Posts
 | yangonchronicle2011 Op-Ed |
၉.၆.၂၀၁၂
ဆောင်းပါးကဏ္ဍ
- လူနှင့် ဖြတ်သန်းမှု
*****************************************
ဆောင်းပါးကဏ္ဍ
လူနှင့် ဖြတ်သန်းမှု
ထက်မြက်
(ပေါ်ပြူလာသတင်းမီဒီယာ၏ အင်တာနက်စာမျက်နှာမှ ကူးယူဖော်ပြချက်)
ယခုနှစ် မေလက ကျွန်တော်သည် ဆရာဒဂုန်တာရာ နေထိုင်ရာ အောင်ပန်းမြို့သို့ ရောက်ရှိခဲ့ပါသည်။ အောင်ပန်းမြို့သို့ သွားရောက်ခြင်းမှာ ဆရာဒဂုန်တာရာ၏ ၉၃ နှစ်မြောက် မွေးနေ့ပွဲသို့ တက်ရောက်ရန်သွားခဲ့ခြင်းဖြစ်၏။ နှစ်စဉ် မေလရောက်တိုင်း ရှမ်းပြည်နယ်တောင်ပိုင်းသို့ ဝတ်မပျက် သွားရောက်ခဲ့ပါသည်။ ကျွန်တော်တို့ မိသားစုနှင့်အတူ စာရေးဆရာ၊ ကဗျာဆရာ၊ ပန်းချီ ဆရာ၊ အယ်ဒီတာ၊ ထုတ်ဝေသူ စသည့် စာပေအသိုင်းအဝိုင်းမှ အနုပညာမောင်နှမ ၃ဝ ကျော်၊ ၄ဝ နီး ပါး ရန်ကုန်မှ တက်ရောက်ခဲ့ကြသည်။ တချို့က ကားနှင့် သွားကြသည်။ တချို့က ရထားနှင့် သွားကြလေသည်။ ရန်ကုန်မှ စာပေအသိုင်းအဝိုင်းကဲ့သို့ပင် မန္တလေးမှလည်း ကားများ၊ ရထားများဖြင့် အသုတ်လိုက် တက်လာကြ၏။ နောက်ပျဉ်းမနားနှင့် အခြားဒေသများမှ လည်း မွေးနေ့ပွဲသို့ တက်တက်ကြွကြွ တက်ရောက်လာပါသည်။ ဆရာဒဂုန်တာရာမှာ ယခု အခါ အသက် ၉၃ နှစ်တင်းတင်း ပြည့်လေပြီ။ ယခုအသက် အရွယ်မှာ ရင့်မှည့်လာသောအရွယ်သို့ ရောက်ပြီဟု ဆိုရမည်။ သို့သော် ဆရာမှာ သတိအနည်းငယ် ချို့ယွင်းသော်လည်း အတော်များများကိုမူ မှတ်မိနေဆဲ ဖြစ်သည်။ ကျွန်တော်တို့နှင့် စာရေးဆရာအသင်းအကြောင်း၊ စာရေးဆရာ ကလပ်အကြောင်း၊ စာရေးဆရာသမဂ္ဂအကြောင်းများကို အားပါးတရနှင့် ကျွန်တော်တို့ကို ပြောပြရာ မှတ်ဥာဏ်မချို့ယွင်းသေးပါ။ အစားကိုလည်း အားပါးတရစား၍ ကျွန်တော်တို့ အားတက်မိပါသည်။ ဆရာသည် ယခုအထိ ‘ရန်သူမရှိ၊ မိတ်ဆွေရှိ၊ မုန်းသူမရှိ၊ ချစ်သူသာရှိ’ ဟူသော အယူအဆကို ကိုင်စွဲပြီး ငြိမ်းချမ်းရေးတည်ဆောက်ရာတွင် တစ်ဖက် နှင့်တစ်ဖက် ရန်သူများဟု မယူဆဘဲ မိတ်ဆွေများဟု ယူဆပါက ငြိမ်းချမ်းရေးရရှိနိုင်ကြောင်း ယူဆထား၏။ ဆရာက ပြည်တွင်းငြိမ်းချမ်းရေးအဖွဲ့တွင် ဆရာကြီးသခင်ကိုယ်တ်ာမှိုင်း နှင့်အတူ သူမနာ၊ ကိုယ်မနာ ငြိမ်းချမ်းရေးတည်ဆောက်ဖို့၊ တွေ့ဆုံညှိနှိုင်းပြီး အဖြေရှာကြဖို့ လှုံ့ဆော်စည်းရုံးခဲ့သူဖြစ်သည်။ တစ်ချိန်တည်းတွင် ကမ္ဘာ့ငြိမ်း ချမ်းရေး ကွန်ဂရက်တွင်လည်း ပါဝင်ခဲ့သည်။ ကမ္ဘာ့ငြိမ်းချမ်းရေး ညီလာခံကျင်းပရာ စတော့ဟုမ်းမြို့သို့လည်း ကိုယ်စားလှယ်အဖြစ် တက်ရောက်ခဲ့လေ သည်။ သူ့ဘဝတွင် ငြိမ်းချမ်းရေး လှုပ်ရှားမှုများအတွက် အချိန်အများဆုံး ပေးခဲ့လေသည်။
ဆရာ၏ ၉၃ နှစ်မြောက် မွေးနေ့ကို အောင်ပန်းမြို့၊ မဟာဂန္ဓာရုံကျောင်း၊ ဓမ္မာရုံသစ်ကြီးတွင် ကျင်းပခြင်းဖြစ်ပါသည်။ ယခင်နှစ်ကမူ တည်ရှိနေ သော နိုင်ငံရေးအခြေအနေအရ ဆရာ့မွေးနေ့ကို ကျယ်ကျယ်ပြန့်ပြန့် မလုပ်နိုင်ခဲ့ပေ။ ဆရာ့ အိမ်အပေါ်ထပ်တွင်သာ ဆရာ့တူမ ဆရာမသင်းမြစန္ဒီ ဦးစီးကာ ကျဉ်းကျဉ်းကျပ်ကျပ် ကျင်းပခဲ့ရ၏။ ယခုမူ ပုဂ္ဂိုလ်ကြီးများ၏ မွေးနေ့အခမ်းအနားကို ဘုန်းကြီးကျောင်းများ၌ ကျင်းပခွင့်ရသလို၊ ဟိုတယ်များ၊ ဓမ္မာရုံများ၊ စားသောက်ဆိုင်များတွင်လည်း ကျင်းပခွင့်ရနေပါပြီ။ ယခုနှစ် ဆရာဒဂုန်တာရာ ၉၃ နှစ်မြောက် မွေးနေ့အခမ်းအနားမှာ အောင်ပန်းတွင် ကျင်းပခဲ့သမျှ၌ တက်ရောက်သူ အများဆုံးဖြစ်သည်။ ပို၍ ထူးခြားသည်မှာ ၈၈ မျိုးဆက် ကျောင်းသားခေါင်းဆောင်များ တက်ရောက်လာခြင်းဖြစ်ပါသည်။ ကိုမင်းကိုနိုင် ဦးဆောင်သော ၈၈ မျိုးဆက်ကျောင်းသားများသည် တောင်ကြီး၊ အင်းလေး၊ ကလော၊ ဟဲဟိုး၊ ဟိုပုန်းစသည့် ဒေသများတွင် လူမှုရေးလုပ်ငန်းများကို လုပ် ဆောင်ရင်း၊ ပြည်သူလူထုနှင့်ထိတွေ့ရင်း ဆရာဒဂုန်တာရာ မွေးနေ့ပွဲကို တက်ရောက်လာခြင်းဖြစ်သည်။ ထို ၈၈ မျိုးဆက်ကျောင်းသားများမှာ ထောင်က ထွက်လာပြီးကတည်းက အိမ်တွင်ကုပ်၍ အေးအေးဆေးဆေး မနေခဲ့ကြပေ။ သူတို့ လုပ်ဆောင်နိုင်စွမ်းရှိသမျှကို မမောမပန်း လုပ်ဆောင်နေကြသူများ ဖြစ်၏။ ပေးလာသော အခြေအနေအရ ရေရရှိရေး၊ စာသင်ကျောင်းဆောက်ရေး၊ ဆေးပေးခန်းဆောက်ရေးစသည့် ကိစ္စများမှအစ လူထုအတွက် လိုအပ် သမျှကို နိုင်ငံရေးအရှိန်အဝါ၊ ကျောင်းသားခေါင်းဆောင်အရှိန်အဝါ၊ လူထုထောက်ခံမှုအရှိန်အဝါများဖြင့် ကိုယ်ကျိုးမကြည့်ဘဲ လုပ်ဆောင်နေကြသည့် အလွန်ချီးကျူးထိုက်သူများ ဖြစ်ပါသည်။ သူတို့သည် နိုင်ငံရေးအခြေအနေများ ပွင့်လင်းနေပြီးဖြစ်သော်လည်း သူတို့က နိုင်ငံရေးပါတီလည်း မထူထောင်၊ ရှိနေသော နိုင်ငံရေးပါတီများနှင့်လည်း ပါဝင်ပတ်သက်မှုမရှိဘဲ ပွင့်လင်းလူ့အဖွဲ့အစည်း တည်ဆောက်ရေး ကြွေးကြော်သံဖြင့် လူမှုရေးကိစ္စများကိုသာ တက်တက်ကြွကြွ ဆောင်ရွက်နေလေသည်။ ယနေ့ အသီးသီးက အားတက်သရော တည်ဆောက်နေသော ဒီမိုကရေစီနိုင်ငံ ဖြစ်တည်ရေး၊ ပြည်တွင်းငြိမ်း ချမ်းရေး တည်ဆောက်ရေးတို့တွင် ၈၈ မျိုးဆက်ကျောင်းသားများ တစ်တပ်တစ်အား ပါဝင်လာသောကြောင့် သူတို့၏လုပ်ဆောင်ချက်မှာ ပြည်သူကို လှုံ့ ဆော် စည်းရုံးနိုင်ပေလိမ့်မည်။
ဒဂုန်တာရာ၏ မွေးနေ့မှာ မေလ ၁ဝ ရက်နေ့ဖြစ်သော်လည်း ယခုနှစ် မေလ ၁ဝ ရက်နေ့မှာ ရုံး ပိတ်ရက် မကျသောကြောင့် ရုံးပိတ်ရက် မေလ ၆ ရက် တနင်္ဂနွေနေ့ကို ကျင်းပခဲ့ပါသည်။ ၈၈ ကျောင်းသားခေါင်းဆောင်ကိုကိုကြီးက မွေးနေ့ပွဲမတိုင်မီ ဆရာဒဂုန်တာရာကို ဂါရဝပြုလာရောက် ကန်တော့ သွားသည်ဟု သိရပါသည်။ သူတို့သည် အဖွဲ့လိုက် မြန်မာပြည်တစ်နံတစ်လျားသို့ ပွင့်လင်းလူ့အဖွဲ့အစည်းအတွက် သွားရောက်နေရသောကြောင့် အား လပ်သည်ဟူ၍ မရှိကြပေ။ မွေးနေ့အခမ်းအနားကို မေလ ၆ ရက်၊ မနက် ၈ နာရီခွဲ တွင် စတင်ကျင်းပပါသည်။ တက်ရောက်လာသူ ပြည်သူများနှင့် စာပေ သမားများ၊ နိုင်ငံရေးသမား များအားလုံး ၅ဝဝ ကျော်ခန့်ရှိလိမ့်မည် ထင်ပါသည်။ ဓမ္မာရုံကြီးတစ်ခုလုံး ပြည့်သွားပါသည်။ အခမ်းအနားမှူးမှာ ဆရာအံ့မောင် ဖြစ်သည်။ မန္တလေးမှ ဆရာကိုလေး (အင်းဝဂုဏ်ရည်)၊ ရန်ကုန်မှ ဆရာမောင်သာနိုး၊ ပျဉ်းမနားမှ ဆရာမောင်သင်းခိုင်တို့လည်း တက်ရောက် ဂါရဝပြုကြ သည်။ အခမ်းအနားစသည်နှင့် ဆရာဒဂုန်တာရာကို စာပေသမားများနှင့် ဧည့်ပရိသတ်က ဦးချ ကန်တော့ကြသည်။ နောက် မွေးနေ့အတွက်ပေးပို့သော သဝဏ်လွှာများကို ပေးပို့ကြသည်။ ဗကသများအဖွဲ့ချုပ်သဝဏ်လွှာ၊ မြန်မာနိုင်ငံ စာရေးဆရာများသမဂ္ဂ ဖြစ်မြောက်ရေး ကော်မတီ၏ သဝဏ်လွှာ၊ အ ထက် မြန်မာနိုင်ငံစာရေးဆရာများသမဂ္ဂ ဖြစ်မြောက်ရေးကော်မတီ၏ သဝဏ်လွှာ စသည့် သဝဏ်လွှာအသီးသီးကို ဖတ်ပြီးသည့်နောက် ကိုမင်းကိုနိုင်က ဒဂုန်တာရာအား ဂါဝရပြုသည့် သူကိုယ်တိုင်ရေးစပ်သော ကဗျာတစ်ပုဒ်ကို ဖတ်ကြားသွားပါသည်။
သူတို့အဖွဲ့မှာ မွေးနေ့ အခမ်းအနားတွင် အေးအေးဆေးဆေး တက်ရောက်ဖို့ အချိန်မရှိပါ။ သူတို့ရှေ့ဆက်ပြီး သွားစရာမြို့ အများအပြားရှိသည်။
သူတို့မှာ လူမှုရေးလုပ်ငန်းများ လုပ်ဆောင်ဖို့ တခြားဒေသများ၌ ချိန်းဆိုထားပြီးဖြစ်သည်။ မွေးနေ့ရှင်က ကျွေးမွေးသော နံနက်စာကို စားသောက် ပြီးသည်နှင့် ၈၈ မျိုး ဆက်ကျောင်းသားများအဖွဲ့မှာ အောင်ပန်းမှ ထွက်ခွာသွားကြလေသည်။
အစီအစဉ်အရ အထက်မြန်မာ နိုင်ငံ စာရေးဆရာများကိုယ်စား ဆရာကိုလေး(အင်းဝဂုဏ်ရည်) က ဆရာဒဂုန်တာရာအား မွေးနေ့ဂုဏ်ပြုစကား ပြောကြားသည်။ သူ ပြောကြားပြီးသည့်နောက် အောက်မြန်မာနိုင်ငံစာရေးဆရာများကိုယ်စား ပြောကြားရမည့်သူ၏ အလှည့်မှာ ကျွန်တော်ဖြစ်ပါသည်။ ကျွန်တော်က ယနေ့ပြည်သူများ နိုင်ငံရေးသမားများ၊ ကျောင်းသားများ၊ စာပေသမားများနှင့် သက်ဆိုင်သော အခြေအနေတစ်ခုကို စဉ်းစားရင်း ‘လူနှင့်သ မိုင်း ဖြတ်သန်းမှု’ဆိုသော ခေါင်းစဉ်ကို ပြောကြားခဲ့လေသည်။ ကျွန်တော် စဉ်းစားမိသည်မှာ ဆရာဒဂုန်တာရာ၏ သမိုင်းဖြတ်သန်းမှု ဖြစ်ပါသည်။ ဆရာနှင့် ၈၈ ကျောင်းသားခေါင်းဆောင် မင်းကိုနိုင်တို့၏ ဖြတ်သန်းမှုအကြောင်း ဖြစ်သည်။ ဆရာသည် အသက် ၂ဝ အရွယ်က ကျောင်းသားသမဂ္ဂတွင် အမှုဆောင် အဖြစ် ပါဝင်ခဲ့သူဖြစ်သည်။ တက္ကသိုလ်ကျောင်းသားများသမဂ္ဂ၏ အာဘော် အိုးဝေမဂ္ဂဇင်းတွင် အယ်ဒီတာအဖြစ် တာဝန်ယူခဲ့ပါသည်။ ထိုတာဝန်မှာ ယခင် က ဗိုလ်ချုပ်အောင်ဆန်းကယူခဲ့သလို ဆရာတာဝန်ယူခဲ့သော အိုးဝေမဂ္ဂဇင်း၏ခေါင်းကြီးမှာ နွေဦးဖြစ်လေသည်။ ဆရာသည် သမိုင်းတွင် သူ့ပခုံးပေါ်ကျ သောတာဝန်ကို ကျေပွန်စွာ ထမ်းဆောင်ခဲ့သူလည်း ဖြစ်၏။ သခင်အောင်ဆန်း၊ သခင်ဗဟိန်း၊ သခင်သန်းထွန်းတို့နှင့်အတူ မြန်မာနိုင်ငံ၏ သမိုင်းကို သူဖြတ်သန်းခဲ့ပါသည်။ ပြည်သူလူထုကြီးက သမိုင်းကို ဖန်တီးခဲ့သလို ထိုသမိုင်းကို ဖြတ်သန်းရမည်မှာ မိမိတို့၏ တာဝန်ဖြစ်သည်။ ပြည်သူကို အကျိုးပြု သော၊ သစ္စာမဖောက်သော ဖြတ်သန်းမှုမျိုးဖြင့် ဖြတ်သန်းရမည်။
ကျွန်တော်တို့သည် သမိုင်းကို အားလုံးဖြတ်သန်းနေကြပါသည်။ မှန်ကန်သော ဖြတ်သန်းမှု၊ တာဝန်ကျေသောဖြတ်သန်းမှု စသည်ဖြင့် ဖြတ်သန်းမှု ကောင်းဖို့လိုပါသည်။ လူအချို့သည်လည်း သမိုင်းကို ဖြတ်သန်းခဲ့ဖူးပါသည်။ နိုင်ငံရေးဖြစ်စဉ်များတွင် ပါဝင်ပတ်သက်ခဲ့ဖူးကြသည်။ သို့သော် သူတို့မှာ ဟို ကွေ့ရောက် ဟိုတက်နှင့် လှော်၊ ဒီကွေ့ရောက် ဒီတက်နှင့်လှော်ဖြင့် ကိုယ်ကျိုးရှာ၊ အနစ်နာမခံရဲသူများဖြစ်သောကြောင့် သူတို့မှာ နာမည်ဆိုးဖြင့် ကျော်ကြားလေသည်။ သူတို့သည် အာဏာရပါတီများ၊ အခွင့်အရေးပေးနိုင်သော အဖွဲ့အစည်းများတွင် ပါဝင်ခဲ့ကြပြီး ရေထဲမိုးထဲရောက်သောအခါ ပြည်သူ ကို သစ္စာဖောက်သွားသူများ၊ သမိုင်းကို ကျောခိုင်းသွားသူများ ဖြစ်သွားကြ၏။ ဒဂုန်တာရာကဲ့သို့ သမိုင်းကို ဖြတ်သန်းသူများနှင့် ၈၈မျိုးဆက်ကျောင်းသား များ၏ ယခုထက်တိုင် သမိုင်းကိုဖြတ်သန်းနေသူအား စဉ်းစားရင်း တစ်လျှောက်လုံးအနစ်နာခံ၊ မိသားစုဘဝကို စွန့်လွှတ်ကာ သမိုင်းကို မှန်မှန်ကန်ကန် လျှောက်လှမ်းနေသည့် ဒေါ်အောင်ဆန်းစုကြည် အကြောင်းကိုလည်း အလေးအနက် ပြန်စဉ်းစားမိသည်။ မြန်မာနိုင်ငံတွင် ဒီမိုကရေစီဖော်ဆောင်ရေးနှင့် မြန်မာနိုင်ငံဖွံ့ဖြိုးတိုးတက်ရေးအတွက် နှစ်ပေါင်းများစွာ အကျယ်ချုပ်ထားခံရပြီး သူမရည်ရွယ်ချက်ကို မစွန့်လွှတ်ဘဲ အကြမ်းမဖက်သောနည်းဖြင့် ဒီမိုက ရေစီတည်ဆောက်ဖို့ ကြိုးစားလာခဲ့၏။ ဒေါ်အောင်ဆန်းစုကြည်၏ စွန့်လွှတ်မှု၊ ခေါင်းဆောင်နိုင်မှုတို့ကြောင့် အနောက်နိုင်ငံများက သူမကို အလေးထားကာ တိုင်းပြည်ဖွံ့ဖြိုးရေးအတွက် အပြောင်းအလဲဖြစ်လိုသော မြန်မာ အစိုးရခေါင်းဆောင် များနှင့် နားလည်မှုရယူနိုင်ခဲ့ကြသည်။ လုံးဝဥဿုံ ပြောင်းလဲသည်၊ မပြောင်းလဲသည်ထား၊ ယခင်နှစ်များနှင့်မတူ ပြောင်းလဲနေသည်မှာ မျက်မြင်ကိုယ်တွေ့ ဖြစ်ပါသည်။ သူတို့အားလုံးသည် သမိုင်းကို ဖြတ်သန်းနေကြ သည်။ ပြည်သူလူထုအတွက် အမှန်တကယ် ဖြတ်သန်းမည်ဟု ရိုးရိုးသားသား သဘောထားနိုင်ခဲ့လျှင် သမိုင်းကိုဖန်တီးသော ပြည်သူလူထုကလည်း မည်သူ့ကိုမဆို မျက်ကွယ်ပြုမည် မဟုတ်ပေ။ ထို့ကြောင့် လူသည်သမိုင်းကို ဖြတ်သန်းနေရာတွင် မှန်မှန်ကန်ကန် ဖြတ်သန်းရန် ဖြစ်၏။ မိမိတိုင်းပြည်၊ မိမိ လူမျိုးအတွက် အမှန်ကန်ဆုံး၊ စေတနာအပါဆုံးဖြင့် သမိုင်းကို ဖြတ်သန်းကြပါစို့။
*****************************************
Google Docs makes it easy to create, store and share online documents, spreadsheets and presentations.
