Posts
၂၀၁၀ ရွေးကောက်ပွဲနှင့်ပတ်သက်၍ မှ ပြည်သူများ၏ အသံကို myanmarcupid.net စုစည်းထားရာ ပိုမို၍ ပျံ့နှံ့စေလို၍ myanmarcupid ကို ခွင့်မတောင်းဘဲ ဖြန့်ဝေလိုက်ပါသည်။
Posted by KoShweYoeGyi in the myanmarcupid .net
ပြည်တွင်းမှ ပြည်သူများကို စာနာပါ
ကျွန်တော်ကတော့ ၂၀၁၀ ရွေးကောက်ပွဲကို စိတ်မ၀င်စားဘူး။ ၂၀၁၀ ရွေးကောက်ပွဲဟာ ဒီမိုကရေစနစ် ကျပါသည်။ ထို.ကြောင့် လက်ခံပါသည် နဲ. ဒီမိုကရေစနစ်မဟုတ်ပါ လက်မခံပါ ဆိုတဲ့ ယူဆချက်တွေ မလုပ်လိုတော့ပါ။
၂၀၁၀ ရွေးကောက်ပွဲသည် ဒီမိုကရေစီ အနှစ်သာရ မပြည့်စုံပါ။ ၂၀၁၀ ရွေးကောက်ပွဲကို ပြဌာန်းသည့် ၂၀၀၈ အခြေခံဥပဒေသည် နာမည်ခံ ဒီမိုကရေစီ စနစ်ကိုသာ အခြေခံထားခြင်းဖြစ်သည်။ ထို.ကြောင့် မြန်မာနိုင်ငံသည် ၂၀၁၀ ရွေးကောက်ပွဲကြောင့် ဒီမိုကရေစီ စနစ် ရရှိမည်မဟုတ်ပါ။
ကျွန်တော် ဒီအထိကို လုံးဝဥသုန် အိပ်သွန်ဖာမှောက် အတိုက်အခံများဘက်မှ ထောက်ခံသည်။
သို.သော် ပြည်သူလူထုသည် ရပ်တန်.နေကြသူများမဟုတ်ပါ။ ဒီမိုကရေစီမရလို. သေသွားမည့် သူများ မဟုတ်ပါ။ ပြည်သူဆိုတာ နိစ္စဓူဝ စားဝတ်နေရေး ဖြေရှင်းကြရမည့်သူများ ဖြစ်သည်။ ထိုသူတို.သည် ဒီမိုကရေစီမရလို. တပြစ်တောက်ခေါက် မနေနိုင်ကြပါ။ ပြေးလိုက်လွှားလိုက်နှင့် အသက်ရှင် နေကြရသည့်သူများ ဖြစ်သည်။ မနက်မိုးလင်းလျှင် ၂၀၀ ပေးပြီး တိုးစီးနေရသော ဘတ်စ်ကားအတွက် တန်းစီရမည်။ မလောက်မငနှင့် ချို.ချို.တဲ့တဲ့ မဖြစ်ရအောင် ကြံကြရသည်။ ဖန်ကြရသည်။ ချဲထိုးသူကထိုးသည်၊ ဘောပွဲလောင်းရသူက လောင်းသည်။ ကြံရင်းနဲ. မွဲသူက မွဲသည်။ ပေါ်လစီမိတ်ကာများနှင့် ဆက်ဆံနေရသူများကြတော့ မြေရှင်ပဒေသရာဇ်စနစ်ကို ပြန်ပြောင်းသတိရစေလိမ့်မည်။ အောက်ခြေအလုပ်သမားများနှင့် ဆက်ဆံသူများက ဂျပန်ခေတ်ကို သတိရစေလိမ့်မည်။
ဤ အခြေအနေဆိုးတွေကို ပြည်သူလူထုက စပ်ဆုတ်ရွံရှာနေသည်။ အချို. စစ်သားများကလဲ စိတ်ပျက်နေပြီဖြစ်သည်။ ဒီမိုကရေစီ မရှိလို. စိတ်ပျက်လက်ပျက်ဖြစ်နေခြင်းမဟုတ်။
မြန်မာပြည်သူလူထုသည် အလွန်ရှေးကျသော ခေတ်နောက်ပြန်ဆွဲနေသော အစိုးရ မူဝါဒ များကို စပ်ဆုတ် နေပြီ ဖြစ်သည်။ တိုင်းပြု ပြည်ပြု မူဝါဒများကို အလိုရှိနေသည်။ တိုက်ဆောက် ကားစီး မူဝါဒများကို အလိုမရှိတော့။ ဒီအတွက် ထွက်ပေါက် ရှာပေးနိုင်မည့်သူကို အလိုရှိသည်။ ကောင်းနိုးနိုး မူဝါဒကို ဟောပြောပေးနိုင်သူကို အလိုရှိနေတာမဟုတ်။ ထွက်ပေါက်ကို အမှန်တကယ် ရှာဖွေ ပေးနိုင်သူကို မျှော်လင့်နေကြသည်။
၂၀၁၀ ကို မျှော်လင့်နေသူတွေ မြန်မာပြည်ထဲမှာ ရှိသည်။၊ အနည်းဆုံးတော့ မူဝါဒတွေ ပြောင်းလာနိုင်ဖို.ကို မျှော်လင့်နေကြသည်။ အများပြည်သူ ကို ပြန်ငဲ့ကြည့်မည့်သူများကို စောင့်နေကြသည်။ ထင်ရာစိုင်းတာထက် အနည်းဆုံး ပါလီမန်ထဲ ဘက်မညီမှုကို မြင်ရနိုင်သည်။ အရပ်ဝတ် စစ်သားနဲ. ယူနီဖောင်း စစ်သားတို. အားပြိုင်တာကို မြင်ရနိုင်သည်။ ထိုအထဲမှာမှ ပြည်သူ.ဘက် ကြည့်မည့် စစ်သား ( ပြည်သူ.ဘက်ကြည့်တယ်ဆိုလို. နိုင်ငံရေး အကျဉ်းသားချည်း ပြေး မမြင်ပါနဲ.၊ ရေမီးမှန်ဖို.၊ အခြေခံလစာတွေ တက်လာဖို. အလုပ်အကိုင်တွေ ပေါများလာဖို. ဆိုတာတွေလဲ အရေးကြီးပါတယ်) တွေ၊ အရပ်ထဲက အမတ်တွေ ပြောခွင့် ရှိကောင်း ရှိမည်။ အနည်းနှင့် အများတော့ ယခုလို တစ်မိန်. စနစ်ထက် သာမည်ဟု မြင်မိသည်။
၂၀၁၀ ကို မျှော်နေသည်။ ကောင်းလာဖို. မျှော်နေခြင်းမဟုတ်။ အနေချောင်ဖို. မျှော်နေကြခြင်းဖြစ်သည်။ ပေါ်လစီ မူဝါဒတွေကို ပွင့်ပွင့်လင်းလင်း ဝေဖန်ခွင့် ရလာမည် ဆိုလျှင် မဆိုး။ ပေါ်လစီဆိုလို. အကျဉ်းသားလွတ်မြောက်ရေး၊ ဒီမိုကရေစီ စာပေလွတ်လပ်ခွင့်ရှိရေး၊ ရဲတွေ အကျင့်ပျက်မှုကို အပုတ်ချနိုင်ရေးသည်ပဲ ပေါ်လစီမဟုတ်။ ကျန်းမာရေး စောင့်လျှောက်မှု စရိတ် တိုးချပေးဖို.၊ ပညာရေးစနစ်ကောင်းမွန်ဖို.၊ လက်ဝါးကြီးအုပ် စီးပွားရေး မူဝါဒတွေ ပြင်ဆင်ဖို. စတာတွေဟာလဲ မူဝါဒတွေထဲ အကျုံးဝင်ပါတယ်။ ( နိုင်ငံခြားမီဒီယာတွေကတော့ အကျုံးမ၀င်သလိုလို အဖက်မလုပ်သလိုလို ) ဒါတွေကို ဝေဖန်ထောက်ပြခွင့်ရမယ်၊ ညှိုနှိုင်းခွင့်ရမယ်လို. မျှော်လင့်နေကြခြင်း ဖြစ်ပါတယ်။
ဒါတွေ ဖြစ်မလာတော့ရော။ ပိုဆိုးသွားမှာလား။ အခုလက်ရှိအခြေအနေထက် ဆိုးစရာ ဘာရှိသေးလဲ။ ပြည်သူအတွက် ဘာများ ပိုဆိုးနိုင်သေးလဲ။ တရားဝင်မယ်တဲ့လား။ တရားမ၀င်တော့ရော စစ်အစိုးရကို ထောက်ခံတဲ့ အစိုးရတွေက ထောက်ပံ့နေတာပဲ မဟုတ်လား။ တရားစွဲဖို. နိုင်ငံတကာခုံရုံးကို တက်မတဲ့လား။ လူမသိသူမသိ ဖြစ်သွားတဲ့ ဒီပဲရင်း ကို အသာထားလို. လူရှေ့သူရှေ့ ဘုန်းကြီးကို တုတ်နဲ. ရိုက်တာတောင် တက်လို.လား။ တရားဝင်ဖြစ်တာနဲ. မဖြစ်တာ စစ်အစိုးရအတွက် နာမည်ကောင်း ရတယ်၊ မရဘူးကလွဲရင်၊ နိုင်ငံတကာနဲ. စကားပြောရာမှာ တင့်တယ်မှာနဲ. မတင့်တယ်မှာကလွဲရင် အခြား အကျိုးက ဘာမှ မရှိဘူး။ ပြည်သူအတွက်ကတော့ ထူးမခြားနားပဲ။
၂၀၁၀ ကို မျှော်လင့်သူတွေ ရှိတယ်။ မမျှော်လင့်သူတွေ ရှိတယ်။ မမျှော်လင့်သူတွေကတော့ ထူးမခြားနား အစိုးရမို. ထူးမခြားနား ဇာတ်ပဲခင်းမှာပဲမို. သူတို.တွေအနေနဲ.လဲ ထူးမခြားနား ဘ၀မှာ ရုန်းကန်ရဦးမှာမို. မစဉ်းစားချင်တော့ပါတဲ့။ ဒါလဲ ဟုတ်တာပဲ။ မျှော်နေတဲ့အထဲက ပြည်သူတွေကတော့ ၂၀၁၀ ကို မျှော်နေတာ ဒီမိုကရေစီ ရပဟေ့ ဆိုပြီး မျှော်နေတာ မဟုတ်ဘူး။ ၂၀၁၀ ဟာ ထွက်ပေါက်ဟုတ်တယ်လို.လဲ ဘယ်သူမှ မယုံဘူး။ ဘယ်သူမှ အဲ့လောက်ထိ ဥာဏ်မတိမ်ဘူး ထင်တယ်။
ထောင်ထဲမှာ တိုက်ပိတ်ခံထားရတဲ့ အကျဉ်းသားတစ်ယောက် ရိုးရိုးအကျဉ်းခန်းထဲ ပြန်ခွင့်ပေးမယ် ဆိုလို. မျှော်လင့်နေသလို မျှော်နေကြတာပါ။ မလှိမ့်တပတ်နဲ. ပြန်ပိတ်ထားရင်ရော။ အခုလက်ရှိအခြေအနေမှာရော ဘယ်သူတွေကများ ဘာများ ဖြစ်မြောက်အောင် လုပ်ပေးနိုင်လို.လဲ။
ပြည်သူတွေ ဘယ်လို ခံစားနေရလဲ ဆိုတော့ ရှင်းရှင်းလေးပဲ။ ဒီအခြေအနေဆိုးထက် နည်းနည်း သက်သာမယ် ထင်တဲ့ အခြေအနေတစ်ခုဆီကို သွားချင်တယ်။ ဒါပါပဲ။ အနှစ် ၂၀ လုံးလုံး ပိန်းပိတ်အောင် မှောင်နေတဲ့ ပြည်သူတွေ အတွက် အလင်းရောင်လေးကို မျှော်လင့်မိတယ်။ မရတော့လဲ ဆက်ပိန်းပိတ်အောင် မှောင်ရမှာပဲ။
-------------------------------------------------------------
Posted by burma blood in the myanmarcupid .net
ကျနော့် အနေနဲ့ ရွေးကောက်ပွဲကြီးကို ကြိုဆိုပါတယ်။
ရွေးကောက်ပွဲကို ကြိုဆိုပါတယ်ဆိုတာ ဒီအစိုးရကို ယုံကြည်ပါတယ် ၂၀၀၈ ဥပဒေကို သဘောကျတယ် ရွေးကောက်ပွဲကို ယုံကြည်ပါတယ်လို့ မဆိုလိုပါဘူး။
ကျနော် အစိုးရကို မယုံကြည်ပါ။
၂၀၀၈ အခြေခံဥပဒေမှာ ချွတ်ယွင်းချက်အများကြီးရှိတာကို လက်ခံပါတယ်။
ရွေးကောက်ပွဲဥပဒေ မတရားတာကို လုံးဝလက်ခံပါတယ်။
ရွေးကောက်ပွဲမှာ အစိုးရ မဲလိမ်ကောင်းလိမ်ဦးမယ် ကလိမ်ကကျစ် ကျကောင်းကျဦးမယ်ဆိုတာ လက်ခံပါတယ်။
ဒါဆို ဘာလို့ ရွေးကောက်ပွဲကို ကြိုဆိုတာလဲ။
ရှင်းပါတယ်။ရုပ်ရှင်ကားတောင် ၂ ခါ ၃ခါ ကြည့်ရရင် ငြီးငွေ့သေးတာပဲ။
ကျနော်တို့ ခပ်ညံ့ညံ့ဇာတ်ကားကြီးတစ်ကားတည်းကို သဘောမကျပဲ ကြည့်လာတာ နှစ်ပေါင်း ၂၀ကျော်ပါပြီ။
နောက်ထပ်ကားတစ်ကားက ဒီလိုပဲခပ်ညံ့ညံ့ကားဖြစ်နေပါစေဗျာ ကားအပြောင်းအလဲ လေးတော့ကြည့်ချင်ပါသေးတယ်။တိုင်းပြည်အပြောင်းအလဲ ကို မနက်ဖြန်၊သဘက်ခါ ကောင်းနိုး မျှော်နေကြတဲ့ကျနော့် အဖိုးအဖွားတွေလဲ တစ်ယောက်မှ သက်ရှိထင်ရှားမရှိကြတော့ဘူး။
အနည်းဆုံးတော့ဗျာ ခု သတင်းဖတ်ရတာ နဂိုကထက် နည်းနည်း စိတ်ဝင်စားစရာ ပိုကောင်းတာပေါ့။
နောက်ဆုံးစစ်တပ်နဲ့ စစ်တပ်က ထောက်ခံသူတွေ ရာနှုန်းပြည့်အာဏာယူဦးဗျာ..အနေအထားတွေ ပြောင်းရတော့မယ်။
စစ်ဝတ်စုံ ၂၅ ရာခိုင်နှုန်းနဲ့ ၀တ်စုံချွတ်တွေနဲ့ ဆိုပြီး။
အယုတ်ဆုံးဗျာ ခုလို တစ်သွေးတစ်သံ တစ်မိန့်နေရာကနေ တပ်ကလာသူတွေ၊ တပ်မှာဆက်ရှိနေသူတွေနဲ့ အရပ်ဘက်ကလာသူတွေ အာဏာ အားပြိုင်မှုတွေ ရှိလာနိုင်တယ်။
အချို့ကလဲ ပြောကြတယ်။ အနာဂတ်ဖွဲ့စည်းပုံမှာ စစ်တပ်က ၂၅% ယူထားလို့ဆိုပြီးတော့။ ဒီနေရာမှာ တစ်ခု သတိထားဖို့က အခုစစ်တပ်က အနှစ် ၂၀ကျော်လုံးလုံး ရာနှုန်းပြည့်အုပ်ချုပ်လာတာ။ ဒါကို မကြိုက်လို့ စစ်တပ်ကို အပြုတ်မတိုက်နိုင်ရင်တော့လဲ ဖြစ်နိုင်တဲ့နည်းလမ်းတွေနဲ့ပြောင်းလဲ ရေးလုပ်ရမှာပဲ။
နောက်တစ်ခုက ဒီအစိုးရကို တရားဝင်အစိုးရပြောပြော တရားမ၀င်ဘူးပြောပြော နိုင်ငံကို တကယ်လက်တွေ့ အုပ်ချုပ်နေတာ သူတို့ပဲ။ တရားမ၀င်ဘူးပြောလဲ အပြောပဲ ရှိမှာပဲ။
နယ်ချဲ့အင်္ဂလိပ်အစိုးရ နဲ့ဂျပန်တို့ မြန်မာပြည်ကို မတရားသိမ်းပိုက်ခဲ့ တဲ့ အတွက်မတရားအစိုးရ တရားမ၀င်အစိုးရလို့ ပြောလည်း သဘောကျသည်ဖြစ်စေမကျသည်ဖြစ်စေ အဲဒီအချိန်မှာ တကယ်အုပ်ချုပ်ခဲ့တဲ့ အစိုးရက သူတို့ပဲ။
၉၀ ရွေးကောက်ပွဲရလဒ်ဆိုတာကို လည်း အန်အယ်ဒီက ဆုပ်ကိုင်ထားသည်ဖြစ်စေ မဆုပ်ကိုင်ထားသည်ဖြစ်စေ လက်တွေ့အကောင်အထည်မဖော်နိုင်တဲ့ အတွက် ပြည်သူလူထုအတွက်တော့ ဘာမှ ကိုမထူးပါဘူး။ အစိုးရအနေနဲ့ကတော့ ၉၀ ရွေးကောက်ပွဲရလဒ်ဟာ အလွန်ကို စိတ်အနှောင့်အယှက်ဖြစ်စေမှာပါ။ အစိုး၇ကို စိတ်အနှောင့်အယှက်ဖြစ်စေရုံနဲ့လဲ ပြည်သူတွေ အတွက်ဘာမှ ပိုကောင်းမလာပါဘူး။
အန်အယ်ဒီ ရွေးကောက်ပွဲမ၀င်တာ ဂုဏ်သိက္ခာပိုင်းဆိုင်ရာအရ မှန်ပါတယ်။ မတရားမှုကို ငုံ့မခံတဲ့အတွက်။ ဒါပေမဲ့ ပါတီအတွက်ေ၇ာ တိုင်းပြည်အတွက်ရော အကျိုးရှိတယ်မထင်ပါဘူး။
ပါတီမရှိပေမဲ့ နိုင်ငံရေးရှိရင်ဆက်လက်ရှင်သန်နိုင်တယ်ဆိုကြတယ်။ ပါတီကြီးရှိနေတာတောင် ဘာမှ မလုပ်နိုင်တာ ပါတီမရှိဘဲနဲ့ ဘာတွေ များလုပ်ကြဦးမလဲ ကျနော်တော့ စဉ်းစားလို့မရပါ။ အချို့က ထောက်ပြကြတယ်။ ၈၈အရေးအခင်းထဲ က နေ ပါတီတွေပေါ်ပေါက်လာတာ ကို။ ဒါပေမဲ့ ခုဟာ က ၈၈ခုနှစ်ကာလလဲ မဟုတ်တော့ပါဘူး။ အန်အယ်ဒီ ပါတီမရှိတော့ပေမဲ့ ၀ါးအစည်း ပြေ သလို ဖြစ်နေတဲ့ဒီပါတီဝင်တွေကို အစိုးရက ဆက်လက် စောင့်ကြည့်နေမယ် ဖိနှိပ်နေမယ်ဆိုရင် ဘယ်လို လှုပ်ရှားကြမလဲ။ ကျနော့် အမြင်ကတော့ ပါတီမရှိတော့အခါ အန်အယ်ဒီပါတီဝင်တွေဟာ နဂိုကလောက်တောင် လှုပ်ရှားနိုင်မယ်မထင်ဘူး။
ကျနော်ဖြစ်စေချင်တာကတော့ ရွေးကောက်ပွဲကို မယုံပေမဲ့ လက်ခံရာလဲ မကျအောင် စတိ သဘော ပါတီအဖျက်မခံ၇အောင် ၃ နေရာလောက် ၀င်အရွေးခံပြီး ရွေးကောက်ပွဲအကြောင်းပြပြီး ပါတီကို အင်အားတည်ဆောက်စေချင်တာပါ။
အန်အယ်ဒီမြို့နယ် ရုံးခွဲတစ်ခုဖွင့်တာ လူ၎သောင်းခွဲလောက် တက်ရောက်ကြတယ်ပြောတယ်။ ရွေးကောက်ပွဲ မ၀င်ပေမဲ့ ဒါကိုအကြောင်းပြုပြီး တနိုင်ငံလုံးကပြည်သူတွေကိုစည်းရုံး အင်အား တည်ဆောက်စေချင်တာ။ အနည်းဆုံး ၆ လတော့ အချိန်ရမှာပေါ့ဗျာ။သပိတ်မှောက်မယ် ဆို၇င်တောင် အဲလို အချိန်မှဆို ပိုမကောင်းဘူးလား။
အခုတော့ အချို့ မီဒီယာတွေ က အန်အယ်ဒီက လူတွေကို မေးတယ် ဘာဆက်လုပ်ကြမလဲ ဆိုတော့ လူမှုရေးလုပ်ငန်းတွေ လုပ်သွားမယ်တဲ့... နိုင်ငံရေးပါတီဘ၀ကနေ ငုတ်တုပ်အသေခံပြီး ရေကြည်တော်ဝတ်အသင်းအဆင့်ကို ခုန်ဆင်းသွားလေသလားလို့ စဉ်းစားမိတယ်ဗျာ။
………………………………………………………………………………………..
Posted by Mr Yoda in the myanmarcupid .net
ဆွေးနွေးနေကြတာ အန်အယ်ဒီမ၀င်တာ မှားသလား မှန်သလား ဆွေးနွေးသလိုဖြစ်လာသလိုပဲ။
တကယ်တော့ဗျာ တပ်မတော်အစိုးရက ၂၀၀၈ ဥပဒေကို လက်မခံသူ ၀င်မပါရအောင် ၂၀၁၀ ရွေးကောက်ပွဲဥပဒေကို ရေးဆွဲထားတယ်၊ ဒီတော့ ၂၀၀၈ ဥပဒေကို လက်မခံနိုင်တဲ့ အန်အယ်ဒီကမ၀င်ဘူး၊ အခြေက အန်အယ်ဒီ အဖျက်ခံရတော့မယ်။ အဲတော့ဘာဖြစ်လဲ ဘာမှမဖြစ်ပါဘူး တပ်မတော်အစိုးရက အန်အယ်ဒီပါပါ မပါပါ သူတို့လျှောက်နေတဲ့ လမ်းကြောင်းကို သူတို့လျှောက်မှာပဲ၊ ဒီတော့ အန်အယ်ဒီအနေနဲ့ မပါတာပိုမကောင်းဘူးလား။
ကျွန်တော်စိတ်ဝင်စားနေတာက ၂၀၁၀ ရွေးကောက်ပွဲအပြီး နိုင်ငံအခြေနေဘယ်လိုဖြစ်မလဲ ဒါပဲစိတ်ဝင်စားတယ်။
၂၀၁၀ အလွန် မြန်မာနိုင်ငံမှာ အမှုတခုဖြစ်ရင် တိုင်းမှူးဆီက ဆုံးဖြတ်ချက်ညွှန်ကြားမှုကို တရားသူကြီးကစောင့်မျှော်ပြီး ဆုံဖြတ်ချက်ချရတဲ့ စနစ်ပျောက်သွားဖို့၊ ကိုယ့်သားသမီးတွေကို သွေးဆောင်ခေါ်ယူပြီး တပ်ထဲရောင်းစားတဲ့ စနစ်ကလွတ်မြောက်ဖို့၊ တပ်ထဲကထွက်ချင်ရင် တပ်သားသစ် ၃ယောက် ရှာပေးပြီးမှ ထွက်လို့ရတဲ့စနစ်ပျောက်သွားဖို့၊ ရဟန်းတော်များ တရားပွဲတခုကို သက်ဆိုင်ရာက ခွင့်မပြုပဲ ဟောခွင့်မရတဲ့ အခြေနေကလွှတ်မြောက်ဖို့၊ သတင်းတွေကို ခွင့်ပြုချက်မရပဲ ဖေါ်ပြခွင့်မရတဲ့ စနစ်ကနေလွှတ်မြောက်ဖို့ ကျွန်တော်တို့ ရွေးကောက်ထားတဲ့ ပြည်သူ့ကိုယ်စားလှယ်တွေက ဘယ်လောက်လုပ်ပေးနိုင်မှာလဲ။
ဒါတွေက ကျွန်တော်တို့ဝမ်းဝရေးထက်ပိုအရေးကြီးနေတဲ့ အချက်တွေပါ။ အခုအချိန်အထိ ခါးမလှတောင် ၀မ်းဝအောင်တော့ ကျွန်တော်တို့ ရှာစားနိုင်နေပါသေးတယ် ဒါပေမဲ့ အပေါ်က ကျွန်တော်ပြောထားတဲ့အချက်တွေကိုတော့ ကျွန်တော်တို့ ဘယ်လိုမှရှောင်လို့မရဘူးဖြစ်နေတယ်ဗျာ။
ဒါတွေကို ဘယ်ကိုယ်စားလှယ်လောင်းတွေက အာမခံပေးမလဲ အဲဒါကို စိတ်ဝင်စားတယ်၊ အန်အယ်ဒီကတော့ လက်ရှိတပ်မတော်အစိုးရ ပြဌါန်းထားတဲ့ ဥပဒေအခြေနေတွေအောက်မှာ သူတို့ အထက်ကအချက်တွေကောင်းအောင် ဘယ်လိုမှ လုပ်လို့မရဘူးဆိုပြီး ၀င်မရွေးတော့ပါဘူး။
သေချာတာကတော့ လူတွေ ရွေးကောက်ပွဲ ဥပဒေ တွေ ဒီချုပ် မပါတာတွေ စိတ်ဝင်စား မစားတော့ မသိဘူး..
မီးပြတ်-ရေပြတ်တာကိုတော့ အတော့ကို စိတ်ဝင်တစား ညည်းညူ နေကြတာတော့ အမှန်ပဲ ဖြစ်လိမ့်မယ်..
--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.