Transparency Myanmar

transparency.myanmar@gmail.com

yangonchronicle2011 Op-Ed
yangonchronicle2011 Op-Ed

၎.၁၁.၂၀၁၁

ဆောင်းပါးကဏ္ဍ

  1.  မုဆိုးစိုင်သင် လွှတ်တော်နှင့် ဘတ်ဂျက်ဆွေးနွေးပွဲ

************************************************************************************

ဆောင်းပါးကဏ္ဍ

 မုဆိုးစိုင်သင် လွှတ်တော်နှင့် ဘတ်ဂျက်ဆွေးနွေးပွဲ

ပြည်သူ့ခေတ်အယ်ဒီတာ

ဦးစွာပြောရမည်ကမုဆိုးစိုင်သင်ကိစ္စ။

ဖွတ်၊ ပုတက်ပဲဖမ်းဖူးသည့် မုဆိုးပိုနက်သောတောထဲဝင်၍ စိုင်တို့၊ ဆတ်တို့တွေ့တော့ ရုတ်တရက် ဘယ်ဖမ်း တက်မည်လဲ။ သို့သော် အဲသည် စိုင်တို့၊ ဆတ်တို့၏ အလေ့အထများကိုဂရုစိုက်လေ့လာ၊ သူတို့ သဘာဝသူတို့ အမူအကျင့်တွေ မြင်၊ သူတို့ သွားလမ်းလာလမ်းတွေ သိ၊ သူတို့ပျော့ကွက်တွေ သတိထားမိတော့မှ ဖမ်းရန်နည်းလမ်းကို ရှာ တွေ့လိမ့်မည်။

သူဖမ်းချင်သည့် စိုင်တို့၊ ဆတ်တို့ကပဲ မုဆိုးအား အတတ်ပညာတွေ သင်ပေးသွားသည့် သဘော။ အဲသည်မှာ အရေးကြီးသည်က လေ့လာချင် ဆည်းပူးချင် သင်ယူမှတ်သားချင်သည့် စိတ်ဓာတ်။ သည်စိတ်မျိုးကလူတိုင်းမှာရှိသည်မဟုတ်။ ကိုယ့်မှာရှိသည့် မစို့မပို့အသိကိုမစို့မပို့မှန်းသိသူ၊ ကိုယ်လုပ်ကိုင်ရမည့် အရာကို ပြည့်ပြည့်စုံစုံသိအောင် လုပ်တတ်သူများမှာသာရှိတတ်သည့် စိတ်ဓာတ်မျိုး ဖြစ်သည်။ စင်စစ်၊ မည်သည့် လုပ်ငန်းမဆို အသစ်ဝင်ရောက် လုပ်ကိုင်သူကတော့ မုဆိုးစိုင်သင်မှပင် စတင်ရမည်ဖြစ်သည်။ ကိုယ့်ပညာ ပမာဏက ဘယ်လောက် ဘယ်ရွေ့ရှိပြီးကိုယ်ကိုင်တွယ်မည့် လုပ်ငန်းက အတိုင်းအဆ ဘယ်မျှကြီးမားသည်ကို မစဉ်းစားနားမလည်၊ ငါတတ်ပါတယ်ကွ၊ ဘယ်ဟာမဆိုငါလုပ်နိုင်တယ် ဟူသောမာနမျိုးနှင့် လုပ်လျှင် တလွဲတချော်တွေဖြစ်မှာသေချာသည်။

အထူးသဖြင့် အများနှင့်ဆိုင်သည့် ကိစ္စကြီးမျိုးတွေ တာဝန်ယူမည့်၊ တာဝန်ယူခွင့်ရထာသည့် ပုဂ္ဂိုလ်တွေ မှာအဲသည် စိတ်ဓာတ်မျိုးရှိသော် အများအတွက် ထိခိုက်နစ်နာမှာသေချာသည်။ အဲသည်လိုလုပ်ဆောင်မှု ကြောင့်သည် တိုင်းပြည်မှာ ဆုံးရှုံးမှုတွေ ကြီးမားခဲ့တာ၊ ဆုံးရှုံးမှု၏ ဒဏ်ရာဒဏ်ချက်တွေ သည်ကနေ့ထိ ခံစားနေရတာလည်း အားလုံး အသိ ဖြစ်သည်။ ထို့ကြောင့်၊ လုပ်ပိုင်ခွင့်များရယူထားသောပုဂ္ဂိုလ်တို့ တကယ်လုပ်ကိုင်နိုင်သော စွမ်းရည်ရှိရေးနှင့် တကယ် လုပ်ကိုင်နိုင်သောစွမ်းရည်ရှိရေးနှင့် တကယ်အောင်မြင်အောင် လုပ်ဆောင်လိုသော စေတနာစိတ်ဓာတ် ရှိရေးသည် တိုင်းပြည်အတွက် အလွန်အရေးကြီးပါသည်။

ယခုနှစ် စောစောပိုင်းတုန်းကရန်ကုန်တိုင်းဒေသကြီးလွှတ်တော်၌  ကျင်းပသည့် တွေ့ဆုံပွဲတစ်ခုတွင် ပြည်သူ့ လွှတ်တော်ဥက္ကဋ္ဌ သူရဦးရွှေမန်းက လွှတ်တော် ကိုယ်စားလှယ်များနှင့် လွှတ်တော်ကော်မတီများ စွမ်းဆောင်ရည် မြင့်မား အရေးအတွက် လေ့ကျင့် ပျိုးထောင်မှု (capacity building) အစီအစဉ်များ ပြုလုပ်နေကြောင်းပြောဆိုတာ ကြားလိုက် ရသည့်အခါ ကျွန်တော် အံ့သြသွားမိသည်။

နှစ်ပေါင်းများစွာအတတွင် သည်စကားမျိုးမကြားခံရဖူးသောကြောင့် ဖြစ်သည်။ ယခင် အစဉ်အဆက်ကတော့ ကုလားထိုင်ပေါ်ရောက်လာလျှင် အဲသည် ကုလားထိုင်နှင့်ဆိုင်သော လုပ်ငန်းအရပ်ရပ်ကိုသည် အလုပ်နှင့် ဘာမှမသက်ဆိုင်ခဲ့သူ နကန်းတစ်လုံးမျှ မသိသူက လူတတ်လုပ်ပြီး စီမံဖန်တီးတာတွေပဲ တွေ့ကြုံခဲ့ရသည်။ ယခုတော့ လွှတ်တော် ကိုယ်စားလှယ်တွေ၊ ရေးရာကော်မတီဝင်တွေ ကိုယ်နှင့်သက်ဆိုင်ရာကဏ္ဍမှာ ကျွမ်းကျင်အောင် လေ့လာကြဖို့ (Self-Study လုပ်ဖို့)၊ အချင်းချင်းဆွေးနွေးကြ အလုပ်ရုံဆွေးနွေးပွဲ စာတမ်းဖတ်ပွဲတွေ လုပ်ကြဖို့၊ နိုင်ငံခြား လွှတ်တော်များသို့လည်း သွားရောက်လေ့လာကြဖို့ တိုက်တွန်းပြောဆိုတာ၊ ဆော်သြလုပ်ဆောင်တာတွေ ရှိလာသည့်အခါ အခြေခံသဘောထား ကတော့ ကောင်းနေပြီ၊ ရှေ့အတွက် အလားအလာမဆိုးဟု မြင်မိသည်။

အရှိကိုအရှိအတိုင်း ဝန်ခံပြောဆိုတာသဘော၊ ပွင့်လင်းသောရှင်းလင်းမြင်သာသောသဘောဟုလည်းဆိုနိုင်သည်။ ယခုအဲသည် သဘောအရ လွှတ်တော် ကိုယ်စားလှယ်များ အရည်အသွေး ဖြည့်ဆည်းတည်ဆောက်ရေး လုပ်ငန်းတစ်ရပ် အနေဖြင့် ရသုံးခန့်မှန်းခြေ ငွေစာရင်း(ဘတ်ဂျက်) ရေးဆွဲခြင်းနှင့် စပ်လျဉ်းသည့်  ရှင်းလင်းဆွေးနွေးပွဲတစ်ရပ်ကို အောင်တို ဘာ ၁၈ ရက်နေ့ကစတင်၍ ၅ ရက်တာကျင်းပခဲ့တာတွေ တွေ့ရသည်။

ဆွေးနွေးပွဲပထမနေ့တွင် ပြည်ထောင်စုလွှတ်တော် နာယကဦးခင်အောင်မြင့်က ‘လွှတ်တော်၏ တတိယပုံမှန် အစည်းအဝေးတွင် နိုင်ငံတော် ရသုံးခန့်မှန်းခြေ ငွေစာရင်း ဥပဒေကြမ်းကို ဆွေးနွေးကြရမည် ဖြစ်သည့်အတွက် ပညာရပ်ဆိုင်ရာရှုထောင့်မှ ဆွေးနွေးနိုင်ကြစေရန်’ ယခုရှင်းလင်း ဆွေးနွေးပွဲကိုကျင်းပခြင်း ဖြစ်ကြောင်းပြောကြားခဲ့ပြီး၊ ပြည်သူ့လွှတ် တော်ဥက္ကဋ္ဌ သူရဦးရွှေမန်းကလည်း ‘မိမိအပါအဝင် လွှတ်တော်ကိုယ်စားလှယ် အများစုသည် ရာခိုင်နှုန်းပြည့်နီးပါး လွှတ်တော် အတွေ့အကြုံမရှိသူများ ဖြစ်ကြသဖြင့် လွှတ်တော် ကိုယ်စားလှယ် အများစုသည် ရာခိုင်နှုန်းပြည့်နီးပါး လွှတ်တော် အတွေ့အကြုံမရှိသူများ ဖြစ်ကြသဖြင့် လွှတ်တော်ကိုယ်စားလှယ်များ၏ အရည်အသွေး မြင့်မာရေးအတွက် ယခုကဲ့သို့ ဆွေးနွေးပွဲ ပြုလုပ်ပေးရခြင်းဖြစ် ကြောင်း’ ဖွင့်ဟပြောဆိုခဲ့သည်။

အဆိုပါ ရှင်းလင်းဆွေးနွေးပွဲအတွင်း အမျိုးသားစီမံကိန်းနှင့် စီးပွားရေးဖွံ့ဖြိုးတိုးတက်မှု ဝန်ကြီးဌာနဒုတိယဝန်ကြီး ဒေါက်တာကံဇော်၊ စီးပွားရေး တက္ကသိုလ်ပါမောက္ခချုပ်၊ ပါမောက္ခနှင့် အငြိမ်းစားပါမောက္ခ၊ ဘဏ္ဍရေးဆိုင်ရာ အငြိမ်းစား ညွှန်မှူး စသည့် ပုဂ္ဂိုလ်တို့ကဘတ်ဂျက်အကြောင်းကို ရှုထောင့်စုံမှ ရှင်းလင်းတင်ပြ ကြပြီးလွှတ်တော်ကိုယ်စားလှယ်တို့ သိလို၍ မေးမြန်းဆွေးနွေးသည်များကို ပြန်လည်ဖြေကြားခဲ့ကြကြောင်းသိရသည်။

လွှတ်တော်ကိုယ်စားလှယ်များအနေနှင့် ဆွေးနွေးပွဲ ၅ ရက်လောက် တက်ရုံဖြင့် ဘတ်ဂျက်ရေးရာ၌ ကျွမ်းကျင်သူ များ ဖြစ်လာနိုင်ကြမည် မဟုတ်။ သို့သော် လေ့လာသော၊ အာရုံစူးစိုက်သောကိုယ်စားလှယ်သည် ပညာရှင်တို့ ပုံစံကျ ရေးဆွဲလာမည့်  ရသုံးခန့်မှန်းခြေငွေစာရင်းမူကြမ်းတွင် အစိုးရကငွေကိုဘယ်ကဘယ်လိုရှာ၍၊ ဘယ်နေရာတွေတွင် ဘယ်လောက် သုံးစွဲရန် လျာထားထားသနည်းဟူသည်ကိုနားလည်သိရှိကာ၊ ဘဏ္ဍငွေ ရှာဖွေမှုအပိုင်းနှင့် ပတ်သက်၍ လည်းကောင်း၊ ခွဲဝေသုံးစွဲမှုအပိုင်းနှင့် ပတ်သက်၍ လည်းကောင်း၊ တိုင်းပြည် အကျိုးစီးပွား အများပြည်သူ အကျိုးစီးပွား ရှုထောင့်မှ စစ်ဆေးစိစစ်ခြင်း၊ ထောက်ပြ ဝေဖန်ခြင်း၊ ဖြုတ်ပယ်- ဖြည့်စွက်- ပြင်ဆင်ရန် အကြံပြုခြင်းတို့ကိုကား ဥပဒေပြု သမားပီသစွာ လုပ်ကိုင်နိုင်လိမ့်မည်ဟု မျှော်လင့်သည်။

မည်သို့ပင်ဖြစ်စေ၊ မုဆိုးစိုင်သင် ဘတ်ဂျက် ဆွေးနွေးပွဲဖြင့် စွမ်းရည်ဖြည့်တင်းခဲ့သောမုဆိုးတို့ အစိုးရက လွှတ်တော်တွင် ဘတ်ဂျက် ဥပဒေမူကြမ်းတင်ချိန်၌  တကယ်ထိရောက်စွာဆွေးနွေးဝေဖန်နိုင်စွမ်းရှိ၊ မရှိဟူသည်ကို များ မကြာမီ ပင် မြင်တွေ့ကြရမည်ဖြစ်ပါသည်။

(ပြည်သူ့ခေတ်ဂျာနယ် အတွဲ (၂) အမှတ် (၆၇) တွင်ပါသည့် ထုတ်ယူဖော်ပြပါသည်။)

***************************************************************************************

 

 

 


Google Docs makes it easy to create, store and share online documents, spreadsheets and presentations.
Logo for Google Docs