Posts
DVB
ကုလသမဂ္ဂသို့ အာရှ လူ့အခွင့်အရေး ကာကွယ်ရေး အဖွဲ့တစ်ခုက ပေးပို့သော အိတ်ဖွင့် ပေးစာ တစ်စောင်အရ မြန်မာနိုင်ငံတွင် လတ်တလော ၁၀ နှစ်တာ ကာလအတွင်း ညှဉ်းပန်း နှိပ်စက်မှုများ ပိုမို ကျယ်ပြန့်လာကြောင်း သိရှိရပါသည်။
ဟောင်ကောင် အခြေစိုက် အာရှ လူ့အခွင့်အရေး ကော်မရှင် (AHRC) ၏ အမှုဆောင် ဒါရိုက်တာက Basil Fernando က လက်မှတ် ရေးထိုးကာ ပေးပို့သော စာအရ ညှဉ်းပန်းနှိပ်စက်မှုများ ကျယ်ပြန့်လာသည့် ကိစ္စတွင် တရားရုံးချုပ်၏ ဘက်လိုက် တရားစီရင်မှုများလည်း ပါဝင်ကြောင်း၊ အထူးသဖြင့် အာဏာရ အုပ်ချုပ်သူများ၏ ညှဉ်းပန်း နှိပ်စက်မှု ဆိုင်ရာ သက်သေ အထောက်အထားများကို လျစ်လျူရှု ထားပေးခြင်း၊ မျက်နှာလိုက် ဦးစားပေးခြင်း (သို့မဟုတ်) အမိန့် ထုတ်ပေးခြင်း စသည်တို့ ရှိနေကြောင်း သိရပါသည်။
လတ်တလောတွင် မြန်မာနိုင်ငံ တရားရုံးချုပ်သည် လုပ်ပိုင်ခွင့်များကို အသုံးပြုကာ ညှဉ်းပန်း နှိပ်စက်မှုများ လုပ်ဆောင်နိုင်သည့် အမိန့်များ ထုတ်ပြန်ပေးထားကြောင်း Basil Fernando က ပြောကြားပါသည်။
ကုလသမဂ္ဂ၏ ညှဉ်းပန်း နှိပ်စက်မှုများ ဆိုင်ရာ အထူး ညှိနှိုင်းရေးမှူးသို့ ပေးပို့သော စာတွင် မနှစ်မြို့စရာ စွဲချက်တင် အရေးယူမှုများကို တွေ့ရကြောင်း၊ အကျဉ်းကျသူ အများအပြားကို ညှဉ်းပန်း နှိပ်စက်ရာတွင် သုဿာန် သင်္ချိုင်းနှင့်ပင် နှိုင်းယှဉ်၍ ရလောက်သော လွန်ကဲစွာ နှိပ်စက်မှုများ ရှိနေကြောင်း ဖော်ပြပါရှိသည်။
ထိုသို့ နှိပ်စက် ညှဉ်းပန်းမှုများကို ဒီမိုကရေစီ ရရှိရေးအတွက် တက်ကြွစွာ လှုပ်ရှားခဲ့သော ဒေါက်တာဝင့်သူနှင့် အခြားသော ရှစ်ဦးအပေါ် အသုံးပြုခဲ့ကြောင်း အဆိုပါစာက ဆိုပါသည်။ သံဃာတော် တစ်ပါးကို စစ်ကြော မေးမြန်းရာတွင် စစ်ကြောသူ အရာရှိက အဆိုပါ သံဃာတော်အား ဒူးထောက် ထိုင်စေကာ ခြေသလုံး ကြွက်သားပေါ်သို့ အကြိမ်ကြိမ် တက်ခုန်ကြောင်း၊ သိလိုသည့် အဖြေ မရပါက ဦးခေါင်းကို သစ်သားတုတ်ဖြင့် ရိုက်နှက်ကြောင်း အဆိုပါ စာတွင် ရေးသားထားသည်။
မြန်မာ့ နိုင်ငံရေး အကျဉ်းသားများ အကူအညီ အထောက်အပံ့ ပေးရေး အဖွဲ့(AAPP) မှ ဦးဘိုကြည်ကမူ ယခုကဲ့သို့သော ညဉ်းပန်း နှိပ်စက်မှုများ ဖြစ်ပေါ်နေခြင်းသည် တရားရုံးချုပ်နှင့် သက်ဆိုင်မှု မရှိဟု ထင်မြင်မိကြောင်း ပြောဆိုပါသည်။
"ဒီကိစ္စတွေက တရားရုံးချုပ်နဲ့ မပတ်သက်ပါဘူး။ ဘာဖြစ်လို့လဲ ဆိုတော့ တရားရုံးချုပ် ကိုယ်တိုင် ကိုယ်၌က ဘာပါဝါမှ မရှိလို့ပါပဲ။ အားလုံးဟာ စစ်ထောက်လှမ်းရေးရဲ့ ထိန်းချုပ်မှု အောက်မှာပဲ ရှိနေတာပါ။ ဥပဒေ စည်းမျဉ်းစည်းကမ်း ဆိုတာ လုံးဝ မရှိပါဘူး" ဟု ဦးဘိုကြည်က ပြောပါသည်။
ထို့ပြင် ၎င်းက ယခုလို နှိပ်စက် ညှဉ်းပန်းမှုများ ပြုလုပ်ခြင်းသည် သက်သေ အထောက် အထားများ ရယူလိုသောကြောင့် ဟုတ်နိုင်၊ မဟုတ်နိုင် ဟူသည်ကို ဆန်းစစ်မိကြောင်း ပြောပါသည်။
တရားဥပဒေ ကြီးစိုးမှုသာ ရှိပါက ညှဉ်းပန်း နှိပ်စက်မှုနှင့် ဘက်လိုက်မှုများလည်း အမြစ်ပင် တွယ်နိုင်မည် မဟုတ်ပေ။ မြန်မာ စစ်အစိုးရသည် အပြစ်ပေးခြင်း၊ ကြိုတင် ဟန့်တားခြင်း စသည့် ရည်ရွယ်ချက်ဖြင့် ယခုကဲ့သို့ ရက်စက် ကြမ်းတမ်းသော နှိပ်စက်မှုများ ပြုလုပ်နေခြင်း ဖြစ်သည်။
Basil Fernando က DVB သို့ပြောကြားရာတွင် ယခုအခါ တစ်ကမ္ဘာလုံးတွင် ညှဉ်ပန်း နှိပ်စက်မှုနှင့် ပတ်သက်သော အငြင်းအခုန်များ ပြန်လည် ပြုလုပ်လာသည့် နည်းတူ ညှဉ်းပန်း နှိပ်စက်သည့် နည်းလမ်းများ အသုံးပြုမှုလည်း ကြီးထွားလာကြောင်း ပြောဆိုသည်။
"အမေရိကန် သမ္မတ ဘွတ်ရ်ှနဲ့ ဗြိတိန် ဝန်ကြီးချုပ် တိုနီဘလဲတို့ လက်ထက်မှာ ညှဉ်းပန်း နှိပ်စက်တဲ့ နည်းလမ်းတွေ သုံးခဲ့တဲ့ ကိစ္စကြောင့် နိုင်ငံတကာမှာ စံနှုန်းတွေ ယိမ်းယိုင်သွားအောင် လုပ်သလို ဖြစ်ခဲ့ရပါတယ်။ ဒီလို ညှဉ်းပန်း နှိပ်စက်တဲ့ နည်းလမ်းတွေကို လုပ်ရိုးလုပ်စဉ် တစ်ခုအနေနဲ့ သုံးတာမျိုး ကျွန်တော် တစ်ခါမှ မကြုံဖူးပါဘူး။ ပြောရရင် ကျွန်တော်တို့ တတွေဟာ လူ့အခွင့်အရေး လေးစားမှု လျော့နည်းလာတဲ့ ခေတ်ကာလကြီးထဲ ရောက်နေတယ် ဆိုတာပါပဲ" ဟု ၎င်းက ပြောပါသည်။
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.