Posts
 | Quote & Comment and News in brief |
သတင်းဆောင်းပါးမှ ကောက်နှုတ်ချက်များ
“ဒီ အဆိုကို တင်ပြရခြင်းဟာ မြေသိမ်းဆည်းခြင်းနဲ့ သက်ဆိုင်တဲ့ ဝန်ကြီးဌာနများနဲ့ အဖွဲ့အစည်းများက အလေးဂရုပြုပြီး တစ်စုံတစ်ရာ အရေးယူဆောင်ရွက်ပေးခြင်းမရှိတဲ့အတွက် တင်ပြခြင်းမဟုတ်ဘဲ တိုင်းဒေသ ကြီး နဲ့ ပြည်နယ်အစိုးရများ၊ သက်ဆိုင်ရာဝန်ကြီးဌာနများရဲ့ အရေးယူဆောင်ရွက်မှုတွေဟာ လုံလောက် မှုမရှိပါသဖြင့် တိုင်းဒေသကြီးနဲ့ ပြည်နယ်အလိုက် တိုင်ကြားစာပါ ကိစ္စရပ်တွေကို နယ်ပယ်အနှံ့ကျယ်ကျယ် ပြန့်ပြန့် စုံစမ်းဖြေရှင်းဆောင်ရွက်ပေးဖို့ လိုအပ်နေသေးတဲ့အတွက် တင်ပြရခြင်းဖြစ်ပါတယ်။”
ဇူလိုင်လ ၉ ရက်နေ့ထုတ် ရန်ကုန်တိုင်းမ် နေ့စဉ်ထုတ်သတင်းစာ တွင်ပါရှိသော “လယ်ယာမြေနှင့် အခြားမြေများ သိမ်းဆည်းခံရမှုကို အရေးယူပေးရန် စုံစမ်းရေးကော်မရှင်မှ ပြည်ထောင်စုလွှတ်တော်သို့ အဆိုတင်” သတင်းမှ စုံစမ်းရေးကော်မရှင် ဥက္ကဋ္ဌ ဦးတင်ထွတ် ၏ပြောကြားချက် အားကောက်နှုတ်ချက်။
“ဒုတိယအကြိမ် ပြန်ပို့ပြီးရင်တော့ သမ္မတက ခုနစ်ရက်အတွင်း လက်မှတ်ထိုးပြီး ပြဋ္ဌာန်းရတော့မှာပေါ့။ သမ္မတ ကနေ ဒုတိယအကြိမ် သဘောထားမှတ်ချက်နဲ့ ပြန်လာရင် လွှတ်တော်ကိုယ်စားလှယ်တွေက ဘယ်အပိုဒ်ကို ပြင်ချင်ပါတယ်ဆိုပြီး လုပ်လို့မရတော့ဘူး။”
ဇူလိုင်လ ၉ ရက်နေ့ထုတ် စံတော်ချိန်နေ့စဉ်ထုတ်သတင်းစာတွင်ပါရှိသော “မြန်မာနိုင်ငံတော်ဗဟိုဘဏ်ဥပဒေ ခုနစ်ရက်အတွင်း ပြဋ္ဌာန်းမည်” သတင်းမှ ပြည်သူ့လွှတ်တော်ကိုယ်စားလှယ် ဦးရဲထွဋ်၏ ပြောကြားချက်အား ကောက်နှုတ်ချက်။
“မြန်မာနိုင်ငံရဲ့ အုပ်ချုပ်မှုက အာဏာရှင်စနစ်ကနေ ဖက်ဒရယ်စနစ်ကို သွားနေတာပါ။ ပင်လုံဖက်ဒရယ်ဆို ၁၀ နှစ်ကြာရင် ခွဲထွက်ခွင့်ပေးရမယ်။ အခု ဖက်ဒရယ်စနစ်က ပြည်နယ်နဲ့ တိုင်းဒေသကြီးရဲ့ လုပ်ပိုင်ခွင့်အာဏာကို အစိုးရလက်စွဲဆိုတဲ့ စာအုပ်နဲ့ ခွင့်ပြုချက်ပေးတာပါ။ Power Sharing လည်း မဟုတ်ပါဘူး။ မြန်မာနိုင်ငံ ဒီမိုကရေစီ နိုင်ငံအဖြစ် သွားနေကတည်းက ဖွဲ့စည်းပုံအခြေခံဥပဒေမှာ ပြည်နယ်နဲ့တိုင်းဒေသကြီး အစိုးရအဖွဲ့ တွေရဲ့လုပ်ပိုင်ခွင့်ပါနေပြီးသားပါ။”
ဇူလိုင်လ ၉ ရက်နေ့ထုတ် Daily Eleven နေ့စဉ်ထုတ် သတင်းစာတွင် ပါရှိသော “ဗဟိုချုပ်ကိုင်မှုကို လျှော့ချသည့် အနေဖြင့် တိုင်းဒေသကြီးနှင့်ပြည်နယ်များ၏ လုပ်ပိုင်ခွင့်များအား ဖွဲ့စည်းပုံအခြေခံဥပဒေ ပြဋ္ဌာန်း ချက်အတိုင်း စတင်ခွင့်ပြု” သတင်းမှ မွန်ပြည်နယ် ဝန်ကြီးချုပ် ဦးအုန်းမြင့် ၏ပြောကြားချက်အား ကောက်နှုတ်ချက်။
“ဝန်ကြီးဌာန ကိုယ်တိုင်ကစာနယ်ဇင်းကောင်စီ (ယာယီ) ကိုဖွဲ့ပေးထားတယ်လို့ ကျွန်တော် နားလည်ထား တယ်။ ဒါပေမယ့် တကယ်တမ်း ဥပဒေကြမ်းထဲမှာ စာနယ်ဇင်းကောင်စီရဲ့ အချက်တွေ ထည့်မထားဘူးဆိုရင် ဒီ ဥပဒေကြမ်းက တကယ်ထွက်လာတဲ့အခါမှာ သတင်းလောကသားတွေ ထောက်ခံမှုမရှိဘူးဆိုရင်၊ ဘယ်လို နည်းနဲ့ ကျင့်သုံးသွားမလဲဆိုတာ ကျွန်တော်နားလည်လို့မရဘူး။”
ဇူလိုင်လ ၁၁ ရက်နေ့ထုတ် Venus News Journal အမှတ် ၄/၅၀ တွင်ပါရှိသော “ပုံနှိပ်ဥပဒေကြမ်း ပြင်ဆင် မရပါက စာနယ်ဇင်းကောင်စီဝင်များ အားလုံးနုတ်ထွက်မည်” သတင်းမှ သတင်းစာဆရာ ဦးရဲနိုင်မိုး ၏ ပြောကြားချက်အားကောက်နှုတ်ချက်။
“ဒီအခမ်းအနားအပြင် တခြားမေးစရာလေးတွေ မေးပါရစေ။ ဖွဲ့စည်းပုံပြင်ဖို့ လွှတ်တော်ဘက်က လုပ်ဆောင် နေတာတွေရှိပါတယ်။ ဒါနဲ့ပတ်သက်လို့ အစ်ကိုတို့ အဖွဲ့က ဘာတွေပြင်ဆင်ပြီးပြီလဲ။
ဒီ ဥစ္စာမှာတော့ ဆွေးနွေးရမယ့်အချက်တွေက အရမ်းကျယ်ပြန့်တယ်။ အထူးသဖြင့် ဒီက တိုင်းရင်းသား အပစ်အခတ်ရပ်စဲရေး ငြိမ်းချမ်းရေးကိစ္စတွေရှိမယ်။ အနာဂတ်ပြည်ထောင်စုသစ်ကို တည်ဆောက်တော့မယ် ဆိုရင် လက်ရှိဖွဲ့စည်းပုံ Frame (ဘောင်) ထဲမှာ ဆောင်ရွက်လို့မရတာတွေရှိတယ်။ အဲဒီတော့ အဓိကက တိုင်းရင်းသား အပစ်အခတ်ရပ်စဲရေး ငြိမ်းချမ်းရေးဆွေးနွေးပွဲတွေက ထွက်လာမယ့် အချက်တွေကို ဒီထဲမှာ ဖွဲ့စည်းပုံထဲမှာ ရှိရမယ်။ နောက် တခြားအသေးစိတ် အချက်အလက်တွေကလည်း လူ့အခွင့်အရေး စံချိန်စံညွှန်း တွေနဲ့ ဆန့်ကျင်နေ တဲ့အချက်တွေ။ နောက်တစ်ခါ အာဏာခွဲဝေမှုနဲ့ ပတ်သက်ပြီးတော့ အပြန်အလှန် ထိန်းညှိ နိုင်အောင် စနစ်တကျ ပြင်ဆင်ရမယ့်အချက်အလက်တွေ အစရှိသဖြင့်တော့ အများကြီးထွက်လာမှာပေါ့။ ဆိုတော့ အနိမ့်ဆုံးအဆင့်တော့ ဖွဲ့စည်းပုံပြင်ဆင်ရေးဆိုင်ရာ အခန်းကဏ္ဍမှာရှိတဲ့ ပြင်ဆင်ပုံ၊ ပြင်ဆင်နည်း ပေါ့။ Amendment Procedure ပေါ့။ Amendment Procedureက အရမ်းကျပ်လွန်းအားကြီးတယ် ဒီအတိုင်းဆိုရင် တော့ ပြင်လို့မရနိုင်ဘူး။ အဲဒီတော့ လွှတ်တော်ကိုယ်စားလှယ် ၇၅ ရာခိုင်နှုန်းကျော် ထောက်ခံမှ။ အရေးပါတဲ့ အချက်တွေဆိုရင် ၇၅ ရာခိုင်နှုန်းကျော်ပြီးတော့ ပြည်သူ့ဆန္ဒခံယူပွဲလုပ်ပြီးတော့ (ဆန္ဒမဲပေးပိုင်ခွင့်ရှိသည့် ပြည်သူလူထု) ထက်ဝက်ကျော်ဆန္ဒမဲနဲ့မှ ပြင်ဆင်နိုင်မယ်ဆိုတာကြီးက ဒါက ဘယ်လိုမှကို ပြင်လို့မရအောင် တင်းကျပ်ထားတာဖြစ်တယ်။ ဆိုတော့ အဲဒီ အချက်က ဦးတည်ပြီးတော့ စပြင်သင့်တယ်လို့ ကျွန်တော်တို့ ထင်တယ်။ အသေးစိတ်အချက်တွေကတော့ သက်ဆိုင်ရာနယ်ပယ်အလိုက် ဆွေးနွေးကြမယ့် အင်အားစုတွေ ရှိတာပေါ့။ အရေးကြီးဆုံးကတော့ တိုင်းရင်းသားပြဿနာ။ အဲဒါတွေကို မပြင်ခင်မှာ အခြေခံအကျဆုံးကတော့ ဖွဲ့စည်းပုံပြင်ဆင်ရေးဆိုင်ရာ လုပ်ထုံးလုပ်နည်းတွေကို စပြီးတော့ပြင်ရလိမ့်မယ်လို့ ကျွန်တော်တို့ ထင်တယ်။ ”
ဇူလိုင်လ ၉ ရက်နေ့ထုတ် The Voice နေ့စဉ်ထုတ်သတင်းစာတွင်ပါရှိသော “ဒီပွဲကနေ အားလုံးသဘောတူတဲ့ သဘောထားတစ်ခု ချမှတ်နိုင်ဖို့ပါ” အင်တာဗျူးမှ ၈၈ မျိုးဆက်ကျောင်းသားခေါင်းဆောင် ဦးကိုကိုကြီး ၏ ဖြေကြားချက်အားကောက်နှုတ်ချက်။
သတင်းတိုများ
ဗုဒ္ဓဂယာ ဗုံးခွဲမှုတွင် သံသယရှိသူ တစ်ဦးကို အိန္ဒိယရဲတပ်ဖွဲ့ ဖမ်းဆီးထား
တစ်ကမ္ဘာလုံးရှိ ဗုဒ္ဓဘာသာဝင်များ အထွတ်အမြတ်ထားကြသည့် ဗုဒ္ဓဂယာ မဟာဗောဓိစေတီတော် ပရိဝုဏ်အတွင်း ဖြစ်ပွားခဲ့သော ဗုံးခွဲတိုက်ခိုက်ခံရမှုနှင့် ပတ်သက်၍ ဆက်နွှယ်မှုရှိသည်ဟု ယူဆရသူ ဗီးနော့ဒ်မစ်ထရီး အမည်ရှိ အမျိုးသား တစ်ဦးကို အိန္ဒိယရဲတပ်ဖွဲ့က ဖမ်းဆီးထိန်းသိမ်းထားပြီး စုံစမ်းစစ်ဆေးမှုများ လုပ်ဆောင်လျက်ရှိကြောင်း အိန္ဒိယနိုင်ငံ ဘီဟာပြည်နယ် ရဲတပ်ဖွဲ့၏ အဆိုအရ သိရှိရသည်။ အိန္ဒိယအမျိုးသား စုံစမ်းစစ်ဆေးရေး အေဂျင်စီ (အင်န်အိုင်အေ)နှင့် အိန္ဒိယ ထောက်လှမ်းရေးဗျူရို (အိုင်ဘီ) တို့က ဗုံးခွဲခံရမှု နှင့် ပတ်သက်၍ ယခုအခါ စုံစမ်းဖော်ထုတ်လျက်ရှိနေပြီး ဗုံးပေါက် ကွဲရာနေရာများ အနီးတစ်ဝိုက်တွင် တပ်ဆပ်ထားသော CCTV ကင်မရာများမှ တစ်ဆင့် တွေ့ရှိချက်များအရ သံသယရှိသူ ခြောက်ဦး အထိ ရှိနေပြီး ၎င်းတို့ကို ယခုအခါ ဖမ်းဝရမ်း ထုတ်ထားကြောင်း သိရှိရသည်။
ဘဏ္ဍာရေးဝန်ကြီးဌာန အဖြစ် အမည်ပြောင်းလဲရန် လွှတ်တော်သဘောတူ
ဇူလိုင်လ ၈ ရက်နေ့တွင် ကျင်းပပြုလုပ်ခဲ့သည့် ပြည်ထောင်စုလွှတ်တော် သတ္တမပုံမှန်အစည်းအဝေးတွင် နိုင်ငံတော် သမ္မတမှ ဖွဲ့စည်းပုံအခြေခံဥပဒေ ပုဒ်မ ၂၀၂ ပုဒ်မခွဲ (က) အရ ပေးပို့ထားသည့် ဘဏ္ဍာရေးဝန်ကြီးအဖြစ် ပြောင်းလဲသတ်မှတ် ခြင်း သဝဏ်လွှာနှင့် ပတ်သက်၍ ပြည်ထောင်စုလွှတ်တော်မှ သဘောတူကြောင်း ပြည်ထောင်စုလွှတ်တော် နာယက ဦးခင်အောင်မြင့်၏ ကြေညာသွားချက်အရ သိရှိရသည်။ ယခုကဲ့သို့ ဘဏ္ဍာရေးနှင့် အခွန်ဝန်ကြီးဌာနအား ဘဏ္ဍာရေး ဝန်ကြီးဌာနအဖြစ် ပြောင်းလဲသတ်မှတ်လိုက်ခြင်းကြောင့် လုပ်ငန်းအနေအထား မတူတော့ဘဲ ဌာနနှစ်ခု ခွဲလိုက်သည့်သဘော သက်ရောက်သွားပြီး အခွန်ဝန်ကြီးဌာနသည် မည်သည့်ဝန်ကြီးဌာန လက်အောက်သို့ ရောက်ရှိမည်ကို သေချာစွာ မသိရှိရ သေးကြောင်း ပြည်ထောင်စုလွှတ်တော် ကိုယ်စားလှယ် ဦးရဲထွန်းက ပြောကြားသည်။
မြန်မာနိုင်ငံတော် ဗဟိုဘဏ် ဥပဒေ ခုနစ်ရက်အတွင်း ပြဋ္ဌာန်းမည်
နိုင်ငံအတွက် အရေးကြီးသည့် ဥပဒေတစ်ရပ်ဖြစ်သည့် မြန်မာနိုင်ငံတော် ဗဟိုဘဏ်ဥပဒေအား ခုနစ်ရက်အတွင်း ပြဋ္ဌာန်းနိုင်တော့မည်ဖြစ်ကြောင်း ပြည်ထောင်စုလွှတ်တော် ကိုယ်စားလှယ် ဦးရဲထွန်း၏ ပြောကြားချက်အရ သိရသည်။ ဇူလိုင်လ ၈ ရက်နေ့တွင် ကျင်းပပြုလုပ်ခဲ့သည့် ပြည်ထောင်စုလွှတ်တော် သတ္တမပုံမှန် အစည်းအဝေးတွင် နိုင်ငံတော်သမ္မတမှ သဘောထားမှတ်ချက်များနှင့်အတူ ပေးပို့လာသည့် မြန်မာနိုင်ငံတော် ဗဟိုဘဏ်ဥပဒေ မူကြမ်းကို ပြည်ထောင်စုလွှတ်တော်မှ တစ်ပိုဒ်ချင်းစီအလိုက် အတည်ပြုခြင်းကို မဲခွဲ ဆုံးဖြတ်ဆောင်ရွက်ခဲ့ပြီး ယင်းဥပဒေကြမ်းကို ပြည်ထောင်စုလွှတ်တော် နာယကမှ တစ်ဆင့် နိုင်ငံတော်သမ္မတထံသို့ ပြန်လည်ပေးပို့လိုက်ခြင်းကြောင့် ယခုအခါ ဖွဲ့စည်းပုံအခြေခံဥပဒေအရ နိုင်ငံတော်သမ္မတမှ အဆိုပါ ဥပဒေမူကြမ်းကို ခုနစ်ရက်အတွင်း လက်မှတ်ရေးထိုး ပြဋ္ဌာန်းပေးရတော့မည် ဖြစ်ကြောင်းသိရ သည်။
မွန်ပြည်နယ် ကလယ်ဂုတ်တွင် ရေနက်ဆိပ်ကမ်း တည်ဆောက်မည်
တရုတ်နိုင်ငံနှင့် ဗီယက်နမ်နိုင်ငံတို့မှ ဆင်းလာသည့် ကုန်လမ်းကြောင်းများအတွက် အဓိကကျမည့် ရေနက်ဆိပ် ကမ်း စီမံကိန်းတစ်ခုကို မွန်ပြည်နယ်တွင် အကေင်အထည်ဖော်မည် ဖြစ်ကြောင်း မော်လမြိုင်မြို့ရှိ လျှပ်စစ်ဓာတ်အားပေး စက်ရုံဖွင့်ပွဲတွင် မွန်ပြည်နယ် ဝန်ကြီးချုပ် ဦးအုန်းမြင့်၏ ပြောကြားချက်အရ သိရှိရသည်။ တရုတ်နှင့် ဗီယက်နမ်နိုင်ငံများမှ ကုန်သင်္ဘောများ အဓိက ဆိုက်ကပ်နိုင်ရန် ကလယ်ဂုတ် ရေနက်ဆိပ်ကမ်း စီမံကိန်းကို အကောင်အထည်ဖော်ရန် စီစဉ်နေ ခြင်းဖြစ်ပြီး အဆိုပါ စီမံကိန်းကို အကောင်အထည်ဖော်နိုင်ပါက ၂၀၁၅ ခုနှစ်တွင် အာဆီယံ လွတ်လပ်စွာကုန်သွယ်ရေး အသက်ဝင်လာမည့်အချိန်တွင် မွန်ပြည်နယ်ဒေသ ဖွံ့ဖြိုးရေးအတွက်များစွာ အထောက်အကူ ပြုနိုင်မည်ဖြစ်ကြောင်း သိရသည်။ ယခုအခါ မော်လမြိုင်မြစ်သည် တိမ်ကောမှုများ ရှိလာနေသည့်အတွက် ရေနက်စီမံကိန်းများကို ဖော်ဆောင်နေခြင်း ဖြစ်ပြီး လက်ရှိအချိန်တွင် ပြည်တွင်းရှိ ကုမ္ပဏီများနှင့် ပူးတွဲပြီး မွန်ပြည်နယ် မုဒုံမြို့နယ်တွင် ကတုံးမော် ရေနက်စီမံကိန်းကို စတင်နေပြီဖြစ်ကြောင်း မွန်ပြည်နယ်ဝန်ကြီးချုပ်၏ ဆက်လက် ပြောကြားချက်အရ သိရှိရသည်။
တိုင်းဒေသကြီးနှင့် ပြည်နယ်များ၏ လုပ်ကိုင်ခွင့်များအား ဗဟိုချုပ်ကိုင်မှုကို လျှော့ချသည့်အနေဖြင့် ဖွဲ့စည်းပုံအခြေခံ ဥပဒေပြဋ္ဌာန်းချက်အတိုင်း စတင်ခွင့်ပြု
ပြည်နယ်နှင့် တိုင်းဒေသကြီးများအား အာဏာခွဲဝေသည့် အနေဖြင့် လုပ်ပိုင်ခွင့်များကို ၂၀၀၈ ခုနှစ် ဖွဲ့စည်းပုံ အခြေခံပြဋ္ဌာန်းချက်အတိုင်း နိုင်ငံတော်သမ္မတ ဦးဆောင်သည့် ဗဟိုအစိုးရအဖွဲ့မှ အစိုးရအဖွဲ့သက်တမ်း နှစ်နှစ်ကျော်ကာလ အတွင်း စတင်လျှော့ချလိုက်ပြီ ဖြစ်ကြောင်း မွန်ပြည်နယ် ဝန်ကြီးချုပ် ဦးအုန်းမြင့်၏ ပြောကြားချက်အရ သိရသည်။ ယခုကဲ့ သို့ လုပ်ပိုင်ခွင့်များ ခွဲဝေပေးလိုက်ခြင်းကြောင့် ပြည်နယ်နှင့် တိုင်းဒေသကြီး အစိုးရအဖွဲ့များအနေဖြင့် ဖွဲ့စည်းပုံအခြေခံဥပဒေ ဇယား (၂) တွင် ပြဋ္ဌာန်းထားသော မိမိတို့ လုပ်ပိုင်ခွင့်ရှိသည်များ၊ ဥပဒေပြဋ္ဌာန်းခွင့်ရှိသည်များ၊ ဗဟိုအစိုးရမှ ဆုံးဖြတ်ခွင့်ရှိ သည်များအား ခွဲခြားလုပ်ဆောင်နိုင်မည် ဖြစ်ကြောင်း သိရသည်။
အမေရိကန် - အာဆီယံ စီးပွားရေးကောင်စီ ဥက္ကဋ္ဌ နှင့် နိုင်ငံတော်သမ္မတ ဦးသိန်းစိန် တွေ့ဆုံဆွေးနွေး
ပြည်ထောင်စုမြန်မာနိုင်ငံတော် နိုင်ငံတော်သမ္မတ ဦးသိန်းစိန် သည် အမေရိကန် - အာဆီယံ စီးပွားရေးကောင်စီ (US-ASEAN Business Council) ဥက္ကဋ္ဌ Mr. Alexander Feldman နှင့် ဇူလိုင်လ ၈ ရက်နေ့က နေပြည်တော်တွင် တွေ့ဆုံခဲ့ကြပြီး ရေနံနှင့် သဘာဝ ဓာတ်ငွေ့ကဏ္ဍ၊ သတ္တု၊ သစ်တော၊ ကျန်းမာရေး၊ ပညာရေးနှင့် အခြေခံအဆောက်အအုံ ဖွံ့ဖြိုးရေး လုပ်ငန်းများ၊ ဆက်သွယ်ရေးနှင့် သတင်းအချက်အလက် နည်းပညာ စသည့် ကဏ္ဍများနှင့် ပတ်သက်ပြီး ဆွေးနွေး ပြောဆိုခဲ့ကြကြောင်း ဇူလိုင်လ ၈ ရက်နေ့ ထုတ် နိုင်ငံပိုင်သတင်းစာများတွင် ဖော်ပြထားချက်အရ သိရှိရသည်။
အာဇာနည်နေ့ အခမ်းအနားသို့ နိုင်ငံတော်သမ္မတ အပါအဝင် လွှတ်တော်ဥက္ကဋ္ဌနှင့် စစ်ဘက်ခေါင်းဆောင်များ တက်ရောက်ရန် အရပ်ဘက် လူ့အဖွဲ့အစည်းများ တောင်းဆို
လာမည့် ဇူလိုင်လ ၁၉ ရက်နေ့တွင် ကျရောက်မည့် (၆၆) နှစ်မြောက် အာဇာနည်နေ့ အခမ်းအနားသို့ နိုင်ငံတော် သမ္မတ ၊ လွှတ်တော်ဥက္ကဋ္ဌများနှင့် တပ်မတော် ကာကွယ်ရေးဦးစီးချုပ်တို့ တက်ရောက်ဂါရဝပြုစေ လိုကြောင်း အရပ်ဘက် အဖွဲ့အစည်း ၃၀ က ဇူလိုင်လ ၈ ရက်နေ့တွင် ကြေညာချက် သဘောထားထုတ်ပြန်ကာ တောင်းဆိုလိုက်ကြောင်း သိရှိရ သည်။
| Google Drive: create, share, and keep all your stuff in one place. |  |