Posts
Irrawaddy News, 3rd April 2010
ဒေသတွင်း အကြီးဆုံး ရေလမ်းကြောင်း ဖြစ်သော မဲခေါင်မြစ်ကို ထိခိုက်စေသည့် ရေလှောင်တမံ စီမံကိန်းများ၏ အန္တရာယ်မှ ကာကွယ်နိုင်ခြင်း မရှိသည့် အတွက် ဘန်ကောက်တွင် ကျင်းပသော NGO များ ညီလာခံက မဲခေါင် မြစ်ကြောင်းများ ကော်မရှင် MRC ကို ပြစ်တင် ဝေဖန်လိုက်သည်။
၁၅ နှစ်မြောက် အောင်မြင်မှု အထိမ်းအမှတ် အဖြစ် ထိုင်းနိုင်ငံ အပန်းဖြေ စခန်း ဟွာဟင်းတွင် ၂ ရက်ကြာ ကျင်းပခဲ့သည့် MRC အစည်းအဝေး ပြီးချိန်တွင် ချူလာလောင်ကွန် တက္ကသိုလ်၌ NGO များ၏ ညီလာခံကို နောက်က လိုက်၍ ကျင်းပခဲ့ခြင်း ဖြစ်သည်။
မဲခေါင် မြစ်ကြောင်းများ ကော်မရှင် MRC တွင် ထိုင်းနိုင်ငံ၊ ကမ္ဘောဒီးယား၊ လာအို၊ ဗီယက်နမ် နိုင်ငံများ ပါဝင်သော်လည်း တရုတ်နှင့် မြန်မာမှ အစိုးရ အရာရှိများလည်း အစည်းအဝေးသို့ တက်ရောက်ခဲ့သည်။
မဲခေါင်မြစ် အထက်ဖျားပိုင်းတွင် ရေအား လျှပ်စစ် စီမံကိန်း ရေလှောင်တမံများ တည်ဆောက်မှုကြောင့် မဲခေါင်မြစ်ရေမှာ အနှစ် ၂၀ အတွင်း အနိမ့်ဆုံး အဆင့်သို့ ရောက်ရှိခဲ့သည်ဟု ဝိုင်းဝန်း ပြစ်တင် ဝေဖန်မှုကို တရုတ်နိုင်ငံက ပယ်ချခဲ့သည်။
လာအိုနှင့် ကမ္ဘောဒီးယား နိုင်ငံတွင်းရှိ မဲခေါင် မြစ်လက်တက်များ ပေါ်မှ ရေလှောင်တမံ အသစ်များမှာလည်း စွပ်စွဲ ပြစ်တင်ခြင်း ခံနေရသည်။
"တကယ်လို့ MRC ဟာ ယုံကြည် လေးစားထိုက်တဲ့ မဲခေါင်မြစ်ဝှမ်း အဖွဲ့အစည်း တစ်ခု ဖြစ်လာဖို့ ဆိုရင် မဲခေါင်မြစ်ဝှမ်း ပြည်သူတွေရဲ့ အသံကို နားစွင့်သင့်ပါတယ်။ ကျန်းမာ သန်စွမ်းတဲ့ မဲခေါင်မြစ်ရဲ့ တန်ဖိုးတွေကို မြှင့်တင် ပေးရပါမယ်။ မြစ်ကြောင်းရဲ့ သဘာဝ သယံဇာတနဲ့ စားနပ် ရိက္ခာ လုံခြုံမှုကို ကာကွယ်ပေးရမယ်။ ဒေသတွင်း ငြိမ်းချမ်းရေးနဲ့ အောင်မြင် ကြွယ်ဝမှုကို ထိန်းသိမ်း မြှင့်တင် ပေးရလိမ့်မယ်" ဟု အမေရိကန် အခြေစိုက် International Rivers Network NGO မှ Carl Middleton က ဧရာဝတီသို့ ပြောကြားခဲ့သည်။
--Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.