Posts
 | yangonchronicle 2011- (1) |
၅.၃.၂ဝ၁၂
ဘာသာပြန်သတင်းများ အပိုင်း(၁)
- မူဝါဒအလွဲများက အဓိကတရားခံဟု ဦးမြင့်ပြောကြား
(Indo Asian News Service မှ 3 Mar 2012 ရက်စွဲပါ Flawer policies Myanmar biggest Set back : official ကို ဘာသာပြန်ဆိုသည်)
- မူဝါဒ အပြောင်းတွင် မြန်မာကျပ်ငွေနှုန်းရှင် မျှောရန် နီးစပ်လာ
(Bloomberg News မှ 4 March 2012 ရက်စွဲပါ Myanmar nearing currency float in policy shift ကို ဘာသာ ပြန်ဆိုသည်)
- မြန်မာဈေးကွက်ကို အာရုံပြုရန် တိုင်ဝမ်စီးပွားရေးများအား တိုက်တွန်း
(The China Post မှ 3 March 2012 ရက်စွဲပါ Businesses urged to focus on Myanmar Market ကို ဘာသာ ပြန်ဆိုသည်)
************************************************************************
မူဝါဒအလွဲများက အဓိကတရားခံဟု ဦးမြင့်ပြောကြား
(Indo Asian News Service မှ 3 Mar 2012 ရက်စွဲပါ Flawer policies Myanmar biggest Set back : official သတင်းကို ဘာသာပြန်ဆိုသည်)
မြန်မာနိုင်ငံသည် စွမ်းအားရင်းမြစ်များ ချို့တဲ့နေခြင်းမဟုတ်ဘဲ ကိုယ့်ကိုကိုယ် ပြန်လည်ဖျက်ဆီးသော မူဝါဒအလွဲများ ကျင့်သုံးခဲ့ခြင်းဖြစ်မည်ဟု သမ္မတဦးသိန်းစိန်၏ စီးပွားရေးအကြံပေးဖြစ်သူ ဦးမြင့်က ပြောကြားလိုက်သည်။
မကြာမီကာလအတွင်း အစိုးရအတွေ့အကြုံရမည့် စိန်ခေါ်မှုများနှင့် ရည်မှန်းချက်များကို ဆွေးနွေးရန် ကျင်းပသော အလုပ်ရုံဆွေးနွေးပွဲတစ်ခုတွင် ဦးမြင့်က ယင်းကဲ့သို့ ပြောကြားခဲ့ခြင်းဖြစ်သည်။ ယခု သီတင်းပတ်အတွင်း ပြုလုပ်ခဲ့သော ယင်းအလုပ်ရုံဆွေးနွေးပွဲကို စီးပွားရေးဖွံ့ဖြိုးတိုးတက်မှု ဝန်ကြီးဌာနနှင့် ဂျပန် နိုင်ငံတကာ ပူးပေါင်းဆောင်ရွက်ရေး အေဂျင်စီ JICA တို့ ပူးပေါင်းကာ ကမကထပြု စီစဉ်ကျင်းပခဲ့သည်။
“ကျွန်တော်တို့ မြန်မာနိုင်ငံမှာ လွတ်လပ်ရေးပြီးနောက်ပိုင်း နှစ်ပေါင်း ၅၀ တစ်လျှောက်လုံးမှာ စွမ်းအား ရင်းမြစ်တွေ ချို့တဲ့ခဲ့တာကြောင့် မဟုတ်ပဲ ကိုယ့်ကိုကိုယ် ပြန်လည်ပျက်စီးစေမယ့် မူဝါဒအလွဲတွေ၊ အကြံဥာဏ် အလွဲတွေကို လက်ခံကျင့်သုံးခဲ့လို့ ခုလို နောက်ကျကျန်ရစ်ခဲ့ရတယ်ဆိုတာကို အမှန်အတိုင်း သိကြဖို့ အရေးကြီးပါတယ်”ဟု ဦးမြင့်က ပြောဆိုသွားသည်။
"ပထမဦးဆုံးနဲ့ အရေးကြီးဆုံးကတော့ ကျွန်တော်တို့ရဲ့လက်ရှိအဆင့်ဟာ ဘယ်နေရာမှာလဲဆိုတာကို ပွင့်ပွင့်လင်းလင်း၊ အဂတိကင်းကင်းနဲ့ အကဲဖြတ်ရမယ့် ကိစ္စပဲဖြစ်ပါတယ်" ဟု ဦးမြင့်က ပြောကြားသွားခဲ့သည်။
**********************************************************************
မူဝါဒ အပြောင်းတွင် မြန်မာကျပ်ငွေနှုန်းရှင် မျှောရန် နီးစပ်လာ
(Bloomberg News မှ 4 March 2012 ရက်စွဲပါ Myanmar nearing currency float in policy shift ကို ဘာသာ ပြန်ဆိုသည်)
ဆယ်စုနှစ် ၅ စု စစ်အုပ်ချုပ်ရေးအလွန် မြန်မာနိုင်ငံသည် အနောက်နိုင်ငံများနှင့် စီးပွားရေးလက်တွဲ ဆောင်ရွက်ရန် ကြိုးစားနေပြီ ဖြစ်သောကြောင့် ကုန်သွယ်မှုနှင့် ရင်းနှီးမြှုပ်နှံမှုများကို နောက်ပြန်ဆွဲထားမည့် အန္တရာယ် တစ်ခု ဖြစ်သော "ပုံသေငွေလဲနှုန်း" ကို ဖျက်သိမ်းရန် ဆုံးဖြတ်ချက် ထွက်ပေါ်လုနီးနေပြီ ဖြစ်သည်။
အာဏာပိုင်များသည် မကြာမီအတွင်း ကျပ်ငွေနှုန်းရှင် မျှောမည့် အပြောင်းအလဲကို ထုတ်ပြန်ကြေညာမည် ဖြစ်ပြီး ငွေလဲနှုန်း တစ်ဒေါ်လာလျှင် ၈ဝဝ ကျပ်ထက် မကျော်အောင် ထိန်းသိမ်းရန် ကြိုးစားမည် ဖြစ်သည်။ ကျပ်ငွေ တန်ဖိုးကို ဗဟိုဘဏ်က ကြားဝင် ထိန်းချုပ်မည့် ဘဏ်များအကြား ငွေလဲအိတ်ချိန်း ဈေးကွက်ကိုလည်း ထူထောင်ကြလိမ့်မည်ဟု အမည်မဖော်လိုသော အတွင်းသိ သတင်းရပ်ကွက်က ပြောကြားသည်။
အဆိုပါအစီအစဉ်သည် မနှစ်က အာဏာရလာပြီးနောက်ပိုင်း စစ်အုပ်ချုပ်ရေး၏ ဆိုးမွေများကို စတင် ဖယ်ရှားလျက် ရှိသည့် သမ္မတဦးသိန်းစိန်၏ စီးပွားရေး ပြုပြင်ပြောင်းလဲမှုများကို အရှိန်မြှင့်တင်နိုင်မည် ဖြစ်သည်။ ထို့ပြင် အတိုက်အခံခေါင်းဆောင် ဒေါ်အောင်ဆန်းစုကြည် ပါဝင်ယှဉ်ပြိုင်မည့် ဧပြီလ ကြားဖြတ်ရွေးကောက်ပွဲများ အပြီးတွင် ပိတ်ဆို့အရေးယူမှုများကို ပြန်လည် သုံးသပ်ရန် အမေရိကန်နှင့် ဥရောပနိုင်ငံများက ကတိပြုထားကြခြင်းကြောင့် ယခု အပြောင်းအလဲသည် ကမ္ဘာနှင့် မြန်မာ စီးပွားရေး ပြန်လည် ချိတ်ဆက်မည့်လမ်းကိုလည်း ခင်းပေးပါလိမ့်မည်။
"ဒီကိစ္စဟာ ပြုပြင်ပြောင်းလဲရေးသမားတွေအတွက် သိသာတဲ့ အောင်ပွဲတစ်ခုပါ။ ဆုံးရှုံးသွားမယ့်သူတွေ ကတော့ ငွေလဲနှုန်း အဟောင်းနဲ့ စီးပွားရှာနေကြတဲ့ တပ်မတော် ထိပ်တန်း လူ့မလိုင်တွေပဲ"ဟု ဩစတြေးလျ Macquarie University မှ မြန်မာ့စီးပွားရေး သုတေသန ပညာရှင် ပါမောက္ခ ရှောင်တာနဲလ်က မှတ်ချက်ပေးသည်။
ပြင်ပဈေးကွက် ငွေလဲနှုန်းထက် ၁၂၅ ဆခန့် တန်ဖိုးရှိသော တစ်ဒေါ်လာ ၆ ကျပ်ခွဲ ငွေလဲနှုန်းသေးကို အဆုံးသတ်ကာ နှုန်းရှင် မျှောမည့် အစီအစဉ်သည် နိုင်ငံတကာ ငွေကြေး ရံပုံငွေအဖွဲ့ IMF ၏ အထူးအခွင့်အရေးများ ကိုပါ ရရှိစေမည် ဖြစ်သည်။ ယခင်အစိုးရက ရင်းနှီးငွေ စီးဆင်းမှုကို ထိန်းချုပ်ထားခဲ့ခြင်းကြောင့် မြန်မာနိုင်ငံ၌ ငွေလဲနှုန်း ၇ မျိုးခန့် အမွေ ကျန်ရစ်ခဲ့သည်။
ယခုကဲ့သို့ ရှုပ်ထွေးလွန်းသော ငွေလဲနှုန်း ပေါင်းစုံနှင့် စနစ်ကို ဖျက်သိမ်းခြင်းသည် အာရှ၏ ဈေးကွက်သစ် ဖြစ်လာရန် အလားအလာ ကောင်းနေသော မြန်မာနိုင်ငံ၏ ဖွံ့ဖြိုးမှု အတားအဆီးများကို လျှော့ချ ဖယ်ရှားလိမ့်မည်ဟု ဝါရှင်တန် အခြေစိုက် IMF အဖွဲ့က ဇန်နဝါရီ ၂၅ တွင် ပြောကြားခဲ့သည်။
နှစ်ပေါင်း ၂ဝ ကျော် အရေးယူ ပိတ်ဆို့ခံရခြင်းကြောင့် ဘဏ်လုပ်ငန်း နည်းပညာကျွမ်းကျင်မှုများ၊ ငွေကြေး စနစ် ခေတ်မီအောင် အားထုတ်မှုများ ပျောက်ဆုံးနေသော မြန်မာဘဏ်များသည် ယခုအခါ ဒေသတွင်း ဘဏ်လုပ်ငန်းများထံမှ လေ့လာသင်ယူရန် ကြိုးစားနေရသည်။
အကယ်၍ ပိတ်ဆို့မှုများ ရုတ်သိမ်းမည် ဆိုပါက မြန်မာနိုင်ငံ၌ ရင်းနှီးမြှုပ်နှံရန် ကြိုးစားနေသော အမေရိကန်နှင့် ဥရောပကုမ္ပဏီများထဲတွင် Standard Chartered Plc. နှင့် General Electric Co. တို့လည်း ပါဝင်သည်။ ၁၉၉၉ ခုနှစ်က ကမ္ဘာလုံးဆိုင်ရာ ကုန်ဈေးနှုန်း တက်မှုကို ကြိုတင် ခန့်မှန်းနိုင်ခဲ့သူ Rogers Holding Ltd ဥက္ကဋ္ဌ ဂျင်မ်ရော်ဂျာ(Jim Rogers)က ဖြစ်နိုင်မည်ဆိုလျှင် ပိုင်ဆိုင်ငွေအားလုံးကို မြန်မာနိုင်ငံတွင် မြှုပ်နှံထားလိုသည်ဟု ဖေဖော်ဝါရီ ၂၂ က ဆိုထားသည်။
အိန္ဒိယ၊ တရုတ် စသော အင်အားကြီး နိုင်ငံများနှင့် နယ်စပ်ချင်း ထိစပ်နေကာ ရာဘာ၊ သဘာဝဓာတ်ငွေ့ အပါအဝင် သယံဇာတများ ကြွယ်ဝပြီး လူဦးရေ ၆၄ သန်း နေထိုင်သော မြန်မာနိုင်ငံသည် ၁၉၆ဝ ခုနှစ်များ အစောပိုင်းတွင် ဒီမိုကရေစီ ဆိတ်သုဉ်းပြီးနောက်ပိုင်း ကမ္ဘာ့စီးပွားရေးနယ်ပယ်နှင့် အဆက်အသွယ် ပြတ်တောက်သွားခဲ့သည်။
အစိုးရသည် ပြည်တွင်းဘဏ် ၁၁ ခုကို ဘဏ်ချင်း ဆက်သွယ်ဆောင်ရွက်သည့် ဈေးကွက်တွင် အမေရိကန် ဒေါ်လာ၊ ယူရို၊ စင်ကာပူ ဒေါ်လာတို့ကို တရားဝင် လုပ်ကိုင်ခွင့်ပြုမည့် လိုင်စင်များ ပေးရန် ပြင်ဆင်လျက် ရှိပြီး ဘဏ်များကလည်း ထိုင်း၊ စင်ကာပူ၊ တရုတ် စသော ကုန်သွယ်ဖက်နိုင်ငံများမှ ပြည်ပဘဏ်များနှင့် ဆက်သွယ် ဆောင်ရွက်ရန် ကြိုးစားနေသည်ဟု အတွင်းသတင်းရပ်ကွက်က ဆိုသည်။
မြန်မာနိုင်ငံတော် ဗဟိုဘဏ်သည် ယခုစနစ်သစ်အရ နိုင်ငံခြား ငွေလဲလှယ်ခြင်းကိုပါ ကိုင်တွယ် ဆောင်ရွက်မည် ဖြစ်သည်။ ပို့ကုန်ရငွေဖြင့်သာ သွင်းကုန်များကို ငွေချေးရန် စည်းကမ်းသတ်မှတ်ထားသော ငွေကြေး စီးဝင်မှု ထိန်းချုပ်စည်းကမ်းများကို လျှော့ချခြင်းသည် အထူးသဖြင့် တရုတ်နိုင်ငံမှ ဈေးပေါသော သွင်းကုန်များ ဒလဟော စီးဝင်လာမှုကို တားဆီးရန်အတွက် အချိန်ယူဆောင်ရွက်ရလိမ့်မည်ဟု အမည်မဖော်လိုသူတစ်ဦးက ဆိုသည်။
Japan External Trade Organization မှ သုတေသနပညာရှင် ကိုရီကူဘို၏ ဇန်နဝါရီလ အစီရင်ခံစာ တစ်စောင်အရ ၂ဝဝ၆ တွင် တစ်ဒေါ်လာ ၁၃ဝဝ ကျပ်မှ ယခုနှစ်တွင် တစ်ဒေါ်လာ ၈ဝဝ ကျပ်သို့ အရှေ့တောင်အာရှ အမြန်ဆုံးနှုန်းဖြင့် တန်ဖိုးတက်သွားခဲ့သော ပြင်ပဈေးကွက် လဲလှယ်နှုန်းကြောင့် ယှဉ်ပြိုင်နိုင်စွမ်း ကျဆင်းနေသော မြန်မာပုဂ္ဂလိက ပို့ကုန်လုပ်ငန်းများကို ယခု ငွေလဲလှယ်နှုန်း အရှင်မျှောထားခြင်းက အထောက်အကူ ပြုလိမ့်မည်ဟု သိရသည်။
ပြီးခဲ့သော ဆယ်စုနှစ် တစ်ခုလုံး ထိုင်းနိုင်ငံသို့ သဘာဝ ဓာတ်ငွေ့ ရောင်းချခဲ့ခြင်းကြောင့် မြန်မာနိုင်ငံ၏ အရံ နိုင်ငံခြားငွေသည် ၂ဝဝဝ ခုနှစ်တွင် ဒေါ်လာ သန်း ၂ဝဝ မှ ၂ဝ၁ဝ တွင် ဒေါ်လာ ၅.၅ ဘီလျံသို့ ထိုးတက်သွားခဲ့သည်ဟု အာရှဖွံ့ဖြိုးရေးဘဏ် ADB ၏ ကိန်းဂဏန်းများက ပြသနေသည်။ မြန်မာနိုင်ငံ ဗဟိုဘဏ်၏ ရည်မှန်းချက်မှာ ကျပ်ငွေတန်ဖိုးကို ထိန်းသိမ်းရန် ဖြစ်သည်ဟု ADB က ဖော်ပြထားသည်။
"ငွေလဲနှုန်း ၂ မျိုး ဈေးကွက်ကြောင့် နောက်ဆုံးမှာ အစိုးရက ထိန်းချုပ်နိုင်ခြင်း မရှိတဲ့ ဘဝကို ရောက်သွားပါတယ်။ အခုလို အစိတ်စိတ်အမွှာမွှာ နိုင်ငံခြား ဈေးကွက်ကို ပြန်လည် စုစည်း ပြင်ဆင်မှုကြောင့် အစိုးရနဲ့ ဗဟိုဘဏ်က ပုဂ္ဂလိက ငွေလဲနှုန်းဈေးကွက်ကို ထိန်းချုပ်နိုင်မှာ ဖြစ်သလို ပိုမို တည်ငြိမ်မှုလည်း ဖြစ်လာပါလိမ့်မယ်" ဟု ဂျပန် ပညာရှင် ကူဘိုက မှတ်ချက်ပေးသည်။
ကျပ်ငွေ နှုန်းရှင်မျှောရန် စီစဉ်မှုကြောင့် တရားဝင် ငွေလဲနှုန်းကို အသုံးပြုနေကြသော နိုင်ငံပိုင် ဘဏ်လုပ်ငန်းများ အထိနာကြမည် ဖြစ်ပြီး အကယ်၍ မှန်ကန်စွာ စီမံခန့်ခွဲနိုင်ခြင်း မရှိပါက ဒေဝါလီခံခြင်း၊ ချေးငွေ လည်ပတ်မှု မရှိခြင်း၊ ငွေကြေးအပ်နှံသူ မရှိခြင်း စသော အလားအလာများကို ရင်ဆိုင်ရလိမ့်မည်ဟု ကူဘိုက ရေးသား တင်ပြထားသည်။
လတ်တလောတွင် နိုင်ငံခြားဘဏ်များအား မြန်မာနိုင်ငံတွင်း ငွေကြေးဆောင်ရွက်ခွင့် တားမြစ်ထားသော ဥပဒေများမှာလည်း အာဆီယံ အဖွဲ့၏ သဘော တူညီမှုများအရ ၂ဝ၁၅ တွင် ပြင်ဆင်ပြောင်းလဲပေးရမည် ဖြစ်သည်။ လက်ရှိ ရန်ကုန်မြို့တော်တွင် ကိုယ်စားလှယ် ရုံးခန်း ဖွင့်လှစ်ထားသော နိုင်ငံခြားဘဏ် ၁၃ ခုအနက် ၁ဝ ခုမှာ အာဆီယံနိုင်ငံများမှ ဖြစ်သည်ဟု ဗဟိုဘဏ်၏ ထုတ်ပြန်မှုအရ သိရှိရသည်။
နိုင်ငံပိုင် မြန်မာ့ နိုင်ငံခြား ကုန်သွယ်မှုဘဏ် MFTB၊ မြန်မာ့ ရင်းနှီမြှုပ်နှံမှုနှင့် ကူးသန်းရောင်းဝယ်ရေးဘဏ် MICB၊ မြန်မာ့စီးပွားရေးဘဏ် MEB တို့ကိုပြည်ပတွင် လုပ်ငန်းဆောင်ရွက်ခွင့် ပြုထားသော်လည်း အမေရိကန်က ဘဏ္ဍာရေးအရေးယူမှုများ ချမှတ်ကာ ပိတ်ဆို့ထားသည်။
ထို့ပြင် အမေရိကန် အရေးယူမှုများတွင် မြန်မာနိုင်ငံမှ သွင်းကုန်များကို တားမြစ်ခြင်း၊ ကယ်ဆယ် ထောက်ပံ့ရေး ငွေကြေးများကို ထိန်းချုပ်ခြင်း၊ မြန်မာနိုင်ငံထွက် ကျောက်မျက် သယံဇာတများကို ပစ်မှတ်ထား ပိတ်ပင်ခြင်း စသည်တို့လည်း ပါဝင်သည်။ အီးယူကလည်း လက်နက်ရောင်းဝယ်မှု တားမြစ်ခြင်း၊ သတ္တုသယံဇာတ တင်သွင်းမှု တားမြစ်ခြင်း အပါအဝင် အရေးယူမှုများ ချမှတ်ကာ အရေးယူထားသည်။
"မြန်မာအစိုးရသည် ဘတ်ဂျတ်လိုငွေကို ဖြည့်ရန်အတွက် ငွေစက္ကူရိုက်ထုတ်နေရခြင်းကို လျှော့ချလျက် ရှိပြီး ငွေကြေးလိုအပ်ချက်ကို ဖြည့်ဆည်းရန် အတွက် ပြည်တွင်း ရင်းနှီးမြှုပ်နှံသူများအား ငွေတိုက် စာချုပ်များ ပိုမို ထုတ်ဝေ ရောင်းချမည့် အလားအလာ ရှိနေသည်။ သို့သော်လည်း မကြာမီ အတောအတွင်း နိုင်ငံခြားသားများကို ငွေတိုက်စာချုပ်များ ရောင်းချပေးရန် အလားအလာ မရှိသေးပါ" ဟု အတွင်းသတင်းရပ်ကွက်က ဆိုသည်။
"မြန်မာ့စီးပွားရေး ခေတ်မီ တိုးတက်ရေးသည် စီးပွားရေးနှင့် ရင်းနှီးမြှုပ်နှံမှု နယ်ပယ်ကို အားပေးခြင်း၊ ငွေကြေးကဏ္ဍကို ခေတ်မီအောင် ပြုပြင်ခြင်း၊ ကုန်သွယ်မှုနှင့် နိုင်ငံခြား တိုက်ရိုက် ရင်းနှီးမြှုပ်နှံမှုများကို ဆက်လက် လွတ်လပ်ခွင့် ပေးခြင်း စသော ဆောင်ရွက်ချက်များဖြင့် တိုးတက်မှု အနှောင့်အယှက်များကို ဖယ်ရှားမည့် လုပ်ငန်းစဉ်တစ်ခု ဖြစ်လာလိမ့်မည်။ မြန်မာအစိုးရ၏ လက်ရှိ အားထုတ်မှုများသည် လမ်းကြောင်းမှန်ပေါ်တွင် ရှိနေသည်" ဟု IMF အဖွဲ့က ဇန်နဝါရီလက မှတ်ချက် ပေးထားသည်။
********************************************************************
မြန်မာ့ဈေးကွက်ကို အာရုံပြုရန် တိုင်ဝမ်စီးပွားရေးသမားများအား တိုက်တွန်း
(The China Post မှ 3 March 2012 ရက်စွဲပါ Businesses urged to focus on Myanmar Market ကို ဘာသာ ပြန်ဆိုသည်)
ကမ္ဘာ့စီးပွားရေး၏ အနာဂတ်သည် အာရှတွင် ရှိကြောင်း၊ မြန်မာနိုင်ငံသည် တိုင်ဝမ်စီးပွားရေးလုပ်ငန်း များအတွက် အလားအလာကောင်းသော ဈေးကွက် ဖြစ်ကြောင်း ထိုင်း-တိုင်ဝမ် စီးပွားရေးအဖွဲ့အဥက္ကဋ္ဌ Norman Chang က ကြာသပတေးနေ့က ဘန်ကောက်တွင် ပြောကြားခဲ့သည်။
အမေရိကန်နှင့် ပြည်ထောင်စုတွင် စီးပွားရေးအားနည်းလာပြီး၊ ဥရောပတွင်လည်း ကြွေးမြီများ ပြဿနာ ရှိနေခြင်းကြောင့် တိုင်ဝမ် စီးပွားရေး လုပ်ငန်းများသည် အာရှကိုသာ အဓိက အာရုံပြုသင့်ကြောင်း Chang က (၁၉)ကြိမ်မြောက် အာရှတိုင်ဝမ်ကုန်သည်ကြီးများအသင်း (ATCC) အစည်းအဝေးတွင် မိန့်ခွန်းပြောကြားခဲ့သည်။ အဆိုပါ အစည်းအဝေးသို့ အာရှနိုင်ငံ(၁၃)နိုင်ငံမှ တိုင်ဝမ်စီးပွားရေးအုပ်စုများမှ ကိုယ်စားလှယ်(၃၀၀) တက်ရောက်ခဲ့သည်။
၎င်းက ထိုင်းနိုင်ငံအခြေစိုက် တိုင်ဝမ်စီးပွားရေး လုပ်ငန်းများအတွက် မြန်မာဈေးကွက် အရေးပါပုံကို အလေးအနက်ထား ပြောကြားခဲ့ပြီး၊ နေရာချင်း နီးကပ်နေမှု၊ မြေကြီးများ အလွယ်တကူရရှိနိုင်မှုနှင့် ဘာသာစကား အတားအဆီး နည်းခြင်းတို့ကို တွေ့မြင်ရကြောင်း ပြောကြားခဲ့သည်။
ထိုင်းနိုင်ငံတွင် လုပ်အားခဈေးနှုန်းများ တက်လာခြင်းနှင့် မြန်မာနိုင်ငံတွင် မြေဈေးပေါခြင်းတို့သည် မြန်မာဈေးကွက်ကို စိတ်ဝင်စားစေသည့် အကြောင်းများ ဖြစ်ကြောင်း ၎င်းက ပြောသည်။
မြန်မာနိုင်ငံသည် တဖြည်းဖြည်း၎င်း၏ ဈေးကွက်ကို တံခါးဖွင့်လာခြင်းကြောင့် တိုင်ဝမ်စီးပွားရေး လုပ်ငန်း မြန်မာနိုင်ငံတွင် သွားရောက် ရင်းနှီးမြှုပ်နှံရန် အချိန်ကောင်းဖြစ်ကြောင်း ၎င်းက အလေးအနက်ပြောခဲ့ပါ သည်။
အစည်းအဝေး တက်ရောက်လာသူ Straits Exchange Foundation မှ ဥက္ကဋ္ဌ Chiang Pin-Kung က အရှေ့တောင်အာရှ ဈေးကွက် အရေးပါပုံကို အလေးအနက် ပြောခဲ့ပြီး၊ တိုင်ဝမ်စီးပွားရေးလုပ်ငန်းများ ရှေ့ဆက် တိုးတက်ရေးအတွက် ၎င်းတို့သည်အရေးကြီးကြောင်း ဆိုခဲ့သည်။
ATCC ကို ၁၉၃၃ ဇူလိုင်တွင် တည်ထောင်ခဲ့ပြီး၊ အာရှတိုက်ရှိ တိုင်ဝမ် စီးပွားရေးလုပ်ငန်းရှင်များကြား စီးပွားရေး သတင်းများ ဖလှယ်နိုင်ရန် ရည်ရွယ်၍ တည်ထောင်ခဲ့ကြောင်း ၎င်း၏ ဝက်ဆိုဒ်အဆိုအရ သိရှိရသည်။
****************************************************************************
Google Docs makes it easy to create, store and share online documents, spreadsheets and presentations.
