Posts
 | CURRENT NEWS |
ပြည်တွင်း နိုင်ငံရေး၊ စီးပွားရေး သတင်းစဉ်
- အစိုးရတပ်မတော်နှင့် KIA တပ်ရင်းတို့အကြား တိုက်ပွဲများပြန်လည်ဖြစ်ပွား
- ကျေးလက်ပြည်သူများအား ရွေးကောက်ပွဲဆိုင်ရာအသိပညာပေးရန် ရွေးကောက်ပွဲကော်မရှင် ပြင်ဆင်
- လူ့အခွင့်အရေးလှုပ်ရှားသူများ ဖမ်းဆီးနေမှု ရပ်တန့်ပေးရန် ဥရောပနိုင်ငံများ တောင်းဆိုမည်
အစိုးရတပ်မတော်နှင့် KIA တပ်ရင်းတို့အကြား တိုက်ပွဲများပြန်လည်ဖြစ်ပွား
အစိုးရတပ်မတော် ခလရ(၁၂၃)မှ ရှမ်းပြည်နယ်မြောက်ပိုင်းရှိ ကချင်လွတ်လပ်ရေးအဖွဲ့ KIO ၏ တပ်မဟာ ၄ နယ်မြေများ အနက် တစ်ခုဖြစ်သော မုန်ဂိုးဒေသ ပန်ဆိုင်း(ကြူကုတ်)မြို့၊ ဖိုင်းကောင်းမြို့အား ချဉ်းကပ်လာမှုကြောင့် KIA တပ်ရင်း (၃၆)နှင့် ဇူလိုင် လ ၂၃ ရက်နေ့တွင် တိုက်ပွဲများ ပြန်လည်ဖြစ်ပွားခဲ့ကြောင်း သိရသည်။
“သူတို့က ကျွန်တော်တို့ နေရာယူထားတဲ့စခန်းမှာ တက်လာလို့ ညနေ ၅ နာရီလောက်ထိ တိုက်ပွဲဖြစ်တယ်။ သူတို့က လက်နက်ကြီးတွေနဲ့ ပစ်တယ်။ ကျွန်တော်တို့ဘက်က လက်နက်ပြန်ရဖို့ သူတို့ကို ပြန်ပစ်တာ”ဟု KIA ပြည်သူ့စစ်တပ်ခွဲ ၅ တပ်ရင်းမှူး ဇော်ဆိုင်းက ပြောကြားသည်။
ထို့ပြင် အစိုးရတပ်မတော်မှ KIO ပြည်သူ့စစ်တပ်ဖွဲ့များရှိရာသို့ တပ်စွဲ၍ ချဉ်းကပ်မှုများလည်း ရှိခြင်းကြောင့် ဇူလိုင်လ ၂၄ ရက်နေ့ နံနက်ပိုင်း ၁၁ နာရီခန့်အထိ ပစ်ခတ်မှုများဖြစ်ပွားခဲ့သော်လည်း တိုက်ပွဲများအတွင်း ထိခိုက်ကျဆုံးမှုများ မရှိသေးကြောင်း တပ်ရင်းမှူး ဇော်ဆိုင်းက ဆိုသည်။
အလားတူ တအောင်းလွတ်မြောက်ရေးတပ်မတော်(TNLA) ထိန်းချုပ်နယ်မြေအတွင်းသို့ အစိုးရ၏စစ်တပ်မှထိုးစစ်ဆင် ဝင်ရောက်လာခဲ့သည့်အတွက် မန်တုံမြို့နယ် ပန်ကန်ကျေးရွာအနီးတွင် အစိုးရစစ်တပ်၏ ရှမ်းပြည်မြောက်ပိုင်း နမ့်လန်မြို့ အခြေစိုက် ခမရ (၅၀၆)တပ်ဖွဲ့နှင့် တအောင်း လွတ်မြောက်ရေးတပ်မတော် (TNLA)တို့အကြား ဇူလိုင်လ ၂၃ ရက်နေ့တွင် တိုက်ပွဲများ ပြန်လည် ဖြစ်ပွားခဲ့ကြောင်း သိရသည်။
“ဖြစ်တာက မန်တုံမြို့နယ် ပန်ကန်ကျေးရွာအနီးမှာ ဖြစ်တာပါ။ ကျနော်တို့(၁၀၁)တပ်ရင်း အဖွဲ့နဲ့ဖြစ်တယ်။ သူတို့က အင်အား (၁၀၀)ကျော်မယ်။ ကျနော်တို့စခန်းကိုတိုက်ဖို့ တက်လာတာကို ကြိုသိထားတော့ သွားစောင့်နေလိုက်ပါတယ်။ သူတို့တက်လာတဲ့ လမ်းကြောင်းတွေမှာပေါ့။ သေသေချာချာ နေရာယူပြီး တစ်နာရီလောက် ပြင်းပြင်းထန်ထန် တိုက်လိုက် တော့ အထိနာပြီး ပြန်ဆုတ် သွားပါတယ်”ဟု TNLA မှ ပြောရေးဆိုခွင့်ရှိသူတစ်ဦးက ပြောသည်။
အဆိုပါတိုက်ပွဲတွင် အစိုးရစစ်တပ်ဖက်မှ သုံးဦးကျဆုံးခဲ့ပြီး (၆)ဦးဒဏ်ရာရရှိခဲ့သည်ဟု ဒုတိယဗိုလ်မှူးကြီး ပြောကြားချက်အရ သိရပြီး ယခုအခါ အစိုးရတပ်ရင်း(၅၀၆)တပ်ရင်းသည် ယခင်ဆောင်ရွက်နေကျအတိုင်း TNLA တပ်ရင်း၏ မနီးမဝေး (နာရီဝက်ကြာ ခရီး)တွင် တပ်စွဲထားသည်ဟု သိရှိရသည်။
ထိုသို့ တပ်စခန်းချင်း အနီးကပ်ထား၍ တိုက်ခိုက်သည့်စနစ်ကို အသုံးပြုကာ ထိုးစစ်ဆင်နိုင်ရန်အတွက် အစိုးရတပ်များကို တပ်ရင်း(၃၀)ကျော် အင်အား(၇၅၀၀)ခန့်အထိ တိုးချဲ့ထားပြီး အဆိုပါ အင်အားဖြင့် တအောင်းဒေသ၌ ရှိနေသော ကချင် လွတ်လပ်ရေး တပ်မတော် (KIA) ၊ ရှမ်းပြည်တိုးတက်ရေး ပါတီ (SSPP) နှင့် ရှမ်းပြည်ပြန်လည်ထူထောင်ရေးကောင်စီ (RCSS)တပ်ဖွဲ့ များကိုပါ ဆက်လက် တိုက်ခိုက်နေခြင်းဖြစ်သည်ဟု သိရသည်။
TNLA အဖွဲ့သည် အစိုးရငြိမ်းချမ်းရေး ဖော်ဆောင်မှုအဖွဲ့နှင့် ထိုင်းနိုင်ငံ၊ မဲဆောက်မြို့တွင်တစ်ကြိမ် တွေ့ဆုံပြီးနောက်ပိုင်း ထပ်မံ တွေ့ဆုံကြခြင်း မရှိတော့ဘဲ လက်ရှိအချိန်အထိ အစိုးရနှင့် အပစ်အခတ်ရပ်စဲရေး သဘောတူညီမှု ရယူထားခြင်း မရှိသေးသည့် တိုင်းရင်းသား လက်နက်ကိုင်အဖွဲ့အစည်းဖြစ်သော်လည်း KIO/KIA တပ်များနှင့်မူ ပူးပေါင်းဆောင်ရွက်လျက်ရှိကြောင်း သိရသည်။
ယခုအခါ အစိုးရတပ်များသည် တအောင်းဒေသသို့ ရောက်ရှိနေသော TNLA အပါဝင် အပစ်အခတ်ရပ်စဲထားသော KIA ၊ SSPP ၊ RCSS တပ်ဖွဲ့များနှင့်လည်း နေ့စဉ်တိုက်ပွဲငယ်များ ဖြစ်ပေါ်လျက်ရှိကြောင်း သိရသည်။ လက်ရှိအခြေအနေတွင် TNLA ဘက်မှ ငြိမ်းချမ်းရေးအတွက် အပစ်အခတ် ရပ်စဲရေး ကမ်းလှမ်းလာပါက အစိုးရ အနေဖြင့် သဘောတူမည်ဖြစ်ကြောင်း ဗဟိုကော်မတီဝင် ဦးမိုင်းအိုက်ညမ်းက ပြောကြားခဲ့ဖူးကြောင်း သိရသည်။ အစိုးရငြိမ်းချမ်းရေး ဖော်ဆောင်အမှု အဖွဲ့ကလည်း TNLA အဖွဲ့နှင့် တွေ့ဆုံရန် ကြိုးစားမှုများရှိခဲ့ကြောင်း သိရသည်။
YC
ကျေးလက်ပြည်သူများအား ရွေးကောက်ပွဲဆိုင်ရာအသိပညာပေးရန် ရွေးကောက်ပွဲကော်မရှင် ပြင်ဆင်
မြန်မာနိုင်ငံအတွင်းရှိ ကျေးလက်ဒေသနှင့် နယ်စပ်ဒေသများရှိ ပြည်သူများအား ရွေးကောက်ပွဲဆိုင်ရာ အသိပညာများ ဖြန့်ဝေပေးနိုင်ရန်အတွက် တိုင်းဒေသကြီးနှင့် ပြည်နယ်များမှ ဒေသခံတိုင်းရင်းသူဆရာမ ၁၄ ဦး၊ ကော်မရှင်ရုံးမှ အရာထမ်း ခြောက်ဦး အပါအဝင် သင်တန်းသား၊ သင်တန်းသူ ၂၃ ဦးအား မြန်မာနိုင်ငံ ပြည်ထောင်စုရွေးကောက်ပွဲကော်မရှင်နှင့် The International Foundation For Electoral Systems(IFES–Myanmar)တို့မှ ပူးပေါင်း၍ ရွေးကောက်ပွဲဆိုင်ရာ နှစ်ပတ်ကြာ သင်တန်းများ ပို့ချပေး သွားနိုင်ရန် စီစဉ်ဆောင်ရွက်လျက်ရှိကြောင်း သိရသည်။
ယခုကဲ့သို့ ရွေးကောက်ပွဲကော်မရှင်မှ ပထမဆုံးအကြိမ်အဖြစ် ရွေးကောက်ပွဲဆိုင်ရာ သင်တန်းများပို့ချရခြင်းမှာ လာမည့် ၂၀၁၅ ခုနှစ်တွင် ကျင်းပမည့် ပါတီစုံအထွေထွေရွေးကောက်ပွဲ၌ အထောက်အကူပြုနိုင်စေရန်ဖြစ်ပြီး ယင်းသင်တန်းသို့ တက်ရောက် လာမည့် သင်တန်းသားများကို နိုင်ငံတကာ အသိအမှတ်ပြု လက်မှတ်များကိုပါ ပေးအပ် ချီးမြှင့်သွားမည်ဖြစ်ကြောင်း သိရသည်။
“ရွေးချယ်ထားတာက တိုင်းနဲ့ ပြည်နယ် ၁၄ ခုက တစ်ယောက်နှုန်းနဲ့ ရွေးထားတာပါ။ ကော်မရှင်အနေနဲ့ကတော့ ၂၀၁၅ အတွက် ကြိုတင်ပြင်ဆင်စရာရှိတဲ့ လုပ်ငန်းတွေမှန်သမျှ ဆောင်ရွက်သွားဖို့ ရှိပါတယ်”ဟု ပြည်ထောင်စုရွေးကောက်ပွဲ ကော်မရှင်မှ ညွန်ကြားရေးမှူး ဦးသောင်းလှိုင်က ပြောကြားခဲ့သည်။
လာမည့် ၂၀၁၅ ခုနှစ်တွင် ရွေးကောက်ပွဲများ အောင်မြင်စွာကျင်းပနိုင်ရေးအတွက် ကြိုတင်ပြင်ဆင်သည့်အနေဖြင့် ယခုကဲ့သို့ သင်တန်းများဖွင့်လှစ်ပေးခြင်းဖြင့် ရွေးကောက်ပွဲများမှတစ်ဆင့် နိုင်ငံတော်ကိုဦးဆောင်နိုင်မည့် ပြည်သူ့ ကိုယ်စားလှယ်များ ကို ရွေးချယ်ပေးနိုင်မည်ဖြစ်သည်။ ထို့ပြင် အနာဂါတ်တွင် ကြုံတွေ့လာရမည့် ရွေးကောက်ပွဲများနှင့် ပတ်သက်၍ ပြည်သူလူထုတစ် ရပ်လုံးမှ နှံ့စပ်စွာ သိရှိထားရန် လိုအပ်သည့်အပြင် နေ့စဉ်စားဝတ်နေရေးအတွက် လုံးပန်းရှာဖွေနေရသော ပြည်သူများမှာ ရွေးကောက် ပွဲဆိုင်ရာ ဗဟုသုတအားနည်းချက်များကြောင့် ရွေးချယ်မှုများ မှားယွင်းနိုင်ကြောင်း သိရသည်။
အဆိုပါသင်တန်းတွင် မဲဆန္ဒရှင်စာရင်း မှတ်ပုံတင်ခြင်း၊ ရွေးကောက်ပွဲဆိုင်ရာ အငြင်းပွားမှုများဖြေရှင်းခြင်း၊ မဲဆန္ဒရှင်များအား ပညာပေးခြင်း၊ သတင်းအချက်အလက် နည်းပညာများနှင့်ပတ်သက်၍ သင်တန်းပေးခြင်း၊ မဲပေးခြင်း၊ မဲရေတွက်ခြင်း၊ ရလဒ်များထုတ် ပြန်ခြင်း စသည်တို့အပါအဝင် အခန်း ၂၅ ခန်း ပါဝင်ကြောင်း သိရသည်။ ယင်းသင်တန်းတက်ရောက်ရန် ဆရာ/ဆရာမများအား ပညာရေးဝန်ကြီးဌာနမှ ရွေးချယ်ထားပြီး သင်တန်းပြီးဆုံးသွားပါက သက်ဆိုင်ရာဒေသများတွင် ဆင့်ပွားသင်တန်းများကို ပြန်လည်ပို့ချ ပေးရမည်ဖြစ်ကြောင်း သိရသည်။
၂၀၀၈ ဖွဲ့စည်းပုံအခြေခံဥပဒေအရ ကျင်းပသော ၂၀၁၀ အထွေထွေရွေးကောက်ပွဲနှင့် ၂၀၁၂ ကြားဖြတ်ရွေးကောက်ပွဲများ တွင် မဲရုံးမှူးများနှင့် မဲရုံတာဝန်ခံများကို ပညာရေးဝန်ကြီးဌာနမှ ဆရာ၊ ဆရာမများကိုသာ ဆောင်ရွက်စေခဲ့ကြောင်း သိရသည်။
YC
လူ့အခွင့်အရေးလှုပ်ရှားသူများ ဖမ်းဆီးနေမှု ရပ်တန့်ပေးရန် ဥရောပနိုင်ငံများ တောင်းဆိုမည်
နိုင်ငံရေးပြုပြင်ပြောင်းလဲမှုများကို ဆက်တိုက်လုပ်ဆောင်နေသော မြန်မာနိုင်ငံအစိုးရ အနေဖြင့် လူ့အခွင့်ရေးတက်ကြွ လှုပ်ရှားသူများကို ဖမ်းဆီးနေခြင်းအား ရပ်တန့်ပေးရန် အတွက် ဗြိတိန်၊ ပြင်သစ်နှင့် ဥရောပသမဂ္ဂနိုင်ငံများက တိုက်တွန်းတောင်း ဆိုသွားမည် ဖြစ်ကြောင်း ဗြိတိန်နှင့် ပြင်သစ်သံရုံးများမှ သံရုံးအရာရှိများက ဇူလိုင်လ ၂၄ ရက်နေ့က ကျင်းပပြုလုပ်သည့် နိုင်ငံရေး အကျဉ်းသားများ လွတ်မြောက်ရေးဆွေးနွေးပွဲတွင် ပြောကြားခဲ့သည်။
အစိုးရသစ်လက်ထက်တွင် လူ့အခွင့်ရေးတက်ကြွလှုပ်ရှားသူများကို ဖမ်းဆီးထောင်ချ ခြင်းသည် မြန်မာနိုင်ငံ၏ ပြုပြင်ပြောင်း လဲရေးကို ထိခိုက်လာစေနိုင်သည့် အတွက် ယင်းကဲ့သို့တောင်းဆိုရခြင်းဖြစ်သည်ဟုလည်း သံရုံးအရာရှိများက ပြောကြားခဲ့သည်။
ထို့အပြင် မြန်မာနိုင်ငံတွင် လူ့အခွင့်အရေးလှုပ်ရှားသူများကို ဖမ်းဆီးရာတွင် တစ်ခု ထက်မကသော ပုဒ်မများဖြင့် ဖမ်းဆီး နေသည့်အတွက် လက်ရှိအစိုးရအနေဖြင့် လွတ်ငြိမ်းချမ်းသာခွင့်ပေးနေသော်လည်း လူ့အခွင့်အရေးအတွက် တက်ကြွလှုပ်ရှားနေ သူများကို ဆက်လက်ဖမ်းဆီးနေခြင်းမှာ အပြောနှင့်အလုပ် မညီညွှတ်ခြင်းသာဖြစ် ကြောင်း မြန်မာနိုင်ငံရှေ့နေများကွန်ရက်မှ ဥက္ကဋ္ဌ ဦးကြီးမြင့်က ပြောကြားခဲ့သည်။
ထို့ကဲ့သို့ လူ့အခွင့်အရေးလှုပ်ရှားသူများကို ဖမ်းဆီးထိန်းသိမ်းထားခြင်းဖြင့် နိုင်ငံတကာ ၏ ယုံကြည်မှုကိုလည်း လျော့နည်း သွားစေနိုင်သည်ဟုလည်း ၎င်းကဆက်လက် ပြောကြားခဲ့သည်။
ပြည်ထဲရေးဝန်ကြီးဌာန၏ အမိန့်ဖြင့် လူ့အခွင့်ရေးလှုပ်ရှားသူ Generation Wave အတွင်းရေးမှူး ဦးဝေဖြိုးအောင်နှင့် အမျိုးသားဒီမိုကရေစီအင်အားစု (NDF) ပါတီကိုယ် စားပြု ဖားကန့်မြို့နယ်မှ ရွေးကောက်ပွဲဝင်ပြိုင်ခဲ့သူ ဒေါ်ဘောက်ဂျာတို့ကို ဇူလိုင်လ တတိယအပတ်အတွင်း ကြွေးကျန်ပြစ်မှုများဖြင့် ဖမ်းဆီးထိန်းသိမ်း တရားစွဲဆိုထားသည်။
YC
| Google Drive: create, share, and keep all your stuff in one place. |  |