Posts
(Associated Press မှ 26 January 2011 ရက်စွဲပါ "China's Premier says Public should criticize Government" ကို ဘာသာ ပြန်ဆိုသည်)
တရုတ် ဝန်ကြီးချုပ်သည် အစိုးရ တာဝန် ရှိသူများ အပေါ် မကျေနပ်ချက်များ တိုင်ကြားခွင့် ပြုသည့် "ပြည်သူ့ ပန်ကြားလွှာ ဗျူရို" သို့ မကြုံစဖူး သွားရောက် လည်ပတ်စဉ် တရုတ် ပြည်သူများအား အစိုးရ အပေါ် ဝေဖန်မှုများ ပြုလုပ် ကြရန်နှင့် မတရားမှုများကို ဖော်ထုတ် တင်ပြကြရန် တိုက်တွန်း လိုက်သည်ဟု နိုင်ငံပိုင် မီဒီယာက သတင်း ဖော်ပြလိုက်သည်။
နိုင်ငံပိုင် ဆင်ဟွာ (Xinhua) သတင်း ဌာနက အင်္ဂါနေ့ ညပိုင်းတွင် သတင်းထုတ်ပြန်ရာ၌ ၁၉၄၉ ခုနှစ် တရုတ် ပြည်သူ့ သမ္မတ နိုင်ငံ ထူထောင်ပြီး နောက်ပိုင်း တိုင်ကြား လျှောက်ထားသူ သာမန် ပြည်သူများကို ဝန်ကြီးချုပ်က တွေ့ဆုံခြင်းသည် ယခု ပထမဆုံး အကြိမ် ဖြစ်သည်ဟု ပြောကြားသည်။
တနင်္လာနေ့ မွန်းလွဲပိုင်းတွင် ဘေဂျင်းရှိ ပန်ကြားလွှာ ဗျူရိုမှ ဝန်ထမ်းများနှင့် ဧည့်သည်များအား ဝမ်ကြားပေါင်က ပြောကြားသည့် အတိုင်း China Central Television ရုပ်သံက တင်ပြရာတွင် ပြည်သူများအား အစိုးရကို ဝေဖန်ခွင့်၊ ကြပ်မတ်ခွင့် ပေးသည့် အခြေအနေများ ဖန်တီး ပေးရမည် ဖြစ်ပြီး အစိုးရ အနေဖြင့် ပြည်သူ အများစု၏ ပြဿနာနှင့် အခက်အခဲများကို တာဝန် သိသိဖြင့် ဖြေရှင်း ပေးနိုင်စွမ်း ရှိရမည်ဟု ဖော်ပြထားသည်။
တရုတ် နိုင်ငံသည် အစိုးရအပေါ် ဆန့်ကျင် အတိုက်အခံ ပြုမှုကို အစွန်းရောက် ပူပန် လွန်းသော နိုင်ငံ ဖြစ်သည်။ ဆန္ဒပြမှုများကို အစိုးရက ခွင့်ပြုထားခြင်း မရှိသကဲ့သို့ ခေါင်းဆောင်ပိုင်းအား ပြင်းထန်စွာ ဝေဖန်ထားသော သို့မဟုတ် တည်ငြိမ်မှု ပျက်ပြားစေနိုင်သော ကိစ္စ မှန်သမျှကို မီဒီယာနှင့် အင်တာနက်တွင် ပုံမှန် စိစစ် တည်းဖြတ်လေ့ ရှိသည်။
ငြိမ်းချမ်းရေး နိုဘယ်ဆုရှင် လူကျားဘို အပါအဝင် တရုတ် ကွန်မြူနစ် အစိုးရအပေါ် လူသိ ရှင်ကြား ထုတ်ဖော် ဝေဖန်သူများကိုလည်း မခိုင်လုံသော တရား စွဲဆိုချက် များဖြင့် ထောင်ဒဏ် အပြစ်ပေးခဲ့သည်။
အဂတိ လိုက်စားမှု ကဲ့သို့သော လူမှု ပြဿနာရပ် များအပေါ် စိတ် အနှောင့်အယှက် ဖြစ်မှု၊ မကျေနပ်မှုများကို ထုတ်ဖော် ပြောဆိုရန် ကြီးမားသော လူထု လွတ်လပ်ခွင့် ပေးမည့် ကိစ္စနှင့် ပတ်သက်၍ ဝမ်ကြားပေါင်က ယခင်ကလည်း ပြောဆိုခဲ့ဖူးသည်။
ယခု သတင်း အပေါ် အချို့က မှတ်ချက် ပေးရာတွင် အစိုးရ အနေဖြင့် ဒီမိုကရေစီ ပြုပြင် ပြောင်းလဲမှုများကို ပိုမို၍ တွန်းတွန်း တိုက်တိုက် လုပ်ဆောင်ရန် ဆန္ဒ ရှိနေသော်လည်း ခိုင်မာသော အစ ပျိုးမှုများဖြင့် ဆက်လက် ဆောင်ရွက်ရန် လိုအပ်နေသေးသည်ဟု ပြောကြားကြသည်။
တိုင်ကြား မှုများအပေါ် ခေတ်မမီ၊ ထိရောက်မှု မရှိ ဖြေရှင်းခြင်းဟု ကျယ်ကျယ် ပြန့်ပြန့် ယူဆ ထားကြသည့် ပြည်သူ့ ပန်ကြားလွှာ စနစ်သည် ယခု ဗျူရိုသို့ လာရောက် လည်ပတ်သည့် ဝမ်ကြားပေါင်၏ နာမည်ကြီး ခရီးစဉ်ကြောင့် တိုင်ကြား လျှောက်ထားမှုများ ပို၍ များလာမည့် ရလဒ် ထွက်ပေါ်လာရန် အလား အလာ ရှိသည်ဟု လူ့အခွင့်အရေး လှုပ်ရှားသူ တစ်ဦးက ပြောကြားသည်။
လူ့အခွင့်အရေး စောင့်ကြည့် လေ့လာသူ သုတေသန ပညာရှင် Phelim Kine က "တိုင်ကြားမှု စနစ်နဲ့ ပတ်သက်လို့ ဝမ်ကြားပေါင်ရဲ့ လူသိ ရှင်ကြား တိုက်တွန်းမှုဟာ အဆင့်အတန်း ကွဲနေတဲ့ တရုတ် ကျေးလက် လူထုကြီးကိုသာ ဆွဲဆောင် နိုင်ပါလိမ့်မယ်၊ အတိတ်က မတရားမှုတွေကို ဖြေရှင်း ဖို့ထက် ပျက်စီးနေတဲ့ တိုင်ကြားမှု စနစ်ကို ပြုပြင်ဖို့ ကြိုးစားမယ် ဆိုရင် စနစ် အသစ်တွေကို ဆက်တိုက် ဖန်တီးရမှာပါ" ဟု အီးမေးလ် ပေးပို့ ပြောကြားသည်။
တရုတ်နိုင်ငံတွင် ဒေသ အာဏာပိုင်များမှာ ၎င်းတို့၏ နယ်မြေဒေသမှ တိုင်ကြားမှုများ မရှိရ ဟူသော ဖိအား ကျရောက်နေသည်။ ယင်းတို့၏ စွမ်းဆောင်မှု အပေါ် နယ်မြေ ဒေသခံများက တိုင်ကြားခြင်းသည် မတည်ငြိမ်မှု လက္ခဏာဟု အစိုးရက ယူဆသောကြောင့် ဖြစ်သည်။ ယင်း၏ အကျိုးဆက် အဖြစ် တိုင်ကြား လျှောက်ထားသူ အချို့မှာ တစ်ခါတစ်ရံ ၎င်းတို့၏ တိုင်ကြားလွှာကို မတင်ပြနိုင်ခင်မှာပင် လူမိုက်များ၏ ဖမ်းဆီးခြင်း ခံရကာ တာဝန် ရှိသူများက တိတ်တိတ်ပုန်း ပြုလုပ်ထားသော တရား မဝင် အချုပ်ခန်းများတွင် ချုပ်နှောင် ထားခြင်း ခံကြရသည်ဟု သိရှိရသည်။
၂၀၀၄ ခုနှစ်က တရုတ် အစိုးရ၏ လေ့လာမှု အစီရင်ခံစာ တစ်စောင်တွင် တိုင်ကြားသူ ၆၂၃ ဦးကို ရွေးထုတ် လေ့လာ မေးမြန်းခဲ့ရာ ၀.၂ ရာခိုင်နှုန်း ကသာလျှင် တိုင်ကြားမှု စနစ်မှ တစ်ဆင့် ပြဿနာ ဖြေရှင်း နိုင်ခဲ့သည် ဟူသော တွေ့ရှိချက်ကို Phelim Kine က ရည်ညွှန်း ကိုးကားကာ မှတ်ချက် ပေးခဲ့ခြင်း ဖြစ်သည်။
--Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.