Posts
 | yangonchronicle2011 Op-Ed |
၁၈.၁၁.၂၀၁၁
ဆောင်းပါးကဏ္ဍ
- ဘယ်သူစတိတ်မင်လဲ
*************************************
ဆောင်းပါးကဏ္ဍ
ဘယ်သူစတိတ်မင်လဲ
နေဘုန်းခန့်
(နိုဝင်ဘာ ၁၈ ထုတ် The Hot News အတွဲ (၂) အမှတ် (၆၆) တွင်ပါသည့် မှထုတ်ယူဖော်ပြသည်)
ဒီမိုကရေစီနိုင်ငံတစ်ရပ် ဖြစ်ထွန်းပေါ်ပေါက်ရန်အတွက် လိုအပ်သောရွေးကောက်ပွဲနှင့် ရွေးကောက်ပွဲအရ ပေါ်ပေါက်သောလာသော အစိုးရ၊ ဒီမိုကရေစီစံနှုန်းများနှင့် အပြည့်အဝ မကိုက်ညီသေးစေကာမူ ယခင်ထက် ပိုမိုသော ပွင့်လင်းမြင်သာမှု၊ ဒီမိုကရေစီအခွင့်အရေးများနှင့် အစိုးရပိုင်း၏ ဖြေလျော့မှုများ ရှိလာပြီဖြစ်သည်။ လတ်တလောပင် နိုင်ငံရေးပါတီများ မှတ်ပုံတင်ခြင်း ဥပဒေအချက်တချို့ကို ပြင်ဆင်ပေးခဲ့သည်။ မကြာမီ ကြားဖြတ် ရွေးကောက်ပွဲတစ်ရပ်ကိုလည်း ပြုလုပ်ဖွယ်ရှိနေသည်။ နိုင်ငံရေး၊ ဒီမိုကရေစီ ကြားဖြတ်ရွေးကောက်ပွဲစသည်တို့ လှုပ်ရှားလာကတည်းက မပါမဖြစ် ပါလာသည်က နိုင်ငံရေးပါတီများနှင့် နိုင်ငံရေးသမားများဖြစ်သည်။
ရွေးကောက်ပွဲများတွင် နိုင်ငံရေးသမားများအနေဖြင့် ရွေးချယ်မခံရမီ ပြည်သူအတွက် ဘာတွေလုပ်ပေးမည်ဆိုကာ ပြောကြသည်။ ယင်းကိစ္စ သည် ကမ္ဘာတွင်ရော၊ မြန်မာတွင်ရော အထူးအဆန်းကတိများ မဟုတ်ကြ။ သို့သော် နိုင်ငံရေးသမားအများစုသည် မိမိတို့၏ ကိုယ်ကျိုးကိုသာ ဦးစားပေး တတ်ကြသည်။ ထိုစရိုက်တို့ကို ပြည်သူတို့က တဖြည်းဖြည်း သိမြင်လာရာ နှိုင်းယှဉ်မှုများဖြင့် ချိန်ထိုးကြည့်တတ်လာသည်။
နိုင်ငံရေးသမားများထဲတွင် သာမန်နိုင်ငံရေးသမားနှင့် နိုင်ငံရေးခေါင်းဆောင်ဟူ၍ ခွဲခြားကြည့်နိုင်သည်။ ပါတီတစ်ရပ် အပေါ်တွင်လည်းကောင်း၊ ပြည်သူလူထုအပေါ်တွင်လည်းကောင်း၊ ခေါင်းဆောင်မှုပေးနိုင်လျှင် ယေဘူယျ အားဖြင့် နိုင်ငံရေးခေါင်းဆောင်ဟုဆို၍ ရသည်။ ခေါင်းဆောင်ဟုဆိုလျှင် မည်သည့်နယ်ပယ်တွင်မဆို အဓိပ္ပယ်ဖွင့်ဆိုချက်က အတူတူသာဖြစ်သည်။ အရည်အသွေး၊ အမူအကျင့်၊ စရိုက်လက္ခဏာ၊ ကိုယ်ရည်ကိုယ်သွေး စသည်ဖြင့် သတ်မှတ် နှိုင်းယှဉ်စရာ “စံချိန်၊ စံညွှန်း”များအတူတူသာဖြစ်သည်။ ယင်းသို့ စံချိန်၊စံညွှန်းများဖြင့် လက်ရှိ မြန်မာ့နိုင်ငံရေး ရေစီးကြောင်း တွင်ပင် ခေါင်းဆောင် များစွာရှိလာသည်။ မကြာမီပါတီသစ် များပေါ်ထွန်းလာဦးမည်။ သို့ဆိုလျှင် ခေါင်းဆောင်များ ထပ်မံပေါ်ထွန်းလာဦးမည်။
သို့သော် လက်ရှိ နိုင်ငံရေးသည် အသွင်ကူးပြောင်းရေး အပြောင်းအလဲကာလ နိုင်ငံရေးဖြစ်သည်။ ယင်းသို့သော အချိန်ကာလသည် သာမန် နိုင်ငံရေးရေစီကြောင်းလို မြစ်ကြောင်းတစ်လျှောက် ပုံမှန်စီးဆင်းနေခြင်းမဟုတ်။ ဆိုရလျှင် လက်ရှိနိုင်ငံရေးသည် မြစ်ရေစီကြောင်းထက် ပင်လယ်နှင့် ပိုတူသည့် အချက်အလက်များစွာ ရှိသည်။ သို့နှင့် လက်ရှိနိုင်ငံရေးအရ နိုင်ငံ၊ ဒီမိုကရေစီရေးနှင့် ပြည်သူ့ဘဝတိုးတက်ရေးအတွက် ယေဘူယျ နိုင်ငံရေး ခေါင်းဆောင်များနှင့် မလုံလောက်တော့ စတိတ်မင် (Stateman) လိုလာတယ်။ ပြည်သူများကလည်းဘယ်သူစတိတ်မင် (Stateman) လဲဟု ရွေးချယ် ဆုံးဖြတ်စရာ ရှိလာသည်။
နိုင်ငံရေးခေါင်းဆောင်သည် ပြည်သူလူထု၏ အာရုံကိုသိမ်းသွင်းနိုင်သူ၊ ပြည်သူလူထုစိတ်ဓာတ်လှုပ်ရှားအောင် စွမ်းဆောင်နိုင်သူ၊ ပြည်သူတို့၏ အမြင်များကိုပြောင်းလဲပေးနိုင်သူ၊ တစ်စုံတစ်ခုသော ရည်မှန်းချက်ကိုရအောင် ဆောင်ရွက်ပေးနိုင်သူဟုဆိုနိုင်သည်။ စတိတ်မင် (Stateman) သည် ထိုထက်မက အဘိဓာတန်တွင် စတိတ်မင် (Stateman) ကို နိုင်ငံရေးသမား၊ အမြော်အမြင်ရှိသော နိုင်ငံရေးခေါင်းဆောင်ဟု အနက်ပေးထားသည်။ စတိတ်မင် (Stateman) ၏ အဓိပ္ပယ်သည် ထိုမျှမကသေး၊ နိုင်ငံရေးသိပ္ပံကျမ်းအချို့တွင် နိုင်ငံရေးအကဲဖြတ်ချက် ကောင်းကောင်း လုပ်ဆောင်နိုင်စွမ်း ရှိသူဟု အဓိပ္ပယ်ဖွင့်သည်။ Good Political Judge mentဟုအဓိပ္ပယ်ဖွင့်သည်။ ထို့အပြင် စတိတ်မင် (Stateman) သည် အမျိုးသားအကျိုးစီးပွားနှင့် အမျိုးသားရည်မှန်းချက်ကို အောင်မြင်အောင် ဖြည့်စွမ်းပေးနိုင်သူဟုဆိုနိုင်သည်။ သို့ဖြင့် ယေဘူယျ နိုင်ငံရေးခေါင်းဆောင်များသည် စတိတ်မင် (stateman) ဖြစ်လိုလျှင် သို့မဟုတ် အမျိုးသားအကျိုးစီးပွားနှင့် အမျိုးသားရည်မှန်းချက်ကို အောင်မြင်အောင် ဖြည့်စွမ်းလိုလျှင် ခေတ်မီသော ပညာ ဗဟုသုတ ရှိရမည်။ ဒီမိုကရေစီတန်ဖိုးကို နားလည် ရမည်။ ညှိနှိုင်းတိုင်ပင်၍ ဆောင်ရွက်သောအကျင့်ရှိရမည် ဖြစ်သည်။
စတိတ်မင် (Stateman) သည် နိုင်ငံရေးအကဲဖြတ်ချက်ကောင်းကောင်း ပြုလုပ်နိုင်သည်မှာ လက်တွေ့မကျသော သရုပ်မှန်ဝါဒနှင့် စေ့ဆော်မှု မရှိသော သရုပ်မှန် ဝါဒတို့၏ စေ့ဆော်မှုနှင့် ၎င်းတို့မှ ပေါ်ပေါက်လာသော ဘေးအန္တရာယ်တို့ကို ရှောင်ရှားနိုင်ခြင်းကို ဆိုလိုသည်။ ယင်းသည် စတိတ်မင် (Stateman) ၏ အရည်အချင်းတစ်ခုသာ ဖြစ်သေးပြီး၊ အတိတ်၊ ပစ္စုပ္ပန်နှင့် အနာဂတ်ကာလ အပိုင်းအခြားများကို ခြုံငုံနိုင်သော ဉာဏ်ရည်နှင့် အခွင့် အရေးများကို အမိဖမ်း ဆုပ်ကိုင်တွယ် နိုင်စွမ်း၊ စိန်ခေါ်မှုများကိုရင်ဆိုင်ရဲဝံ့မှု တို့လည်းရှိရမည်ဖြစ်သည်။ လတ်တလော မြန်မာ့နိုင်ငံရေးတွင် ယင်းသို့ သော စတိတ်မင် (Stateman) တွေ့နိုင်သော်လည်း တစ်ဦးတစ်ယောက်ထက် မပိုသည်မှာလက်တွေ့ပင် ဖြစ်သည်။ ယင်းစတိတ်မင် (Stateman) ၏ ရှုပ်ထွေးစွာ စီးမျောနေသော အတွေ့အကြုံဖြစ်ရပ်များအပေါ် တိုးဝင်စီးမျောရင်းဖြင့် ယင်းစီးမျောမှုများထဲမှ သင်ခန်းစာယူတတ်ခြင်း ဟူသော နိုင်ငံရေး အကဲဖြတ်ချက်ကောင်းကောင်း ပြုလုပ်နိုင်ခြင်းသည်ပင် အခြားသော နိုင်ငံရေးခေါင်းဆောင်များထက် စတိတ်မင် (stateman) ဖြစ်သည်ဆိုခြင်းကို ထင်ရှားစေသည်။
စတိတ်မင် (Stateman) သည် မည်သည့်အရာသည် မည်သည့်အရာနှင့်ကိုက်ညီသည်။ မည်သည့်အရာသည် မည်သည့်ဖြစ်ပေါ်မှုမှ ထွက်ပေါ်လာသည်။ မည်သည်ကို ရှေးရှုနေသည်ဆိုသည်တို့ကို ရှုပ်ထွေးမှုများထဲမှ ရွေးထုတ်နိုင်ရမည်။ ယင်းမှာ မူလဘူတစိစစ်သုံးသပ်ခြင်း (Analysis) ထက် ဆက်စပ်သုံးသပ်ခြင်း (Synthesis) အပေါ် ပိုမိုအလေးပေး တတ်ခြင်းဖြစ်သည်။
ဒီမိုကရေစီတွင် အသွင်ကူးပြောင်းရေးကာလသည် အမြဲတစေအဖြစ်အပျက်ဖြစ်သည်။ အဘယ်ကြောင့်ဆိုသော် ဒီမိုကရေစီသည် ပြောင်းလဲမှု များကို လွတ်လပ်စွာ ပြုလုပ်၍ ရနေသဖြင့်ဖြစ်သည်။ အသွင်ကူးပြောင်းရေးကာလတို့၌ စတိတ်မင် (Stateman) တို့၏ နိုင်ငံရေးအကဲဖြတ်ချက်သည် အလွန်တရာ အရေးကြီးသည်။ ဒီမိုကရေစီကို ထိန်းသိမ်းဖော် ဆောင်ရာတွင် လူထက် အခြေခံဥပဒေအပေါ်ပို၍ အားကိုးအားထား ပြုရမည်ကိုလည်း စတိတ်မင် (Stateman) က နားလည်ထားရသည်။ စတိတ်မင် (Stateman) ဆိုသည်မှာ ခြုံ၍ပြောရလျှင် စိတ်အရည်အချင်းနှင့် နှလုံးသား အရည်အချင်း နှစ်ခုံစလုံး မြင့်မားသူဖြစ်သည်။
ဆိုခဲ့ပြီးဆိုသလိုပင် လက်ရှိနိုင်ငံရေးပါတီခေါင်းဆောင်များ ပြည်သူကသတ်မှတ်ထားသော နိုင်ငံရေးခေါင်းဆောင်များတွင် မည်သူသည် စတိတ်မင် (Stateman) နည်း။ မည်သူသည် စတိတ်မင် (Stateman) ဖြစ်အောင် လုပ်ဆောင်နေသနည်းကို ရွေးချယ်ဆုံးဖြတ်ကြဖို့လိုပြီ ဖြစ်သည်။ သို့မှသာ ယခုအသွင်အပြောင်းအလဲကို ရရှိအောင် ယင်းစတိတ်မင်များက ဖော်ဆောင်ပေးနိုင်မည်ဖြစ်သည်။ နိုင်ငံရေးခေါင်းဆောင်များအနေဖြင့် လည်းအမျိုးသားအကျိုးစီးပွားနှင့် အမျိုးသားရည်မှန်းချက်ကို ဖြည့်စွမ်းပေးလိုလျှင် ယေဘူယျနိုင်ငံရေးခေါင်းဆောင်မှ စတိတ်မင် (stateman) ဖြစ်အောင် လုပ်ဆောင် ကျင့်ထုတ်ရန် မိမိတို့ စွမ်းအား (Power) များကို မြှင့်တင်ရန် အချိန်လွန်ပင်လာခဲ့သည်ကို သတိချပ်ဖို့ လိုအပ်နေပြီ ဖြစ်သည်။
သို့သော် တကယ်မတော်လျှင် ခြေချော်နိုင်သလို၊ ဘယ်လောက်တော်တော်ခြေချော်နိုင်သ်ညဆိုတာကလည်း မြန်မာ့နိုင်ငံရေးသမိုင်းကို ပြန်ကြည့်လျှင် တွေ့နိုင်သည်။ သေချာသည်ကတော့ သမိုင်းလှည်းဘီး တစ်ကျော့ပြန်မလည်ဖို့ အားထုတ်ရင်းရှေ့ကို ဆက်လျှောက်ကြဖို့ ဆောင်ရွက်ရန် ဖြစ်သည်။ လက်ရှိအချိန်အထိတော့ ပြည်သူများက ဘယ်သူ စတိတ်မင် (Stateman) လဲဟုမေးသံတွေသာဆူညံနေရုံအဖတ်တင်နေသေးသည်။
Ref: Scholarship and Statemanship by F.H. Candoso.
***************************************************************************************
Google Docs makes it easy to create, store and share online documents, spreadsheets and presentations.
