Posts
 | yangonchronicle2011 Op-Ed |
၁၇.၇.၂၀၁၂
ဆောင်းပါးကဏ္ဍ
- အရေးတကြီး ဆောင်ရွက်သင့်သည်မှာ
*****************************************
ဆောင်းပါးကဏ္ဍ
အရေးတကြီး ဆောင်ရွက်သင့်သည်မှာ
ဆယ်စုနှစ်နှစ်စုအကြာ ဖြစ်သန်းလာရပြီး အောင်မြင်မှုရာခိုင်နှုန်းအားဖြင့် နည်းပါးခဲ့သော မြန်မာ့ဒီမိုကရက်တိုက်ဇေးရှင်းဖြစ်စဉ်မှာ ၂၀၁၀ ပွိုင့် အလွန် နိုင်ငံရေးပြုပြင်ပြောင်းလဲမှုများအပြီးတွင် အောင်မြင်နိုင်ချေ အလားအလာကောင်းများ ဖြစ်ထွန်းပေါ်ပေါက်လာပြီဖြစ်သည်။ ယခင်အစိုးရ အဆက်ဆက်၏ နိုင်ငံရေးအင်စတီကျူးရှင်းများ၏ ရလဒ်ကြောင့် မြန်မာနိုင်ငံရေးဖြစ်စဉ်တွင် ပါဝင်နေသူများမှာကိစ္စရပ်တိုင်းအပေါ် ရန်/ငါ စည်းခြား၊ ငါတို့ နှင့် သူတို့ဆိုသည့် အမြင်မျိုးနှင့် ကြည့်မြင်လေ့ရှိကြသည်။ တနည်းအားဖြင့်ဆိုရလျှင် အစွန်းရောက် နိုင်ငံရေးရပ်တည်မှု (Polarization) ဖြင့် နိုင်ငံရေး တွင် ပါဝင်ပတ်သက်ခဲ့ကြသည်။ သို့နှင့် မြန်မာဒီမိုကရက်တိုက်ဇေးရှင်းဖြစ်စဉ်မှာ ရှေ့တိုးဖွံ့ဖြိုးတိုးတက်ခဲ့ခြင်းမရှိဘဲ အဆိုးကျော့သံသရာထဲ၌သာ တဝဲဝဲ လည်နေခဲ့ရသည်။
ဤသို့ ပြည်တွင်းရေးရာကိစ္စရပ်များတွင် အမျိုးသားစည်းလုံးညီညွတ်မှု ရှာမရသည့်အခါ အခြားနိုင်ငံများ၏ အလွယ်တကူ သြဇာလွှမ်းမိုးမှုခံ ရခြင်းနှင့်အတူ နိုင်ငံရေးကြောင့်ပင်လျှင် စီးပွားရေးအရပိတ်ဆို့အရေးယူမှုများ ကြုံတွေ့ခဲ့ရသည်။ အနောက်အုပ်စု၏ ပိတ်ဆို့မှုကြောင့် တရုတ်နိုင်ငံ၏ လွှမ်းမိုးမှုကို လက်သင့်ခံခဲ့ရသည်။ နိုင်ငံမှာတော့ ဘာမျှဖြစ်ထွန်းတိုးတက်သွားခြင်းမရှိခဲ့။ ဒေသတွင်းနိုင်ငံများ၏ ဖွံ့ဖြိုးတိုးတက်မှုနှင့် ယှဉ်လျှင်ပင် အတော်ကြီး နောက်ကျကျန်ရစ်ခဲ့ပါပြီ။ မြန်မာနိုင်ငံမှာပထဝီနိုင်ငံရေး၊ စီးပွားရေးအရ ဖွံ့ဖြိုးတိုးတက်နိုင်သည့် အလားအလာများစွာရှိသော်ငြားလည်း အကြောင်းအမျိုးမျိုးကြောင့် ဖွံ့ဖြိုးတိုးတက်မှု အနှေးကွေးဆုံးသောနိုင်ငံ ဖြစ်ခဲ့ရသည်။
အစိုးရသစ်၏ ပြုပြင်ပြောင်းလဲမှုများအပြီး နိုင်ငံတည်ဆောက်ရေးနှင့် အမျိုးသားတည်ဆောက်ရေး လုပ်ငန်းများမှာလည်း လွယ်မယောင်နှင့်ခက် တိမ်မယောင်နှင့်နက်သည့် လုပ်ငန်းစဉ်များဖြစ်နေသည်ကို တွေ့မြင်နေရသည်။ ယင်းလုပ်ငန်းစဉ်များ အောင်မြင်ဖို့ အရေးတကြီး ပြုပြင်ဆောင်ရွက်မှု များကို လုပ်ဆောင်ရန် အထူးပင် အရေးကြီးပါသည်။ ထိုသို့လုပ်ဆောင်နိုင်မှသာလျှင် နိုင်ငံသားအားလုံး မျှော်လင့်တောင်းတနေသည့် လုံခြုံသော၊ လူမှု ဘဝသာယာသော နိုင်ငံတစ်နိုင်ငံဖြစ်လာဖို့ ရေခံမြေခံကောင်းများ ရှိသွားမည်ဖြစ်သည်။
တရားဥပဒေစိုးမိုးမှု
တရားဥပဒေစိုးမိုးမှုမှာကောင်းမွန်သည့် လူ့အဖွဲ့အစည်းတစ်ခုဖြစ်ထွန်းလာဖို့ မရှိမဖြစ်အရာပင်ဖြစ်သည်။ တရားဥပဒေစိုးမိုးမှုမရှိလျှင် ကောင်းမွန်သည့်အစိုးရလည်း ဖြစ်လာလိမ့်မည်မဟုတ်။ ဒီမိုကရေစီခေါင်းဆောင် ဒေါ်အောင်ဆန်းစုကြည်ကလည်း မြန်မာနိုင်ငံတွင် တရားဥပဒေစိုးမိုးမှုရှိ လာဖို့ကို သူ၏ မိန့်ခွန်းများ၊ သတင်းစာရှင်းလင်းပွဲများတွင် အကြိမ်ကြိမ်အထပ်ထပ်ပြောကြားခဲ့ပြီး တရားဥပဒေစိုးမိုးမှုအရေးကြီးကြောင်းကို မီးမောင်း ထိုးပြခဲ့သည်။ ဥပဒေအတိုင်း လက်တွေ့ကျင့်သုံးဖို့ အားမထုတ်သေးသ၍ မြန်မာလူ့အဖွဲ့အစည်းအတွင်း လုံခြုံမှုကင်းမဲ့နေဦးမည်ဖြစ်ပြီး အကျင့်ပျက် လာဘ်စားမှုများလည်း ဆက်လက်ဖြစ်ထွန်းနေဦးမည်သာ ဖြစ်သည်။
ဗျူရိုကရေစီ
ဒီမိုကရေစီနိုင်ငံအများစုတွင် အစိုးရတစ်ဆက်ပြီးတစ်ဆက် ပြောင်းလဲသွားသော်ငြားလည်း မပြောင်းလဲသည့်အရာမှာ ဗျူရိုကရေစီအုပ်ချုပ်ရေး ပင် ဖြစ်သည်။ နှစ်ပေါင်းများစွာ မ.ဆ.လ စရိုက်ဖြင့်သာ အလုပ်လုပ်နေသော ဗျူရိုကရေစီမှာ ကြီးမားသည်နှင့်အမျှ စွမ်းဆောင်ရည်လည်း နိမ့်ပါးသည်။ ဦးသိန်းစိန်အစိုးရအနေဖြင့် ဗျူရိုကရေစီအုပ်ချုပ်ရေး ဒိုင်းနမစ်ဖြစ်လာဖို့ နည်းမျိုးစုံ ကြိုးပမ်းဆောင်ရွက်သွားနိုင်ခြင်းမရှိခဲ့လျှင် ချမှတ်ထားသည့် မူဝါဒ များလည်း လက်တွေ့အလုပ်ဖြစ်လာမည်မဟုတ်။ အဖြစ်လုပ်သည့်သဘောမျိုးနှင့်ဆိုလျှင် အစိုးရအပေါ် ယုံကြည်မှုကျသွားနိုင်ပါသည်။ ယခုအခါတွင် နိုင်ငံတကာကရော၊ ပြည်သူများကပါ လက်ရှိအစိုးရသစ်အပေါ် ယုံကြည်စပြုလာပြီ၊ သံသယကင်းစပြုလာပြီ…သို့သော် ဆက်လက် စောင့်ကြည့်နေသေး သည်ကို သတိချပ်စေချင်ပါသည်။ ပြည်သူများမျှော်လင့်ထားသလို ဖြစ်မဖြစ်မှာ ဗျူရိုကရေစီကို ပြုပြင်ပြောင်းလဲနိုင်မှုအပေါ်၌လည်း များစွာ မူတည်လျက် ရှိနေသည်။
အရည်အချင်းတည်ဆောက်ရေး
အရည်အချင်းတည်ဆောက်ရေးမှာလည်း နိုင်ငံတည်ဆောက်ရေး၊ အမျိုးသားတည်ဆောက်ရေးအတွက် အမှန်တကယ်အရေးကြီးသည့် လုပ် ငန်းစဉ်ကြီး ဖြစ်သည်။ ပုဂ္ဂလိကလုပ်ငန်းများတွင်လည်းကောင်း၊ အစိုးရဝန်ထမ်းများ၊ အများနှင့်သက်ဆိုင်သည့် လုပ်ငန်းများတွင်လည်းကောင်း ရာထူးနေရာမှာ ခေါ်ယူခန့်ထားရာ၌ အရည်အချင်းအဓိကဖြစ်မှုသာ ဖြစ်သင့်သည်။ ဤအချက်ကို သတိကြီးကြီးထားစေချင်ပါသည်။ အခြားနိုင်ငံများနှင့် ယှဉ်ပြိုင်နိုင်အောင် အရည်အချင်းအဓိကစနစ်နှင့် ရွေးချယ်ခန့်ထားမှုကို စနစ်တကျ ဆောင်ရွက်နိုင်မှဖြစ်မည်။ စာရေးသူအမြင်၌ အရည်အချင်း တည်ဆောက်ရေးမှာ လူစွမ်းအားအရင်းအမြစ် တည်ဆောက်ရေးပင်ဖြစ်ရာ ပညာရေးပြုပြင်ပြောင်းလဲမှုလည်း ဖြစ်သောကြောင့် အချိန်ယူရမည်ဖြစ်သလို သက်ရောက်မှုလည်း ကြီးမားသည်။ အချိန်မဆိုင်းသင့်ဘဲ ယခုထက် ပိုမို၍ အရှိန်အဟုန်မြှင့် ဆောင်ရွက်သင့်သည့် ကိစ္စရပ် ဖြစ်ပါသည်။
အမြင်မတူမှုများအပေါ် သဘောထားကြီးနိုင်မှု
နိုင်ငံရေးအင်အားစုများကြား သဘောထားကွဲလွဲမှုများကို သဘောထားကြီးကြီးထားနိုင်မှုမှာ ဒီမိုကရေစီဖွံ့ဖြိုးတိုးတက်ရေးအပါအဝင်၊ စီးပွားရေး ဖွံ့ဖြိုးတိုးတက်မှုကိုပါ များစွာအထောက်အကူပြုမည့်အရာပင် ဖြစ်သည်။ နိုင်ငံ၏ ခေတ်မမီတော့သော နောက်ကျပြတ်ကျန်နေခဲ့ပြီးဖြစ်သော အရပ်ရပ် အခြေအနေများကို အမှီလိုက်နိုင်ဖို့၊ တိုင်းရင်းသားစည်းလုံးညီညွတ်မှုရရှိဖို့ မြန်မာနိုင်ငံအင်အားစုများ အားလုံး အမြင်မတူမှုများအပေါ် သဘောထား ကြီးကြီး ထားနိုင်ကြဖို့ စာရေးသူမှ အထူးပင် မေတ္တာရပ်ခံအပ်ပါသည်။ ပါလီမန်ဒီမိုကရေစီခေတ်က နိုင်ငံရေးအင်အားစုများ၏ အကွဲအပြဲဇာတ်လမ်းများ အပေါ် အတုယူသင့်သည်။ ထိုအချိန်အခါတုန်းက မြန်မာနိုင်ငံမှာ အာရှနိုင်ငံများအနက် ဖွံ့ဖြိုးတိုးတက်ဖို့ အလားအလာအကောင်းဆုံး နိုင်ငံတစ်နိုင်ငံ ဖြစ်ခဲ့သည်။ ယခုလည်း မြန်မာနိုင်ငံမှာ အာရှကျားဖြစ်လာနိုင်သည်ဟု အာရှဖွံ့ဖြိုးရေးဘဏ်ကဲ့သို့ နိုင်ငံတကာအဖွဲ့အစည်းများက ထင်ကြေးပေးကြပြန် သည်။ သမိုင်းတစ်ကျော့ ပြန်မလာလာဖို့ စာရေးသူ အင်အားစုများအားလုံးအပေါ် မေတ္တာရပ်ခံအပ်ပါသည်။
*****************************************
Google Drive: create, share, and keep all your stuff in one place.
