Posts
ပြည်ထောင်စုနေ့
လွန်ခဲ့သော ၆၄ နှစ်ခန့်က ဗိုလ်ချုပ်အောင်ဆန်းအမှူးပြုသည့် ဗမာပြည်မမှ ခေါင်းဆောင်ကြီးများနှင့် တိုင်းရင်းသားခေါင်းဆောင် ကြီးများသည် ရှမ်းရိုးမပေါ်ရှိ ပင်လုံဆိုသော မြို့ကလေး၏ ခိုက်ခိုက်တုန်အောင် ချမ်းအေးလှသော နှင်းမှုန်များကို အံတု၍ အင်္ဂလိပ် လက်အောက်မှ လွတ်လပ်ရေးကို တောင်တန်းနှင့်ပြည်မ အတူတကွ ရယူရေးအတွက် အကြိတ်အနယ် ဆွေးနွေးခဲ့ကြသည်။ ပြည်မနှင့် တောင်တန်းဒေသမခွဲခြားဘဲ လွတ်လပ်ရေးကို အတူတကွ ရယူကြမည်၊ တိုင်းရင်းသား ညီအစ်ကို မောင်နှမ အချင်းချင်း ချစ်ကြည်ရင်းနှီးစွာ အတူတကွနေထိုင်ကြသည့် လွတ်လပ်သော ပြည်ထောင်စုနိုင်ငံအဖြစ် ရပ်တည်သွားကြရန် သဘောတူလက်မှတ်ရေးထိုးခဲ့ကြသည့် ဖေဖော်ဝါရီလ ၁၂ ရက်နေ့ကို ပင်လုံညီလာခံ၊ ပြည်ထောင်စုနေ့၊ တိုင်းရင်းသား ချစ်ကြည် ရင်းနှီးမှုကို မှတ်ကျောက်တင်နိုင်ခဲ့သည့်နေ့ဟု ကျွန်ုပ်တို့ ငယ်စဉ်တည်းက အရိုးစွဲအောင် ကျက်မှတ်ယုံကြည်ခဲ့ကြ သည်။
အောင်မြင်မှုတို့သည် ရိုးရှင်းလွယ်ကူစွာရလေ့မရှိ။ ပင်လုံညီလာခံတွင် ဆွေးနွေး၍ မပြီးပြတ်နိုင်သဖြင့် ဗိုလ်ချုပ်ကိုယ်တိုင် စိတ်ပျက်၍ ပြည်မသို့ပြန်ရန် ပြင်ဆင်ချိန်ကျမှ တိုင်းရင်းသားခေါင်းဆောင်များသည် သူတို့ချစ်သော ကိုအောင်ဆန်း စိတ်ငြိုငြင်မည်ကို စိုးရိမ်သဖြင့် နောက်ဆုံးအချိန်တွင်မှ ပြည်ထောင်စုအဖြစ်ပူးပေါင်းနေထိုင်သွားကြရန် လက်မှတ်ရေးထိုးခဲ့ကြသည်။ သို့ရာတွင် တိုင်းရင်းသားတို့က ပြည်ထောင်စုအဖြစ် ဆယ်နှစ်ခန့် ယှဉ်တွဲနေထိုင်ပြီး နောင်ဆယ်စုနှစ်တစ်ခုအကြာတွင် ပြည်ထောင်စုအဖြစ်နှင့် ဆက်လက်နေထိုင်မည်(သို့) သီးခြားနိုင်ငံများအဖြစ် ရပ်တည်သွားကြမည်ဟူသည့် အချက်ကို ထည့်သွင်းချုပ်ဆိုခဲ့ကြပြီး ဖက်ဒရယ်မူဟု ခေါ်ဆိုခဲ့ကြသည်။ အဆိုပါ ဖက်ဒရယ်မူသည်ပင် နောင်ဆယ်နှစ်အကြာတွင် တိုင်းရင်းသားညီညွတ်ရေးကို ပျက်စီးစေခဲ့ပြီး ကမ္ဘာပေါ်တွင် အရှည်ကြာဆုံးပြည်တွင်းစစ်ကို ဆင်နွှဲခဲ့ကြသည်မှာ ယနေ့တိုင်ဖြစ်သည်။
ဗမာဆိုသည်မှာ ကတိမတည်၊ တိုင်းရင်းသားဆိုသည်မှာ လိုအပ်သည်ထက်အခွင့်အရေးယူတတ်သည်ဟူသော အမြင်မကြည်မှုများသည် ပြည်တွင်းစစ်ကို ကြာညောင်းစေခဲ့ပြီး အပြန်အလှန်ယုံကြည်မှုလဲ တည်ဆောက်၍ မရသည့်နိုင်ငံသည် တည်ငြိမ်မှုမရှိတော့ဘဲ ဖွံ့ဖြိုးတိုးတက်မှုတွင်များစွာနောက်ကျကျန်စေခဲ့သည့် အကြောင်းအရင်းလဲ ဖြစ်ပါသည်။ မြန်မာနိုင်ငံတွင် အာဏာသိမ်းမှုများဖြစ်ပွားအပြီးတွင် အဆိုပါကွဲလွဲမှုများ ပိုမိုဆိုးရွားလာပြီး သတိမမူမိသည့်အချက်မှာ အာဏာရှင်ဆိုသည်မှာ တိုင်းရင်းသားရော ဗမာရော မည်သူ့ကိုမဆို ၎င်းအား ဆန့်ကျင်လျှင် ဖိနှိပ်မည်ဆိုသည့်အချက်ပင်ဖြစ်သည်။ ဖိနှိပ်မှုအောက်တွင် မည်သည့်လူမျိုးမှ တိုးတက်မှုမရရှိခဲ့ကြဘဲ အထူးသဖြင့် စစ်ပွဲများ မပြတ်ဆင်နွှဲနေကြရသည့် တိုင်းရင်းသားဒေသများသည် များစွာပင် နောက်ကျကျန်ခဲ့ပြီဖြစ်ပါသည်။
ယခုအခါတွင် အာဏာရှင်စနစ်မှ ပါလီမန်စနစ်သို့ကူးပြောင်းနေပြီဖြစ်ရာ လူတိုင်းလူတိုင်းသည် တန်းတူညီမျှ အခွင့်အရေးများ ရရှိနိုင်ရန် သက်ဆိုင်ရာလွှတ်တော်များမှ တဆင့်တင်ပြတောင်းဆိုကြရတော့မည်ဖြစ်သည်။ ပေါ်ပေါက် လာသည့် ပါလီမန်သည် မည်သို့ပင်ဖြစ်စေကာမူ တည်ငြိမ်အေးချမ်းမှုနှင့် ညီညွတ်ရေးကိုလိုလားသည့် တိုင်းရင်းသားနှင့် ပြည်သူလူထုကို တစ်စိတ်တစ်ပိုင်းအားဖြင့် ကိုယ်စားပြုနေသည်ကို သတိချပ်စေလိုပါသည်။ ဤပါလီမန်တွင်ပင် လူတစ်ဦးချင်းတိုးတက်ရေးကိုတောင်းဆိုရင်းဖြင့် သာတူညီမျှမှုနှင့် တန်းတူရည်တူရှိမှုကို ဖြစ်ပေါ်စေကာ ညီရင်းအကိုချစ်ကြည်မှုမှ တိုင်းရင်းသားသွေးစည်းညီညွတ်ရေးကို အလိုလျှောက်ဖော်ဆောင်ပြီးဖြစ်ပေမည်။
ယခုအခါတွင် နိုင်ငံရေးသြဇာကြီးမားသူများက တိုင်းရင်းသားတို့၏ ရိုးသားမှုနှင့် ဖက်ဒရယ်မူဟူသော မက်လုံးကို အကြောင်းပြု၍ ဒုတိယပင်လုံညီလာခံဟူ၍ ကျင်းပရန်ပြင်ဆင်နေသည်ကိုလည်းကြားသိနေရသည်။ မည်မျှပင် စေတနာကောင်းစေကာမူ နောက်သို့တဖြေးဖြေး ဆုတ်နေသော အာဏာရှင်ကို ရှေ့သို့ပြန်တိုးလာရန် ဖိအားပေးခြင်းမျိုးလည်း ဖြစ်သွားနိုင်ပါသည်။ ထို့ကြောင့် အခိုက်အတန့်အားဖြင့် ရရှိလာနေသည့် တည်ငြိမ်မှုများ နောက်ပြန်ဆုတ်သွားလျှင်၊ တိုင်းပြည်သည် ပြည်တွင်းစစ်များဆီသို့ သံသရာလည်သွားလျှင် ညီအကိုချင်းချစ်ကြည် ရင်းနှီးမှုဆိုသည်မှာ နောက်တစ်ကြိမ်ထပ်မံရရှိရန်နိုင် ပိုမိုခက်ခဲသွားမည်ဖြစ်ပြီး ကိုအောင်ဆန်းကဲ့သို့သော ပြည်သူချစ်သော ခေါင်းဆောင် ကောင်းများ မပေါ်ပေါက်သေးသည်ကိုလည်း သတိပြုသင့်ပါသည်။
တစ်ဦးတစ်ယောက်တည်း ၊ မိမိပြည်နယ်နှင့်တိုင်းတစ်ခုတည်း ရပ်တည်၍မရတော့သော ယနေ့ခေတ်တွင် ပြည်ထောင်စုအတွင်း မှီတင်းနေထိုင်ကြသည့် တိုင်းရင်းသားလူမျိုးစုအားလုံးသည် ကိုးကွယ်ရာ ဘာသာနှင့် အသားအရောင်တို့ကိုလိုက်၍ ခွဲခြားမှုမရှိဘဲ အားလုံး သည်တန်းတူရည်တူအခွင့်အရေးများရရှိရန် တစ်ဦးနှင့်တစ်ဦး အမြင်မတူညီမှုများကို လက်ခံနားလည်ပေးရင်း အပြန်အလှန်ညှိနှိုင်းယူကြရင်းဖြင့် တစ်ဦးချင်းတိုးတက်မှု၊ တန်းတူရည်တူ ရှိမှုများရရှိလာလျှင် ညီရင်းအကိုစိတ်ဓာတ်၊ ပြည်ထောင်စုစိတ်ဓာတ်ဆိုသည်မှာ တမင်တကာ မွေးမြူယူရန်ပင်မလိုတော့ဘဲ တိုင်းရင်းသားလူမျိုးစုများ အပြန်အလှန်ချစ်ခင်လေးစားမှုများ အလိုလျှောက်ဖြစ်ပေါ်လာကာ စစ်မှန်သော ပြည်ထောင်စု ကြီးလည်း ဖြစ်ပေါ်လာလိမ့်မည်ဖြစ်သည်။
(အထက်ပါ သတင်းများကို ရွှေပြည်တော် ဝက်ဘ်ဆိုက်မှ ကူးယူဖော်ပြခြင်းဖြစ်ပါသည်။ ခရော်နီကယ် ပရိတ်သတ်များအတွက် သတင်းများနှင့် ဆောင်းပါးများကို အချိန်ပေးဖတ်ရှုရသည့်အလျှောက် ပေးရသည့်အချိန်နှင့် ထိုက်တန်သည့် ရလဒ် တခုခုကို ရရှိကျေနပ်စေရန် ရည်ရွယ်၍ ထပ်ဆင့်ဖော်ပြပေးခြင်းသာ ဖြစ်ပြီး ပေးပို့သည့် သတင်းများ၊ ဆောင်းပါးများ အားလုံးသည် yangon chronicle ၏ အာဘော်(လုံးဝ) မဟုတ်ပါကြောင်းအသိပေး ဖော်ပြအပ်ပါသည်။)
_____________________________________________________________________________________
--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.