Posts
 | yangonchronicle2011 Op-Ed |
၁၂.၁.၂၀၁၂
ဆောင်းပါးကဏ္ဍ
- ပေးလိုက်ရသည့် တန်ဖိုး မကြီးစေလို
*******************************
ဆောင်းပါးကဏ္ဍ
ပေးလိုက်ရသည့် တန်ဖိုး မကြီးစေလို
မြန်မာနိုင်ငံ၏ ဒီမိုကရေစီအသွင်ကူးပြောင်းမှု နိုင်ငံရေးဖြစ်စဉ်တွင် ပြည်သူများအားရ ကျေနပ်လောက်သည့် အပြောင်းအလဲများ ဖြစ်ပြီးကာမှ ယခုတလော အစိုးရသစ်၏ လုပ်ဆောင်ချက်များမှာ ရှိပြီးကျေနပ်မှုတွင် လျော့ပါးသွားစေသည့် လက္ခဏများရှိနေသည့်အဖြစ်ကို တွေ့ကြုံနေရသည်။ စာရေးသူ သည် အာဏာပိုင်စနစ်မှ ဒီမိုကရေစီ အသွင်ကူးပြောင်းရေးဖြစ်စဉ်များတွင် နိုင်ငံတိုင်း ကြုံတွေ့ရတတ်သည့် အခင်းအကျင်းကို (၁၆.၁၂.၂၀၁၁) ၌ အသွင် ကူးပြောင်းရေး အချိုးအကွေ့အမည်ဖြင့် ဆောင်းပါးတစ်ပုဒ် ရေးခဲ့ပါသည်။ ယင်းဆောင်ပါးတွင် အဓိကဆိုလိုရင်းမှာ ဒီမိုကရေစီအသွင်ကူးပြောင်းသည့် နိုင်ငံတိုင်းတွင် အစိုးရအဖွဲ့အတွင်း အပြောင်းအလဲကို လိုလားသူနှင့် အပြောင်းအလဲကို ခုခံသူဟူ၍ ရှိတတ်ကြောင်းနှင့် ပြည်သူများ၏ အကျိုးစီးပွားကို ရှေ့ရှု၍ ကောင်းမွန်သည့်ပြုပြင်ပြောင်းလဲမှုများကို နိုင်ငံရေးစေတနာ အပြည့်ဖြင့် နောက်ကြောင်းပြန်မလှည့်သည့် အပြောင်းအလဲများကို လုပ်ဆောင်သွားဖို့ တိုက်တွန်း ထားခြင်းဖြစ်သည်။ ယခုအခါတွင် နိုင်ငံ၏ အပေါ်ထပ်အဆောက်အအုံဖြစ်သော နိုင်ငံရေးမှာ ပိုမိုလွတ်လပ်သည့်ဘက်သို့ တဖြည်းဖြည်း ရွှေ့လျားလာပြီ ဖြစ်သော်လည်း ထိုအပြောင်းအလဲများကို ဟန့်တားလိုသည့်ခုခံသူများ တနည်း သဘောထားတင်းမာသူများ၏ နောက်ကြောင်းပြန်လှည့်ချင်သည့် ခြေရာလက်ရာ များလည်း မြင်တွေ့နေရသည်။
အများပြည်သူများ မျှော်လင့်နေသည့် နိုင်ငံရေးအကျဉ်းသားများ လွှတ်ပေးရေးတွင် ပြစ်ဒဏ်လျော့ပေါ့ပေးသည်ဆိုသည်မှာ မည်သို့သော အဓိပ္ပယ်မျိုးနည်း။ အားလုံးပါဝင်သည့် နိုင်ငံရေးဖြစ်အောင် ဆောင်ရွက်နေသည့် ဦးသိန်းစိန်အစိုးရသည် အဘယ်သို့သော အင်အားစုများကြောင့် ဤသို့ အနည်းကျဉ်းသော နိုင်ငံရေးအကျဉ်းသားများကိုသာ လွှတ်ပေးရသနည်း အစရှိသည့် မေးခွန်းများကို တစ်သီးတစ်တန်းကြီး မေးဖွယ်ရာရှိပါ သည်။ စာရေးသူမှာ ဤမေးခွန်းများကို အပြန်အလှန်သုံးသပ်ကြည့်ရာ နိုင်ငံရေးအကျဉ်းသားအားလုံးကို လွှတ်ပေးလိုက်ရုံဖြင့် သဘောထားတင်မားသူများ၏ အကျိုးစီးပွားကို တိုက်ရိုက်ထိခိုက်နိုင်သည့် အနေအထားမျိုးတွင် မရှိပါ။ လွှတ်လပ်စွာ စီတန်းလှည့်လည် ဆန္ဒထုတ်ဖော်ခွင့်ပေးထားခြင်းကြောင့် ထိုအခြေအနေမျိုး စိုက်ရသည်ဟု ငြင်းဆိုလျှင် ယုတ္တိရှိမည်မဟုတ်။ ဤသည်မှာ ဖွဲ့စည်းပုံအခြေခံဥပဒေကို မဆန့်ကျင်ဘဲ ရရှိသည့် မြန်မာနိုင်ငံသားအားလုံး၏ နိုင်ငံသားအခွင့်အရေးပင် ဖြစ်သည်။
နောက်တစ်ခုမှာ ပြည်တွင်းငြိမ်းချမ်းရေး ဖြစ်ပါသည်။ ယခင်အစိုးရမှ နယ်ခြားစောင့်တပ်အသွင်ပြောင်း ခိုင်းခဲ့သော တိုင်းရင်းသားလက်နက်ကိုင်များကို ယခု အစိုးရသစ်တွင် အပစ်အခတ်ရပ်စဲရေး သဘောတူလက်မှတ်များရေးထိုးနိုင်သည်အထိ ညှိနှိုင်းဆောင်ရွက်လာနိုင်ကြောင်းတွေ့ရှိရသည် စာရေးသူတို့လို ပြည်သူ တစ်ဦးအနေဖြင့် အထူးဝမ်းမြောက်စရာပင် ဖြစ်သည်။ သို့သော် တနေ့က သတင်းတစ်ပုဒ်ဖတ်လိုက်ရသည့်အခါ ထိုဝမ်းမြောက်မှုသည့် ရာနှုန်းပြည့် မဟုတ်နိုင် သေးကြောင်း သိလိုက်ရသည်။ ကချင်လွှတ်မြောက်ရေးတပ်မတော် (KIA) မှ ဇန်နဝါရီ ၅ရက်နေ့တွင် ကချင်ပြည်နယ် မိုးကောင်းနှင့် ဖားကန့်မြို့နယ် တို့ကို ဆက်ထားသော လမ်းမကြီးအား လမ်းပိတ်ဆို့လိုက်ကြောင်း ဖတ်လိုက်ရသည်။ ဤသို့ဆိုလျှင် ထိုဒေသများတွင်နေထိုင်သော ပြည်သူများ၏ သွားရေးလာရေး ခက်ခဲသွားမည်ဖြစ်သည့်အပြင် အစားအစာ ကုန်ဈေးနှုန်းများလည်း မြင့်တက်သွားမည်မှာ သေချာပါသည်။
မြန်မာနိုင်ငံ၏ ပထဝီဝင်အနေအထားရ ကမ္ဘာလှည့်ခရီးသွားလုပ်ငန်းနှင့် နိုင်ငံခြားရင်းနှီးမြုပ်နှံမှုလုပ်ငန်းတို့ လွန်စွာတွင်ကျယ်နိုင်သည့် နိုင်ငံတစ်ခု ဖြစ်ပါသည်။ အမေရိကန် နိုင်ငံခြားရေးဝန်ကြီး၊ ဗြိတိန် နိုင်ငံခြားရေးဝန်ကြီးနှင့် ပြင်သစ်၊ နော်ဝေးနှင့် ဒိန်းမတ်အစရှိသည့် နိုင်ငံတို့မှ အဆင့်မြင့်အစိုးရအရာရှိများမှာ မြန်မာနိုင်ငံ၏ ဒီမိုကရေစီအသွင်ကူးပြောင်းရေးကို တွန်းအားပေးသည့်သဘောနှင့် ကူးချည်သန်းချည် လာရောက်နေကြသည်။ ထို့အပြင် ဒီမိုကရေစီခိုင်မာ အားကောင်းရေးအတွက် တနည်း အပွင့်လူ့အဖွဲ့အစည်းဖြစ်ထွန်းရေးအတွက် အရှေ့ဥရောပအပါအဝင် ဒီမိုကရေစီအသွင်ကူးပြောင်းသည့် နိုင်ငံများကို အကူအညီ ပေးအပ်လေ့ရှိသော ဂျော့ဆိုရော့စ်လို ပုဂ္ဂိုလ်မျိုးပင် မြန်မာနိုင်ငံသို့ လာရောက်ရသည်ကို ကြည့်ခြင်းအားဖြင့် နိုင်ငံ၏ဂုဏ်ကျက်သရေ မြင့်မားမှု ရှိနေပြီဟု ကောက်ချက်ချ၍ ရနိုင်ပါသည်။ မြန်မာနိုင်ငံ၏ အသွင်ကူးပြောင်းရေး တည်ငြိမ်မှုရှိ၊ မရှိနှင့် နောက်ကြောင်းပြန်လှည့်နိုင်သည့် အနေအထားမျိုး ရှိနိုင်၊ မရှိနိုင်ကို ကြည့်၍ အဆိုပါနိုင်ငံများမှ ယင်းတို့ စီးပွားရေးအရ အရေးယူပိတ်ဆို့ထားမှုများကို ဖွင့်ပေးသင့်၊ မသင့် စဉ်းစားသုံးသပ်မည် ဖြစ်သည်။ ဤသို့သော အရပ်ရပ်အခြေအနေမျိုးတွင် ယခုကဲ့သို့ သဘောထားတင်းမာသူများ၏ နိုင်ငံရေး စေတနာနည်းပါးမှုနှင့် KIA ၏ လုပ်ရပ်များသည် ပြည်သူများ၏ အကျိုးစီးပွားကို ကောင်းကျိုးမသက်ရောက်နိုင်သည့် လုပ်ရပ်များပင်ဖြစ်သည်။
စနစ်တစ်ခုအသက်ဝင်ရေးကိုပင် ရှိရှိသမျှ အင်အားဖြင့် တွန်းတင်နေရသည့် ယခုလိုအချိန်အခါမျိုးတွင် စာရေးသူအနေဖြင့် များစွာမျှော်လင့်မထား သော်ငြားလည်း စတုတ္ထမဏ္ဍိုင်အနေဖြင့် ပြောသင့်ပြောထိုက်သည့် ဝေဖန်သင့်သည့်အရာများကို ထောက်ပြဝေဖန်ပြလိုရင်းပင် ဖြစ်သည်။ မကြာမီတွင် တတိယ အကြိမ်လွှတ်တော် ခေါ်ယူတော့မည်။ ဘတ်ဂျက်ရေးရာကိစ္စရပ်များ အပါအဝင်၊ နိုင်ငံ၏ စီးပွားရေးအတွက် အဓိကပြဋ္ဌာန်းသင့်သည့် ဥပဒေများ၊ ပြင်ဆင်သင့်သည့် ဥပဒေများကို ရေးဆွဲပြဋ္ဌာန်းရတော့မည်။ ဘတ်ဂျက်ရေးဆွဲရေးတွင်ပင် နိုင်ငံ၏ အဓိကထားလုပ်ဆောင်ရမည့် ကိစ္စရပ်များကို သိရှိနားလည်အောင် ဆောင်ရွက် ရခြင်းသည်ပင်လျှင် အလွန်သိမ်မွေ့သည့် နိုင်ငံ့အရေးအရာပင်ဖြစ်သည်။ လက်ရှိလွှတ်တော်မှာ ကိုယ်ပိုင်ဘတ်ဂျက်ဟူ၍ မရှိ၊ အုပ်ချုပ်ရေးမှ ဘတ်ဂျက်ခွဲဝေ ယူထားရသည့်အဖြစ်ကို ကြည့်ခြင်းအားဖြင့် မည်မျှအထိ နိုင်ငံ၏ဘတ်ဂျက်ရေးရာ စီမံခန့် ခွဲမှုကို လုပ်ဆောင်ဖို့ရန် များစွာလိုအပ်နေသည်ကို သိရှိ၍ ရနိုင်ပါသည်။ မည်သို့ပင်ဆိုစေ အဆိုပါ အခက်အခဲများ၊ ဖွံ့ဖြိုးရေးစိန်ခေါ်မှုများမှာ မြင့်မားသည့် ယဉ်ကျေးမှုတစ်ခုကို တည်ဆောက်ရာ၌ ပေးဆပ်ရသည့် အဖိုးအခများပင် ဖြစ်ပါသည်။ သို့သော် ထိုအဖိုးအခများမှာ တန်ဖိုးကြီးကြီးမားမား ပေးလိုက်ရသည်ဆိုလျှင် ရလဒ်နှင့် တန်မည်မဟုတ်ဆိုခြင်းကိုတော့ နိုင်ငံ့အရေးတွင် ပါဝင် နေသည့် သူအားလုံးကို သတိရှိစေချင်ပါသည်။
***************************************************************************************
Google Docs makes it easy to create, store and share online documents, spreadsheets and presentations.
