Transparency Myanmar

transparency.myanmar@gmail.com

yangonchronicle 2011
yangonchronicle 2011

၁၈.၇.၂၀၁၁

ပြည်တွင်းသတင်းများ

မီးသတ်ဦးစီးဌာနတွင် လိုအပ်ချက်များစွာရှိနေဆဲဟုဝေဖန်

လူမူဝန်ထမ်းနှင့် ကယ်ဆယ်ရေးဝန်ကြီးဌာန လက်အောက်ခံ မီးသတ်ဦးစီးဌာနတွင် လိုအပ်ချက်များစွာရှိပြီး ယင်း လိုအပ်ချက်များကို ပြည့်မှီ အောင် ဆောင်ရွက်ခြင်းမရှိဘဲ လုပ်ဆောင်ရန် မလိုအပ်သည်များကို ဦးစားပေးလုပ်ဆောင်နေကြောင်း ရန်ကုန်တိုင်းဒေသကြီးမှ မီးသတ်ဇုန်နယ်မြေမှူး တစ်ဦးက ဝေဖန်လိုက်သည်။

ယင်းက ၂၀၁၁-၂၀၁၂ ဘဏ္ဍာနှစ်တွင် မီးသတ်ဦးစီးဌာက လုပ်ဆောင်သည့် လုပ်ငန်းစီမံချက်များတွင် နှစ်ခုသာ တိုင်းပြည်အတွက် အမှန် တကယ် လိုအပ်သော စီမံချက်ဖြစ်ကြောင်း ဆိုသည်။

“အရေးပေါ်ကယ်ဆယ်ရေး အဖွဲ့တွေ ဖွဲ့တာရယ်၊ မီးသတ်ဖို့ အမြန်ရေယာဉ် ဝယ်တာရယ်ပဲ ကောင်းတယ်”ဟု ဆိုသည်။

မီးသတ်ဦးစီးဌာနမှ လုပ်ဆောင်နေသော စီမံကိန်းများမှာ မီးသတ်ကားများတွင် GPS, GIS စနစ်တပ်ဆင်ခြင်း၊ ရန်ကုန်တိုင်းဒေသကြီးတွင် ဆွဲအားကောင်းCCTV ကင်မရာများတပ်ဆင်ခြင်း၊ အရေးပေါ်ကယ်ဆယ်ရေးအဖွဲ့များ တစ်နိုင်ငံလုံးတွင် ဖွဲ့စည်းခြင်း၊ ကယ်ဆယ်ရေးပစ္စည်းကိရိယာပါ အမြန်ရေယာဉ်နှင့် မီးသတ်ရေယာဉ်ဝယ်ယူခြင်းတို့ ဖြစ်သည်။

ယခုနှစ်တွင် လူမှုဝန်ထမ်းနှင့် ကယ်ဆယ်ရေးဝန်ကြီးဌာနသို့ ချပေးသည့်ဘတ်ဂျက်မှာ အရင်နှစ်များက သတ်မှတ်သည့် ဘတ်ဂျက်ထက် နည်း ပါးသည့်အတွက် နိုင်ငံနှင့်ပြည်သူများအတွက် အမှန်တကယ်အကျိုးရှိသည်များကို ဆောင်ရွက်စေလိုကြောင်း ဆက်လက်ပြောကြားသည်။

“Water Tower လို့ ကျွန်တော်တို့ ပြောနေကြတဲ့ မီးသတ်လှေကားတွေပါတဲ့ ကားတွေများများဝယ်ရင် ကောင်းတာပေါ့ဗျာ”ဟု အကြံပြုပြော ကြားသည်။ ယင်း မီးသတ်လှေကားများပါဝင်သည့် မီးသတ်မော်တော်ယာဉ်များသည် အထပ်မြင့်တိုက်များတွင် မီးလောင်မှုဖြစ်ပွားပါက ကယ်ဆယ်ရေး နှင့် မီးငြိမ်းသတ်ရေးလုပ်ငန်းများတွင် များစွာထိရောက်ကြောင်း သိရှိရသည်။

ယင်း မီးသတ်ကားများသည် မြန်မာတစ်နိုင်ငံလုံးတွင် ၁၀ စီးအောက်သာရှိကြောင်း သိရှိရပြီး၊ ယင်းတို့ထဲမှ ၃ စီးမှာ ဂျပန်နိုင်ငံမှ လှူဒါန်း ထားခြင်း ဖြစ်သည်။

ကျော်စွာ

-----------------------------------------------------------------------------------------------------------------------------------

ရန်ကုန်ဆိပ်ကမ်းရှိ ကုန်သေတ္တာစစ်ဆေးရေးပုံစံ ပြောင်းလဲ

ရန်ကုန်မြို့ရှိ ဆိပ်ကမ်းများအားလုံးတွင် ကွန်တိန်နာစစ်ဆေးရေး လုပ်ကိုင်လျက်ရှိသော မြန်မာ့ဆိပ်ကမ်း အာဏာပိုင်အဖွဲ့၊ ကုန်သွယ်ရေး ညွှန်ကြားမှု ဦးစီးဌာနတို့ ပါဝင်သည့် ကွန်တိန်နာ စစ်ဆေးရေးပူးပေါင်းအဖွဲ့ကို ဖျက်သိမ်းလိုက်ပြီဖြစ်ကြောင်း သိရှိရသည်။

အဆိုပါ ဆိပ်ကမ်းကွန်တိန်နာ စစ်ဆေးရေးလုပ်ငန်းများကို အကောက်ခွန်ဦးစီးဌာနမှ တိုက်ရိုက်ကိုင်တွယ်နေပြီဖြစ်ကြောင်း အကောက်ခွန် ရှင်းလင်းရေး ဝန်ဆောင်သူများထံမှ သိရှိရသည်။

ကွန်တိန်နာစစ်ဆေးရေးပုံစံများကို နိုင်ငံတကာပုံစံများနည်းတူ ပြောင်းလဲလိုက်ခြင်းဖြစ်ကြောင်း သိရသည်။ ယခင်က ဆိပ်ကမ်းအာဏာပိုင် အဖွဲ့၊ ကုန်သွယ်ရေးနှင့် အကောက်ခွန်ဦးစီးဌာနတို့ ပူးပေါင်းထားသောအဖွဲ့က စစ်ဆေးရေးလုပ်ဆောင်ခြင်းဖြစ်ပြီး ယခုမှ နိုင်ငံတကာပုံစံဖြင့် စစ်ဆေးခြင်း ဖြစ်ကြောင်း  အကောက်ခွန်ဦးစီးဌာနမှ တာဝန်ရှိသူတစ်ဦးက ပြောကြားသည်။

ယခင်က  ဆိပ်ကမ်းကွန်တိန်နာ ထုတ်ယူရေးလုပ်ငန်းများကို ပူးပေါင်းအဖွဲ့နှင့် ဆက်သွယ်ဆောင်ရွက်ရသော်လည်း ယခုအခါ အကောက်ခွန် ဦးစီးဌာနတစ်ခုတည်းဖြင့်သာ တိုက်ရိုက်ဆက်သွယ် လုပ်ကိုင်နေရကြောင်း ရန်ကုန်မြို့ရှိ အကောက်ခွန်ရှင်းလင်းရေး အေဂျင်စီများမှ ရှင်းလင်းပြောကြား သည်။

ဆိပ်ကမ်းကွန်တိန်နာ စစ်ဆေးရေးပုံစံများ ပြောင်းလဲလိုက်သော်လည်း နယ်စပ်ဒေသများရှိ စစ်ဆေးရေးစခန်းများတွင် ပစ္စည်းတင်သွင်းမှုများ ကို နယ်မြေမှဒေသခံ အာဏာပိုင်များ၊ အကောက်ခွန် ဦးစီးဌာနနှင့် ဝန်ကြီးဌာနများ ပူးပေါင်းပါဝင်သောအဖွဲ့များက စစ်ဆေးမှုများ ပြုလုပ်ဆဲ ဖြစ်ကြောင်း နယ်စပ်ကုန်သွယ်ရေးဂိတ်များနှင့် ကုန်သည်များထံမှ စုံစမ်းသိရသည်။

YC

-----------------------------------------------------------------------------------------------------------------------------------

မြန်မာ-တရုတ် ရေနံနှင့် သဘာဝဓာတ်ငွေ့ပိုက်လိုင်းစီမံကိန်း၌ ဒေသခံမြန်မာများ လိုအပ်ချက်အရလုပ်ကိုင်ခွင့်ရ

မြန်မာ-တရုတ် ရေနံနှင့် သဘာဝဓာတ်ငွေ့ပိုက်လိုင်းစီမံကိန်း(မြန်မာအပိုင်း)၌ လုပ်ကိုင်ရာတွင် ယခင် တရုတ်နိုင်ငံသားပညာရှင်များ၊ တရုတ် အလုပ်သမားများဖြင့်သာ လုပ်ကိုင်တည်ဆောက်လျက်ရှိရာမှ ယခုအခါ လုပ်ငန်းလိုအပ်ချက်အရ မြန်မာနိုင်ငံရှိ ကာယလုပ်သားများကိုပါ ခေါ်ယူအသုံး ပြု၍ လုပ်ကိုင်ဆောင်ရွက်လျက်ရှိကြောင်း သိရသည်။

မြန်မာ-တရုတ် ရေနံနှင့် သဘာဝဓာတ်ငွေ့ ပိုက်လိုင်းစီမံကိန်း(မြန်မာအပိုင်း)၏ မန္တလေးအပိုင်း ပိုက်လိုင်းသွယ်တန်းရေး လုပ်ငန်းကို မန္တလေး တိုင်းဒေသကြီး ပုသိမ်ကြီးမြို့နယ် ရွှေစာရံကျေးရွာအုပ်စု ကျွဲနဖားတောင်ကွင်း ပိုက်လိုင်းသွယ်တန်းရေး လုပ်ငန်းခွင်စခန်း၌် ၂၀၁၀ ခုနှစ် ဇွန်လ ၃ ရက် နေ့က စတင်ဆောင်ရွက်ခဲ့ပြီး ယခုအခါ လုပ်ငန်းလိုအပ်ချက်အရ ဒေသခံကာယလုပ်သားများအား ခေါ်ယူ၍လုပ်ကိုင်ဆောင်ရွက်လျက်ရှိကြောင်း သိရ သည်။

မြန်မာ-တရုတ် ရေနံနှင့် သဘာဝဓာတ်ငွေ့ပိုက်လိုင်း စီမံကိန်းစတင်စဉ်က ဒေသခံမြန်မာလုပ်သား တစ်ယောက် နှစ်ယောက်သာ ပါဝင်လုပ်ကိုင် ကြကြောင်း၊ ကျန်သည့်လုပ်သားများမှာမူ တရုတ်နိုင်ငံသား ပညာရှင်များသာဖြစ်ကြောင်း၊ ၎င်း တရုတ်နိုင်ငံခြားသား ပညာရှင်များအတွက် စကားပြန်ကို လည်း ဒေသခံတရုတ်လူမျိုးများကသာ လုပ်ကိုင်ဆောင်ရွက်ကြကြောင်း၊ ယခုအခါ ဒေသခံမြန်မာလူမျိုး ကာယလုပ်သားအတော်များများကို ခေါ်ယူ အသုံးပြု၍ လုပ်ကိုင်လာကြကြောင်း ၎င်းဒေသရှိ ဒေသခံတစ်ဦးက ပြောကြားခဲ့သည်။

၎င်း စီမံကိန်း၌ လက်ရှိလုပ်ကိုင်နေသည့် မြန်မာလုပ်သားတစ်ဦးကလည်း “မြန်မာ-တရုတ် ရေနံနှင့် သဘာဝဓာတ်ငွေ့ပိုက်လိုင်းစီမံကိန်း လုပ်ငန်းခွင်သို့ ရောက်ရှိနေသည်မှာ နှစ်လခန့်ကြာမြင့်သွားပြီဖြစ်ကြောင်း၊ ပထမဆုံးလုပ်ကိုင်သည့်လ၌ လစာ ကျပ်ရှစ်သောင်းရကြောင်း၊ ယခုအခါ လစာနှုန်းထားထပ်တိုး၍ လစာကိုးသောင်း ရရှိပြီဖြစ်ကြောင်း၊ မိမိတို့ ကျေးရွာမှ  ရေနံနှင့် သဘာဝဓာတ်ငွေ့ပိုက်လိုင်း စီမံကိန်းတွင် လာရောက်လုပ်ကိုင် နေသူများမှာ အယောက် ၃၀ ခန့် ရှိကြောင်း ပြောကြားခဲ့သည်။

မြန်မာ-တရုတ် သဘာဝဓာတ်ငွေ့ပိုက်လိုင်း စီမံကိန်းကို လာမည့် ၂၀၁၃ ခုနှစ်တွင် တည်ဆောက်ပြီးစီးရန် လျာထားပြီး ၎င်းစီမံကိန်း တည် ဆောက်ပြီးစီးပါက ဒေသခံလုပ်သားများအတွက် နည်းပညာများ ရရှိစေရန် ဆောင်ရွက်ပေးမည် ဖြစ်ကြောင်း သိရသည်။

(Weekly Eleven၊ အတွဲ-၆၊ အမှတ်-၄၂ ပါ “မြန်မာ-တရုတ် ရေနံနှင့် သဘာဝဓာတ်ငွေ့ပိုက်လိုင်း စီမံကိန်းလုပ်ငန်းခွင်တွင် တရုတ်နိုင်ငံသား ပညာရှင်များ၊ တရုတ်လုပ်သားများဖြင့် တည်ဆောက်လျက်ရှိရာမှ ယခုအခါ လုပ်ငန်းလိုအပ်ချက်အရ ဒေသခံကာယလုပ်သားများ ခေါ်ယူ လုပ်ကိုင်လာ” သတင်း အား အကျဉ်းချုံး ဖော်ပြသည်)

-----------------------------------------------------------------------------------------------------------------------------------

တရားမဝင်လမ်းကြောင်းဖြင့် ကုန်သွယ်မှုအား ထိရောက်စွာအရေးယူရန် လိုအပ်

မြန်မာနိုင်ငံရှိ ပြည်ပကုန်သွယ်မှုကဏ္ဍတွင် တရားဝင်ကုန်သွယ်မှုတန်ဖိုး မြင့်တက်လာနိုင်စေရန်မှာ လက်ရှိလုပ်ကိုင်လျက်ရှိနေသည့် တရား မဝင် ပြည်ပကုန်သွယ်မှုလုပ်ငန်းများကို ထိရောက်စွာ အရေးယူဆောင်ရွက်ရမည်ဖြစ်ကြောင်း သိရသည်။

ပြည်ပကုန်သွယ်မှုကဏ္ဍတွင် ပုံမှန်လမ်းကြောင်းနှင့် လုပ်ထုံးလုပ်နည်း အတိုင်းလုပ်ကိုင်ရန် လိုအပ်ကြောင်း၊ နိုင်ငံတော်မှ ကောက်ခံသည့် ကုန်သွယ်မှုအခွန်အခ များပြားနေမည်ဆိုပါကလည်း တရားမဝင် ကုန်သွယ်မှုဆိုသည်မှာ ရှိနေဦးမည်ဖြစ်ကြောင်း မြန်မာနိုင်ငံရှိ စီးပွားရေးပညာရှင် တစ်ဦးက ပြောကြားခဲ့သည်။

ထို့ပြင် မြန်မာနိုင်ငံ၌ အဓိကဖြစ်ပေါ်လျက်ရှိသည့် တရားမဝင် ကုန်သွယ်မှုလုပ်ငန်းအား တားဆီးပိတ်ပင် လိုက်နိုင်မည်ဆိုပါက နိုင်ငံ၏ GDP တန်ဖိုးမှာ ပိုမိုတိုးတတ်လာနိုင်ကြောင်း သိရသည်။ ထို့ပြင် တရားမဝင်ကုန်သွယ်မှုကို တားဆီးပိတ်ပင်နိုင်ပါက ပို့ကုန်သွင်းကုန်များမှတစ်ဆင့် တိကျ သည့် အခွန်အခများကိုလည်း ရရှိလာနိုင်မည်ဖြစ်ပြီး တင်သွင်းဖြန့်ချီသူများအပါအဝင် နိုင်ငံအတွက်လည်း တရားဝင်ကုန်သွယ်မှုမှတစ်ဆင့် ဂုဏ်သိက္ခာ ပိုမိုတက်လာစေနိုင်မည် ဖြစ်သည်။

၂၀၁၁ ခုနှစ် ဇွန်လ ၂၉ ရက်နေ့ထိ မြန်မာနိုင်ငံ၏ ပြည်ပကုန်သွယ်မှုတန်ဖိုး စုစုပေါင်းမှာ အမေရိကန် ဒေါ်လာ သန်းပေါင်း ၁၅၂၇၈ ဒဿမ ၅၂ သန်းရှိကြောင်း သိရသည်။

အစိုးရသစ်လက်ထက်မှ စတင်၍ ကုန်သွယ်မှုကဏ္ဍတွင် ကုန်သွယ်ခွန် ၁၀ ရာခိုင်နှုန်းမှ ၇ ရာခိုင်နှုန်းသို့ လျှော့ချပေးလိုက်သည့်အတွက် ကုန် သွယ်မှု လုပ်ငန်းရှင်များအနေဖြင့် ပိုမိုအဆင်ပြေလာကြောင်း၊ ကုန်သွယ်မှုကဏ္ဍအားလုံးတွင် တရားဝင်လမ်းကြောင်းဖြင့်သာ လုပ်ကိုင်မည်ဆိုပါက နိုင်ငံ အတွင်း လက်ရှိကုန်သွယ်မှုတန်ဖိုးထက်ပင် ပိုမိုများပြားလာနိုင်ကြောင်း တရုတ်-မြန်မာနယ်စပ်မှ ကုန်သည်လုပ်ငန်းရှင်တစ်ဦးက ပြောကြားခဲ့သည်။

မြန်မာနိုင်ငံတွင် တရားဝင် ကုန်သွယ်မှုပြုလုပ်သည့် ပို့ကုန်တန်ဖိုးထက် တရားမဝင် ကုန်သွယ်မှုပြုလုပ်သည့် ပို့ကုန်တန်ဖိုးမှာ ပိုမိုများပြား ကြောင်း သိရသည်။

(Flower News၊ အတွဲ-၇၊ အမှတ်-၂၇ ပါ “ပြည်ပကုန်သွယ်မှုတန်ဖိုးမြင့်တတ်ရန် တရားမဝင်လမ်းကြောင်းကို ထိရောက်စွာ အရေးယူရန် လိုအပ်” သတင်း အား အကျဉ်းချုံး ဖော်ပြသည်)

-----------------------------------------------------------------------------------------------------------------------------------

 ဧရာဝတီတိုင်းဒေသကြီးမှစတင်၍ ဆင်းရဲမှုလျှော့ချရေး အစီအစဉ် စတင်ပြီ

မြန်မာနိုင်ငံရှိ ကျေးလက်ဒေသဖွံ့ဖြိုးရေးနှင့် ဆင်းရဲမှုလျှော့ချရေး အစီအစဉ်အား အကောင်အထည်ဖော်ဆောင်ရွက်ရန် ဧရာဝတီတိုင်းဒေသ ကြီးမှ စတင်၍ ဆင်းရဲနွမ်းပါးမှု စစ်ဆေးကောက်ယူလျက်ရှိကြောင်း သိရသည်။

ထို့ပြင် ကျေးလက်ဒေသဖွံ့ဖြိုးရေးနှင့် ဆင်းရဲမှုလျှော့ချရေးအစီအစဉ်၏ ရှေ့ပြေးအစီအစဉ်အဖြစ် ရန်ကုန်တိုင်းဒေသကြီး သန်လျင်မြို့နယ်ရှိ ရန်ကုန်သမဝါယမ ဒီဂရီကောလိပ်နှင့် Myanmar Business Executive (MBE) တို့မှ ပူးပေါင်း၍ ဧရာဝတီတိုင်းဒေသကြီးအတွင်း ဆင်းရဲနွမ်းပါးမှု အခြေ အနေအား ကွင်းဆင်းလေ့လာမှု ပြုလုပ်ခဲ့ကြကြောင်း သိရသည်။

၎င်း ရန်ကုန်သမဝါယမကောလိပ်နှင့် MBE တို့မှ ကထိကဆရာ၊ ဆရာမတို့မှ အဖွဲ့ (၁၀) ဖွဲ့ ဖွဲ့၍ ဧရာဝတီတိုင်း ဒေသကြီးအတွင်းရှိ ရွာများ၏ အခြေအနေကိုသိရှိနိုင်စေရန် အသေးစိတ်လေ့လာ စစ်တမ်းကောက်ယူခဲ့ကြောင်း၊ ရန်ကုန်တိုင်းဒေသကြီးအစိုးရအဖွဲ့ထံမှ တရားဝင်ခွင့်ပြုချက် တောင်းခံ ပြီးမှသာ ဧရာဝတီတိုင်းဒေသကြီးအတွင်း ဆင်းရဲနွမ်းပါးမှု စစ်တမ်းသွားရောက် ကောက်ယူခြင်းဖြစ်ကြောင်း၊ ယခုကောက်ယူခဲ့သည့် စစ်တမ်းသည် မြန်မာနိုင်ငံ၌ ကျေးလက်ဖွံ့ဖြိုးရေးနှင့် ဆင်းရဲမှုလျှော့ချရေးအစီအစဉ် ဆောင်ရွက်နိုင်ရန် အထောက်အပံ့ဖြစ်လာနိုင်မည်ဖြစ်ကြောင်း ရန်ကုန်သမဝါယမ ကောလိပ်မှ တာဝန်ရှိသူတစ်ဦးက ပြောကြားခဲ့သည်။

ရန်ကုန်သမဝါယမကောလိပ်နှင့် MBE တို့မှ သွားရောက်စစ်တမ်းကောက်ယူခဲ့သည့် ကျေးရွာများမှာ ဖျာပုံမြို့နယ်အတွင်းရှိ ကျေးရွာနှစ်ရွာနှင့် ဒေးဒရဲမြို့နယ်အတွင်းရှိ ကျေးရွာရှစ်ရွာတို့အား သွားရောက်လေ့လာ စစ်တမ်းကောက်ယူခဲ့ခြင်းဖြစ်ကြောင်း သိရသည်။

ယခု သွားရောက်စစ်တမ်းကောက်ယူခဲ့သည့် ရန်ကုန်သမဝါယမကောလိပ်နှင့် MBE တို့မှ အဖွဲ့များ၏ တူညီသည့် နောက်ဆုံးရလဒ်အဖြေမှာ ၎င်းဒေသရှိ ဒေသခံများ၏ ပညာရေး၊ ကျန်းမာရေးနှင့် စီးပွားရေးများမှာ အားရကျေနပ်ဖွယ်ရာ အခြေအနေ လုံးဝမရှိကြောင်း၊ NGO အဖွဲ့များ၏ ကူညီ ထောက်ပံ့မှုများကိုလည်း မြို့နှင့်နီးသည့် ကျေးရွာများကသာ ရရှိကြောင်း၊ မြို့နှင့် ဝေးသည့်ကျေးရွာများတွင်မူ စားဝတ်နေရေးကျပ်တည်းမှုပြဿနာ၊ ပညာရေးခက်ခဲမှုနှင့် ကျန်းမာရေးပြဿနာများကို အဆိုးရွားဆုံးရင်ဆိုင်ရလျက်ပင်ရှိကြောင်း ကွင်းဆင်းလေ့လာခဲ့သည့် တာဝန်ရှိသူတစ်ဦးက ပြောကြား ခဲ့သည်။

ပြည်ထောင်စုသမ္မတမြန်မာနိုင်ငံတော် နိုင်ငံတော်အစိုးရသစ်မှ ကျေးလက်ဒေသဖွံ့ဖြိုးရေးနှင့် ဆင်းရဲမှုလျှော့ချရေး အစီအစဉ်အား  ၂၀၁၁ ခုနှစ် ဇူလိုင် ၁ ရက် မှ ၂၀၁၅ ခုနှစ် ဒီဇင်ဘာ ၃၀ ရက်နေ့ထိတိုင် စီမံချက်ရေးဆွဲလုပ်ဆောင်လျက် ရှိကြောင်း သိရသည်။

(Flower News၊ အတွဲ-၇၊ အမှတ်-၂၇ ပါ “ဆင်းရဲမှုလျှော့ချရေး အစီအစဉ် ဧရာဝတီတိုင်းဒေသကြီးတွင် စတင်” သတင်းအား အကျဉ်းချုံး ဖော်ပြသည်)

×××××××××××××××××××××××××××××××××××××××××××××××××××××××××××××××××

ပြည်တွင်းပါတီ၊ နိုင်ငံရေးသတင်းများ

လူ့အခွင့်အရေး လှုပ်ရှားသူ ထောင်ထဲရောက်မှ ပြစ်ဒဏ်နှစ်ဆဖြစ်

ရန်ကုန်၊ ဇူလိုင်၊ ၁၇။

သူတပါးအကျိုးဖျက်ဆီးမှု၊ ရာဇဝတ်မကင်းသော ကျုးကျော်မှုတို့ဖြင့် စွဲချက်တင်ပြီး  ပုသိမ်မြို့၊ ကန်ကြီးထောင့် တရားရုံးမှ ဇူလိုင် ၈ ရက်နေ့တွင် ထောင်ဒဏ်သုံးလ ချမှတ်ခြင်းခံခဲ့ရသော လူ့အခွင့်အရေး စောင့်ကြည့်ကာကွယ်ရေး အဖွဲ့ဝင်တစ်ဦးဖြစ်သည့် ဦးထွန်းအေးအား အကျဥ်းထောင်ထဲ ရောက်မှ ထောင်ဒဏ်ခြောက်လချမှတ်ခြင်း ခံခဲ့ရကြောင်း ၎င်း၏သမီးဖြစ်သူ ဒေါ်တင်မျိုးအေးက ဆိုသည်။

ပုသိမ်မြို့ထိန်တောကြီး ကျေးရွာအုပ်စု ဗမာစုကျေးရွာနေ ဦးထွန်းအေးသည် မြေစာရင်းဌာနမှ ဝန်ထမ်းများနှင့် အ ထွေထွေအုပ်ချုပ်ရေးမှူးရုံးမှ ဝန်ထမ်းများက ယင်းနေထိုင်ရာကျေးရွာအုပ်စုရှိ ရွာများမှ လယ်သမားများအား အကြောင်းပြချက်မရှိဘဲ ပုံမှန်သီးစားခထက် အဆပေါင်းများစွာပိုမို ကောက်ခံနေမှုအား ဧရာဝတီတိုင်းဒေသကြီး ဝန်ကြီးချုပ်နှင့် အပြည်ပြည်ဆိုင်ရာ အလုပ်သမားအဖွဲ့တို့အား တိုင်ကြားရန်ကြိုးပမ်းနေရာမှ အထက်ပါ ပြစ်မှု များဖြင့် အဖမ်းခံခဲ့ရသူဖြစ်သည်။

“တရားရုံးမှာအမိန့်ချတုန်းက သုံးလလို့ပဲကြားလိုက်ကြတာ။ ထောင်ဝင်စာသွားတွေ့တော့မှ အဖေက သူ့ကို ထောင်ခြောက်လချလိုက်တာလို့ ထောင်ကဝန်ထမ်းတွေက ပြောတယ်ဆိုပြီး ပြန်ပြောပြတယ်” ဟု ဒေါ်တင်မျိုးအေးက ဆိုသည်။

အဆိုပါအမှု အမိန့်ချမှတ်သည့်နေ့တွင် တရားရုံးသို့ သွားရောက်နားထောင်ခဲ့သည့် လူ့အခွင့်အရေး စောင့်ကြည့်ကာကွယ်ရေးကွန်ယက် အဖွဲ့ ဝင်တစ်ဦးဖြစ်သည့် ကိုမြင့်နိုင်ကလည်း ထိုနေ့က ၎င်းတို့ လူ့အခွင့်အရေး စောင့်ကြည့်ကာကွယ်ရေး အဖွဲ့ဝင် ၁၅ ဦးခန့် တရားရုံးသို့ သွားရောက်ခဲ့ရာ အားလုံးပင် ထောင်ဒဏ်သုံးလ အမိန့်ချမှတ်သည်ကို ကြား လိုက်ရကြောင်း ပြောကြားသည်။

“အခုလိုသိလိုက်ရတာ တော်တော်အံ့သြသွားတယ်၊ ဒီကိစ္စ္စကိုသေချာအောင် တရားရုံးအမိန့်ကို ရဖို့လုပ်နေတယ် ပြီးရင်အယူခံဝင်ဖို့လည်း လုပ်နေပါပြီ” ဟု ၎င်းက ဆိုသည်။

ထိုသို့ အယူခံဝင်နိုင်ရန်အတွက် ရှေ့နေငှားရမ်းမှုကို လူအခွင့်အရေး စောင့်ကြည့် ကာကွယ်ရေးကွန်ယက် အဖွဲ့ဝင်တစ်ဦးဖြစ်သည့် အမျိုးသား ဒီမိုကရေစီအင်အားစုပါတီမှ လွှတ်တော် ကိုယ်စားလှယ်လောင်း ဒေါ်ဘောက်ဂျာမှ ငွေကြေးအကုန်အကျခံသွားမည်ဖြစ်ကြောင်း သိရသည်။

“ပိုက်ဆံ အရမ်းရှိလို့တော့ မဟုတ်ပါဘူး။ ဒီလိုမတရားလုပ်တာကို မခံနိုင်လို့ပါ”ဟု ဒေါ်ဘောက်ဂျာက ဆိုသည်။

အဆိုပါ ဦးထွန်းအေး၏ ဇနီးဖြစ်သူ ဒေါ်ထွန်းကြည်ကိုလည်း အလားတူအမှုဖြင့်ပင် တရားရုံးမှ ဝရမ်းထုတ်ထားသဖြင့် တိမ်းရှောင်နေရကြောင်း ၎င်းတို့၏သမီးဖြစ်သူ ဒေါ်တင်မျိုးအေးက ဆိုသည်။

“အိမ်မှာက မိသားစုငါးယောက်ရှိတာ၊ အဖေက ထောင်ကျပြီးအမေက ရှောင်နေရတယ်၊ မောင်တစ်ယောက်က ရန်ကုန်မှာ ကျောင်းတက်နေ တယ်ဆိုတော့ ကျွန်မနဲ့ မောင်လေးတစ်ယောက်ပဲ အခြားသူတွေအကူအညီနဲ့ လယ်လုပ်နေရတယ်”ဟု အသက် ၂၀ အရွယ်ရှိ ၎င်းက ဆိုသည်။

ယခုနှစ်တွင် ၎င်းတို့ပိုင် လယ်များအတွက် ရရှိထားသော စိုက်ပျိုးစရိတ်ချေးငွေများသည်လည်း ဖခင်၏အမှုအတွက် ကုန်ကျစရိတ်များ ဖြစ်သွား ရကြောင်း ၎င်းက ဆက်လက်ပြောကြားသည်။

ဦးထွန်းအေးအား သူတပါးအကျိုးဖျက်ဆီးမှု ပုဒ်မ ၄၂၇၊ ရာဇ၀တ်မကင်းသော ကျူးကျော်မှု ပုဒ်မ ၄၄၇ တို့ဖြင့် တရားစွဲဆိုခဲ့ခြင်းဖြစ်ပြီး ကန်ကြီးထောင့် မြို့နယ်တရားရုံး၊ တရာသူကြီး ဒေါ်ဖြူဖြူခိုင်က ဇူလိုင်လ ၈ ရက်နေ့တွင် ထောင်ဒဏ်သုံးလ ချမှတ်ခဲ့ခြင်းဖြစ်သည်။

ပိုင်စိုး

-----------------------------------------------------------------------------------------------------------------------------------

၂၀၁၄ ခုနှစ် အာဆီယံဥက္ကဋ္ဌအဖြစ် မြန်မာတာဝန်ယူရေး လာအိုထောက်ခံ

၂၀၁၄ ခုနှစ် အလှည့်ကျအာဆီယံဥက္ကဋ္ဌတာဝန်ကို လာအိုနိုင်ငံမှတာဝန်ယူရန် အလှည့်ကျသော်လည်း ယင်းတာဝန်ကို မြန်မာနိုင်ငံကို တာဝန် ပေးရန်နှင့် အိမ်ရှင်အဖြစ်တာဝန်ယူ ကျင်းပသွားရန် လာအိုပြည်သူ့ ဒီမိုကရက်တစ် သမ္မတ နိုင်ငံဝန်ကြီးချုပ် မစ္စတာသွန်ဆင်းသမာဗောင်က ပြောကြား လိုက်သည်။

မြန်မာနိုင်ငံသို့ ချစ်ကြည်ရေးခရီးစဉ်အဖြစ် ရောက်ရှိနေသော လာအိုပြည်သူ့ ဒီမိုကရက်တစ်သမ္မတနိုင်ငံတော် ဝန်ကြီးချုပ် မစ္စတာ သွန်ဆင်း သမာဗောင်က နေပြည်တော်ရှိ နိုင်ငံတော်သမ္မတ ဦးသိန်းစိန် တည်ခင်းဧည့်ခံသော ညစာစားပွဲတွင် ပြောကြားခဲ့ကြောင်း ဇူလိုင်လ ၁၂ ရက်နေ့ ထုတ် နိုင်ငံပိုင်မီဒီယာများတွင် ဖော်ပြခဲ့သည်။

မြန်မာနိုင်ငံက ၂၀၁၄ ခုနှစ်တွင် အလှည့်ကျ အာဆီယံ ဥက္ကဋ္ဌတာဝန်ယူရေးကို အဖွဲ့ဝင်နိုင်ငံအားလုံးက ကန့်ကွက် ခြင်း မရှိကြောင်း အင်ဒိုနီးရှား သမ္မတ ဆူဆီနိုဘမ်ဘန်းယူဒိုယူနိုက ဂျာကာတာတွင် တရားဝင်ထုတ်ပြန်ကြေငြာခဲ့ပြီး၊ အာဆီယံ၏ အခြေခံမူများတွင် အဖွဲ့ ဝင်နိုင်ငံအားလုံးက သဘော တူညီရမည်ဟု ဖော်ပြထားသည်။

၂၀၁၄ ခုနှစ် အာဆီယံ ဥက္ကဋ္ဌတာဝန်ကို မြန်မာနိုင်ငံမှ တာဝန်ယူနိုင်ခဲ့ပါက မြန်မာနိုင်ငံ၏ ဒီမိုကရေစီဖြစ်ထွန်းရေးနှင့် အမျိုးသားပြန်လည် စည်းလုံးညီညွတ်ရေးကို ယခုထက် ပိုမိုတိုးမြှင့်ဆောင်ရွက်သွားနိုင်မည်ဟု အာဆီယံက မျှော်လင့်ကြောင်း အင်ဒိုနီးရှားသမ္မတက ထည့်သွင်းပြောကြား ခဲ့သည်။

မြန်မာနိုင်ငံသည် ၂၀၀၆ ခုနှစ် အာဆီယံ အလှည့်ကျဥက္ကဋ္ဌတာဝန်ကို အလှည့်ကျော်ခဲ့ပြီးမှ ယခု ၂၀၁၄ ခုနှစ် ဥက္ကဋ္ဌနေရာကိုယူရန် တင်ပြခဲ့ခြင်း ဖြစ်သည်။ အာဆီယံအဖွဲ့ ၏ အထွေထွေအတွင်းရေးမှူးချုပ် ဒေါက်တာဆူရင်းပစ်ဆူ ဝမ်က မြန်မာနိုင်ငံမှ ၂၀၁၄ ခုနှစ် အာဆီယံဥက္ကဋ္ဌလုပ်ရန် ကိစ္စကို အာဆီယံအဖွဲ့ဝင် ၁၀ နိုင်ငံ ခေါင်းဆောင်များက ဆုံးဖြတ်ပါလိမ့်မည်ဟု ပြောကြားခဲ့သည်။

လာအိုနိုင်ငံသည် ၁၉၉၇ ခုနှစ်တွင် မြန်မာနိုင်ငံနှင့်အတူ အာဆီယံအဖွဲ့ ဝင်ဖြစ်လာခဲ့ပြီး ၂၀၁၄ ခုနှစ် အာဆီယံ ဥက္ကဋ္ဌတာဝန်ကို လာအိုနိုင်ငံမှ တာဝန်ယူရန် အလှည့်ကျသော်လည်း ၂၀၁၄ ခုနှစ် အာဆီယံဥက္ကဋ္ဌတာဝန်ကို မြန်မာနိုင်ငံအား တာဝန်ပေးပြီး ၂၀၁၆ ခုနှစ်တွင်မှ အလှည့်ကျော် တာဝန် ယူရန် တင်ပြခဲ့ခြင်းမှာ လာအိုနိုင်ငံ၏ ပြည်တွင်းရေးကိစ္စများကို ပိုမိုအာရုံစိုက်လို၍ကြောင်း လာအိုနိုင်ငံမှ ဝန်ကြီးချုပ် မစ္စတာသွန်ဆင်းသမာဗောင်က ပြော ကြားခဲ့သည်။

အာဆီယံ ဥက္ကဋ္ဌ တာဝန်ကို အက္ခရာစဉ်အရ အလှည့်ကျတာဝန်ယူ ဆောင်ရွက်ခြင်း ဖြစ်ကြောင်းသိရသည်။

(The Voice Weekly ၊ အတွဲ-၇၊ အမှတ်-၃၁ ပါ “၂၀၁၄ ခုနှစ် မြန်မာ အာဆီယံဥက္ကဋ္ဌတာဝန်ယူရန် လာအိုထာက်ခံ” သတင်းအား အကျဉ်း ချုံး ဖော်ပြသည်)

-----------------------------------------------------------------------------------------------------------------------------------

 

NDF ပါတီမှ ရည်ညွှန်းစာကြည့်တိုက်နှင့် လူထုဆက်သွယ်ရေးစင်တာ တည်ထောင်မည်

၂၀၁၀ ရွေးကောက်ပွဲဝင် အမျိုးသားဒီမိုကရေစီအင်အားစုပါတီမှ ရည်ညွှန်းစာကြည့်တိုက်နှင့် လူထုဆက်သွယ်ရေးစင်တာကို တည်ထောင် သွားမည်ဖြစ်ကြောင်း သိရသည်။

NDF ပါတီမှ တည်ထောင်မည့် ရည်ညွှန်းစာကြည့်တိုက်နှင့် လူထုဆက်သွယ်ရေးစင်တာကို သြဂုတ်လပိုင်းတွင် စတင်တည်ထောင်မည်ဖြစ်ပြီး ရည်ညွှန်းစာကြည့်တိုက်နှင့် လူထုဆက်သွယ်ရေးစင်တာတည်ထောင်ရခြင်း ရည်ရွယ်ချက်မှာ လွှတ်တော်တွင်း၌ NDF ပါတီမှ လွှတ်တော်ကိုယ်စား လှယ်များ၏ အဆိုတင်သွင်းမှုကို အထောက်အကူပြုနိုင်စေရန် တည်ထောင်ခြင်းဖြစ်ကြောင်း သိရသည်။

လူထုဆက်သွယ်ရေးစင်တာမှ အဓိကလုပ်ဆောင်ရမည့်လုပ်ငန်းမှာ ပြည်သူလူထုမှ မိမိဆက်သွယ်လိုသည့် လွှတ်တော်ကိုယ်စား လှယ်များအား ဆက်သွယ်လိုလျှင် ၎င်းစင်တာမှ တစ်ဆင့်ခံဆက်သွယ်ဆောင်ရွက်ပေးမည်ဖြစ်ကြောင်း သိရသည်။

NDF ပါတီမှ တည်ထောင်မည့် ရည်ညွှန်းစာကြည့်တိုက်တွင် NDF ပါတီမှ ပါတီဝင်များသာမက အခြားပါတီများမှ လွှတ်တော်ကိုယ်စားလှယ် များ၊ ပါတီဝင်များနှင့် ပြည်သူလူထုကပါ လာရောက်လေ့လာနိုင်ကြောင်း သိရသည်။

NDF ပါတီမှ တည်ထောင်မည့် ရည်ညွှန်စာကြည့်တိုက်နှင့် လူထုဆက်သွယ်ရေးစင်တာ ဖွင့်လှစ်ရန် အစည်းအဝေးသို့ အမျိုးသားဒီမိုကရေစီ အင်အားစုပါတီမှ ပါတီခေါင်းဆောင် ဦးခင်မောင်ဆွေ၊ NDF ပါတီမှ လွှတ်တော်ကိုယ်စားလှယ်များ၊ ပါတီ ဗပာိုအလုပ်အမှုဆောင်အဖွဲ့များနှင့် မြို့နယ် အမျိုးသားဒီမိုကရေစီအင်အားစု ပါတီတာဝန်ခံများ တက်ရောက်ခဲ့ကြောင်း သိရသည်။

(Envoy၊ အတွဲ-၂၊ အမှတ်-၁၃ ပါ “ရည်ညွှန်းစာကြည်တိုက်နှင့် လူထုဆက်သွယ်ရေးစင်တာ NDF ပါတီတည်ထောင်” သတင်းအား အကျဉ်း ချုံး ဖော်ပြသည်)

 ×××××××××××××××××××××