Posts
 | CURRENT NEWS |
ပြည်တွင်း နိုင်ငံရေး၊ စီးပွားရေး သတင်းစဉ်
- သင်္ကြန်ကာလအတွင်း အကောက်ခွန်နှင့် သင်္ဘောကုန်တင်၊ ကုန်ချလုပ်ငန်း လျင်မြန်စွာဆောင်ရွက်ပေးမည်
- လာမည့် နွေရာသီ၌ ကြားဖြတ်ရွေးကောက်ပွဲပြုလုပ်ရန် နိုင်ငံရေးပါတီအချို့မျှော်လင့်
- ဆက်သွယ်ရေးလုပ်ငန်းလိုင်စင် ရရှိနိုင်ရေးအတွက် Digicel မှ ကုမ္ပဏီများနှင့် ပူးပေါင်းဆောင်ရွက်မည်
- အင်ဒိုနီးရှားနိုင်ငံတွင် မြန်မာနိုင်ငံသားများသေဆုံးမှု သံတမန်နည်းအရ ဖြေရှင်းမည်
သင်္ကြန်ကာလအတွင်း အကောက်ခွန်နှင့် သင်္ဘောကုန်တင်၊ ကုန်ချလုပ်ငန်း လျင်မြန်စွာ ဆောင်ရွက်ပေးမည်
ယခုနှစ် မြန်မာနှစ်သစ်ကူး သင်္ကြန်ကာလအတွင်း အကောက်ခွန်ဆိုင်ရာလုပ်ငန်းများ၊ သင်္ဘောကုန်တင်/ကုန်ချ လုပ်ငန်းများ လျင်မြန်ချောမွေ့စွာဆောင်ရွက်နိုင်ပေးသွားမည်ဖြစ်ကြောင်း ဧပြီလ ၅ ရက်နေ့က ရန်ကုန်မြို့ ကမ်းနားလမ်းရှိ အကောက်ခွန်ဦးစီးဌာန(ရုံးချုပ်)အစည်းအဝေးခန်းမ၌ ကျင်းပခဲ့သည့် ညှိနှိုင်းအစည်းအဝေးတွင် ထုတ်ပြန်ကြေညာခဲ့သည်။
အဆိုပါ ထုတ်ပြန်ကြေညာချက်တွင် အကောက်ခွန်ဦးစီးဌာနအနေဖြင့် အကောက်ခွန်ဆိုင်ရာ ပို့ကုန်/သွင်းကုန် လုပ်ငန်းများ ဆောင်ရွက်နိုင်ရန် ဧပြီ ၁၂ ရက်၊ ၁၃ ရက်၊ ၁၉ ရက်နေ့နှင့် ၂၀ ရက်နေ့များတွင် ပို့/သွင်း ကုန်ရုံးချုပ်၊ ဆိပ်ကမ်း၊ လေဆိပ်ကုန်လှောင်ရုံနှင့် စက်လှေဆိပ်များကို နေ့စဉ် နံနက် ၁၀ နာရီမှ ညနေ ၃ နာရီထိ ရုံးဖွင့်လှစ်၍ ဆောင်ရွက် ပေးသွားမည်ဖြစ်သည့်အပြင် မြန်မာ့ဆိပ်ကမ်းအာဏာပိုင်များအနေဖြင့်လည်း ကုန်ပစ္စည်းများ ထုတ်ယူရေးအတွက် ကုန်ပစ္စည်း ထုတ်ပေးခွင့်အမိန့် (Delivery Order)ကို မြန်မာ့ဆိပ်ကမ်းအာဏာပိုင် ကိုယ်စားလှယ်လုပ်ငန်းဌာနက ဧပြီလ ၁၂ ရက်၊ ၁၄ ရက်၊ ၁၆ ရက်၊ ၁၈ ရက်နေ့နှင့် ၂၀ ရက်နေ့တို့တွင် ရုံးဖွင့်လှစ်၍ ဆောင်ရွက်ပေးသွားမည်ဖြစ်ကြောင်း သိရသည်။
ထို့ပြင် မြန်မာ့နိုင်ငံခြားကုန်သွယ်မှုဘဏ်(MFTB)ကလည်း ဧပြီ ၁၃ ရက်နေ့နှင့် ၁၈ ရက်နေ့တို့တွင် ရုံးဖွင့်လှစ်၍ လုပ်ငန်းများဆောင်ရွက်ပေးမည်ဖြစ်ပြီး မြန်မာနိုင်ငံကုန်သေတ္တာယာဉ်ပိုင်ရှင်များအသင်းမှ ကုန်သေတ္တာသယ်ယာဉ် အလုံအလောက် ရရှိရေးအတွက် ဧပြီ ၁၂ ရက်နေ့နှင့် ၁၃ ရက်နေ့တို့တွင် ဂိတ်သုံးဂိတ်ဖွင့်လှစ်၍ ဧပြီ ၁၉ ရက်နေ့နှင့် ၂၀ ရက်နေ့များတွင် ဂိတ်အားလုံးဖွင့်လှစ်ဆောင်ရွက်ပေးသွားမည်ဖြစ်ကြောင်း သိရသည်။
သက်ဆိုင်ရာဆိပ်ကမ်းများမှလည်း ကုန်ပစ္စည်း တင်သွင်း/တင်ပို့မှုများအတွက် ဧပြီ ၁၂ ၊ ၁၃၊ ၁၉ ရက်နေ့နှင့် ၂၀ ရက်နေ့များတွင် လုပ်ငန်းများလျင်မြန်ချောမွေ့အောင် ဆောင်ရွက်ပေးမည်ဖြစ်ပြီး အရေးကြီးတင်သွင်း/တင်ပို့လိုပါက အကောက်ခွန်ဦးစီးဌာနနှင့် ဆိပ်ကမ်းသို့ ဧပြီလ ၁၀ ရက်နေ့ နောက်ဆုံးထား၍ အကြောင်းကြားရမည်ဖြစ်ကြောင်း သိရသည်။
YC
လာမည့် နွေရာသီ၌ ကြားဖြတ်ရွေးကောက်ပွဲပြုလုပ်ရန် နိုင်ငံရေးပါတီအချို့မျှော်လင့်
လာမည့် နွေရာသီကာလအတွင်း ယခင် လုံခြုံရေးအခြေအနေနှင့် အကြောင်းအမျိုးမျိုးကြောင့် ကြားဖြတ် ရွေးကောက်ပွဲ မကျင်းပနိုင်ခဲ့သော ကချင်ပြည်နယ်၊ ချင်းပြည်နယ်၊ ရခိုင်ပြည်နယ်၊ စစ်ကိုင်းတိုင်းဒေသကြီး၊ ဧရာဝတီတိုင်းဒေသကြီး၊ ရန်ကုန်တိုင်းဒေသကြီး၊ တနင်္သာရီတိုင်းဒေသကြီးနှင့် မကွေးတိုင်းဒေသကြီးတို့ရှိ မဲဆန္ဒနယ် စုစုပေါင်း(၁၂)ခုတွင် ကြားဖြတ်ရွေးကောက်ပွဲ ပြန်လည်ပြုလုပ်ပေးနိုင်ရေးအတွက် နိုင်ငံရေးပါတီအချို့မှ မျှော်လင့်လျက် ရှိကြောင်း သိရသည်။
လက်ရှိအချိန်တွင် ကြားဖြတ်ရွေးကောက်ပွဲကျင်းပနိုင်ခဲ့ခြင်းမရှိသည့် အဆိုပါမဲဆန္ဒနယ်(၁၂)ခုနှစ်တွင် ကိုယ်စားလှယ် (၂၈)ဦး လစ်လပ်လျက်ရှိပြီး ဧပြီလ ၈ ရက်နေ့၌ နိုင်ငံရေးပါတီများနှင့် ပြည်ထောင်စုရွေးကောက်ပွဲ ကော်မရှင်တို့ တွေ့ဆုံရာတွင် အဆိုပါကိစ္စအား ထည့်သွင်းဆွေးနွေးသွားမည်ဖြစ်ကြောင်း သိရသည်။
ပြီးခဲ့သည့် ၂၀၁၀ ခုနှစ် နိုဝင်ဘာလ ၇ ရက်နေ့တွင် ကျင်းပပြုလုပ်ခဲ့သည့် အထွေထွေရွေးကောက်ပွဲနှင့် ၂၀၁၂ ခုနှစ် ဧပြီလ ၁ ရက်နေ့၌ ကျင်းပခဲ့သည့် ကြားဖြတ်ရွေးကောက်ပွဲတို့တွင် ကချင်ပြည်နယ်နှင့် ရှမ်းပြည်နယ်အတွင်းရှိ မဲဆန္ဒနယ်များ၌ လုံခြုံရေးအခြေအနေကြောင့် ရွေးကောက်ပွဲပြုလုပ်နိုင်ခဲ့ခြင်းမရှိကြောင်း သိရသည်။
ကျင်းပပြီးစီးခဲ့သည့် ၂၀၁၀ ရွေးကောက်ပွဲတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ အငြင်းပွားမှုများဖြင့် ကိုယ်စားလှယ်အများဆုံး အနိုင်ရရှိခဲ့ပြီး ၂၀၁၂ ခုနှစ် ကြားဖြတ်ရွေးကောက်ပွဲ၌ အမျိုးသားဒီမိုကရေစီအဖွဲ့ချုပ်(NLD)ပါတီမှ လစ်လပ်မဲဆန္ဒနယ်(၄၅)နေရာအနက် (၄၃)နေရာတွင် ကိုယ်စားလှယ်အများဆုံးအနိုင်ရရှိခဲ့ကြောင်း သိရသည်။
YC
ဆက်သွယ်ရေးလုပ်ငန်းလိုင်စင် ရရှိနိုင်ရေးအတွက် Digicel မှ ကုမ္ပဏီများနှင့် ပူးပေါင်းဆောင်ရွက်မည်
မြန်မာနိုင်ငံမှ လုပ်ကိုင်ခွင့်ပြုမည့် ဆက်သွယ်ရေး လိုင်စင် (၂)နေရာလျှောက်ထားမှုတွင် လိုင်စင်သစ်(၁)နေရာ ရရှိနိုင်ရေးအတွက် ကမ္ဘာတစ်ဝှမ်းရှိ တယ်လီကွန်းဆက်သွယ်ရေး ဝန်ဆောင်မှုလုပ်ငန်းများကို ကျယ်ပြန့်စွာလုပ်ကိုင် ဆောင်ရွက်လျှက်ရှိသော Digicel Group Co.,Ltd မှ လိုင်စင်ရွေးချယ်ရေးလုပ်ငန်းစဉ်၏ အစိတ်ပိုင်းတစ်ခု ဖြစ်သော အကြိုအရည်ချင်းစစ် လျှောက်လွှာကို မတ်လ ၇ ရက်နေ့တွင် လျှောက်ထားခဲ့ကြောင်း သိရသည်။
Digicel ကုမ္ပဏီသည် မြန်မာနိုင်ငံ၏ ဆက်သွယ်ရေးဝန်ဆောင်မှုလုပ်ငန်း၌ ဝင်ရောက်လုပ်ကိုင်ရန် ပြင်ဆင်ရာတွင် ကမ္ဘာ့နိုင်ငံအသီးသီးတွင် ငွေအရင်းအနှီးများဖြင့် လုပ်ဆောင်ရသည့် လုပ်ငန်းစတင်မှုများ၊ ဝယ်ယူရေးကိစ္စများ၊ ရှယ်ယာတန်ဖိုးမြှင့်တင်ရေး စသော ရင်းနှီးမြုပ်နှံမှုလုပ်ငန်းများကို လုပ်ကိုင်လျှက်ရှိသော George Soros ၏ Quantum Strategic Partners Ltd. နှင့် မြန်မာနိုင်ငံမှ Yoma Strategic Holdings ကုမ္ပဏီတို့နှင့် ပူးပေါင်းဆောင်ရွက် သွားမည်ဖြစ်ကြောင်း သိရသည်။
Digicel အနေဖြင့် ကမ္ဘာအနှံ့ရှိ တယ်လီဖုန်းအသုံးပြုမှုနည်းပါးလျက်ရှိနေသေးသည့် နိုင်ငံများကို တယ်လီဖုန်း အသုံးပြုမှုပိုမိုတိုးတက်လာစေရန်နှင့် ပွင့်လင်းလာသော ဈေးကွက်များအတွင်းသို့ ဝင်ရောက်ရင်းနှီးမြှုပ်နှံခဲ့ရာ အောင်မြင်မှုများစွာ ရရှိခဲ့သော လုပ်ငန်းကုမ္ပဏီတစ်ခုဖြစ်ပြီး မြန်မာနိုင်ငံတွင် လက်ရှိမိုဘိုင်းလ်ဖုန်း ကိုင်ဆောင်နိုင်မှုမှာ (၁၀)ရာခိုင်နှုန်းအောက်သာ ရှိနေသေးသည့်အတွက် Digicel မှ ကမ္ဘာ့အဆင့်မီ တယ်လီကွန်း ဆက်သွယ်ရေး ကွန်ရက်ကို မြန်မာနိုင်ငံအားပေးရန် ဆုံးဖြတ်ခဲ့ကြောင်း Digicel Group ကို စတင်တည်ထောင်သူ Denis O’ Brein က ပြောကြား ခဲ့ကြောင်း သိရသည်။
Digicel Group Ltd. သည် ကာရေဘီယံဒေသ၊ ဗဟိုအမေရိကဒေသနှင့် အာရှပစိဖိတ်ဒေသများရှိ ဈေးကွက် (၃၁)ခု၌ တယ်လီကွန်းဆက်သွယ်ရေးဝန်ဆောင်မှုလုပ်ငန်းများကို ဆောင်ရွက်လျှက်ရှိပြီး စုစုပေါင်း ရင်းနှီးမြုပ်နှံမှုအဖြစ် ကမ္ဘာနှင့်အဝှမ်းတွင် အမေရိကန်ဒေါ်လာ ( ၄.၅ ) ဘီလီယံ ရှိကြောင်း သိရှိရသည်။
လာမည့် ဧပြီလ ၂၄ ရက်နေ့မှစတင်၍ ကျပ် ၁၅၀၀ တန် မိုဘိုင်လ်ဖုန်းဆင်းကတ်များကို ပြည်နယ်နှင့် တိုင်းဒေသကြီးအစိုးရအဖွဲ့များ၏ အစီအစဉ်ဖြင့် ရောင်းချပေးသွားမည်ဖြစ်ကြောင်း ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာနမှ ဧပြီလ ၃ ရက်နေ့တွင် တရားဝင်ထုတ်ပြန်ကြေညာခဲ့သည်။
YC
အင်ဒိုနီးရှားနိုင်ငံတွင် မြန်မာနိုင်ငံသားများသေဆုံးမှု သံတမန်နည်းအရ ဖြေရှင်းမည်
အင်ဒိုနီးရှားနိုင်ငံ ဆူမားတြားကျွန်း၊ ဘီလာဝီဆိပ်ကမ်း အကျဉ်းထောင်တွင် အကျဉ်းကျခံနေရသော မြန်မာများနှင့် ရိုဟင်ဂျာများ ပဋိပက္ခဖြစ်ပွား၍ မြန်မာနိုင်ငံသား ရှစ်ဦး သေးဆုံခဲ့ရမှုများအပေါ် နှစ်နိုင်ငံအကြား ခိုင်မာသောနားလည်မှုများ အရ ကန့်ကွက်ကြောင်း ထုတ်ပြန်ချက်များ ထုတ်ပြန်မည်မဟုတ်ဘဲ သံတမန်နည်းလမ်း အရသာ ဆောင်ရွက် သွားမည် ဖြစ် ကြောင်း နိုင်ငံတော် သမ္မတရုံး ညွှန်ကြားရေးမှူး ဦးဇော်ဌေး ကပြောကြားခဲ့ ကြောင်း သိရှိရသည်။
အဆိုပါကိစ္စရပ်များဆောင်ရွက်ရာတွင် နှစ်နိုင်ငံနိုင်ငံခြားရေး ၀န်ကြီးဌာနများမှတစ်ဆင့် ပူးပေါင်းဆောင်ရွက် သွားမည်ဖြစ်ပြီး အမှုမှန်ပေါ်ပေါက်နိုင်ရေး၊ အပြစ်ရှိသူများကို အရေးယူနိုင်ရေးတို့အတွက်လည်း နှစ်နိုင်ငံတာဝန် ရှိသူများက ကြိုးပမ်းဆောင်ရွက် သွားမည်ဖြစ်ကြောင်း ၎င်းကထပ်မံပြောကြားခဲ့သည်။
မြန်မာနိုင်ငံနှင့် ဘင်္ဂလားဒေရှ့်နိုင်ငံနယ်စပ်ရှိ ရိုဟင်ဂျာအချို့မှာ အင်ဒိုနီးရှားနိုင်ငံတွင်းသို့ လှေများဖြင့် တရားမဝင် ဝင်ရောက်သူများနှင့် အင်ဒိုနီးရှားရေပိုက်နက်အတွင်း တရားမဝင် ငါးဝင်ရောက်ဖမ်းဆီးခဲ့သည့် မြန်မာနိုင်ငံသားများအား အင်ဒိုနီးရှားအစိုးရမှ ဖမ်းဆီး၍ ဘီလာဝမ်ဆိပ်ကမ်းရှိ လူဝင်မှု ကြီးကြပ်ရေး အကျဉ်းထောင်ထောင်အတွင်း အတူတကွ ထိန်းသိမ်းထားစဉ် ယခုကဲ့သို့ ပဋိပက္ခများ ဖြစ်ပွားခဲ့ခြင်းဖြစ်ကြောင်း သိရသည်။
အင်ဒိုနီးရှားနိုင်ငံ၌ မြန်မာ ၈ ဦးသေဆုံးမှုနှင့်ပတ်သက်၍ မှန်မှန်ကန်ကန် တရားမျှတစွာ စုံစမ်းဖော်ထုတ်ပေးရေး၊(ဓား သို့မဟုတ် သေကြေစေသော ကိရိယာများ Detention Centre အတွင်း ရောက်ရှိနေရခြင်း အကြောင်းရင်း၊ Detention Centre ရှိ လုံခြုံရေးတပ်ဖွဲ့ဝင်များ၏ စောင့်ကြပ် ထိန်းသိမ်းမှု အခြေအနေ)၊ စုံစမ်း ဖော်ထုတ်ချက်အရ အပြစ်ရှိသူများ၊ ပြစ်မှုကျူးလွန်သူများကို ဥပဒေနှင့်အညီ ထိထိရောက်ရောက် အပြစ်ပေး အရေးယူရေး အင်ဒိုနီးရှားရောက် မြန်မာနိုင်ငံသားများ၏ လုံခြုံရေးကို အလေးထား ဆောင်ရွက်ဖြေရှင်းပေးရန် အင်ဒိုနီးရှားနိုင်ငံရှိ မြန်မာသံရုံးက အင်ဒိုနီးရှားအစိုးရထံတောင်းဆိုခဲ့ကြောင် သိရသည်။
YC
| Google Drive: create, share, and keep all your stuff in one place. |  |