Posts
ဘာသာပြန်သတင်းများ (၂)
(5 Nov 2013 ရက်စွဲပါ UN News Center မှ Myanmar: UN adviser lauds peace talks in Kachin ကို ဘာသာပြန်ဆိုသည်)
(The Asahi Shiman မှ 5 Nov 2013 ရက်စွဲပါ “Aung San Suu Kyi: No Democracy without constitution revisions” သတင်းကို ဘာသာပြန်ဆိုသည်)
ကုလအကြံပေးက ကချင်ပြည်နယ်မှ ငြိမ်းချမ်းရေး ဆွေးနွေးပွဲများကို ချီးမွမ်း
(5 Nov 2013 ရက်စွဲပါ UN News Center မှ Myanmar: UN adviser lauds peace talks in Kachin ကို ဘာသာပြန်ဆိုသည်)
ကုလသမဂ္ဂ ကိုယ်စားလှယ်က ကချင်ပြည်နယ်တွင် ငြိမ်းချမ်းရေး ဆွေးနွေးကြသော အဖွဲ့များအား ယနေ့လူသိ ရှင်ကြား ချီးမွမ်းပြောဆိုခဲ့ပါသည်။ ယခုအပတ် ၎င်းတို့၏ တွေ့ဆုံဆွေးနွေးမှုမှာ မြန်မာနိုင်ငံ၏ အမျိုးသားပြန်လည် ပေါင်းစည်းရေး လုပ်ငန်းစဉ်အတွက် အရေးပါသော အရွေ့တစ်ခုဖြစ်ကြောင်း ပြောဆိုလိုက်ပါသည်။
အောက်တိုဘာလက မြန်မာအစိုးရနှင့် ကချင်လွတ်မြောက်ရေးအဖွဲ့ကြား သဘောတူညီမှု ရရှိအပြီးတွင် နိုဝင်ဘာလ (၄) ရက်နှင့် (၅) ရက်နေ့များတွင် အစိုးရနှင့် တိုင်းရင်းသား လက်နက်ကိုင်အဖွဲ့များကြား မြစ်ကြီးနားတွင် တွေ့ဆုံဆွေးနွေးခဲ့ကြပါသည်။
“မြစ်ကြီးနားမှာ လုပ်တဲ့အစည်းအဝေးဟာ အစိုးရနဲ့တိုင်းရင်းသား လက်နက်ကိုင်တွေကို စုပေါင်းထားတဲ့အဖွဲ့ကို ဆယ်စုနှစ်များစွာမှာ ပထမဆုံးတွေ့ဆုံတာ ဖြစ်ပြီး၊ အမျိုးသားပြန်လည်ပေါင်းစည်းရေး လုပ်ငန်းစဉ်အတွက် အရေးပါတဲ့ ရှေ့သို့ခြေလှမ်းတစ်ရပ်အဖြစ် ကိုယ်စားပြုပါတယ်” ဟု ဆွေးနွေးပွဲတွင် လေ့လာသူအဖြစ် တက်ရောက်သော ကုလသမဂ္ဂ အထွေထွေ အတွင်းရေးမှူးချုပ်၏ မြန်မာနိုင်ငံ အကြံပေး Vijay Nambiar က ပြောကြားခဲ့ပါသည်။
“ပြောရမယ့် အချက်ကတော့ တိုင်းပြည်မှာ ဒီလို ဆွေးနွေးပွဲမျိုး ဖြစ်လာခြင်းဟာ မြန်မာနိုင်ငံမှာ ပြုပြင်ပြောင်းလဲ ရေးလုပ်ငန်းစဉ် စတင်ပြီးကတည်း အစိုးရနှင့် တိုင်းရင်းသား လက်နက်ကိုင်များဟာ ခရီးတစ်ခုပေါက်ခဲ့ပြီဖြစ်ကြောင်း သက်သေပြလိုက်ခြင်းပင် ဖြစ်ပါတယ်” ဟု ၎င်းက ရန်ကုန်တွင် ထုတ်ပြန်သော ကျေညာချက်တွင်လည်း ထည့်သွင်း ဖော်ပြ ခဲ့ပါသည်။
Mr.Nambiar က ပြောကြားရာတွင် ၎င်းအနေဖြင့် သေချာဂရုပြု ဆွေးနွေးခြင်း ပြုလုပ်ကြသည်ကို တွေ့ရ၍ အပြုသဘောဆောင်သော စိတ်ဓါတ်များကြောင့် လည်းကောင်း၊ အုပ်စု အများအပြားသည် ဘုံပလက်ဖောင်းမှ တဆင့် အစိုးရနှင့် တွေ့ဆုံဆွေးနွေးရန် လာရောက်နိုင်ခြင်းကြောင့်လည်းကောင်း အားတက်မိကြောင်း ဆိုပါသည်။ “မြန်မာနိုင်ငံ အနှံ့ရှိ အဖွဲ့အစည်းများသည် ငြိမ်းချမ်းရေးအတွက် သံန္ဒိဌာန် ချထားမှုများကို အမှန်တကယ်ပင် ချီးကျူးလိုပါတယ်” ဟု ၎င်းကပြောပါသည်။
ကချင်ပြည်နယ်တွင် ပြီးခဲ့သည့်လကုန်က တိုင်းရင်းသား လက်နက်ကိုင်အဖွဲ့များကြားတွင် အစည်းအဝေး ပြုလုပ်၍ တစ်နိုင်ငံလုံး အပစ်အခတ်ရပ်စဲရေး သဘောတူညီချက်ရရှိရေး ညှိနှိုင်းရန် ၎င်းတို့ ကိုယ်စား ဆွေးနွေးနိုင်ရန် တစ်နိုင်ငံလုံး အပစ်အခတ်ရပ်စဲရေး ညှိနှိုင်းရေးအဖွဲ့ကို ဖွဲ့စည်းပေးခဲ့ပါသည်။ ထို အစည်းအဝေး ပြီးနောက် ယခုနှစ်ရက် တာ အစည်းအဝေးမှာ ယနေ့ပြီးဆုံးခဲ့ပါသည်။
ပြီးခဲ့သည့် ဇန်နဝါရီလက အစိုးရသည် ကချင်ပြည်နယ်၌ သုံးပတ်ကြာ စစ်ဆင်ရေးများ ပြုလုပ်ပြီးနောက် တစ်ဖက်သတ် အပစ်အခတ်ရပ်စဲရေးကို ကြေညာခဲ့ပါသည်။ ထို့နောက် မေလတွင် အစိုးရနှင့် KIO တို့ သည် အချက် (၇) ချက်ပါသော သဘောတူညီချက်ကို ချမှတ်ခဲ့ရာ နိုင်ငံရေးအရ ဆွေးနွေးပွဲ စတင်နိုင်ရန်နှင့် တိုက်ပွဲများကြောင့် အိုးမဲ့အိမ်မဲ့ ဖြစ်ကြရသော လူပေါင်း (၇၅၀၀၀) ခန့်အတွက် ပြန်လည်နေရာချထားရေး အတွက် ဆွေးနွေးရန်များ ပါဝင်ခဲ့ပါသည်။
“အထူးအကြံပေးအနေဖြင့် ယုံကြည်သည်မှာ မြန်မာနိုင်ငံမှ ပဋိပက္ခများ ငြိမ်းချမ်းစွာ အဖြေရှာရေးသည် တိုင်းပြည်နှင့် ပြည်သူများ၏ အနာဂတ်အတွက် အရေးပါသော ဦးစားပေး ဖြစ်သည်ဟူသော အချက်ဖြစ်ပါသည်” ဟု ယနေ့ ကျေညာချက်တွင် ဖော်ပြထားပါသည်။
မြန်မာနိုင်ငံသည် ငြိမ်းချမ်းရေးနှင့် ဒီမိုကရေစီလမ်းကြောင်းသို့ ဆက်လက် လျှောက်လှမ်း နေခြင်းကြောင့် ကုလသမဂ္ဂသည် မြန်မာနိုင်ငံမှ ပြည်သူများကို ထောက်ခံ၍ပံ့ပိုးကူညီသွားမည် ဖြစ်ပါသည်။
အခြေခံဥပဒေမပြင်လျှင် ဒီမိုကရေစီမရှိ
(The Asahi Shiman မှ 5 Nov 2013 ရက်စွဲပါ “Aung San Suu Kyi: No Democracy without constitution revisions” သတင်းကို ဘာသာပြန်ဆိုသည်)
မြန်မာ အတိုက်အခံခေါင်းဆောင် ဒေါ်အောင်ဆန်းစုကြည်က မြန်မာနိုင်ငံ ဒီမိုကရေစီ ထွန်းကားစေဖို့အတွက် အခြေခံဥပဒေ ပြင်ဆင်ပေးရန် သူမ တိုက်တွန်းထားခြင်းကို ထပ်မံတိုက်တွန်းလိုက်ပါသည်။
“ဒီ အခြေခံဥပဒေကို မပြင်ဆင်ပဲထားသမျှတော့ ပြည့်ဝတဲ့ဒီမိုကရေစီစနစ်လုံးဝမရနိုင်ပါဘူး” ဟု NLD ပါတီ ခေါင်းဆောင်က နိုဝင်ဘာ ၄ ရက်နေ့တွင် မီဒီယာများနှင့် ပြုလုပ်သော အင်တာဗျူးတွင် ပြောကြားသည်။
တပ်မတော်သား ကိုယ်စားလှယ်များ (သို့) စစ်ဖက်အရာရှိများအား လွှတ်တော်နေရာ လေးပုံတစ်ပုံ ဖယ်ပေးထား သော အခြေခံဥပဒေကို ပြင်ဆင်ရေးသည် ဒီမိုကရေစီကို ဦးတည်နေသော မြန်မာနိုင်ငံအတွက် မရှိမဖြစ် လိုအပ်ပါလိမ့် မည်။ အဖွဲ့ဝင် ၁၀၉ ဦးပါဝင်သော လွှတ်တော်ကော်မတီသည် အခြေခံဥပဒေ ပြင်ဆင်ရေးဆိုင်ရာ အစီရင်ခံစာကို ယခုနှစ်ကုန်တွင် လွှတ်တော်သို့ တင်သွင်းမည်ဟု မျှော်လင့်ရသော်လည်း၊ မကြာသေးမှီက ဒေါ်အောင်ဆန်းစုကြည် ဥရောပသို့ ရောက်ရှိနေစဉ်အတွင်း တင်ပြချက်များကို ကော်မတီဥက္ကဌက ရွှေ့ဆိုင်းထားသည်ဟု ကြားသိရသည်။
“ဘယ်လိုအကြောင်းရင်းတွေရှိနေလို့ နှောင့်နှေးသွားရသလဲ ဆိုတာကို ကျွန်မ မသိပါဘူး။ ဒါပေမယ့် သူတို့ သတ်မှတ်ထားတဲ့ နောက်ဆုံးရက်ကို သူတို့သဘောနဲ့ ရွှေ့ဆိုင်းတာမျိုးကတော့ လိုလားစရာ ကိစ္စမဟုတ်ပါဘူး” ဟု ဒေါ်အောင်ဆန်းစုကြည်က ပြောကြားသည်။
မိသားစုဝင်ထဲတွင် ပြည်ပနိုင်ငံသားခံယူထားသူများရှိပါက သမ္မတလောင်း အရည်အချင်းနှင့် အကြုံးမဝင်ဟု ဖော်ပြတားမြစ်ထားသော လက်ရှိအခြေခံဥပဒေကို ပြင်ဆင်ခြင်းမပြုပါက ၂၀၁၅ သမ္မတလောင်းရွေးရာတွင် ဒေါ်အောင်ဆန်းစုကြည် ပါဝင်နိုင်လိမ့်မည် မဟုတ်ပေ။ သူမ၏ သားနှစ်ဦးနှင့် ကွယ်လွန်သူ ခင်ပွန်းသည်တို့မှာ ဗြိတိသျှ နိုင်ငံသားအဖြစ် ခံယူထားသူများ ဖြစ်သည်။
တပ်မတော်အစိုးရလက်ထက် ၂၀၀၈ ခုနှစ်က အတည်ပြုခဲ့သော အငြင်းပွားဖွယ် အခြေခံဥပဒေကို ပြင်ဆင်ရန် လိုအပ်နေခြင်းကို နိုင်ငံတကာက ထောက်ခံအားပေးကြရန် မကြာသေးမှီက သီတင်းနှစ်ပတ်ကြာ ဥရောပခရီးတွင် ဒေါ်အောင်ဆန်းစုကြည်က တိုက်တွန်းခဲ့သည်။
“ဥရောပခရီးမှာ လူတော်တော်များများက ကျွန်မအမြင်ကိုနားလည်သဘောပေါက်ကြောင်း ပြသခဲ့ကြပါတယ်” ဟု ဒေါ်အောင်ဆန်းစုကြည်က ဆိုပါသည်။
Asahi Shimbun ၏ တောင်းဆိုမှုဖြင့် စီစဉ်ခဲ့သော အင်တာဗျူးကို နေပြည်တော်တွင် ပြုလုပ်ခဲ့ပြီး ပြည်တွင်း မီဒီယာများကိုလည်း တက်ရောက်ခွင့်ပြုခဲ့သည်။
ဒေါ်အောင်ဆန်းစုကြည် ကို တမင်ရည်ရွယ် ပိတ်ပင်ထားသော လက်ရှိအခြေခံဥပဒေကို ပြင်ဆင်ရမည့် ကိစ္စ သည် အရေးကြီးသောကြောင့် အာဏာပိုင် (အာဏာလက်ဝယ်ရှိသူ) ၏ ခွင့်ပြုမှုလိုအပ်ပြီး အဆိုပါ အာဏာလက်ဝယ်ရှိ သူနှင့် ညှိနှိုင်းမှုပြုလုပ်ရန် လိုလိမ့်မည်ဟု ရန်ကုန်မြို့မှ အကဲခတ်လေ့လာသူများက မှတ်ချက်ပေးသည်။ ယင်းသို့ ညှိနှိုင်း မှုသည် ၂၀၁၅ ရွေးကောက်ပွဲ၏ အဖြေ ဖြစ်လိမ့်မည်ဟုလည်း ၎င်းတို့က ခန့်မှန်းကြသည်။
| Google Drive: create, share, and keep all your stuff in one place. |  |
