။ အခုထိ ကျွန်တော်တုိ့ ကြုံရတဲ့ ကြီးမားတဲ့ စိန်ခေါ်မှုကတော့ ဆက်သွယ်ရေးလိုင်းတွေ သိပ်ခက်ခဲတာပါပဲ။ ဒါဟာ နိုင်ငံရေးအရ ရော ယဉ်ကျေးမှုအရရောကြောင့် ဖြစ်တာပါ။ ဒါကြောင့် အခုခွင့်ပြုငွေဟာ အမှန်တကယ် လုပ်ဆောင်နေသူတွေ ပညာဖလှယ်ဖို့ အလုပ်ရုံဆွေးနွေးပွဲတွေတင် မကဘဲ ဆက်သွယ်ရေးအတွက် မတူတဲ့ မော်ဒယ်တွေ စမ်းသပ်ဖို့လဲ ခွင့်ပြုရ ပါလိမ့်မယ်။” ဟု ၎င်းက ဆိုပါသည်။
အချို့ ပရောဂျက်များတွင် မြင်နိုင်သော ရလဒ်များ ထွက်သည်ကိုလည်း တွေ့ရပါသည်။ ဆေးပညာ ၊ သွားဘက်ဆိုင်ရာ ဆေးပညာနှင့် ကျန်းမာရေးပညာ သိပ္ပံ သင်ကြားရေးပုဂ္ဂိုလ် ပါမောက္ခ Beverly – Ann Biggs ကလည်း မြန်မာနိုင်ငံတွင် အမျိုးသမီးများနှင့် ကလေးများအတွက် ကျန်းမာရေး သုတေသနများ အတွက် ထောက်ပံ့ငွေ ရရှိပါသည်။ အထူးသဖြင့် ကလေးများ မွေးဖွားပြီး ရက်ပေါင်း (၁၀၀၀) အတွက် ဖြစ်ပါသည်။ ဇူလိုင်လက ပါမောက္ခ Biggs သည် မြန်မာနိုင်ငံတွင် ကိုယ်ဝန်ဆောင်မိခင်နှင့် ကလေးကျန်းမာရေး ဆွေးနွေးပွဲ ကို ဦးဆောင်ကျင်းပခဲ့ရာ ထိုနယ်ပယ်ရှိ မူဝါဒကို အာရုံပြုမည့် သုတေသနကို အထောက်အကူပြုရန် လိုအပ်ပုံ ပိုမို သိမြင်လာစေရန် ရည်ရွယ်ခဲ့ပါသည်။
“ကျွန်မတို့က ကိစ္စရပ်တွေရဲ့ အကြောင်းကို စပြီး ပြောပါတယ်။ ပြီးနောက် ခြေလှမ်းက စီမံကိန်းနဲ့ ပြဿနာတွေ ကို ကိုင်တွယ်မယ့် မဟာဗျူဟာတွေ ချမှတ်ဖို့ပါပဲ” ဟု သူက ပြောပါသည်။
မြန်မာနိုင်ငံတွင် နိုင်ငံခြားအစားအသောက်နှင့် အဖျော်ယမကာဆိုင်များ ရေပန်းစား
(CNA မှ 8 August 2013 ရက်စွဲပါ Foreign F&B outlets gaining popularity
in Myanmar ကိုဘာသာပြန်ဆိုသည်)
မြန်မာနိုင်ငံတွင် အစားအသောက်နှင့် အဖျော်ယမကာဆိုင်များတွင် နိုင်ငံခြားအစားအစာများနှင့် ယဉ်ကျေးမှုများ စားသုံး မှုသည် နာမည်ကျော်လူကြိုက်များလျက်ရှိသည်။
မြန်မာနိုင်ငံသည် ပြုပြင်ပြောင်းလဲမှုများပြုလုပ်ပြီး တံခါးဖွင့်လျက်ရှိရာ နိုင်ငံတကာမှ စီးပွားရေးလုပ်ငန်းခွဲများက ထွန်းသစ်စ ဈေးကွက်သစ်ထဲသို့ ဝင်ရောက်လျက်ရှိသည်။ ယင်းစီးပွားရေးလုပ်ငန်းများသည် မြန်မာနိုင်ငံသားများအား စားသောက်မှုအလေ့အထအသစ်များနှင့် မိတ်ဆက်ပေးရန် ကြိုးပမ်းလျက်ရှိသည်။
စင်ကာပူစားသောက်ဆိုင်တစ်ခုဖြစ်သည့် Ya Kun သည်လည်း ထိုစီးပွားရေးလုပ်ငန်းများကဲ့သို့ပင် နိုင်ငံခြားမှ စားသောက်မှုအလေ့အထများကို မြန်မာပြည်သူများနှင့် မိတ်ဆက်ပေးလျက်ရှိသည်။ YaKun က ရိုးရာ အုန်းသီးယို၊ ပေါင်မုန့်မီးဖုတ်နှင့် ကော်ဖီတို့ဖြင့် ပြည်တွင်းမှ စားသောက်သူများကို ဆွဲဆောင်လျက်ရှိသည်။
Ya Kun မှ CEO ဖြစ်သူ Marc Leoi က “ကျွန်တော်ထင်ပါတယ် (မြန်မာပြည်က) ဒီကစားသုံးသူတွေ ကျွန်တော်တို့ရဲ့ ကော်ဖီသောက်တဲ့ စတိုင်၊ အစားစားတဲ့စတိုင်နဲ့ တခြားအစားအသောက်တွေကို စားနိုင်ကြမှာပါ။ မြန်မာနိုင်ငံမှာ နိုင်ငံခြားကိုသွားပြီး ပြန်လာနေကြတဲ့သူတွေရှိတယ်၊ သူတို့က မြန်မာ့ရိုးရာအစားအစာနဲ့ ယဉ်ကျေးမှု မဟုတ်တဲ့ အစားအသောက်တွေနဲ့ယဉ်ကျေးမှုတွေနဲ့ အတိုင်းအတာတစ်ခုအထိ ထိတွေ့ခဲ့ကြရတယ်။ ယှဉ်ပြိုင်မှုဆိုတာ ကောင်းပါတယ်။ ရွေးချယ်စရာတွေ၊ လုပ်ငန်းတွေ၊ စားသောက်ဆိုင်တွေ အစုံအလင်နဲ့ဆိုတော့ သူတို့အနေနဲ့ စီမံခန့်ခွဲမှု ပုံစံတွေနဲ့ပတ်သက်ပြီး မတူညီတာတွေကို တွေ့မြင်ရမှာပဲ။ စားသုံးသူတွေ၊ ဖောက်သည်တွေကို ဝန်ဆောင်မှုပေးတဲ့ ပုံစံနဲ့ပတ်သက်ပြီး မတူညီမှုတွေကိုလည်းသူတို့တွေ့မြင်မှာပါ” ဟု ပြောကြားသည်။
Ya Kun သည် ရန်ကုန်မြို့၌ တစ်လမပြည်မီအချိန်ပိုင်းအတွင်း စားသောက်ဆိုင် နှစ်ခုဖွင့်လှစ်ဖြစ်ခဲ့သည်။ Ya Kun သည် လူလတ်တန်းစားများနှင့် ပိုမိုမြင့်မားသော လူလတ်တန်းစားများကို ပစ်မှတ်ထားခြင်းဖြစ်သည်။
ထို့အတူ Nervin Café သည်လည်း မြန်မာပြည်သူများကိုနိုင်ငံခြားယဉ်ကျေးမှုများနှင့် မိတ်ဆက်ပေးရန် ကြိုးပမ်းလျက်ရှိသည်။ Nervin Café ၏ ပိုင်ရှင်မှာ ပြည်တွင်းမှဖြစ်သည်။ သို့သော် သူသည်ယှဉ်ပြိုင်မှုများ တိုးမြင့်လာခြင်း ကြောင့် တုန်လှုပ်ခြောက်ခြားမှု မရှိပေ။ Nervin Café ကိုဖွင့်လှစ်သည်မှာ နှစ်လမျှသာရှိသေးသော်လည်း ၎င်းက သုံးနှစ်အတွင်း အလားတူ Café ဆိုင်မျိုး ၂၀ ခန့်ဖွင့်လှစ်ရန် စီစဉ်ထားသည်။ ၎င်းက ကမ္ဘာကျော် Starbucks နှင့် Coffee Bean တို့ မြန်မာဈေးကွက်ကို လွှမ်းမိုးမှုမပြုလုပ်မီ ၎င်း၏ အမှတ်တံဆိပ်ကို လူသိများလာအောင် ကြိုးပမ်းနိုင်လိမ့်မည်ဟု မျှော်လင့်ထားသည်။
Nervin Café ကိုထူထောင်သူ ကိုရဲနိုင်ဝင်းက “နိုင်ငံခြားက အမှတ်တံဆိပ်တွေ ဝင်လာမယ်ဆိုတာ သံသယဖြစ်စရာမရှိပါဘူး။ သူတို့က အင်နဲ့အားနဲ့ဝင်ချလာမှာ။ တကယ်လို့ ပြည်တွင်းကလုပ်ငန်းတွေမှာ အစီအစဉ်တွေ၊ ဗျူဟာတွေမရှိဘူးဆိုရင် နိုင်ငံခြားလုပ်ငန်းတွေပဲ ဈေးကွက်တစ်ခုလုံးကို လွှမ်းမိုးသွားကြမှာပါပဲ။ ကျွန်တော်တို့ တစ်နိုင်ငံလုံးကို နိုင်ငံခြားအမှတ်တံဆိပ်တွေချည်းပဲ လွှမ်းမိုးသွားမယ့်ကိစ္စမျိုးကို ကျွန်တော့်အနေနဲ့ မမြင်ချင်ပါဘူး။ ကျွန်တော်တို့ဟာ အဖိုးထိုက်တန်ပြီး အဲဒီနိုင်ငံခြားအမှတ်တံဆိပ်တွေနဲ့ ယှဉ်ပြိုင်နိုင်တဲ့သူတွေဖြစ်တယ်ဆိုတဲ့ အချက်အပေါ် ကျွန်တော်ယုံကြည်မှုအပြည့်ရှိပါတယ်” ဟု ပြောကြားသည်။
ထိုသို့ အရည်အသွေးပြည့်ဝသော အစားအစာနှင့် ဝန်ဆောင်မှုမျိုးပေးခြင်းဖြင့် စားသုံးသူနှင့် ဖောက်သည်များအပေါ် ကောင်းစွာဆွဲဆောင်နိုင်မည်ဟု Nervin ကဲ့သို့သော လုပ်ငန်းငယ်များက မျှော်လင့်လျက်ရှိသည်။
Posts
