Posts
CNN, 2nd August 2010
မြောက်ကိုရီးယားနိုင်ငံ အပေါ် တင်းကျပ်သည့် အရေးယူ ပိတ်ဆို့မှုများသည် ၎င်းနိုင်ငံ၏ နျူကလီယာ လက်နက် အစီအစဉ် အဆုံးသတ်သွားစေရန် ဖိအားပေးနိုင်လိမ့်မည်ဟု အမေရိကန် ပြည်ထောင်စုက မျှော်လင့်ထားကြောင်း တနင်္လာနေ့တွင် နိုင်ငံခြားရေးဌာန အရာရှိ တစ်ဦးက ပြောကြားသည်။
နိုင်ငံခြားရေး ဌာနမှ နျူကလီယာ မပြန့်ပွားရေးနှင့် လက်နက် ထိန်းချုပ်ရေး ဆိုင်ရာ အထူး အကြံပေး Robert Einhorn သည် ယခု သီတင်းပတ် အတွင်း ဆိုးလ်နှင့် တိုကျို၌ ထိပ်တန်း အစိုးရ အရာရှိများနှင့် အရေးယူ ပိတ်ဆို့မှု အကြောင်းကို ဆွေးနွေးလျက် ရှိသည်။
"ဒီအရေးယူ ဒဏ်ခတ်မှုတွေဟာ မြောက်ကိုရီးယား ပြည်သူတွေ အပေါ် တိုက်ရိုက် ရည်ရွယ်တာ မဟုတ်ပါဘူး။ ကျွန်တော်တို့ရဲ့ ရည်မှန်းချက်က "တည်ငြိမ်မှု ပျက်ပြားစေတဲ့ မြောက်ကိုရီးယားရဲ့ နျူကလီယာ ပြန့်ပွားရေး လုပ်ဆောင်မှုတွေ အဆုံးသတ်စေဖို့၊ သူ့ရဲ့ နျူကလီယာ ဒုံးပျံ အစီအစဉ် အတွက် ရန်ပုံငွေ ရှာဖွေပေးနေတဲ့ တရားမဝင် လက်နက် ရောင်းဝယ်မှုတွေကို တားဆီးဖို့၊ အနာဂတ် ကျူးကျော် ရန်စမှုတွေကို ဟန့်တားဖို့" ဖြစ်ပါတယ်" ဟု Eimhorn က သတင်းထောက်များအား ပြောကြားခဲ့ကြောင်း ၎င်း၏ မှတ်ချက်များ ပါဝင်သည့် မိတ္တူ ကော်ပီအရ သိရှိရသည်။
ကွန်မြူနစ် အာဏာရှင် နိုင်ငံ၏ လက်နက် ဝယ်ယူမှု၊ ရောင်းချမှုကို ထိန်းချုပ်ရန် ကြိုးစားသည့် အနေဖြင့် ပိုင်ဆိုင်မှု အချို့ကို ပိတ်ပင်ခြင်း အပါအဝင် တင်းကျပ်သည့် အရေးယူ ပိတ်ဆို့မှု အစီအစဉ်များကို နိုင်ငံခြားရေး ဝန်ကြီး ဟီလာရီ ကလင်တန်က ကြေညာခဲ့ပြီးနောက် နှစ်ပတ် နီးပါး အကြာတွင် Einhorn ၏ ခရီးစဉ် ထွက်ပေါ်လာခြင်း ဖြစ်သည်။
အရေးယူ ပိတ်ဆို့မှုများ၏ ရည်ရွယ်ချက်မှာ အမေရိကန် ငွေကြေးအတု ပြုလုပ်မှု၊ မူးယစ်ဆေး တရားမဝင် ရောင်းဝယ်မှု၊ အခြား တရားမဝင် လုပ်ဆောင်မှုများ အပါအဝင် အမေရိကန် ဒေါ်လာ သန်းပေါင်းရာချီ၍ ငွေမာ အဖြစ် ရရှိနေသော မြောက်ကိုရီးယား၏ ရင်းမြစ်များကို သက်ရောက်မှု ရှိစေရန် ဖြစ်သည်ဟု Einhorn က ပြောကြားသည်။
စီးကရက်၊ အရက်နှင့် နိုင်ငံခြားဖြစ် အစားအသောက်များ တရားမဝင် ရောင်းချမှုများက မြောက်ကိုရီးယား၏ လျင်မြန်စွာ ကြီးထွားလာသော နျူကလီယာ အစီအစဉ် အတွက် ရန်ပုံငွေ ကူညီ ထောက်ပံ့နေသည်ဟု အမေရိကန် အရာရှိများက ဆိုသည်။
"ဒီလို တရားမဝင် လှုပ်ရှားမှုတွေမှာ ပါဝင် ပတ်သက်နေတဲ့ ပုဂ္ဂလိကတွေ၊ သီးခြား အဖွဲ့အစည်းတွေကို ရွေးချယ် သတ်မှတ်နိုင်အောင်၊ အမေရိကန် ဘဏ်တွေ၊ ပုဂ္ဂိုလ်တွေရဲ့ ထိန်းချုပ်မှု အောက်မှာ ရှိနေတဲ့ သူတို့ပိုင် မြေယာ အဆောက်အဦးတွေ၊ ပိုင်ဆိုင်မှု ဥစ္စာပစ္စည်းတွေကို ပိတ်ဆို့နိုင်အောင် ကျွန်တော်တို့ရဲ့ အရေးယူ စီမံချက် အသစ်တွေက ကူညီပါလိမ့်မယ်" ဟု Einhorn က ပြောကြားသည်။
ယင်းသို့ ပတ်သက်နေသည့် အဖွဲ့အစည်းများ၊ ကုမ္ပဏီများ၊ တစ်ဦးချင်း ပုဂ္ဂလိကများကို လူသိရှင်ကြား သတ်မှတ် ကြေညာခြင်း အားဖြင့် ၎င်းတို့အား နိုင်ငံတကာ ငွေကြေးစနစ်မှ ခွဲခြား ပစ်ပယ်ထားသည့် ကြီးမားသော သက်ရောက်မှုကို ဖြစ်ပေါ်စေနိုင်လိမ့်မည် ဟုလည်း ၎င်းက ပြောဆိုခဲ့သည်။
တရားမဝင် ကုန်သွယ်မှုကို ပံ့ပိုး ကူညီနေသည့် သံတမန်ဆိုင်ရာ အထူး အခွင့်အရေးများကိုလည်း ဖြိုခွဲရန် အမေရိကန် ပြည်ထောင်စုက ရည်ရွယ်ထားသည်။
တောင်ကိုရီးယား တာဝန်ရှိ ပုဂ္ဂိုလ်များနှင့် ပြုလုပ်မည့် အစည်းအဝေးတွင် အီရန် အပေါ် တင်းကြပ်စွာ အရေးယူရေး ကိစ္စကိုလည်း ဆွေးနွေးခဲ့သည်ဟု Einhorn က ပြောကြားသည်။
တောင်ကိုရီးယား စစ်သင်္ဘော နစ်မြုပ်၍ ရေတပ်သား ၄၆ ဦး အသက် ဆုံးရှုံးခဲ့သော မတ်လ မှစ၍ ကိုရီးယား ကျွန်းဆွယ်တွင် တင်းမာမှုများ မြင့်တက်ခဲ့သည်။
နိုင်ငံတကာ စုံစမ်းရေး အဖွဲ့က မြောက်ကိုရီးယား တိုပီဒို ပစ်ခတ်မှုကြောင့် သင်္ဘော နစ်မြုပ်ခဲ့ခြင်း ဖြစ်ကြောင်း စစ်ဆေး တွေ့ရှိခဲ့သည်။ မြောက်ကိုရီးယားကမူ တစ်စုံတစ်ရာ ပါဝင် ပတ်သက်မှု မရှိဟု ခုခံ ငြင်းဆိုခဲ့ပြီး နိုင်ငံတကာ လျှို့ဝှက် ပူးပေါင်း ကြံစည်မှု၏ သားကောင် ဖြစ်ခဲ့ရသည်ဟု ၎င်း၏ ထုံးစံအတိုင်း သူခိုးက လူပြန်ဟစ်ခဲ့သည်။
--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.