Posts
 | yangonchronicle 2011 |
၇.၈.၂၀၁၁
ပြည်တွင်းသတင်းများ
ပုဂ္ဂလိက မီဒီယာအချို့ နယ်သတင်းထောက်များ ရှားပါး
ပုဂ္ဂလိက မီဒီယာများအား နေ့စဉ်ထုတ်သတင်းစာများ ထုတ်ဝေခွင့်ပေးမည်ဟု သတင်းများ ထွက်ပေါ်လာပြီးနောက် နေ့စဉ်ထုတ် သတင်းစာများ ထုတ်ဝေရန် ရည်ရွယ်ထားသော မီဒီယာများအနေဖြင့် နယ်သတင်းထောက်များကို ယခုအချိန်မှစတင်ကာ ခေါ်ယူလျက်ရှိရာ လာရောက် လျှောက်ထားသူ အလွန်နည်းပါကြောင်း သတင်းရရှိသည်။
အစိုးရမှ နေစဉ်ထုတ် သတင်းစာများ ပေးလာခဲ့လျှင် အခက်အခဲများ မရှိစေရန် ပုဂ္ဂလိက မီဒီယာအချို့မှ ကြိုတင် ပြင်ဆင်မှုများ ပြုလုပ်လျက်ရှိရာ သတင်းစာ ထုတ်နိုင်ရန်အတွက် ပြင်ဆင်ထားရှိမှုများနည်းတူ အရည်အချင်း ပြည့်ဝသော နယ်သတင်းထောက်များ ရရှိနေစေရန် ယခုအချိန်မှစတင်ကာ နယ်သတင်းထောက်များကို ခေါ်ယူလျက်ရှိရာ လာရောက် လျှောက်ထားသူ နည်းပါးသဖြင့် မီဒီယာများအနေဖြင့် ရွေးချယ်စရာ မရှိသလောက်ပင် နည်းပါး နေကြောင်း သိရသည်။
မြန်မာတိုင်း(မ်)ဂျာနယ်မှ အယ်ဒီတာဦးဇော်မြင့်က မည်သည့်သတင်းစာဖြစ်စေ နယ်သတင်းများ ဖော်ပြရမည့်နည်းတူ အရည်အချင်းပြည့်ဝသော နယ်သတင်းထောက်များလည်း မဖြစ်မနေ လိုအပ်လျက်ရှိကြောင်း ပြောကြားသည်။
နယ်သတင်းများကို သွားရောက်ရယူရာတွင် အဓိက ကြုံတွေ့ရသော အခက်အခဲမှာ အချို့သောဒေသများတွင် သက်ဆိုင်ရာ အာဏာပိုင် အဖွဲ့ အစည်းများ၏ တားမြစ်ပိတ်ပင်ခြင်းများဖြစ်ကြောင်း သတင်းထောက်တစ်ဦးမှ ပြောကြားသည်။ ထို့ပြင် ရန်ကုန်နှင့် အခြားနယ်မြို့များကို နှိုင်းယှဉ်ပါက သတင်းမီဒီယာအပေါ် သဘောထားမှုများမှာ ကွာဟချက်များ ရှိနေပြီး ပြည်သူလူထုအနေဖြင့်လည်း သတင်းမီဒီယာများနှင့် ပတ်သတ်ရန် စိုးရွံ့နေခြင်းများ ရှိနေကြောင်း သိရသည်။
မြန်မာနိုင်ငံတွင် အပတ်စဉ်ထုတ်ဝေလျက်ရှိသော ဂျာနယ် ၁၅၀ ကျော်ရှိပြီး သုံးပုံတစ်ပုံခန့်သည် သတင်းဂျာနယ်များ ဖြစ်ကြောင်းသိရသည်။ ထိုထဲတွင် အားလုံးနီးပါသည် ရန်ကုန်အခြေစိုက် ထုတ်ဝေသော ဂျာနယ်များဖြစ်သော်လည်း မြန်မာနိုင်ငံဒေသအနှံ့ သတင်းများကို ယခင်ထက် ပိုမို ထည့်သွင်း ဖော်ပြနေကြသည်ကိုတွေ့သည်။
Ref: Bi Weekly Eleven
-----------------------------------------------------------------------------------------------------------------------------------
အိန္ဒိယအလှူငွေ ဒေါ်လာ ၆ သန်းကို လူမှုရေးလုပ်ငန်းများတွင် အသုံးပြုမည်
ချင်းပြည်နယ် ဖွံ့ဖြိုးတိုးတက်ရေးအတွက် အိန္ဒိယနိုင်ငံမှ ပထမဆုံးလှူဒါန်းသည့် အလှူငွေများကို ချင်းပြည်နယ် ဖွံ့ဖြိုးတိုးတက်ရေးအတွက် အသုံးပြုသွားမည်ဖြစ်ကြောင်း မန္တလေးမြို့အခြေစိုက် အိန္ဒိယကောင်စစ်ဝန်ရုံးမှ ကောင်စစ်ဝန် Dr.Mada Mohan Sethi က ဇူလိုင်လ ၂၈ ရက်နေ့တွင် ချင်းပြည်နယ် မြို့တော် ဟားခါးမြို့၌ ပြောကြားခဲ့ကြောင်း သတင်း ရရှိသည်။
အိန္ဒိယ ကောင်စစ်ဝန် Dr.Mada Mohan Sethi သည် ချင်းပြည်နယ် အစိုးရအဖွဲ့မှ တာဝန်ရှိသူများနှင့် တွေ့ဆုံပြီးနောက် ချင်းပြည်နယ် ဖွံ့ဖြိုး တိုးတက်ရေးအတွက် ပထမဆုံးအကြိမ်လှူဒါန်းမည့် ဒေါ်လာ ၆ သန်းကို ချင်းပြည်နယ်တွင်းရှိ ပြည်သူများ၏ ကျန်းမာရေး၊ ပညာရေးနှင့် လူမှုရေးကိစ္စများ ဖွံ့ဖြိုးတိုးတက်ရေးအတွက် အသုံးပြုသွားမည်ဖြစ်ကြောင်း ပြောကြားခဲ့သည်။
အိန္ဒိယနိုင်ငံမှ ပထမဆုံးအကြိမ်အဖြစ် ဒေါ်လာ ၆ သန်းကို လှူဒါန်းမည်ဟု ပြောကြားခဲ့သော်လည်း နှစ်ကာလ သတ်မှတ်ချက်ကိုမူ အတိအကျ သတ်မှတ်ထားခြင်း မရှိသေးကြောင်း ပြောကြားပြီး ပထမအဆင့်အနေဖြင့် ဒေါ်လာ ၂ သန်း လှူးဒါန်းသွားမည်ဖြစ်ကြောင်း ပြောကြားခဲ့သည်။ အိန္ဒိယ ကောင်စစ်ဝန်သည် ချင်းပြည်နယ်သို့ ဇူလိုင်လနောက်ဆုံးပတ်တွင် သွားရောက်ခြင်းမှာ ပထမဆုံးအကြိမ်ဖြစ်ပြီး အိန္ဒိယနိုင်ငံမှ ချင်ပြည်နယ်အား အလှူငွေ ပေးအပ်ခြင်းသည်လည်း ပထမဆုံးအကြိမ်ဖြစ်ကြောင်း သိရသည်။
Ref : Favourite News
-----------------------------------------------------------------------------------------------------------------------------------
ရာသီဥတု ဖောက်ပြန်ခြင်းနှင့် စပါးဈေးကျဆင်းမှုတို့ကြောင့် တောင်သူများ အရှုံးပေါ်
မြန်မာနိုင်ငံ၌ ဖြစ်ပေါ်လျက်ရှိသည့် ရာသီဥတု ဖောက်ပြန်ခြင်းနှင့် စပါးဈေး ကျဆင်းမှုတို့ကြောင့် နွေစပါး စိုက်ပျိုးသည့် တောင်သူအများစုမှာ အရှုံးနှင့် ရင်ဆိုင်တွေ့ခဲ့ရကြောင်း သိရသည်။
ယခု လက်ရှိ နွေစပါးဈေးမှာ စပါးတင်းတစ်ရာလျှင် ကျပ် ၂၇၀,၀၀၀ ဖြစ်သည့်အတွက် နွေစပါးစိုက်ပျိုးစရိတ်များ မကာမိသည့်အပြင် ရာသီဥတု ဖောက်ပြန်ခြင်းများ၊ စိုက်ပျိုးစရိတ် မြင့်မားလာခြင်းများကြောင့် တောင်သူများမှာ အခက်အခဲ များစွာနှင့် လုပ်ကိုင်နေကြရကြောင်း သိရသည်။
ထို့ပြင် ဇူလိုင်လ အတွင်း၌ မိုးသည်းထန်စွာ ရွာသွန်းမှုများကြောင့် မြန်မာနိုင်ငံရှိ အဓိကဆန်စပါး ထွက်ရှိရာ ဒေသများဖြစ်သော ဧရာဝတီတိုင်း ဒေသကြီး၊ ပဲခူးတိုင်းဒေသကြီးနှင့် ရခိုင်ပြည်နယ်တို့တွင် ရေလွှမ်းမိုးမှုများ ဖြစ်ပေါ်ခဲ့ပြီး စပါး စိုက်ပျိုးခင်း အများအပြား ပျက်စီးဆုံးရှုံးခဲ့ရကြောင်း သိရသည်။
ထိုသို့ ပြဿနာအခက်အခဲ များပြားသည့် တောင်သူများအတွက် နိုင်ငံတော်မှလည်း စိုက်ပျိုးစရိတ် ချေးငွေ ပိုမိုထုတ်ချေးပေးနိုင်ရန် စီစဉ် ဆောင်ရွက် ပေးလျက်ရှိကြောင်း သိရသည်။
သို့သော် မြန်မာနိုင်ငံအထက်ပိုင်း ဒေသများတွင် မိုးရွာသွန်းမှုနည်းပါးပြီး စပါးအထွက်နှုန်း ကောင်းမွန်သည့်အပြင် မြန်မာနိုင်ငံ အောက်ပိုင်း ဒေသများတွင်လည်း ဆန်တင်သွင်းမှု များပြားလာသည့်အတွက် ဆန်စပါးဈေးမှာ အနည်းငယ် ပြန်လည်မြင့်တတ်လာခဲ့ကြောင်း သိရသည်။
ရေနက်ကွင်း စိုက်ဧက အထွက်နှုန်းမှာ တစ်နိုင်ငံလုံးအတိုင်းအတာနှင့် တစ်ဧကလျင် ပျမ်းမျှ ၆၁ တင်းကျော်ရှိပြီး၊ ပင်လင်ရေငန်ဝင်စိုက် ဧက အထွက်နှုန်းမှာ ၅၆ တင်းကျော်၊ ရေကြီးကွင်း အထွက်နှုန်းမှာ ၆၆ တင်းကျော်နှင့် သဲဆန်ကုန်း ကြောမြေများတွင် တစ်ဧကလျှင် ၆၄ တင်းကျော် ရှိကြောင်း သိရသည်။
YC
×××××××××××××××××××××××××××××××××××××××××××××××××××××××××××××××××
ပြည်တွင်းပါတီ၊ နိုင်ငံရေးသတင်းများ
ဒေါ်အောင်ဆန်းစုကြည် ခရီးထွက်ရန် နှောင့်နှေးနေ
လုံခြုံရေး အစီအစဉ်များ ပေါက်ကြားမှုကြောင့် မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည် ပဲခူးသို့ ခရီးထွက်မည့် အစီအစဉ် နှောင့်နှေး နေကြောင်း ဗိုလ်ကြီးဝင်းထိန်က ပြောကြားသည်။
သြဂတ်လဆန်းတွင် ပဲခူးရှိ စာကြည့်တိုက်ဖွင့်ပွဲ အခမ်းအနားတက်ရောက်ရန် အစီအစဉ်သည် မီဒီယာများထံ ပေါက်ကြားသွားသဖြင့် ယခုကဲ့သို့ နှောင့်နှေးနေရခြင်း ဖြစ်ကြောင်း ဆက်လက်ပြောကြားသည်။
“CEC တစ်ယောက်က မီဒီယာကို ပြောလိုက်လို့ လုပ်ထားတဲ့ အစီအစဉ်တွေ အကုန်ဖျက်လိုက်ရတယ်။ စာကြည့်တိုက် ဖွင့်မယ့်ရက်ကိုလည်း နောက်ဆုတ် ထားလိုက်ရတယ်။ ခရီးကတော့ သွားမှာပါ”ဟု ဗိုလ်ကြီးဝင်းထိန်က ဆိုသည်။
ပဲခူးရှိ၊ လမ်းပြကြယ် စာကြည့်တိုက်ဖွင့်ပွဲအား ဒေါ်အောင်ဆန်းစုကြည် တက်ရောက်မည်ဆိုသည့်အတွက် ပဲခူးတိုင်းဒေသကြီးရှိ NLD လူငယ် အဖွဲ့ဝင်များ လုံခြုံရေး အစီအစဉ်များအား လုပ်ဆောင်ထားသည်မှာ ပြီးစီးနေပြီဖြစ်ကြောင်း ပဲခူးတိုင်း NLD လူငယ်တစ်ဦးက ဆိုသည်။
“ဇူလိုင်လ မကုန်ခင်ကတည်းက ရုံးချုပ်က လူတွေနဲ့ လုံခြုံရေးကိစ္စတွေ အသင့်ပြင်ထားတာ၊ ဒေါ်အောင်ဆန်းစုကြည် လာမယ့်ရက်ကိုပဲ အသင့် ပြင်ပြီး စောင့်နေရတယ်။ ဘယ်နေ့လာမလဲတော့ မသိဘူး။ ပြီးတော့ မြန်မာ့အသံမှာ စာကြည့်တိုက်မှာထားတဲ့ ဦးဝင်းတင်ရဲ့ ထောင်စာအုပ်နဲ့ ပတ်သက်လို့ အသံလွှင့်ထားတာ ရှိတော့ စိတ်လည်းပူရတယ်”ဟု ဆိုသည်။
ယခုလဆန်းပိုင်းတွင် အမျိုးသားစီမံကိန်းနှင့် ဖွံဖြိုးတိုးတက်ရေး ဝန်ကြီးဌာနမှ ဒု-ဝန်ကြီး ဒေါက်တာကံဇော် ဦးစီးပြုလုပ်မည့် စီးပွားရေး အလုပ်ရုံဆွေးနွေးပွဲသို့ ဒေါ်အောင်ဆန်းစုကြည်အား အထူးဧည့်သည်တော်အဖြစ် ဖိတ်ကြားမည်ဖြစ်ကြောင်း သတင်းများထွက်ပေါ်လာခဲ့သည်။
YC(KS)
-----------------------------------------------------------------------------------------------------------------------------------
ဒုတိယအကြိမ် လွှတ်တော်တွင် ပြည်ခိုင်ဖြိုးပါတီမှ အဆို ၄၀ တင်သွင်းမည်
အစိုးရသစ်မှ ပထမဆုံးအကြိမ် ခေါ်ယူသည့် သြဂုတ် ၂၂ ရက်နေ့တွင် ကျင်းပမည့် ဒုတိယအကြိမ် လွှတ်တော်တွင် ၂၀၁၀ ရွေးကောက်ပွဲတွင် လွှတ်တော်ကိုယ်စားလှယ်နေရာ အများဆုံးရယူထားသည့် ပြည်ခိုင်ဖြိုးပါတီမှ အဆို ၄၀ တင်သွင်းမည်ဖြစ်ကြောင်း ယင်းပါတီ၏ အထွေထွေ အတွင်းရေးမှူး ဦးဌေးဦးက ဆိုသည်။
ပြီးခဲ့သည့် သြဂုတ် ၅ ရက်နေ့က ကုန်သည်စက်မှု/အသင်းချုပ်တွင် မြန်မာနိုင်ငံ ဆန်စပါးလုပ်ငန်းရှင်များနှင့် တွေ့ဆုံပွဲအပြီး၊ သတင်းမီဒီယာ များနှင့် တွေ့ဆုံစဉ် ယင်းသို့ ပြောကြားခဲ့ခြင်း ဖြစ်သည်။
“လွှတ်တော်အစည်းအဝေး မစတင်ခင်မှာ ပြည်ခိုင်ဖြိုးပါတီရဲ့ ဗဟိုကော်မတီဝင် အစည်းအဝေးခေါ်ယူဖို့ ရှိပါတယ်။ အဲဒီ အစည်းအဝေးမှာ လွှတ်တော်ခေါ်တဲ့အခါ တင်သွင်းမယ့် အဆိုတွေ၊ မေးမြန်းမယ့် မေးခွန်းတွေကို ပြင်ဆင်ပါ မယ်”ဟု ဦးဌေးဦးက ဆိုသည်။
ပြည်ခိုင်ဖြိုးပါတီမှ လွှတ်တော်သုံးရပ်တွင် တင်သွင်းမည့် အဆိုများတွင် တောင်သူလယ်သမားများနှင့် ဆက်စပ်သည့်အဆို၊ အလုပ်သမားများနှင့် ဆက်စပ်သည့်အဆို၊ နိုင်ငံခြားငွေ လဲလှယ်နှုန်းနှင့် သက်ဆိုင်သည့် အဆိုများကို ထည့်သွင်းတင်သွင်းမည် ဖြစ်ကြောင်း ဦးဌေးဦးက ထပ်လောင်း ပြောကြား သည်။
အစိုးရသစ်မှခေါ်ယူကျင်းပမည့် ဒုတိယအကြိမ် လွှတ်တော်အစည်းအဝေးများသည် ပထမအကြိမ် ကျင်းပသော လွှတ်တော် အစည်းအဝေးများ ထက် ပို၍ထင်သာ၊ မြင်သာရှိကာ ပွင့်လင်းမှုရှိမည်ဟု ထင်မြင်သည့်အတွက် လွှတ်တော်တွင်းရောက် နိုင်ငံရေးပါတီများကလည်း အဆိုများ၊ မေးခွန်းများ မေးရန် ပြင်ဆင်နေကြကြောင်း သိရှိရသည်။
လွှတ်တော်များ၏ ပထမအကြီမ် ပုံမှန်အစည်းအဝေးကို ၂၀၁၁ခုနှစ် ဇန်န၀ါရီ ၃၁ ရက်မှ မတ် ၃၀ရက်အထိ ကျင်းပပြုလုပ်ခဲ့ပြီး၊ ယင်း အစည်း အဝေးအတွင်း ကိုယ်စားလှယ်များက မေးခွန်း ၁၀၆ ခုနှင့် အဆို ၄၃ ခုတို့အား တင်သွင်းမေးမြန်းခဲ့ရာ မေးခွန်း၁၀၆ ခုကို ဖြေကြားခဲ့ပြီး အဆို ၄၃ ခုအား ဆွေးနွေးဆုံးဖြတ်ချက် ချမှတ်နိုင်ခဲ့သည်။
YC(KS)
-----------------------------------------------------------------------------------------------------------------------------------
အာဆီယံ ပါလီမန်အမတ်များ ညီလာခံသို့ လွှတ်တော် ကိုယ်စားလှယ်များ တက်ရောက်မည်
တိုင်းဒေသကြီးနှင့် ပြည်နယ်အသီးသီးမှ ပြည်သူ့လွှတ်တော်နှင့် အမျိုးသားလွှတ်တော် ကိုယ်စားလှယ်များသည် မြန်မာတင်းပြည့် အဖွဲ့ဝင် ဖြစ်ရေး ဆုံးဖြတ်ဖွယ်ရှိသည့် အာဆီယံပါလီမန် အမတ်များညီလာခံသို့ တက်ရောက်မည်ဖြစ်ကြောင်း သတင်းရရှိသည်။
ယခုနှစ်အတွင်း ကျင်းပမည့် ညီလာခံတွင် မြန်မာနိုင်ငံမှ အာဆီယံပါလီမန်အမတ်များ ညီလာခံသို့ တင်းပြည့်အဖွဲ့ဝင်ဖြစ်ရေးအတွက် ဆုံးဖြတ်ချက် ရယူ ဆောင်ရွက်မည်ဖြစ်ကြောင်း အာဆီယံပါလီမန်အမတ်များ ညီလာခံအလှည့်ကျ သဘာပတိ ကမ္ဘောဒီးယား အမျိုးသားလွှတ်တော် ဥက္ကဋ္ဌ ဟန်ဆင်မရင်က ပြောကြားခဲ့သည်။
ညီလာခံကို စက်တင်ဘာလ ၁၈ ရက်နေ့မှ ၂၄ ရက်နေ့ အထိ ကမ္ဘောဒီးယားနိုင်ငံတွင် ကျင်းပမည်ဖြစ်ကြောင်း အာဆီယံ ပါလီမန်အမတ်များ ညီလာခံ၏ ထုတ်ပြန်ချက်အရ သိရသည်။
အာဆီယံပါလီမန်အမတ်များ ညီလာခံသို့ ပြည်ထောင်စုလွှတ်တော်က တင်းပြည့်အဖွဲ့ဝင်အဖြစ် ပါဝင်ရန် ပြည်ထောင်စုလွှတ်တော် နာယက ဦးခင်အောင်မြင့်က ပြည်ထောင်စု လွှတ်တော်၏ သဘောထားကို ရယူ ခဲ့ရာတွင် ၂၀၁၁ ခုနှစ် မတ်လ ၂၈ ရက်နေ့၌ ပြည်ထောင်စုလွှတ်တော်က သဘောတူ ကြောင်း ကြေညာခဲ့သည်။
အာဆီယံ ပါလီမန်အမတ်များ ညီလာခံတွင် ကမ္ဘောဒီးယား၊ အင်ဒို နီးရှား၊ လာအို၊ မလေးရှား၊ ဖိလစ်ပိုင်၊ စင်ကာပူ၊ ထိုင်း၊ ဗီယက်နမ်နှင့် ဘရူနိုင်း နိုင်ငံတို့က အဖွဲ့ဝင်အဖြစ် ပါဝင်ထားပြီး မြန်မာ တစ်နိုင်ငံတည်းသာ အထူးလေ့လာသူနိုင်ငံအဖြစ် ကျန်ရှိနေခြင်း ဖြစ်သည်။
Ref: Bi Weekly Eleven
×××××××××××××××××××××××××××××××××××××××××××××××××××××××××××××××××
သတင်းနှင့် ဆောင်းပါးများမှ ကောက်နှုတ်ချက်များ
"ဒီတော့ လူနာတွေကလည်း ဆေးကိုသောက်ချင်တဲ့အချိန် သောက်တယ်။ အမျိုးသားက အိပ်ခ်ျအိုင်ဗီ positive ဆိုတာနဲ့ အမျိုးသမီးကို သွေးတောင် မစစ်ခိုင်းဘဲ အေအာရ်တီပေးတယ်။ ကျွန်တော်တို့အဖွဲ့တွေနဲ့ တွေ့ပြီး အိပ်ခ်ျအိုင်ဗီဆိုင်ရာ နှစ်သိမ့်ဆွေးနွေး ပညာပေးလုပ်ပြီး သွေးစစ်ကြည့်တော့ အမျိုးသမီးက negative ပါ။ အမျိုးသားရဲ့ CD4 က ၅၆၀ ဆိုတော့ အေအာရ်ဗီဆေးသောက်ဖို့ မလိုသေးဘဲ သောက်နေရတယ်"
သြဂုတ် ၅ ထုတ် မြန်မာတိုင်းမ် အတွဲ (၂၇) အမှတ် (၅၂၉) တွင်ပါသည့် "ဆရာဝန်အချို့ကြောင့် အိပ်ခ်ျအိုင်ဗီပိုးရှိ လူနာများ နစ်နာမှုရှိနေ" သတင်းမှ HIC Hotline Initiative Group မှာ တာဝန်ခံ ဦးဝဏ္ဏ၏ ပြောကြားချက်အပေါ် ကောက်နှုတ်ချက်
-----------------------------------------------------------------------------------------------------------------------------------
"အခုလို နိုင်ငံတကာ ရင်းနှီးမြုပ်နှံမှုတွေလာဖို့ သူတို့တွေအတွက် ဒီဘက်ကမက်လုံးလို ဖြစ်စေမယ့် အရာတွေနဲ့ လမ်းတွေဖွင့်ပေးထားဖို့ လိုတယ်။ နိုင်ငံခြား ရင်းနှီးမြုပ်နှံမှုတွေက ကိုယ်သွားချင်တဲ့ဟာကိုပဲ ဖက်တွယ်ထားလို့ မရပါဘူး။ သူတို့ ဘာလုပ်ချင်တာလဲဆိုတာ လမ်းဖွင့်ပေးရင် သင်ယူသွားရမယ်။ အခုလို ထားဝယ်စီးပွားရေး ဆိပ်ကမ်းဇုန် ဖြစ်ထွန်းလာခြင်းအပေါ်မှာ နိုင်ငံတကာက ဝင်လာတာကို လမ်းဖွင့်ပေးထားရင်း ဥပဒေနဲ့ ထိန်းကွပ်တည့်မတ် ထားဖို့လည်း လိုပါတယ်"
သြဂုတ် ၅ ထုတ် BiWeekly ELEVEN အတွဲ (၄) အမှတ် (၁၈) တွင်ပါသည့် "ထားဝယ်ကဲ့သို့ဆိပ်ကမ်းစီးပွားရေး ဇုန်များ ဖွံ့ဖြိုး လာလျှင် IMO ၏ ဥပဒေပြု စည်းမျဉ်းများအား လိုက်နာနိုင်မှသာ နိုင်ငံရှိ ဆိပ်ကမ်းများနှင့် လူထုအား အလုံးစုံ ကာကွယ်မှုပြုနိုင်မည်ဟုသိရ" သတင်းမှ Logis tics and Supply Chain Managment မှ ဆိပ်ကမ်းနှင့် ပင်လယ်ရေကြောင်း စီးပွားရေး ဘာသာသင်ကြားသူ ဆရာတစ်ဦး၏ ပြောကြားချက် အပေါ် ကောက်နှုတ်ချက်
-----------------------------------------------------------------------------------------------------------------------------------
"အလှူငွေဆိုတာလည်း မရှိဘူး၊ ရှင်းရှင်းပြောရရင် လာဘ်ပေးလာဘ်ယူတာတွေ မရှိဘူးဆိုတဲ့သဘောပါ။ အဂတိ လိုက်စားတယ်။ လာဘ်ပေးလာဘ်ယူ လုပ်တယ်ဆိုတာတိကျရင်ဥပဒေအရ အရေးယူလို့ရတယ်"
သြဂုတ် ၄ ထုတ် Popular News အတွဲ (၃) အမှတ် (၃၀) တွင်ပါသည့် "နေထိုင်ကြောင်းနှင့် အကျင့်စာရိတ္တ ထောက်ခံချက်အတွက် ငွေယူပါက ထောင်ဒဏ်" သတင်းမှ ရန်ကုန်တိုင်းဒေသကြီး အစိုးရအဖွဲ့မှ တာဝန်ရှိသူတစ်ဦး၏ ပြောကြားချက်အပေါ် ကောက်နှုတ်ချက်
-----------------------------------------------------------------------------------------------------------------------------------
"အွန်လိုင်းပေါ်ကနေ ဖုန်းဘီလ်ဆောင်လို့ရပြီဆိုတော့ အရင်တန်းစီတဲ့ပြဿနာ၊ အချိန်ကုန်ပြဿနာတွေ၊ သွားလာရေးစရိတ်တွေ သက်သာလာမှာပါ။ ဒါပေမယ့် ဘီလ်ဆောင်ဖို့ အင်တာနက်အသုံးပြုခက အနည်းဆုံး ၂၀၀ ကျမှာပါ။ ဘီလ်ဆောင်ပြီး မပြီးကို ၂၄ နာရီကြာမှ သိရမယ်ဆိုတော့ ဆောင်ပြီးမပြီး ပြန်ကြည့်ဖို့ အင်တာနက်ပြန် သုံးရပါမယ်။ အနည်းဆုံးတော့ ကျပ် ၄၀၀ အပိုကုန်မှာပါ။ ဒီ့ထက်ပိုသက်သာမယ်ဆိုရင်တော့ ပိုအဆင်ပြေမှာပါ"
သြဂုတ် ၄ ထုတ် Popular News အတွဲ (၃) အမှတ် (၃၀) တွင်ပါသည့် "ဘီလ်စနစ်သုံး ဖုန်းများအားလုံး အွန်လိုင်းမှ သုံးစွဲခဆောင်နိုင်ပြီ" သတင်းမှ သုံးစွဲသူတစ်ဦး၏ ပြောကြားချက်အပေါ် ကောက်နှုတ်ချက်
×××××××××××××××××××××××××××××××××××××××××××××××××××××××××××××××
ဆောင်းပါးကဏ္ဍ
တင်သွင်းသင့်သည့် အဆိုတစ်ခု
ဒုတိယအကြိမ်ခေါ်ယူမည့် ပြည်ထောင်စုလွှတ်တော် အစည်းအဝေးအတွက် လွှတ်တော်အမတ်မင်းများ ပြင်ဆင်နေကြသည်ဟု ကြားသိရပါသည်။ ပထမအကြိမ်က ပယ်ချခံခဲ့ရသော အဆိုများကို ပြန်လည်တင်သွင်းရန် အားခဲထားကြသကဲ့သို့ လွှတ်တော်မှ ပထမအကြိမ် ပြန်လာပြီးသည့်နောက်ပိုင်း မိမိ ကိုယ်စားပြုရာ ဒေသများတွင် တွေ့ကြုံနေရသော အခက်အခဲ အသစ်များကိုလည်း စနစ်တကျ သုတေသနပြုကာ ပြန်လည်တင်သွင်းရန် ကြိုးပမ်းနေကြ သည်ဟု သိရရာ များစွာ နှစ်ထောင်းအားရ ဖြစ်မိပါသည်။ အထူးသဖြင့် တိုင်းရင်းသား လက်နက်ကိုင်များနှင့် ဖြစ်ပွားနေသော တိုက်ပွဲများ အမြန်ဆုံး ရပ်တန့် နိုင်ရန် အဆိုများ တင်သွင်းကြမည်ဟု ဆိုကြသဖြင့်လည်း လွှတ်တော်ပေါ်မှ ပထမဆုံးအကြိမ်အဖြစ် ဆွေးနွေးသည့် ပြည်တွင်း အပစ်အခတ်ရပ်စဲရေး ဆွေးနွေးပွဲအကြောင်းကိုလည်း မကြာမီ ကြားသိရတော့မည်ဖြစ်ပါသည်။
ပထမအကြိမ် လွှတ်တော်ခေါ်ယူစဉ်က ယခင်အစိုးရဟောင်းက အာဏာလွှဲခြင်းဖြစ်၍ အဆိုများ ပယ်ချခံရသည်ဟု ဆိုကြသလို၊ ဝန်ကြီးများက မိမိကိုယ်ကို ကာကွယ်ထွက်ဆိုသွားကြ၍ အဆိုများ မအောင်မြင်ခဲ့ကြဟုလည်း ဆိုကြပါသည်။ ယခု တစ်ကြိမ်သည် ပထမအကြိမ်ကနှင့်စာလျှင် များစွာ မျှော်လင့်ချက်ရှိကြမည်ဟုလည်း ဆိုကြပါသည်။ သို့ရာတွင် အင်အားကြီးပါတီ၏ အကျိုးစီးပွားကို ထိခိုက်နိုင်သော အဆိုများမှာ အောင်မြင်နိုင်ဖွယ် မရှိသည် မှာလည်း သေချာသလောက်ပင် ဖြစ်နေပါသည်။ သို့ရာတွင် တမျိုးသားလုံးအတွက် အကျိုးရှိမည့် ဥပဒေများမှာ အတည်ပြုနိုင်ဖွယ် ရှိကြောင်းလည်း အကောင်းမြင်သူတို့က မြင်ကြပါသည်။ သူ့ဘက် ကိုယ့်ဘက် မခွဲခြားဘဲ တိုင်းပြည်အတွက် အမှန်တကယ် အကျိုး ဖြစ်ထွန်းမည့် ဥပဒေကြမ်းများတင်သွင်း၍ အတည်ပြုနိုင်ပါလျှင် အတိုက်အခံတို့အနေဖြင့် မိမိပါတီက တင်သွင်းသော အဆို အောင်မြင်သဖြင့် ပြည်သူလူထု နှစ်သက်မှု ရနိုင်သလို အတည်ပြုနိုင်ရန် အတွက် အင်ပြည့်အားပြည့် ထောက်ခံမှုပေးသော အင်အားကြီးပါတီအပေါ်လည်း ပြည်သူများ၏ တိမ်းညွတ်မှု ပိုမိုရရှိလာပါလိမ့်မည်။ ထို့ကြောင့် တစ်မျိုး သားလုံး အကျိုးရှိမည့်အနက်မှ အရေးကြီးဆုံးသော ကိစ္စတစ်ရပ်ကို ဥပဒေကြမ်းအဖြစ် တင်သွင်းရန် အကြံပြုလိုပါသည်။ ထိုကိစ္စမှာ မြစ်ဆုံတွင် တရုတ် နိုင်ငံနှင့် ပူးပေါင်း၍ ရေကာတာ တည်ဆောက်မည့် စီမံကိန်းကို ရပ်တန့်ရန်အတွက် အဆိုများ တင်သွင်းကြရန် ဖြစ်ပါသည်။ ဤကိစ္စသည် ကချင်ပြည် နယ်နှင့် သာမက မြန်မာတစ်နိုင်ငံလုံးနှင့် ဆက်စပ်လျက်ရှိပြီး ဧရာဝတီမြစ်ဝှမ်းကို အမှီပြု၍ ယဉ်ကျေးမှုထွန်းကားခဲ့သော မြန်မာဟူသော လူမျိုးပါ ပျောက် ကွယ်သွားနိုင်သည့် အခြေအနေကြောင့်ပင် ဖြစ်ပါသည်။
ယခုတည်ဆောက်မည့် စီမံကိန်းသည် စင်္ကာပူနိုင်ငံထက်ကြီးပြီး နယူးယောက်မြို့ခန့်ကျယ်ဝန်းပါသည်။ ထိုရေကာတာသည် ကမ္ဘာပေါ်တွင် ၁၅ခု မြောက် အကြီးဆုံးရေကာတာလည်း ဖြစ်နေသည့်အတွက် မြန်မာနိုင်ငံအနေဖြင့် ဂုဏ်ယူဖွယ်ရာ ဖြစ်နေသော်လည်း သေချာစွာ လေ့လာကြည့်လိုက်မည် ဆိုပါက မပေါက်ကွဲသေးသည့် အနုမြူဗုံးတစ်လုံးကို ထမ်းပိုးထားရသည်နှင့် တူနေပါသည်။ ဘေးအန္တရာယ်သက်သက်ကြည့်လျှင် ထိုရေကာတာမှ ရေပမာဏက စစ်ကိုင်းငလျင် ပြတ်ရွေ့ကြောကြီးကို သွားရောက်လှုံ့ဆော်ပြီး အကယ်၍ ငလျင်လှုပ်ခဲ့ပြီး ရေကာတာပြိုပျက်ခဲ့လျှင် မြစ်ကြီးနားမြို့မှာ စက္ကန့် နှစ်ဆယ်အတွင်း ပျောက်ကွယ်သွားနိုင်သည်ဟု ဆိုပါသည်။ ထို့ပြင် နုန်းပို့ချမှုတန့်သွားပြီး ရေစီးရေလာ ရပ်သွားကာ ဧရာဝတီမြစ်ကြောင်း ကောသွားမည့် အခြေအနေနှင့်ရင်ဆိုရနိုင်ပါသည်။ ဂေဟစနစ်များလည်း ပျက်ယွင်းသွားကာ ဧရာဝတီလင်းပိုင်ကဲ့သို့ ရှားပါးမျိုးစိတ်များလည်း ပျောက်ကွယ် သွားပါလိမ့် မည်။ သို့ဆိုလျှင် ယင်းကမ္ဘာကျော်မြစ်ကြီးကို အမှီပြု၍ လူသားယဉ်ကျေးမှု စခဲ့ရသော မြန်မာလူမျိုးလည်း ပျောက်ကွယ်သွားပါလိမ့်မည်။ မြစ်ဝကျွန်းပေါ် ဘက်တွင် ရေပြတ်တောက်ခြင်းကြောင့် စိုက်ပျိုးမြေဧရိယာ အမြောက်အများ ဆုံးရှုံးပါမည်။ မြစ်ဝကျွန်းပေါ်ဒေသသည် ဧရာဝတီမြစ်ကြီး၏ နုန်းပို့ချမှုကြောင့် ဖြစ်ပေါ်လာသော ဒေသ ဖြစ်ပါသည်။ ရေမစီးသောကြောင့် ပင်လယ်ရေများ မြစ်ဝကျွန်းပေါ်ဒေသများသို့ ဝင်ရောက်လာနိုင်ပြီး တစ်ချိန်ချိန်တွင် ပင်လယ် ရေအောက်မြုပ်သွားဖွယ်ရာ ရှိပါသည်။
စီးပွားရေးအရ ကြည့်လျှင် ရေကာတာမှ ထွက်ရှိသည့် လျှပ်စစ်ဓာတ်အား၏ ၉၉ % ကို တရုတ်နိုင်ငံကို ရောင်းချပြီး ကျန်သည့် ၁% ခန့်သာ မြန်မာ ပြည်တွင် သုံးစွဲခွင့်ရရှိမည်ဖြစ်ကာ အဆိုပါလျှပ်စစ်ဓာတ်အားသည် မြစ်ဝကျွန်းပေါ်၏ စိုက်ပျိုးရေးမှ ရရှိသော ဂျီဒီပီကို ကာမိစေသော စက်မှုလုပ်ငန်းများ ဖန်တီးပေးနိုင်လိမ့်မည် မဟုတ်ဟု ယူဆရနိုင်ပါသည်။ ယင်းအကျိုးအမြတ် ရရှိစေကာမူ ဆန်စပါးကို ပြည်ပမှ တင်သွင်းရမည့် အခြေအနေမျိုး ရောက်သွားနိုင်ပါသည်။ စိုက်ပျိုးရေးနယ်ပယ်မှ လုပ်သားအင် အားစုမှာ ပြည်ပနိုင်ငံများသို့ထွက်ခွာသွားကြပါလိမ့်မည်။ တိုင်းပြည်၏ ကုန်ထုတ်စွမ်းအားစုကြီး ဆုံးရှုံးခြင်းပင် ဖြစ်ပါလိမ့်မည်။
တရုတ်နိုင်ငံဘက်မှ ပညာရှင်များပါဝင်သည့် အဖွဲ့က အဆင့် ၁၀ ဆင့်ဖြင့် လေ့လာတိုင်းတာရာတွင် ပထမ အဆင့်၌ပင် ဤစီမံကိန်းကို ဆက်လက် တည်ဆောက်ရန် မသင့်ကြောင်း အဆိုပြုခဲ့သော်လည်း တရုတ်နှင့် မြန်မာအစိုးရပိုင်းက မသိကျွိုးကျွံ့ ပြုနေကြကြောင်း ပညာရှင်တို့က ဆိုပါသည်။ ဤစီမံကိန်းသာ ဖြစ်မြောက်ခဲ့ပါက မြန်မာနိုင်ငံအတွက် ဝမ်းနည်ဖွယ် ဖြစ်ရပ်ဆိုးကြီးနှင့် ရင်ဆိုင်ရလိမ့်မည်ဟုလည်း သတိပေးထားခဲ့ပြီး ပြည်တွင်းပြည်ပ လေ့လာရေးသမားများ၊ အန်ဂျီအိုများကလည်း အလွန်အန္တရာယ်ကြီးကြောင်း အထောက်အထားများ စုဆောင်းပြသလျက် ရှိနေပါသည်။
ယခုပင်လျှင် စတင်နေသော စီမံကိန်းများကြောင့် လယ်ယာနှင့် ရွာများ ဖျက်သိမ်းခံလိုက်ရသော တိုင်းရင်းသား လူမျိုးစု များသည် ထိုက်တန်သော လျော်ကြေးမရရှိခြင်း၊ အတင်းအဓမ္မဖယ်ရှားခံရခြင်းတို့ကြောင့် စိတ်ဒုက္ခများ ခံစားရလျက်ရှိပြီး အဆိုပါ ခံစားမှုများသည် ယခင်တည်းက ရှိနှင့်ပြီးဖြစ်သော မြန်မာအစိုးရအပေါ် မုန်းတီးမှုများကို ပိုမိုတိုးပွားစေပါသည်။ ထို့ကြောင့် အဆိုပါ စီမံကိန်းသည် တိုင်းရင်းသား စည်းလုံးညီညွတ်ရေးကိုလည်း အလှမ်းဝေး စေမည့် အကြောင်းအရင်းတစ်ရပ်အဖြစ်လည်း ရှိနေပါသည်။
အစိုးရအနေဖြင့် ဤစီမံကိန်းကို ရပ်တန့်နိုင်ပါက နောင်ရွေးကောက်ပွဲများတွင် မဲမသမာမှု တစ်စုံတစ်ရာမရှိဘဲ ဆက်လက်အနိုင်ရနိုင်ပြီး ယင်းနယ်မြေမှ တိုင်းရင်းသားလက်နက်ကိုင်များနှင့်လည်း အထိုက်အလျောက် ပြေလည်မှုများရရှိကာ အမှန်တကယ် ငြိမ်းချမ်းရေး လုံးဝဥသုံရရှိခဲ့ပါမူ အစိုးရအဖွဲ့ကို ဦးဆောင်သူ သမ္မတကြီးသည် နိုဗယ်ဆုပင် ရနိုင်သည်ဟု အခိုင်အမာဆိုကြသူများလည်းရှိနေပါသည်။ လက်ရှိ အင်အားကြီးပါတီ အနေဖြင့် လည်း အဆိုပါစီမံကိန်းကို ရပ်တန့်ရန် ထောက်ခံခဲ့ပါက မြန်မာပြည်သူလူထု တစ်ရပ်လုံးကို ကယ်တင်ခဲ့သော ပါတီအဖြစ် ချက်ချင်းပြောင်းလဲသွားမည် ဖြစ်ကာ လူထု၏ ယုံကြည်ကိုးစားမှုကို ရရှိစေပါလိမ့်မည်။
အထက်ပါ အချက်အလက်များသည် ပုံနှိပ်နှင့် အင်တာနက်မီဒီယာများပေါ်မှ အခြေခံထားခြင်းဖြစ်ပြီး လွှတ်တော်အမတ်များအနေဖြင့် ပိုမိုတိကျ သော အချက်အလက်များကို ပညာရှင်များထံမှ ရယူစုဆောင်းကာ မြစ်ဆုံတွင် ရေကာတာတည်ဆောက်ရေး စီမံကိန်းပယ်ဖျက်ရန်ဟူသော ဥပဒေကြမ်း တစ်စောင် ရေးသားပြီး တင်သွင်းသင့်ပါကြောင်း အကြံပြု တင်ပြလိုခြင်းဖြစ်ပါသည်။
×××××××××××××××××××××××××××××××××××××××××××××××××××××××××××××××
Google Docs makes it easy to create, store and share online documents, spreadsheets and presentations.
