Posts
 | Editorial |
|
|
၈.၂.၂၀၁၃
အတွေးအမြင်
အယ်ဒီတာအာဘော်
စီးပွားရေးသစ် မဖြစ်ထွန်းသေး
မြန်မာနိုင်ငံ၏ဒီမိုကရေစီကျင့်သုံးမှုမှာ တစ်စုံတစ်ရာအတိုင်းအတာထိတော့ လက်တွေ့အလုပ်ဖြစ်လာလေပြီ။ လွှတ်တော်တွင်း ဆွေးနွေးငြင်းခုံမှု များ၊ ဆန္ဒထုတ်ဖော်မှုများ၊ သတင်းမီဒီယာလွတ်လပ်မှုများနှင့် နိုင်ငံရေးအကျဉ်းသားတဖြည်းဖြည်းချင်းနည်းပါလာမှု အစရှိသော နိုင်ငံရေးဖွံ့ဖြိုးတိုးတက်မှု ကို ပြည်သူများတွေ့မြင်လာရသည်။ ဤရပြီးသော နိုင်ငံရေးဖွံ့ဖြိုးတိုးတက်မှု အဓွန့်ရှည်တည်တံ့ရန်နှင့် ရှေ့ဆက်ဖွံ့ဖြိုးတိုးတက်အောင် ဆောင်ရွက်သွား ဖို့ရာ၌ အဓိက မောင်းနှင်အားမှာ စီးပွားရေးဖွံ့ဖြိုးတိုးတက်မှုဖြစ်သည်။
အစိုးရမှ စီးပွားရေးအပြောင်းအလဲများ ဖြစ်ပေါ်လာဖို့ မူဝါဒအချို့ကိုပြောင်းလဲခဲ့သော်လည်း ပြည်သူများအပေါ် ကြီးမားသည့် အကျိုးသက်ရောက်မှုမျိုး ဖြစ်ပေါ်မလာခဲ့ပေ။ မြန်မာနိုင်ငံသို့ နိုင်ငံတကာမှ ရင်းနှီး မြှုပ်နှံသူများ လာရောက်နေကြသော်လည်း လေ့လာမှုသာ များနေပြီး လက်တွေ့ရင်းနှီးမြှုပ်နှံမှုသို့ ရောက်ရှိမှုမှာ အနည်းငယ်သာရှိပါသေးသည်။ နိုင်ငံခြားရင်းနှီးမြှုပ်နှံမှုကို ကိုင်တွယ်တက်လျှင် နိုင်ငံစီးပွားရေးကို မြှင့်တင် နေကြောင်း အိမ်နီးချင်း ဗီယမ်နမ်၊ ကမ္ဘာဒီယား အစရှိသည့်နိုင်ငံများကို လေ့လာခြင်းဖြင့်သိရှိနိုင်ပါသည်။ သို့သော် မြန်မာနိုင်ငံမှာမူ နိုင်ငံခြား ရင်းနှီးမြှုပ်နှံမှုများ တဖွဲဖွဲမလာရောက်ခင် အကြိုအနေဖြင့် ယင်းနှင့်ပတ်သက်ပြီး ပြဿနာများစွာကို ဖြေရှင်းနေရသည်။ ယခင်အစိုးရမှ ခွင့်ပြုခဲ့သည့် နိုင်ငံခြားရင်းနှီးမြှုပ်နှံမှုများမှာ နိုင်ငံတကာစံနှုန်းများနှင့် မညီညွတ်သောကြောင့် ယခု တစ်စုံတစ်ရာလင်းပွင့်မှုရှိလာသည့်အခါ ပဋိပက္ခများ၏ အရင်းခံ အကြောင်းရင်းလို ဖြစ်ကြသည်။ စီးပွားရေးဖွံ့ဖြိုးဖို့အတွက် အရေးပါသည့် နိုင်ငံတကာမှရင်းနှီးမြှုပ်နှံမှုများစွာပါပြီး အင်အားတောင့်တင်း၍ နည်းပညာ အဆင့်မြှင့်သော ကုမ္ပဏီများပါဝင်သည့် သီလဝါဆိပ်ကမ်းအထူးစီးပွားရေးဇုန်စီမံကိန်းတောင် လုပ်ငန်းစတင်ခါစမှာပင် ယခင်အစိုးရ၏ လုပ်ဆောင်ခဲ့မှု များကြောင့် အစိုးရ နှင့် ပြည်သူများ စီမံကိန်းမြေကိစ္စနှင့် ပတ်သက်၍ ကြီးမားသည့် တင်းမာမှုများ ဖြစ်ပေါ်နေရသည်။
မြန်မာနိုင်ငံ နိုင်ငံခြားရင်းနှီးမြှုပ်နှံမှုကော်မရှင်လို စီးပွားရေးဖွံ့ဖြိုးဖို့ သြဇာရှိသည့် အစိုးရအဖွဲ့အစည်းမှာလည်း အထက်ပါကဲ့သို့ အရှုပ်အထွေး များစွာကို ကြိုးစားဖြည့်နေရသည်။ မည်သို့ပင်ဆိုစေ အကြွေးနွံနစ်နေသည့် နိုင်ငံတစ်နိုင်ငံဖို့ နိုင်ငံတကာမှ အကြွေး ဘီလီယံပေါင်းများ လျှော်ပစ်ခဲ့ပြီး နောက်ထပ်လည်း အကြွေးပေးမည်ဆိုခြင်းကြောင့် ထိုအကြွေးများဖြင့်ပင် နိုင်ငံ၏စီးပွားရေးကို တည်ဆောက်သွားရမည်ဖြစ်သည်။
မြန်မာနိုင်ငံသားတစ်ဦးစီ၏ ကုန်ထုတ်လုပ်မှု ပမာဏမြင့်မားလာဖို့မှာ အစိုးရ၏ဖွံ့ဖြိုးရေးမူဝါဒများပေါ်တွင် များစွာမူတည်ပေသည်။ နိုင်ငံခြား ရင်းနှီးမြုပ်နှံမှုများကို ဝင်ရောက်လာဖို့ လုပ်သာကိုင်သာရှိသည့် စီးပွားရေးဝန်းကျင်ကောင်းကို ဖန်တီးပေးဖို့၊ အသေးစား၊ အလတ်စား စီးပွားရေး လုပ်ငန်းများကို အားပေးကူညီမှုအပါအဝင် ပြည်သူအများအား အလုပ်အကိုင်များရရှိစေအောင် ဆောင်ရွက်ပေးနိုင်မှုတို့ဖြင့် တာဝန်ကျေမည်ဆိုပါက ပြည်သူများအကြား ဈေးကွက်၏ မက်လုံးများကြောင့် အလုပ်လုပ်လိုစိတ်များ ထက်သန်လာပြီး နိုင်ငံ့စီးပွားရေး အင်ဂျင်ကို မြှင့်တင်သွားနိုင်မည်ဖြစ်သည်။ သို့မှသာ ထွန်းသစ်စဒီမိုကရေစီတိုးတက်မှုများမှာ ရှေရှည်တည်တံ့မှာဖြစ်ပြီး ရှေ့ဆက်ဖွံ့ဖြိုးတိုးတက်ဖို့မှ ရေခံမြေခံကောင်းများလည်း ရရှိသွားမည် ဖြစ်ပါကြောင်း။
×××××××××××××××××××××××××××××××××××××××××××××××××××××××××××××××××
| Google Drive: create, share, and keep all your stuff in one place. |  |