Posts
 | yangonchronicle2011 Op-Ed |
၃.၄.၂၀၁၂
ဆောင်းပါးကဏ္ဍ
- မြန်မာနိုင်ငံရေးကံကောင်းစေချင်
****************************************
ဆောင်းပါးကဏ္ဍ
မြန်မာနိုင်ငံရေးကံကောင်းစေချင်
မိုးမြင့်ငြိမ်း
ကြားဖြတ်ရွေးကောက်ပွဲ ပြီးခဲ့လေပြီ။ ရလဒ်ကတော့ ပြတ်သားလှသည်။ရွေးကောက်ပွဲနေ့က လွတ်လပ်မဲဆန္ဒနယ် အများစုတွင် ဟိုမဲရုံမှာလည်း NLD၊ဒီမဲရုံမှာ NLD မဲအများစုဖြင့်နိုင်ကြောင်း သတင်းများ ဆက်တိုက်ဆိုသလို ကြားသိခဲ့ရသည်။ လူထု၏ရင်ထဲတွင် NLD မှာ ယခုထိတိုင် အမြစ်တွယ် နေဆဲပင်ဖြစ်သည်ဟု စာရေးသူ သဘောပေါက်မိခဲ့သည်။ ဘယ်အထိနက်ရှိုင်းစွာ ထိုးဖောက်ဝင်နေသလဲဆိုရင် ကိုယ်မဲပေးခဲ့သူ၏ အရည်အချင်းကို တိတိပပမသိခဲ့သည့်တိုင် ခွပ်ဒေါင်းတံဆိပ်ကို မြင်သည်နှင့် အမှန်ခြစ်မဲပေးခဲ့သည့်သူမျိုးလည်း အများအပြားရှိခဲ့သည်။ NLD ကို ပြည်သူ့ဘက်မှ ရပ်သည့် ပါတီကြီးတစ်ခုအနေအဖြစ် မဲထည့်ခဲ့သည်မှာ နိုင်ငံသားများ၏ အခွင့်အရေးဖြစ်သောကြောင့် စာရေးသူအနေဖြင့်အလေးထားသော်လည်း ကိုယ်မဲပေးခဲ့ သူ၏ အရည်အချင်းကိုတော့ အခြားပါတီများမှ ဝင်ရောက်ယှဉ်ပြိုင်မည့်သူများနှင့် ယှဉ်၍အကဲဖြတ်သင့်ပါသည်။ နိုင်ငံတစ်နိုင်ငံ၏ ပြည်သူများမှာ ၎င်းတို့နှင့် တန်သည့် အစိုးရကိုသာရသည်ဟူသော အဆိုလည်းရှိလေရာ စာရေးသူမှာ မြန်မာနိုင်ငံရေးကံကြမ္မာ အကောင်းဘက်သို့ ရောက်နိုင်ပါမည်လောဟူသော သံသယများ ဖြစ်လာ ရသည်။
ယခု ကြားဖြတ်ရွေးကောက်ပွဲသည် မြန်မာနိုင်ငံ၏ ဒီမိုကရေစီအသွင်ကူးပြောင်းရေးဖြစ်စဉ် ဒုတိယအဆင့်သို့ တက်လှမ်းသွားသည့် ဖြစ်စဉ်ဟု ယူဆ၍ ရနိုင်သည်။ အသွင်ကူးပြောင်းရေး ပထမဖြစ်စဉ်မှာ ဖွဲ့စည်းပုံအခြေခံဥပဒေဖြင့် စစ်ဘက်-အရပ်ဘက် ဆက်ဆံရေးတစ်ရပ်ကို လွှတ်တော်အတွင်း အနည်းငယ်သော အတိုက် အခံများဖြင့် ဦးဆုံးအသွင်း ပြောင်းခဲ့ခြင်းဖြစ်သည်။ ယင်းမှတစ်ဆင့် တစ်နှစ်အတွင်း နိုင်ငံရေးဖြေလျော့မှုများစွာကို တစ်ဆင့်ပြီး တစ်ဆင့် လုပ်ဆောင်ရင်းဖြင့် အဆင့်ဆင့် အသွင်ကူးပြောင်းလာရာယခု ကြားဖြတ်ရွေးကောက်ပွဲတွင် နောက်ထပ် အချိုးအကွေ့တစ်ခုသို့ ရောက်ရှိလာ သည့် အခင်းအကျင်းဖြစ်သည်။ ထိုသို့ဆိုရခြင်းမှာ ယခုကြားဖြတ်ရွေးကောက်ပွဲ၏ လွတ်လပ်မှုနှင့်တရားမျှတမှုကို ၂၀၁၀ အထွေထွေရွေးကောက်ပွဲကြီး ကျင်းပခဲ့စဉ်နှင့် နှိုင်းယှဉ်အကဲဖြတ်ကြည့်ပါက ကွဲပြားမှု များစွာရှိခဲ့သည်။ ယခု ကြားဖြတ်ရွေးကောက်ပွဲ ပြီးပြည့်စုံမှုမရှိသော်လည်း နိုင်ငံရေးပါတီများ လွတ်လပ်စွာမဲဆွယ်စည်းရုံးခွင့်၊ မီဒီယာသတင်းသမားများ စည်းမျဉ်းစည်းကမ်းနှင့်အညီ သတင်းရယူခွင့်နှင့် နိုင်ငံတကာမှ စောင့်ကြည့်လေ့လာသူများ လာရောက်လေ့လာခွင့်များ တချို့ နေရာတွင် အကန့်အသတ်၊ တချို့နေရာတွင် အပြည့်အဝရရှိခဲ့သည်။
သတင်းသမားတစ်ဦးအနေဖြင့် စာရေးသူသည် မင်္ဂလာတောင်ညွှန့်မြို့နယ်ရှိ မဲရုံများတွင် ပြည်သူများ မဲဆန္ဒပေးပုံများကို သွားရောက်လေ့လာ ခဲ့သည်။ စာရေးသူအနေဖြင့် ရွေးကော်ပွဲမတိုင်မီကာလက ဝင်ရောက်ယှဉ်ပြိုင်သည့်လွှတ်တော် အမတ်လောင်းအားလုံးနှင့် အင်တာဗျူးများ ပြုလုပ်ခဲ့ရာ ၎င်းတို့၏ နိုင်ငံရေးစွမ်းရည်ကို သိရှိခွင့်ရခဲ့သည်။ ဒီမိုကရက်တစ်ပါတီ (မြန်မာ)မှ ဥက္ကဋ္ဌလည်းဖြစ်၊ အမတ်လောင်းလည်းဖြစ်သော ဦးသုဝေ၏ နိုင်ငံရေး အတွေ့အကြုံကို လေးစားသဖြင့် မင်္ဂလာတောင်ညွှန့်မြို့နယ်တွင် နိုင်ခြေများသည်ဟု အထင်ရှိ ခဲ့သည်။ သို့သော် မနည်းသော ပြည်သူများနှင့် စကားစမြည် ပြောကြည့်ရာ ယင်းတို့၏ ကောက်ချက်ကြောင့် အမျိုးသားဒီမိုကရေစီအဖွဲ့ချုပ်မှ ဒေါ်ဖြူဖြူသင်းနိုင်မည်ဟု ယတိပြတ် ကောက်ချက်ချနိုင်ခဲ့သည်။ ဤနေရာ တွင် စဉ်းစားသင့်သည်မှာ ပြည်သူများ၏ နိုင်ငံရေးရင့်ကျက်မှုဖြစ်သည်။ ဦးသုဝေ၏ နိုင်ငံရေးစွမ်းဆောင်ရည်အရ လွှတ်တော်ထဲတွင် ရှိနေမည်ဆိုလျှင် နိုင်ငံရေးဖြစ်စဉ်တွင် အတွေ့အကြုံရင့်ကျက်သည့် Player တစ်ဦးဝင်ရောက်လာမည်ဖြစ်သည်။ ဒေါ်ဖြူဖြူသင်းမှာ နိုင်ငံရေးထက် လူမှုရေးနယ်ပယ်တွင် ပိုမို ဖြစ်ထွန်းအောင် ဆောင်ရွက်နိုင်သူဖြစ်ပြီး နိုင်ငံရေးအတွေ့အကြုံလည်း ယခုမှစတင်ယူရမည့်သူ ဖြစ်သည်။ စာရေးသူမှာ ဒေါ်ဖြူဖြူသင်းနှင့် အင်တာဗျူး လုပ်ခဲ့စဉ်က သူ၏ HIV/AIDS လူမှုရေးဆောင်ရွက်မှုများကို အလေးထားသော်လည်း လူမှုရေးအရင်းအနှီးဆိုတာလည်းမသိ၊ ဒီမိုကရက်တိုက်ဇေးရှင်း ဖြစ်စဉ် ကိုလည်း ကောင်းစွာနားမလည်ချေ။ ဒေါ်အောင်ဆန်းစုကြည်မှ ရွေးချယ်လိုက်သည့်လက်ရွေးစင်တစ်ဦးအဖြစ်သာ ရွေးကောက်ပွဲကို ဝင်ရောက်ခဲ့ဟန်ရှိပါ သည်။ ထိုသို့ အရည်အချင်း ကွာဟချက်များ ရှိနေသော်ငြားလည်း ပြည်သူများမှာ ခွပ်ဒေါင်းမှ ခွပ်ဒေါင်းဖြစ်နေသည်။
နောက်တစ်ခုမှာ NLD ပါတီဝင်တချို့နှင့် NLD ပါတီကို ထောက်ခံသော ပြည်သူအချို့၏ သွေးကြွရမ်းကားမှုမျိုး ဖြစ်သည်။ မှတ်မှတ်ရရ ဖြစ်ခဲ့သည့် ဖြစ်ရပ်တစ်ခုလည်းရှိပါသေးသည်။ စာရေးသူ မဲရုံတစ်ရုံသို့စောင့်ကြည့်ခဲ့စဉ်အခါက စာရေးသူ၏အကျီမှာ ပင်နီအရောင်ဖြစ်နေ၍ NLD တစ်ဦးမှ မဲဆွယ် သလို ဖြစ်နေကြောင်း လာရောက်သတိပေး ပြောကြားခဲ့သည်။ အမှန်စင်စစ် စာရေးသူဝတ်ခဲ့သည့် အကျီ၏အရောင်မှာ ပန်းရောင်နှင့် အုပ်ကျိုးရောင်စပ် ကြားသာ ဖြစ်သည်။ ပြောလိုသည်မှာ လုပ်ပိုင်ခွင့်နည်းနည်းပေးလိုက်သည်နှင့် အာဏာပြချင်သည့်သဘောဖြစ်သည်။ ထို့ပြင် ရွေးကောက်ပွဲ အောင်နိုင်ခဲ့ ခြင်းအတွက် ဝမ်းမြောက်ဝမ်းသာ ဖြစ်နေမှုကို စာရေးသူအနေနှင့် မည်သို့မျှမဆိုသာသော်လည်း ယင်းဝမ်းမြောက်မှုမှ တစ်ဖက် ကြံ့ခိုင်ရေးပါတီ၏ ရုံများ ရှေ့တွင် NLD နိုင်ပြီ၊ အမေစုနိုင်ပြီဟု အော်ဟစ်ခြင်းမျိုးသည် နိုင်ငံရေး သူငယ် နာမစင်မှုကို ဖော်ပြနေခြင်းသာဖြစ်သည်။
NLD ပါတီကို အဓိက ထောက်ခံခဲ့သူများမှာ အောက်ခြေလူတန်းစား (grass-root level) မှ ဖြစ်သည့် အားလျှော်စွာ အောက်ခြေလူတန်းစားအား အခြေပြုရွေးချယ်ခြင်းထက် ကိုယ်ရွေးကိုယ်သွေးအခြေပြု ရွေးချယ်မှုမျိုးသာ လုပ်ဆောင်ဖြစ်အောင် မဲဆွယ်စည်းရုံးခဲ့ခြင်းမှာ အင်အားကြီးပါတီတစ်ခု၏ လူထုအပေါ် မှန်ကန်သည့်နည်းလမ်းဖြင့် ဦးဆောင်နိုင်ခြင်းမျိုးလားဟု မေးစရာရှိပါသည်။ အလယ်ခေတ်ဥရောပ နိုင်ငံရေးအတွေးခေါ်ပညာရှင် Machiavelli မိန့်ကြားခဲ့သည့် The end justifies the means ဆိုသည့် ဆိုရိုးစကားတစ်ခုရှိပါသည်။ ရလဒ်ကောင်းဖို့အတွက် မမျှတသည့်နည်းလမ်းကိုလည်း လက်ခံ ကျင့်သုံးရမည်ဟူသော သဘောပင်ဖြစ်သည်။ NLD ပါတီ၏ လုပ်ဆောင်ချက်မှာ ဤအတိုင်းပင်ဖြစ်ခဲ့ပါသည်။ စာရေးသူ ဒေါ်အောင်ဆန်းစုကြည်နှင့် တွေ့စဉ်ကတည်းက ဒေါ်အောင်ဆန်းစုကြည်နှင့် NLD ပါတီမှာ နိုင်ငံရေးအား အကြွင်းသုံးညထွက်သည့်ဂိမ်း (Zero sum game) ကို ကစားမည့် သဘောဟု ကောက်ချက်ချခဲ့ဖူးသည်။ ယခုလည်း ဤအတိုင်းပင်ဖြစ်နေသည်။ သို့ဆိုပါလျှင် မြန်မာနိုင်ငံရေးကံကြမ္မာမှာ အကောင်းဖက်သို့ ဦးတည်နိုင် မည်လော။
ယခုကြားဖြတ်ရွေးကောက်ပွဲကြီးအပြီးတွင် စာရေးသူမှာ နိုင်ငံသာတစ်ဦးအနေဖြင့် ဝမ်းမြောက်မှုနှင့် စိုးရိမ်မှုကို တစ်ပြိုင်တည်း ဖြစ်ပေါ်လာသည်။ ဝမ်းမြောက်မှုမှာ လွှတ်တော်တွင် အနည်းငယ်ဖြစ်သော အတိုက်အခံအင်အားစုများ ပိုမိုများပြားလာခြင်းကြောင့် မူဝါဒအငြင်းအခုံများ ဖြစ်နိုင်ခြေ ပိုများသွား နိုင်ခြင်းနှင့် စိုးရိမ်မှုမှာ ဒီမိုကရေစီအသွင်ကူးပြောင်းမှုတွင် ပြည်သူများ၏ နိုင်ငံရေးရေချိန် နိမ့်ပါးနေမှုကြောင့် လူမှုရေးမတည်မငြိမ်ဖြစ် နိုင်ခြင်းတို့ဖြစ်သည်။ လွှတ်တော်တွင်းသို့ ရောက်ရှိတော့မည့် ရွေးကောက်ပွဲနိုင် ဒေါ်အောင်ဆန်းစုကြည်နှင့် NLD ပါတီဝင်များကြောင့် လွှတ်တော်နှင့် အစိုးရအဖွဲ့တွင် အာဏာ ချိန်ခွင့်လျှာ မည်သို့ ပုံဖော်ပြောင်းလဲသွားနိုင်သည်ကို စိတ်ဝင်တစားစောင့်ကြည့်ရဦးမည်ဖြစ်သည်။ မြန်မာနိုင်ငံရေး ကံကောင်းမှုစေချင်ပါသည်။
****************************************
Google Docs makes it easy to create, store and share online documents, spreadsheets and presentations.
