Transparency Myanmar

transparency.myanmar@gmail.com

yangonchronicle 2011
yangonchronicle 2011

၃၁.၃.၂၀၁၁

ပြည်တွင်းသတင်းများ

နိုင်ငံတကာကုမ္ပဏီများ လာရောက်သော်လည်း အရာမထင်

ရန်ကုန်၊ မတ် ၃၀။

မြန်မာနိုင်ငံရှိ စီးပွားရေးလုပ်ငန်းရှင်များနှင့် စီးပွားရေးလုပ်ငန်းများကို လာရောက်လေ့လာသော နိုင်ငံတကာ ကုမ္မဏီများရှိသော်လည်း နိုင်ငံခြား ရင်းနှီးမြုပ်နှံမှုများအတွက် ဆွဲဆောင်နိုင်သော မက်လုံးများမရှိပါက အကြောင်းထူးနိုင် ခြင်းမရှိဟု စီးပွားရေးပညာရှင်တစ်ဦးက ဆိုသည်။

“အခုတလော UMFCCI တို့ MFF တို့ကို နိုင်ငံတကာက စီးပွားရေးလုပ်ငန်းရှင်တွေ လာနေတယ်လေ။ သူတို့ လာတာကလည်း တစ်ဖွဲ့ပြီးတစ်ဖွဲ့ လာကြတယ်။ ဒီကလုပ်ငန်းရှင်တွေကလည်း တွေ့ကြတယ်။ ပြီးတော့ ပြန်သွားတယ်။ ဘာထူးလာလဲဆိုတာ မတွေ့ရသေးဘူး။ နိုင်ငံတကာက မြန်မာနိုင်ငံ မှာ ရင်းနှီးမြုပ်နှံချင်တယ်ဆိုတာတော့ ဟုတ်တယ်။ သူတို့မှာလည်း သူတို့ရဲ့ရင်းနှီးမြုပ်နှံမှုအတွက် အကာအကွယ်ပေးတာတွေလည်း လိုချင်မှာပေါ့။ ထားဝယ် စီးပွားရေးဇုန် ဥပဒေလို နိုင်ငံပိုင်မသိမ်းပါဘူးဆိုတဲ့ အာမခံချက်တွေ အခွန်နဲ့ပတ်သက်တာတွေကို သူတို့ကလိုချင်တယ်။ ဒါပေမယ့် ဒီဇုန်ကလွဲလို့ တခြားနေရာတွေမှာလုပ်ရင် ကာကွယ်မှုတွေက မရှိသလောက်ရှားတော့ သူတို့တွေလည်း ပြန်စဉ်းစားတာတွေ ရှိမယ်။ ဒီတော့ တည်ငြိမ်မှုကို မပြနိုင်တာတို့ ပုဂ္ဂလိကကို အားမပေးတာတို့ဆိုရင်တော့ ဘာမှမထူးလာနိုင်ဘူး။ ထားဝယ်ဇုန်ကလွဲလို့ နောက်နေရာတွေမှာ ဘယ်ရင်းနှီးမြုပ်နှံမှုမှ မဝင်လာနိုင်ဘူး။”ဟု ၎င်းက ဆက်လက်ပြောကြားသည်။

ပြည်တွင်းထွက်ကုန်များအား ပြည်ပသို့တင်ပို့ရာတွင် အခွန်အဖြစ် ၁၀ရာခိုင်နှုန်းပေးနေရသည့်အတွက် နိုင်ငံတကာဈေးကွက်တွင် မိမိတို့နိုင်ငံမှ ထွက်ကုန်များမှာ အခြားနိုင်ငံများမှတင်ပို့သော ထွက်ကုန်များထက် ကုန်ဈေးနှုန်းကြီးမြင့်နေမှုများရှိပြီး နိုင်ငံခြားရင်းနှီးမြုပ်နှံသူများအနေဖြင့် အဓိကထည့် သွင်းစဉ်းစားသည့် ဒုတိယအချက်မှာ အခွန်ကြီးမြင့်နေမှုဖြစ်သည်ဟု ရေလုပ်ငန်းရှင်တစ်ဦးက ဆိုသည်။

မြန်မာနိုင်ငံရှိ စီးပွားရေးလုပ်ငန်းအသီးသီးမှစီးပွားရေးလုပ်ငန်းရှင်များနှင့် ဆွေးနွေးမှုများပြုလုပ်ရန်အတွက် နိုင်ငံတကာမှ စီးပွားရေးလုပ်ငန်း ရှင်များ လာရောက်လျှက်ရှိရာ မတ်လ ၂၉ ရက်တွင် UMFCCI ၌ မလေးရှားနိုင်ငံမှ စီးပွားရေးလုပ်ငန်းရှင်များနှင့် တွေ့ဆုံရန်ရှိကြောင်း စီးပွားရေးလုပ်ငန်း ရှင်တစ်ဦးက ဆိုသည်။

(ကျော်စွာ)

-------------------------------------------------------------------------------------------------------------

ရန်ကုန်မှ အခြေနေမဲ့ ၄၀၀ကျော် ရခိုင်သို့ပို့

ရန်ကုန်၊ မတ် ၃၀။

ရန်ကုန်တိုင်းဒေသကြီးအတွင်းရှိ အခြေနေမဲ့ အယောက် ၄၀၀ ကျော်ကို ရခိုင်ပြည်နယ်ရှိ ဘဝသစ် အိမ်ယာစီမံကိန်းသို့ မတ်လ ၂၈ရက်နေ့တွင် သက်ဆိုင်ရာမှ ပို့ဆောင်ပေးလိုက်ကြောင်းသိရသည်။

“မြို့နယ် လေးဆယ်ငါးမြို့နယ်က မိသားစုတစ်ရာလေးဆယ် သုံးစုကို ထောက်ပံ့ငွေတွေနဲ့အတူ ပို့ပေးလိုက်ပြီ။” ဟု ဗိုလ်တစ်ထောင်မြို့နယ် ရဲတပ်ဖွဲ့မှ တာဝန်ရှိသူတစ်ဦးကပြောသည်။

နေအိမ်ဆောက်ပေးခြင်း၊ လယ်ယာမြေပေးခြင်းအပြင် ဆိုက္ကား၊ အပ်ချုပ်စက်များထောက်ပံ့ပေးခဲ့ရာ တစ်မိသားစုစီကို ကျပ်ငွေရှစ်သိန်းနီးပါးခန့် ထောက်ပံ့ပေးလိုက်ကြောင်း၎င်းကပြောကြားသည်။

ကျန်းမာရေးဝန်ကြီးဌာန၊ စက်မှု(၁)ဝန်ကြီးဌာန၊ စွမ်းအင်ဌာနနှင့် နယ်စပ်စည်ပင်ဝန်ကြီးဌာနတို့မှ ယင်းကဲ့သို့ ထောက်ပံ့ပေးခဲ့ ကြကြောင်းသိရ သည်။ ပို့ဆောင်ပေးလိုက်သောမိသားစုများမှာ ရန်ကုန်တိုင်းရဲတပ်ဖွဲ့မှ စုဆောင်းထားသော အခြေအနေမဲ့များအပါဝင် လွတ်ရက်နီးနေပြီဖြစ်သော အကျဉ်း သားမိသားစု ၆၁စုလည်း ပါဝင်ကြောင်းသိရသည်။

ဘဝသစ်စီမံကိန်းကို ၁၉၉၉ခုနှစ်တွင် စတင်တည်ထောင်ခဲ့ပြီး နှစ်စဉ်မြန်မာပြည်အနှံ့ရှိ အခြေနေမဲ့များကို သက်ဆိုင်ရာမှ ပို့ဆောင်ပေးခဲ့ရာ ၂၀၁၀ခုနှစ်တွင် မိသားစုနှစ်ထောင်နီးပါး နေထိုင်လျက်ရှိကြောင်း သိရသည်။

Peace Press

-------------------------------------------------------------------------------------------------------------

အစိုးရသစ် မလာမီ နောက်ဆုံးအသုတ် ဈေးရောင်းပွဲကြီး ပြီးစီး

ရန်ကုန်၊ မတ် ၂၉။

နိုင်ငံပိုင်အဆောက်အဦးများအား လေလံတင်ရောင်းချနေမှုများတွင် နောက်ဆုံးအသုတ်ဖြစ်သည့် ရန်ကုန်တိုင်းဒေသကြီးအတွင်းရှိ အစိုးရရုံး အဖြစ်အခြေစိုက်ခဲ့သည့် နိုင်ငံပိုင်အဆောက်အဦး အများဆုံးပါဝင်သော လေလံတင်ရောင်းချမှုကို  မတ်လ ၁၉ ရက်နေ့က နေပြည်တော်တွင် လေလံ အောင် စာရင်း ထုတ်ပြန်ခဲ့ရာ ကျပ်သန်းပေါင်း ၂၃၂၇၇၃ သန်းကျော် ရောင်းချခဲ့ရကြောင်း ထုတ်ပြန်သော စာရင်းများအရ သိရှိရသည်။

မတ်လ ၃၁ ရက်နေ့တွင် နအဖအဖွဲ့၏ အာဏာသက်ရောက်မှုသည် ပြီးဆုံးတော့မည်ဖြစ်ပြီး လေလံတင်ရောင်းချပွဲများအား မြန်မာနိုင်ငံတစ်ဝှမ်းရှိ မြို့ကြီးပေါင်း ၅ မြို့တွင် နိုင်ငံပိုင်ပစ္စည်းမျိုးစုံအား လေလံတင်ရောင်းချမှုများ ပြုလုပ်နေသည်မှာ ၃ နှစ်ပတ်ဝန်းကျင်ခန့် ရှိပြီဖြစ်သော်လည်း လေလံအောင် ခဲ့သော ပစ္စည်းစုစုပေါင်းအား ရောင်းချရာမှရရှိခဲ့သော ငွေပမာဏအား အများပြည်သူများကြားသို့ ထုတ်ပြန်ခြင်းမရှိခဲ့သည်ကို တွေ့ရသည်မှာ မှန်ကန်မှု မရှိကြောင်း စီးပွားရေး ပညာရှင်တစ်ဦးက ပြောကြားသည်။

“နိုင်ငံပိုင်ဆိုတဲ့ခေါင်းစဉ်တပ်ပြီး နိုင်ငံသားတွေကို ဘာတွေ၊ ဘယ်လောက်ရောင်းရတယ်ဆိုတာကို ပြည်သူတွေဆီကို သတင်းထုတ်ပြန်မှုတွေ မလုပ်တာဟာ မရိုးသားဘူးလို့ ဆိုချင်ပါတယ်။ အခုနောက်ဆုံးအသုတ်ရောင်းရငွေပမာဏကို ကြည့်တာနဲ့တင် သူတို့တွေရောင်းချတာ ဘယ်လောက် တန်ကြေးရှိနိုင်တယ်ဆိုတာက မခန့်မှန်းနိုင်အောင် ဖြစ်နေပြီ။ တချို့ရောင်းရငွေတွေကို ထုတ်ပြန်တဲ့နေရာမှာလည်း ဥပမာဆိုရင် ငွေကျပ်သန်းပေါင်း ၂၃၀ ကျော် ဆိုပြီး ထုတ်ပြန်တာတွေ ရှိတယ်လေ။ သူတို့ပြောတဲ့ “ကျော်”ဆိုတာ ဘယ်လောက်ဆိုတာက စဉ်းစားစရာပါ”ဟုဆိုသည်။

လေလံပွဲများတွင် လေလံအောင်သူအများစုသည် နအဖထိပ်သီးခေါင်းဆောင်များနှင့် ရင်းနှီးသူများဖြစ်နေပြီး လေလံပွဲ၏နောက်ကွယ်တွင် မည် သို့သော အကြောင်းတရားများရှိမည်ဆိုသည်မှာ စဉ်းစားဖွယ်ရာဖြစ်လာကြောင်း မြန်မာ့အရေးလှုပ်ရှားသူတစ်ဦးက ဆိုသည်။

အစိုးရရုံးစိုက်ရာ နေပြည်တော်အား တည်ဆောက်ရာတွင် ကုန်ကျသွားသော ငွေများနေရာတွင် ပြန်လည်အစားထိုးရန်အတွက် ယင်းသို့သော လေလံတင် ရောင်းချမှုများကို ပြုလုပ်လာရကြောင်း သိရှိရသည်။

(ကျော်စွာ)

-------------------------------------------------------------------------------------------------------------

၄၇ရက်အကြာ တရားရင်ဆိုင်ပြီးမှ ဒန်ကလေအား အာမခံထုတ်ခွင့်ပြု

ရန်ကုန်၊ မတ် ၂၉။

မြန်မာတိုင်းမ်ဂျာနယ်၏ အမှုဆောင်အရာရှိချုပ်ဟောင်း မစ္စတာရော့စ်ဒန်ကလေ အား၄၇ ရက်ကြာ တရားရင်ဆိုင်ပြီးမှ အာမခံနှင့် အင်းစိန်ထောင် အချုပ်ခန်းမှ လွတ်မြောက်လာပြီ ဖြစ်ကြောင်းသိရသည်။

လူဝင်မှုကြီးကြပ်ရေး ဥပဒေချိုးဖောက်မှုနှင့် အမျိုးသမီးတစ်ဦးကို နာကျင်အောင်ပြုလုပ်မှုတို့ဖြင့် မစ္စတာရော့စ်ဒန်ကလေကို ယခုနှစ် ဖေဖော်ဝါ ရီလ ၁ဝ ရက်နေ့တွင် ဖမ်းဆီးခဲ့ပြီး အင်းစိန်ထောင်တွင် ထိန်းသိမ်းထားခဲ့ပြီးမှ မတ်လ ၂၉ ရက်နေ့တွင် အာမခံဖြင့် လွှတ်ပေးလိုက်ပြီဖြစ်ကြောင်း သိရ သည်။

“တကယ်ဆိုရင် မစ္စတာဒန်ကလေအမှုက အာမခံပေးသင့်နေတာကြာလှပြီ။ ဒါပေမဲ့ အခုမှပေးတယ်။” ဟု ရန်ကုန်မြို့နေ ရှေ့နေတစ်ဦးက ဆို သည်။

ယခုလက်ရှိ မြန်မာတိုင်းမ်ဂျာနယ်၏ အမှုဆောင်အရာရှိချုပ်အဖြစ် လွှဲပြောင်းတာဝန်ယူလိုက်သူ ဒေါက်တာတင်ထွန်းဦးနှင့် မြန်မာတိုင်းမ်ဂျာနယ် မန်နေဂျာ ဦးဝေလင်းတို့မှ ကျပ်ငွေ သိန်း ၅၀ စီဖြင့် စုစုပေါင်း သိန်း ၁၀၀ ကို အာမခံ တင်ပေးလိုက်ကြောင်းသိရသည်။

နှစ်ဖက်လျှောက်လဲချက်များကို ကမာရွတ်မြို့နယ်တရားရုံးတွင် အပြန်အလှန်သုံးသပ်ခဲ့ပြီး မစ္စတာဒန်ကလေသည် နှလုံးရောဂါကြောင့် ဆေးဝါး ကုသမှုခံနေရသူဖြစ်ကြောင်း၊ မြန်မာတိုင်းမ်ဂျာနယ်၏ အမှုဆောင်အရာရှိချုပ်အဖြစ် တာဝန်ယူခဲ့ဖူးသူဟူသော ဂုဏ်သိက္ခာများကြောင့် ယခုကဲ့သို့ အာမခံ ပေးလိုက်ခြင်းဖြစ်ကြောင်း ကမာရွတ်မြို့နယ် တရား သူကြီးမှ ဖတ်ကြားခဲ့သည်။