Posts
 | yangonchronicle2011 |
၂၈.၁၁.၂၀၁၂
ပြည်တွင်းသတင်း
- ထိုင်းရောက်မြန်မာလုပ်သားများအရေး ILO ကူညီမည်
- မြန်မာဆန်စပါးကဏ္ဍ ပုဂ္ဂလိသို့တာဝန်ယူစေတော့မည်
နိုင်ငံရေးသတင်း
- တိုင်းဒေသကြီးနှင့် ပြည်နယ်အစိုးရများ၏ လုပ်ပိုင်ခွင့်တိုးမြှင့်နိုင်ရန် ပင်လုံညီလာခံကျင်းပမည်
- လွှတ်တော်နှင့်သမ္မတအကြား သဘောထားကွဲလွဲမှုမှာ အသွင်ကူးပြောင်းရေးကိုထိခိုက်နိုင်
သတင်းနှင့် ဆောင်းပါးများမှ ကောက်နှုတ်ချက်များ
********************************************************************************************
ပြည်တွင်းသတင်း
ထိုင်းရောက်မြန်မာလုပ်သားများအရေး ILO ကူညီမည်
ထိုင်းနိုင်ငံရှိ စက်ရုံ၊ အလုပ်ရုံများနှင့် ငါးဖမ်းသင်္ဘောများပေါ်တွင် သွားရောက်အလုပ် လုပ်ကိုင်လျက်ရှိကြသော မြန်မာလုပ်သားများကို ထိုင်း လုပ်ငန်းရှင်များက မတရားဖမ်းဆီးထောင်ချခြင်းများအား အပြည်ပြည်ဆိုင်ရာအလုပ်သမားအဖွဲ့(ILO)မှ အပြည့်အဝ ကူညီပေးသွားမည်ဖြစ်ကြောင်း သိရ သည်။
ပြည်ပသို့ ရောက်ရှိနေသည့် မြန်မာလုပ်သားများအနေဖြင့် ဖမ်းဆီးနှိပ်စက်ခံရမှုများအား အကြောင်းအမျိုးမျိုးကြောင့် ကိုယ်တိုင် တိုင်ကြားနိုင်ခဲ့ ခြင်း မရှိလျှင် မိမိဆွေမျိုး၊ အသိုင်းအဝန်းများမှတဆင့် ရန်ကုန်မြို့ရှိ ILO ရုံးသို့ တိုင်ကြားနိုင်ကြောင်း သိရသည်။ ထိုကဲ့သို့ တိုင်ကြားမှုများကို မြန်မာနိုင်ငံရှိ သက်ဆိုင်ရာအဖွဲ့အစည်း၊ ထိုင်းနိုင်ငံရှိ သက်ဆိုင်ရာအာဏာပိုင်အဖွဲ့အစည်းများနှင့် ILO တို့မှ ဆက်သွယ်ဆောင်ရွက် ဖြေရှင်းပေးသွားမည် ဖြစ်ကြောင်း ILO မှ တာဝန်ရှိသူတစ်ဦးက ပြောကြားသည်။
ထိုင်းနိုင်ငံရောက် မြန်မာလုပ်သားများတွင် ကိုယ်တိုင်ပြစ်မှု ကျူးလွန်ခြင်းကြောင့် အကျဉ်းကျနေသူများ ရှိသကဲ့သို့ ထိုင်းအလုပ်ရှင်များနှင့် ထိုင်း အာဏာပိုင်များကပူးပေါင်း၍ အကြောင်းမရှိ အကျဉ်းချထားသည့် မြန်မာလုပ်သားများလည်း ရှိကြောင်း သိရသည်။ လက်ရှိအချိန်တွင် ထိုင်းနိုင်ငံရောက် မြန်မာလုပ်သားများ၏ အရေးကိစ္စကို ထိုင်း-မြန်မာအစိုးရချင်း ပူးပေါင်းဆောင်ရွက် ဖြေရှင်းပေးနေသော်လည်း ထုတ်ပြန်ထားသည့် သတ်မှတ် စည်းကမ်းများကို ထိုင်းလုပ်ငန်းရှင်များက ဖောက်ဖျက်လျက်ရှိနေသေးကြောင်း သိရသည်။
လက်ရှိ ထိုင်းနိုင်ငံရောက် မြန်မာရွှေ့ပြောင်းလုပ်သား နှစ်သန်းကျော်အနက် ၁.၂ သန်းခန့်သာ ယာယီနိုင်ငံကူး လက်မှတ်ပြုလုပ်၍ မှတ်ပုံတင် ထားကြောင်း သိရသည်။
YC
*******************************************
မြန်မာဆန်စပါးကဏ္ဍ ပုဂ္ဂလိသို့တာဝန်ယူစေတော့မည်
နိုင်ငံတကာတွင် မြန်မာ့ဆန်ဈေးကွက် ရရှိရေးနိုင်စေရေးအတွက် ဆန်စပါးမူဝါဒများ ပြောင်းလဲကျင့်သုံး၍ ဆန်စပါးဈေးကွက်ကို ပုဂ္ဂလိကသို့ လွှဲပြောင်းကာ အပြည်အဝ တာဝန်ယူဆောင်ရွက် စေတော့မည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးဝင်းမြင့်က ပြောကြားသည်။
ပြီးခဲ့သည့် နိုဝင်ဘာလ ၂၇ ရက်နေ့တွင် ကမ္ဘာဘဏ်မှ Senior Ecinomist Mr.Paavo Eliste တို့ဦးဆောင်သော ကိုယ်စာလှယ်အဖွဲ့နှင့် စီးပွားရေးနှင့် ကူးသန်းရောင်းဝယ်ရေးဝန်ကြီးရုံး၌ တွေ့ဆုံစဉ် ပြည်ထောင်စုဝန်ကြီးဦးဝင်းမြင့်က ယခုကဲ့သို့ပြောကြားခဲ့ခြင်း ဖြစ်သည်။
ထိုသို့ ဆန်စပါးမူဝါဒများကိုပြောင်းလဲ၍ ပုဂ္ဂလိကသို့တာဝန်ယူစေခြင်းကြောင့် တောင်သူလယ်သမားများ၏ ဘဝတိုးတက်ရေးနှင့် မြန်မာ့ လယ်ယာကဏ္ဍ မြှင့်တင်ရေးတို့တွင် အထောက်အကူကောင်းများ ရှိလာစေနိုင်မည့်အပြင်၊ လိုအပ်သောနည်းပညာ အကူအညီများကိုလည်း စီးပွား/ကူးသန်းဝန်ကြီးဌာနမှ ပံ့ပိုးကူညီပေးသွားမည်ဖြစ်ကြောင်း သိရသည်။ ထို့ပြင် လက်ရှိအချိန်တွင် ပြည်တွင်းရှိ ဆန်စပါးဆိုင်ရာ အသင်းအဖွဲ့များနှင့် ပူးပေါင်း၍ လိုအပ်သောဆန်မှုဝါဒများကို ချမှတ်နိုင်ရန် အကောင်အထည်ဖော်ဆောင်ရွက်လျက် ရှိကြောင်းသိရသည်။
အဆိုပါဆွေးနွေးပွဲတွင် မြန်မာလယ်ယာကဏ္ဍကုန်သွယ်မှု ဖွံဖြိုးတိုးတက်ရေးအတွက် ကမ္ဘာ့ဘဏ်နှင့် ပူးပေါင်းဆောင်ရွက်မည်ဖြစ်ပြီး ခေတ်နှင့် လျော်ညီသော ဆန်စပါးမှုဝါဒများ ရေးဆွဲနိုင်ရေးနှင့် အလုပ်ရုံဆွေးနွေးပွဲများ ကျင်းပရေးတို့အတွက် ဆက်လက်အကောင်အထည်ဖော် ဆောင်ရွက် သွားမည်ဖြစ်ကြောင်း ၎င်းက ဆက်လက်ပြောကြားသည်။
YC
***************************************************************************************************
နိုင်ငံရေးသတင်း
တိုင်းဒေသကြီးနှင့် ပြည်နယ်အစိုးရများ၏ လုပ်ပိုင်ခွင့်တိုးမြှင့်နိုင်ရန် ပင်လုံညီလာခံကျင်းပမည်
မြန်မာနိုင်ငံအတွင်း တိုင်းရင်းသားကိုယ်စားလှယ်အားလုံး ပါဝင်တက်ရောက်နိုင်သည့် ပင်လုံညီလာခံကို ကျင်းပပြုလုပ်၍ ယင်းညီလာခံတွင် တိုင်းဒေသကြီးနှင့် ပြည်နယ်အစိုးရများ၏ လုပ်ပိုင်ခွင့်များ တိုးမြှင့်နိုင်စေရေးအတွက် အဓိကဆွေးနွေးသွားမည်ဖြစ်ကြောင်း နိုဝင်ဘာလ ၂၄ ရက်နေ့တွင် MCC ခန်းမ၌ ကျင်းပပြုလုပ်ခဲ့သည့် အလုပ်ရုံဆွေးနွေးပွဲတွင် ကရင်အမျိုးသမီး ဖွံ့ဖြိုးတိုးတက်ရေးအဖွဲ့မှ တာဝန်ရှိသူတစ်ဦးက ပြောကြားသည်။
ထို့ပြင် ပင်လုံညီလာခံတွင် တိုင်းဒေသကြီးနှင့် ပြည်နယ်ဝန်ကြီးချုပ်များကို ပြည်သူများက ရွေးချယ်တင်မြှောက်နိုင်ခွင့် ရရှိနိုင်စေရန်နှင့် ပြည်နယ်အဆင့် ဖွဲ့စည်းပုံအခြေခံဥပဒေကို ပြင်ဆင်ပြဋ္ဌာန်းခွင့် ရရှိနိုင်စေရန် ဆောင်ရွက်သွားမည်ဖြစ်ကြောင်း သိရသည်။
လက်ရှိ ပြဋ္ဌာန်းထားသည့် ၂၀၀၈ ဖွဲ့စည်းပုံ အခြေခံဥပဒေတွင် ပြည်နယ်နှင့် တိုင်းဒေသကြီး အစိုးရများ၏ လုပ်ပိုင်ခွင့်အာဏာကို အတိအကျ ပြဋ္ဌာန်းထားခြင်း မရှိသည့်အတွက် ပြည်ထောင်စုအဆင့်ရှိ ပုဂ္ဂိုလ်များမှ ပေးအပ်သည့် လုပ်ပိုင်ခွင့်များဖြင့်သာ ရပ်တည်နေရကြောင်း သိရသည်။
ထိုသို့ တိုင်းဒေသကြီးနှင့် ပြည်နယ်အစိုးရများ၏ လုပ်ပိုင်ခွင့် အားနည်းနေသည့်အတွက် အချို့ကိစ္စရပ်များတွင် အခက်အခဲများရှိပြီး ယင်းကိစ္စ ပြေလည်နိုင်စေရန် အလုပ်ရုံဆွေးနွေးပွဲများ ပြုလုပ်ခြင်း၊ နိုင်ငံတကာပညာရှင်များနှင့် ဆွေးနွေးခြင်းနှင့် ပင်လုံကဲ့သို့ ညီလာခံပြုလုပ်၍ လုပ်ပိုင်ခွင့်အာဏာ တိုးမြှင့်နိုင်ရေး ဆောင်ရွက်သွားမည်ဖြစ်ကြောင်း သိရသည်။
YC
*******************************************
လွှတ်တော်နှင့်သမ္မတအကြား သဘောထားကွဲလွဲမှုမှာ အသွင်ကူးပြောင်းရေးကိုထိခိုက်နိုင်
လွှတ်တော်နှင့် နိုင်ငံတော်သမ္မတအကြား သဘောထားကွဲလွဲမှုများ ဖြစ်ပေါ်နေခြင်းသည် မြန်မာနိုင်ငံ၏ အသွင်ကူးပြောင်းရေးကိုပါ ထိခိုက် လာနိုင်စေမည် ဖြစ်ကြောင်း မြန်မာ့နိုင်ငံရေး စောင့်ကြည့်လေ့လာနေသူတစ်ဦးက ပြောကြားသည်။
နိုင်ငံတော်အေးချမ်းသာရာရေးနှင့် ဖွံဖြိုးရေးကောင်စီလက်ထက်က ရေးဆွဲပြဋ္ဌာန်းခဲ့သော ၂၀၀၈ ဖွဲ့စည်းပုံ အခြေခံဥပဒေပါ ပြည်သူ့လွှတ်တော် နှင့် အမျိုးသားလွှတ်တော်ဆိုင်ရာ ဥပဒေနှစ်ခုနှင့် စာရင်းစစ်ချုပ်ဥပဒေများကို ပြည်ဆောင်စုလွှတ်တော်တွင် ပြင်ဆင်အတည်ပြုခဲ့ပြီး နိုင်ငံတော်သမ္မတထံ လက်မှတ်ရေးထိုးရန် ပေးပို့ခဲ့သော်လည်း နိုင်ငံတော်သမ္မတက သဘောမတူသည့် အချက်များကို သဘောထားမှတ်ချက် ၁၀ ချက်နှင့်အတူ လွှတ်တော်သို့ မတ်လ ၃ ရက်နေ့တွင် ပြန်လည်ပေးပို့ခဲ့ကြောင်း သိရသည်။
အဆိုပါ သဘောထားပြင်ဆင်ချက်ကို ပြည်ထောင်စုလွှတ်တော်က သဘောတူထောက်ခံသည့်အတွက် နိုဝင်ဘာ ၁၈ ရက်နေ့တွင် နိုင်ငံတော် သမ္မတထံသို့ ဒုတိယအကြိမ် ပြန်လည်ပေးပို့ခဲ့သော်လည်း အဆိုပါ ယင်းဥပဒေကြမ်းကို နိုင်ငံတော်သမ္မတက လက်ခံသဘောတူခြင်း မရှိသည့်အတွက် ပြည်ထောင်စုလွှတ်တော် နာယကထံသို့ နိုဝင်ဘာလ ၂၃ ရက်နေ့တွင် သဝဏ်လွှာ ပြန်လည်ပေးပို့ခဲ့ကြောင်း သိရသည်။
ထို့ပြင် ပြည်ထောင်စုလွှတ်တော်မှ အတည်ပြုထားသော ပြည်ထောင်စုစာရင်းစစ်ချုပ် ဥပဒေကိုပြင်ဆင်သည့် ဥပဒေကြမ်းကို ပြဋ္ဌာန်းနိုင်ရေး အတွက် နိုင်ငံတော်သမ္မတသို့ လက်မှတ်ရေးထိုးရန် ပေးပို့ရာတွင် သမ္မတက အဆိုပါဥပဒေကြမ်းသည် ဖွဲ့စည်းပုံအခြေခံဥပဒေနှင့် ညီညွှတ်ခြင်း မရှိကြောင်း သဘောထားမှတ်ချက်များနှင့်အတူ ပြည်ထောင်စုလွှတ်တော် နာယကထံသို့ နိုဝင်ဘာလ ၁ ရက်နေ့တွင် သဝဏ်လွှာပေးပို့ခဲ့သည်။
ထိုသို့ လွှတ်တော်နှင့် သမ္မတအကြား သဘောထားကွဲလွဲမှုများသည် အသွင်ကူးပြောင်းရေးကို ထိခိုက်စေနိုင်သည့်အတွက် လွှတ်တော်နှင့် အစိုးရအဖွဲ့အကြား သဘောမတူညီမှုများရှိသော်လည်း လွှတ်တော်အမတ်များကို အာဏာပိုင်များက အလေးထားရန် လိုအပ်သကဲ့သို့ လွှတ်တော် အမတ်များအနေဖြင့်လည်း အုပ်ချုပ်ရေးအာဏာပိုင်များ၏ ဆောင်ရွက်နေမှုများအား ဝင်ရောက်လွှမ်းမိုးချုပ်ကိုင်ခြင်း မပြုလုပ်ရန် လိုအပ်ကြောင်း သိရ သည်။
YC
****************************************************************************************
သတင်းနှင့် ဆောင်းပါးများမှ ကောက်နှုတ်ချက်များ
"ပြည်တွင်းမှာရရှိတဲ့ လုပ်ငန်းရှင်တွေက ကိုယ်နိုင်တဲ့ဝန်နဲ့ပဲ လုပ်နေကြတာဆိုတော့ တကယ်လို့ ပြည်ပက လုပ်ငန်းရှင်တွေသာဝင်ပြီး ရင်းနှီးမြှုပ်နှံမယ် ဆိုရင် ကျွန်တော်တို့အတွက် အင်အားတစ်ခုရသွားတာပေါ့။ ဒါပေမဲ့ တစ်ခုတော့ရှိတယ်။ နိုင်ငံတကာကဝင်လာပြီး နောင်တစ်ချိန်မှာ ပြည်တွင်း ရွှေဈေးကွက်ကို ဝင်ပြီး ကစားသွားမလား၊ ဒါမျိုးတွေဖြစ်လာရင် ဘယ်လိုကာကွယ်မလဲ။ ဒါတွေတော့ စဉ်းစားဖို့လိုလိမ့်မယ်"
နိုဝင်ဘာ ၂၉ ရက်နေ့ထုတ်၊ အင်ပါယာဂျာနယ်၊ အတွဲ ၄ အမှတ် ၄၇ တွင်ပါရှိသော “မြန်မာ့ရွှေပြည်ပမှ ဝင်ရောက်ဈေးကစားခြင်း မဖြစ်အောင်ကြိုပြင်ထားသင့်”သတင်းမှ မြန်မာနိုင်ငံ ရွှေလုပ်ငန်းရှင်များအသင်း အတွင်းရေမှူးဦးကျော်ဝင်း ပြောကြားချက်အား ကောက်နှုတ်ချက်။
*********************************************
"လွှတ်တော်အဖွဲ့အစည်းတွေကို အုပ်ချုပ်ရေးအဖွဲ့အစည်းတွေနဲ့ တန်းတူရည်တူမထားနိုင်တာပာာ ဥပဒေပြုရေးနဲ့ တရားစီရင်ရေးမဏ္ဍိုင်တွေကို အုပ်ချုပ်ရေးမဏ္ဍိုင်ရဲ့နောက်မှာပဲ ထားချင်တဲ့ဆိုတဲ့သဘောဖြစ်နေတယ်။ အရင်အစိုးရရဲ့ အကျင့်အတိုင်းပဲ လုပ်ချင်တဲ့ပုံပေါက်နေတယ်"
နိုဝင်ဘာ ၂၉ ရက်နေ့ထုတ်၊ 7Day News ဂျာနယ်၊ အတွဲ ၁၁ အမှတ် ၃၈ တွင်ပါရှိသော “အတည်ပြုပြီး ဥပဒေကြမ်းအပေါ် သမ္မတ မှတ်ချက်ပြုခြင်းအား လွှတ်တော်ကိုယ်စားလှယ်အချို့ဝေဖန်” သတင်းမှ အမျိုးသားလွှတ်တော်ကိုယ်စားလှယ် ဒေါက်တာ အေးမောင် ပြောကြားချက်အား ကောက်နှုတ်ချက်။
********************************************
“ခေတ်မီတဲ့ဒီမိုကရေစီကို လေးစားတန်ဖိုးထားတဲ့ တပ်မတော်ဖြစ်ဖို့ဆိုရင် တကယ့်ဒီမိုကရေစီနိုင်ငံကြီးတွေရဲ့ တပ်မတော်တွေနဲ့ ပူးပေါင်းမှုရှိဖို့လိုတယ်။ ပြီးတော့ တကယ့်ဒီမိုကရေစီနီုင်ငံကြီးရဲ့ စစ်တပ်နဲ့ပူးပေါင်းခြင်းအားဖြင့် နိုင်ငံရေးကို အရမ်းစွက်ဖက်တဲ့ စစ်တပ်ကနေ ဒီမိုကရေစီကိုလေးစားတဲ့ စစ်တပ် ဖြစ်သွားနိုင်တယ်။ စစ်တပ်ကို ဒီမိုကရေစီ သင်ပေးသလိုပေါ့”
နိုဝင်ဘာ ၂၉ ရက်နေ့ထုတ်၊ 7Day News ဂျာနယ်၊ အတွဲ ၁၁ အမှတ် ၃၈ တွင်ပါရှိသော “Cobra Gold စစ်ရေးလေ့ကျင့်မှုတွင် မြန်မာ့ တပ်မတော်မှ လေ့လာသူသုံးဦးစေလွှတ်ခွင့်ရ”သတင်းမှ နိုင်ငံရေးဆောင်ပါးရှင် နေသန်မောင် ကောက်နှုတ်ချက်။
******************************************************************************************
| Google Drive: create, share, and keep all your stuff in one place. |  |