![]() | Quote & Comment and News in brief |
သတင်းဆောင်းပါးမှ ကောက်နှုတ်ချက်များ
“ရန်ကုန်အပါအဝင် မြို့ကြီးတွေမှာ ဘာသာရေးကို ဦးတည်တဲ့ ပဋိပက္ခတွေ မဖြစ်အောင် ငြိမ်းချမ်းရေးနဲ့ ညီညွတ်ရေး အဖွဲ့တွေက ဘာသာရေးခေါင်းဆောင်တွေက အထင်အမြင်လွဲမှားမှုတွေကို ဖြေရှင်းဖို့ ဘာသာပေါင်းစုံ ဆုတောင်းပွဲ တွေ၊ တွေ့ဆုံဆွေးနွေးပွဲတွေ လုပ်နေပါတယ်။ ပဋိပက္ခဖြစ်နေတဲ့ ဒေသတွေကိုသွားဖို့က လုံခြုံရေး အခက်ခဲကြောင့် အစိုးရအနေနဲ့ ခွင့်မပြုတာ ဖြစ်ပါတယ်။ ဒါပေမဲ့ သွားဖို့တော့ အစီအစဉ်ရှိပါတယ်။”
ဇူလိုင်လ ၄ ရက်နေ့ထုတ် ပြည်မြန်မာနေ့စဉ်ထုတ် သတင်းစာတွင် ပါရှိသော “ပဋိပက္ခဒေသများသို့ သွားရောက်ရန် လုံခြုံရေး အခက်ခဲရှိနေသည်ဟု ဘာသာရေးခေါင်းဆောင်များဆို” သတင်းမှ အစ္စလာမ်ဘာသာရေး ခေါင်းဆောင် ဦးအေးလွင်၏ ပြောကြားချက်အား ကောက်နှုတ်ချက်။
“အန်ကယ် တစ်ယောက်တည်း သဘောထားပြောရရင် မြန်မာနိုင်ငံ ပြည်သူလူထုတစ်ရပ်လုံးက မဲပေးနိုင်တဲ့ နိုင်ငံရေးဆိုင်ရာ အရည်အသွေး အများကြီး လိုသေးတယ်။ အခုပေးတဲ့စနစ်ကိုတောင် ခဲရာခဲဆစ်ပေးနေရတာ။ အလွန်ရှုပ်ထွေးတဲ့ PR စနစ် ဆိုရင် မဲပေးဖို့ အင်မတန် ခက်ခဲလိမ့်မယ်။ တရားမျှတပြီး စစ်မှန်တဲ့ရွေးကောက်ပွဲ ဖြစ်ဖို့လည်း ခက်ခဲသွားမယ်။ ဒီစနစ်သာ ကျင့်သုံးရင် ပါတီတွင်း အာဏာရှင်စနစ် ပေါ်ပေါက်လာမယ်။ အစွန်းရောက်အဖွဲ့အစည်းတွေ လွှတ်တော် ထဲမှာ နေရာရလာနိုင်တယ်။ လွှတ်တော်ထဲမှာ ပါတီတွေ အမြဲတမ်းကွဲနေတဲ့အတွက် စီမံခန့်ခွဲတဲ့နေရာမှာ ငြင်းနေတာနဲ့ အချိန်ကုန်လိမ့်မယ်။ အစိုးရရဲ့ အားနည်းမှုကို ဖြစ်ပေါ်စေမယ်။”
ဇူလိုင်လ ၅ ရက်နေ့ထုတ် မြန်မာပို့စ်ဂလိုဘယ် အမှတ် (၁၁၆) တွင်ပါရှိသော “ရွေးကောက်တင်မြှောက်ပုံစနစ် ပြောင်းလဲရေး အတွက် ဆွေးနွေးဆုံးဖြတ်ပေးရန် တင်ပြသည့်စာအား ပြည်ထောင်စုလွှတ်တော်မှ ပယ်ချ” သတင်းမှ အမျိုးသားလွှတ်တော် ကိုယ်စားလှယ် ဦးအောင်ကြည်ညွှန့်၏ ပြောကြားချက်အားကောက်နှုတ်ချက်။
“ပြီးခဲ့တဲ့ (အတည်ပြုခဲ့တဲ့) ဘတ်ဂျက်မှာ နိုင်ငံတော်သမ္မတကြီးသုံးဖို့အတွက် အထူးရန်ပုံငွေ ခေါင်းစဉ်တစ်ခု ရှိတယ်။ အဲဒီမှာ ထပ်ပြီးတော့ ငြိမ်းချမ်းရေးကိစ္စ အပါအဝင် တခြားကိစ္စတွေ သုံးနိုင်ဖို့အတွက် ဘတ်ဂျက်ခေါင်းစဉ်တစ်ခု ထည့်ပေးထားတယ်။ ဒီတော့ ငြိမ်းချမ်းရေးအတွက် ဆောင်ရွက်မယ်ဆိုရင် အဲဒီပြည်သူ့ငွေတွေနဲ့ ဆောင်ရွက်နိုင်တာကို ပြောတာပါ။ တစ်ဆက် တည်းမှာပဲ ပြောလိုတာက မြန်မာနိုင်ငံကို ရောက်ရှိနေကြတဲ့ ငြိမ်ချမ်းရေး ဖော်ဆောင်ဖို့အတွက် ကူညီပေးမယ်ဆိုတဲ့အဖွဲ့ တွေရှိတယ်။ နိုင်ငံတွေရှိတယ်။ မနေ့က သက်ဆိုင် ရာဝန်ကြီးရဲ့ ရှင်းပြချက်အရ သူတို့ဆီက (နိုင်ငံတကာအဖွဲ့တွေဆီက) ငွေတွေ အကူအညီတွေ မရသေးဘူး။ သူတို့က ငြိမ်းချမ်းရေးရပြီးတော့မှ အိမ်နေရာချထားခြင်း၊ အလုပ်အကိုင်ရှာဖွေပေးခြင်း လုပ်ငန်းတွေကို လုပ်ပေးမယ်လို့ ပြောတယ်။ ဒါ့ကြောင့်မို့ မိမိကပြောလိုက်တယ်။ အဲဒါတွေကို စောင့်စားမနေနဲ့၊ အားမထားနဲ့၊ ကိုယ့်မှာရှိတဲ့ ငွေတွေနဲ့ ငြိမ်းချမ်းရေးအတွက်လုပ်လို့ ပြောခဲ့တယ်။ ငြိမ်းချမ်းရေးဟာ အရေးကြီးတယ်။ ငြိမ်းချမ်းရေး ရလိုက်တယ်ဆိုရင် အခု ဒုက္ခရောက်နေတာတွေ အားလုံးချုပ်ငြိမ်းသွားမယ်။ ဒါ့ကြောင့်မို့ (ပြည့်သူ့ဘဏ္ဍာငွေကို) သုံးပါ၊ သုံးရမယ်လို့ ပြောခဲ့တာတွေလည်းရှိတယ်။”
ဇူလိုင်လ ၅ ရက်နေ့ထုတ် မြန်မာတိုင်းမ် ဂျာနယ် အတွဲ (၃၂) အမှတ် (၆၂၈) တွင်ပါရှိသော “ကာကွယ်ရေးနှင့် လုံခြုံရေး ကောင်စီအစည်းအဝေး ရလဒ်ကောင်းနှစ်ခု ရရှိခဲ့” သတင်းမှ သူရဦးရွှေမန်း၏ ပြောကြားချက် အား ကောက်နှုတ်ချက်။
“ပြီးခဲ့တဲ့ကာလတွေကို သတိပြန်ရဖို့ထက် အစဉ်အဆက် ဒီမိုကရေစီရုန်းကန်မှုမှာ ပါဝင်ခဲ့ကြတဲ့ ဒီမျိုးဆက်ကြီးတစ်ခုလုံးရဲ့ စုပေါင်းရုန်းကန်မှုကို မြန်မာနိုင်ငံရဲ့ အနာဂတ်မှာ ဘယ်လိုအပိုင်းတွေက ဖြည့်စွက်ပြီး ပါဝင်ဆောင်ရွက်နိုင် သလဲ။ တကယ်ကို အရေးတကြီး လိုအပ်နေတဲ့ အမျိုးသားပြန်လည်သင့်မြတ်ရေးအတွက် ဘယ်လိုပူးပေါင်းဆောင်ရွက်သလဲ ဆိုတာကို ကျွန်တော်တို့ ဝိုင်းဝန်းစဉ်းစားကြတယ်။ အဲဒီကမှတစ်ဆင့် နိုင်ငံသားတွေအားလုံး သဘောတူညီ တဲ့ နိုင်ငံရေးစနစ်တစ်ခု ပေါ်ထွက်လာဖို့ ကျွန်တော်တို့ ဝိုင်းဝန်းဆောင်ရွက်ကြရပါမယ်။”
ဇူလိုင်လ ၄ ရက်နေ့ထုတ် ရွှေနိုင်ငံသစ် နေ့စဉ်ထုတ်သတင်းစာ တွင်ပါရှိသော “တစ်ဦးတစ်ယောက်ကို ကိုယ်စားမပြု အများကိုယ်စားပြု ငွေရတုရှစ်လေးလုံးရဲ့ စုပေါင်းရုန်းကန်မှုနဲ့ အနာဂတ်အစီအစဉ်” သတင်းမှ ၈၈ မျိုးဆက် ကျောင်းသားခေါင်းဆောင် ကိုဌေးကြွယ်၏ ပြောကြားချက်အား ကောက်နှုတ်ချက်။
“တကယ်ဆို နိုင်ငံတစ်ခုက နိုင်ငံခြားအထောက်အကူရတာ နိုင်ငံအတွက် အကျိုးရှိပါတယ်။ ပြည်ပရန်ကို ကာကွယ်ဖို့ဆိုရင်တော့ ကျွန်တော်တို့လည်း ထောက်ခံအားပေးပါတယ်။ ဒါမှမဟုတ် ပြည်တွင်းစစ်မှာလာ အသုံးပြုရင်တော့ တော်တော်ဆိုးရွား တဲ့ လုပ်ရပ်လို့ ပြောရမယ်။ ပြည်ပကရတဲ့ စစ်ရေးအကူအညီက အင်အားနည်းတဲ့ တိုင်းရင်းသား လက်နက်ကိုင်တွေအပေါ်မှာ ပြန်အသုံးပြုမယ် ဆိုရင်တော့ မဖြစ်သင့်တဲ့ ကိစ္စပဲ။”
ဇူလိုင်လ ၆ ရက်နေ့ထုတ် Unity Journal အတွဲ (၂) အမှတ် (၂၆) တွင်ပါရှိသော “ပြည်ပရန်ကို ကာကွယ်ရန် အတွက် ဆိုပါက နိုင်ငံခြားမှ စစ်ရေး အထောက်အပံ့ယူခြင်းကို ကြိုဆိုကြောင်း တိုင်းရင်းသားလက်နက်ကိုင် အချို့ကဆို” သတင်းမှ ရှမ်းပြည်တပ်မတော်မြောက်ပိုင်း (SSPP/SSA) ပြောခွင့်ရ ဗိုလ်မှူးစိုင်းလ ၏ပြောကြားချက်အားကောက်နှုတ်ချက်။
သတင်းတိုများ
ဒုတိယ ဗိုလ်ချုပ်ကြီး သိန်းဌေးကို အမေရိကန် ပိတ်ဆို့မှု စာရင်းသွင်း
ဒုတိယဗိုလ်ချုပ်ကြီးသိန်းဌေးကို ကုလသမဂ္ဂ လုံခြုံရေးကောင်စီ၏ တားမြစ်ချက် ကို ဖောက်ဖျက်၍ မြောက်ကိုရီးယား နိုင်ငံမှ စစ်သုံးလက်နက်ပစ္စည်းများ ဝယ်ယူမှုကြောင့် အမေရိကန်နိုင်ငံ၏ ပိတ်ဆို့မှုစာရင်းတွင် ထည့်သွင်းလိုက်ကြောင်း ဇူလိုင်လ ၂ ရက်နေ့က အမေရိကန်နိုင်ငံခြားရေးဌာနမှ တရားဝင် ထုတ်ပြန်ကြေညာခဲ့သည်။ အဆိုပါ အရေးယူမှုကြောင့် အမေရိကန်နိုင်ငံသားများ အနေဖြင့် ဒုတိယ ဗိုလ်ချုပ်ကြီးသိန်းဌေး နှင့်တွဲ၍ စီးပွားရေးလုပ်ငန်းလုပ်ခွင့်၊ ငွေကြေးအလွှဲ အပြောင်း လုပ်ပိုင်ခွင့်များ မရှိတော့ဘဲ အမေရိကန်ပြည်ထောင်စုတွင်ရှိသော ဒုတိယဗိုလ်ချုပ်ကြီးသိန်းဌေး၏ ပိုင်ဆိုင်မှုများ ကိုလည်း သိမ်းဆည်းထား တော့မည် ဖြစ်သည်။ ယင်းအရေးယူမှုနှင့် ပတ်သက်၍ သမ္မတ၏ ပြောရေးဆိုခွင့်ရှိသူ ပြန်ကြားရေး ဒု-ဝန်ကြီး ဦးရဲထွဋ်က အမေရိကန်အစိုးရ၏ ထုတ်ပြန်ကြေညာချက်သည် လူပုဂ္ဂိုလ်တစ်ဦးတစ်ယောက်ကို ရည်ရွယ်ခြင်းဖြစ် ပြီး မိမိတို့ အစိုးရအဖွဲ့ကို ရည်ရွယ်ခြင်း မဟုတ်သည့်အတွက် နှစ်နိုင်ငံဆက်ဆံရေးကို ထိခိုက်လိမ့်မည်မဟုတ်ကြောင်း တုန့်ပြန် ပြောဆိုခဲ့သည်။
ဖွဲ့စည်းပုံအခြေခံဥပဒေကို လွှတ်တော်ကိုယ်စားလှယ် ၁၀၅ ဦးမှ လေ့လာသုံးသပ်မည်
၂၀၀၈ ဖွဲ့စည်းပုံအခြေခံဥပဒေ လေ့လာသုံးသပ်ရေး ကော်မတီတွင် ပါဝင်မည့် လွှတ်တော်ကိုယ်စားလှယ် ၁၀၅ ဦး၏ အမည်စာရင်းကို ဇူလိုင်လ ၇ ရက်နေ့ နောက်ဆုံးထား၍ အကြံပြုတင်ပြရမည် ဖြစ်ကြောင်း နေပြည်တော် လွှတ်တော်ရုံးမှ ထုတ်ပြန်ကြေညာခဲ့သည်။ ပြီးခဲ့သည့် မတ်လအတွင်းက ပြုလုပ်ခဲ့သည့် ပြည်ထောင်စုလွှတ်တော် ဆဋ္ဌမပုံမှန် အစည်းအဝေး တွင် ပြည်သူ့လွှတ်တော်ကိုယ်စားလှယ် သူရဦးအေးမြင့်မှ ဖွဲ့စည်းပုံ အခြေခံဥပဒေ လေ့လာသုံးသပ်ရေး ကော်မတီဖွဲ့စည်းရေးအဆိုကို တင်သွင်းခဲ့ခြင်းဖြစ်ပြီး ဖွဲ့စည်းပုံအခြေခံဥပဒေကို လေ့လာသုံးသပ်ရာ၌ လူထုအကျိုးပြု ဥပဒေများဖြစ်ရေးကို ထည့်သွင်း ဆွေးနွေး သုံးသပ်သွားမည်ဖြစ်ကြောင်း လွှတ်တော်ကိုယ်စားလှယ် အသိုင်းအဝိုင်းမှ သိရသည်။
အမျိုးသားပို့ကုန် မဟာဗျူဟာ (Trade Policy) ကို ၂၀၁၃ ခုနှစ်အတွင်း အပြီးရေးဆွဲမည်
အမျိုးသား ပို့ကုန်မဟာဗျူဟာ ရေးဆွဲရာတွင် ပို့ကုန်ဖွံ့ဖြိုးတိုးတက်မှု၊ ပို့ကုန်ယှဉ်ပြိုင်နိုင်စွမ်း ရှိမှုတို့ကို အဓိက ဦးတည်၍ ၂၀၁၃ ခုနှစ်အတွင်း ရေးဆွဲမည်ဖြစ်ပြီး ဖွံ့ဖြိုးတိုးတက်မှုဆိုင်ရာ ကိစ္စများ၊ စီးပွားရေး ပတ်ဝန်းကျင်၏ အရည် အသွေး အပြင် ဆက်စပ်ပါဝင်သည့် ဦးစားပေးကဏ္ဍများကိုလည်း ထည့်သွင်းရေးဆွဲသွားမည် ဖြစ်ကြောင်း သိရသည်။
နိုင်ငံရေးအကျဉ်းသား တစ်ရာကျော် ထပ်လွှတ်မည်ဟု စိစစ်ရေးကော်မတီဆို
လက်ရှိ အကျဉ်းထောင် အသီးသီးတွင် ကျန်ရှိနေသေးသော နိုင်ငံရေးအကျဉ်းသား ၂၀၀ ကျော်အနက် နိုင်ငံရေး အကျဉ်းသား ၁၀၀ ခန့်ကို လာမည့် ရက်သတ္တပတ် နှစ်ပတ်အတွင်း အစိုးရမှ ထပ်မံလွှတ်ပေးနိုင်ဖွယ် ရှိကြောင်း နိုင်ငံရေး အကျဉ်းသားစိစစ်ရေး ကော်မတီဝင် ဦးညိုထွန်း၏ ပြောကြားချက်အရ သိရသည်။ အဆိုပါ လွတ်မြောက်နိုင်မည့် နိုင်ငံရေး အကျဉ်းသားများမှာ မတရားအသင်းဆက်သွယ်မှုဖြင့် ဖမ်းဆီးခံရသူများ ဖြစ်ပြီး အများစုမှာ လက်နက်ကိုင် တပ်ဖွဲ့ဝင်များဖြစ် ကြောင်း နိုင်/ကျဉ်း စိစစ်ရေးကော်မတီထံမှ သိရှိရသည်။ ယခင် တပ်မတော်အစိုးရ လက်ထက်တွင် ပြစ်ဒဏ်ကျခံနေရသော လက်ကျန်နိုင်ငံရေး အကျဉ်းသား ၁၃၆ ဦးနှင့် လက်ရှိ အစိုးရသစ်လက်ထက်တွင် ပုဒ်မ ၁၈ နှင့် ပုဒ်မ ၅၀၅ တို့ဖြင့် အရေးယူ ခံခဲ့ရသော နိုင်ငံရေး အကျဉ်းသား ၆၇ ဦး ၊ စုစုပေါင်း ၂၀၃ ဦးကို နိုင်ငံတော်သမ္မတထံ တင်ပြထားကြောင်း အဆိုပါကော်မတီ ၏ ပြောကြားချက်အရ သိရသည်။
အင်တာနက်တွင် ဘာသာရေးပဋိပက္ခ ဖြစ်ပွားစေရန် လှုံ့ဆော်ရေးသားမှုများ စုံစမ်းဖော်ထုတ်ရန် လွှတ်တော် တွင် တင်ပြထား
လူမှုရေး ကွန်ယက်တစ်ခုဖြစ်သည့် အင်တာနက်စာမျက်နှာများတွင် ဘာသာရေးနှင့် ပတ်သက်၍ အမုန်းတရားပွား များစေနိုင်သော စကားလုံးများ လှုံ့ဆော်ရေးသားနေမှုများကို စုံစမ်းဖော်ထုတ်နိုင်ရေးအတွက် လွှတ်တော်တွင် တင်ပြထား ကြောင်း တရားလွှတ်တော် ဦးညွန့်ရှိန်၏ ပြောကြားချက်အရ သိရှိရသည်။ ထိုသို့ အင်တာနက်စာမျက်နှာများတွင် ပဋိပက္ခ လှုံ့ဆော်ရေး ရေးသားမှုများနှင့် ပတ်သက်၍ ဘာသာရေး အမုန်းပွားမှုများကို အရေးယူရန်အတွက် ဥပဒေရှိကြောင်း၊ တိုင်းပြည်၏ ငြိမ်းချမ်းရေးကို ထိပါးစေနိုင်ပါက အရေးပေါ်စီမံဥပဒေ ပုဒ်မ ၅ (ည) ဖြင့် ထောင်ဒဏ် ခုနစ်နှစ်အထိ အရေးယူ အပြစ်ပေးနိုင်ကြောင်း၊ သို့သော် စုံစမ်းဖော်ထုတ်ရာတွင် နည်းပညာအခက်အခဲ ရှိသည့်အတွက် အနီးစပ်ဆုံး စုံစမ်းဖော်ထုတ်နိုင်ရန် အခြားနိုင်ငံများကိုပါ နည်းပညာအကူအညီ တောင်းခံသင့်ကြောင်း တရားလွှတ်တော် ရှေ့နေတစ်ဦး ဖြစ်သူ ဦးကိုနီက ဆိုသည်။
အမြဲတမ်း နေထိုင်ခွင့် မူကြမ်း ရှေ့နေချုပ်ရုံးသို့တင်ပြထား
ပြည်ပနိုင်ငံသားအဖြစ် ခံယူထားသော မြန်မာနိုင်ငံသားများနှင့် နိုင်ငံခြားသားများ လျှောက်ထားနိုင်ရန် အမြဲတမ်း နေထိုင်ခွင့် (Permanent Resident-PR) ဥပဒေကို ရှေ့နေချုပ်ရုံးသို့ တင်ပြထားပြီဖြစ်ကြောင်း လူဝင်မှုကြီးကြပ်ရေးနှင့် အမျိုးသားမှတ်ပုံတင်ရေး ဦးစီးဌာနမှ ညွှန်ကြားရေးမှူးချုပ် ဦးမောင်မောင်သန်း၏ ပြောကြား ချက်အရ သိရှိရသည်။ အဆိုပါ အမြဲတမ်းနေထိုင်ခွင့် ဥပဒေမူကြမ်းကို နိုင်ငံခြားရင်းနှီးမြှုပ်နှံသူများ အပါအဝင် ပညာရှင်များနှင့် နိုင်ငံခြားသားအဖြစ် ခံယူထား သော မြန်မာနိုင်ငံသားဟောင်းများအတွက် ရည်ရွယ်၍ ရေးဆွဲထားခြင်းဖြစ်ပြီး ၂၀၁၃ တွင်ပြီးစီးရန် မျှော်မှန်းထားသောကြောင့် လက်ရှိအချိန်တွင် ဝန်ကြီးဌာနများမှ စုပေါင်းကာ အမြန်ဆုံး ပြီးစီးရန် ဆောင်ရွက်နေကြောင်း သိရှိရသည်။
UWSA နှင့် အစိုးရ ဆက်ဆံရေးရုံး ပိတ်သည်အထိ တင်းမာနေ
ရှမ်းပြည်တောင်ပိုင်း မိုင်းတုံမြို့နယ် အတွင်းရှိ ‘ဝ’ ပြည်သွေးစည်းညီညွတ်ရေး တပ်မတော် (UWSA) ၏ စခန်းကို အစိုးရ စစ်တပ်မှ ဆုတ်ခွာပေးရန် တောင်းဆိုခဲ့သော်လည်း UWSA ဘက်မှ ဆုတ်ပေးခြင်းမရှိမှုကို အကြောင်းပြု၍ အစိုးရ တပ်မတော်မှ UWSA စခန်းကို ဝုိုင်းရာတွင် စစ်ရေးတင်းမာမှုများ ဖြစ်ပေါ်ခဲ့ပြီး ယခုအခါ နှစ်ဖက်ဆက်ဆံရေးရုံးကို ပိတ်ပစ် လိုက်ပြီဖြစ်ကြောင်း UWSA ပြောခွင့်ရသူကို အခြေခံ၍ တရုတ်ပြည်နယ်စပ်မှ စစ်ရေး အကဲခတ်သူ ဦးအောင်ကျော်ဇော၏ ထုတ်ဖော်ပြောကြားချက်အရ သိရှိရသည်။ ထိုသို့ အစိုးရတပ်မတော်နှင့် တင်းမာမှုများ ရှိလာခဲ့သည့်အတွက် UWSA မှ ၂၀၁၃ ခုနှစ် ဇွန်လ တတိယပတ်မှ စတင်၍ ၄င်းတို့ လက်အောက်ခံ တပ်ဖွဲ့များ အားလုံးနှင့် ၄င်းတို့၏ မိသားစုဝင်များအား အရေးကြီးကာလအဖြစ် သတ်မှတ်ပြီး ခရီးသွားလာပါက လက်နက်များ ယူဆောင်သွားရန်နှင့် စစ်ရေးအတွက် အသင့်ပြင်ဆင် ထားရန် အမိန့်ထုတ်ထားခဲ့ပြီး ဖြစ်ကြောင်း သိရှိရသည်။ ယခုအခါ UWSA ဘက်မှ တာချီလိတ်နှင့် ကျိုင်းတုံမြို့များရှိ ဆက်ဆံရေးရုံးကို ပိတ်လိုက်လိုက်သကဲ့သို့ အစိုးရတပ်မတော်ဘက်ခြမ်းမှလည်း ရှမ်းပြည်တောင်ပိုင်းနှင့် မြောက်ပိုင်းကို ဆက်သွယ်ထားသည့် ဆက်သွယ်ရေးလမ်းကြောင်းများကို ဖြတ်တောက်လိုက်ပြီဖြစ်ကြောင်း သိရသည်။