Posts
Khaley Times, By Philip Bowring (Asia), 9th October 2010
မြန်မာနိုင်ငံတွင် နိုဝင်ဘာလ (၇) ရက်နေ့တွင် ကျင်းပမည့် ရွေးကောက်ပွဲများသည် မည်သို့ပင် ဒီမိုကရေစီ အယောင် ဆောင်ထားသည်ဟု ဆိုနေကြသော်လည်း ယင်းရွေးကောက်ပွဲများကို ကြိုဆိုရမည်သာ ဖြစ်သည်။
ယင်းတို့၏ အဓိက ရည်ရွယ်ချက်မှာ စစ်တပ် အစိုးရကို အရပ်ဝတ် ပြောင်းခိုင်းလိုခြင်း ဖြစ်ပြီး ဒုတိယ ရည်ရွယ်ချက်မှာ ရွေးကောက်ပွဲကိုပြ၍ နိုင်ငံတကာ၏ ဝေဖန်မှုများ ဖြေလျော့စေရန် ကြိုးစားခြင်းပင် ဖြစ်သည်။ ဗိုလ်ချုပ်များသည် အာဏာနှင့် ပတ်သက်၍ အမှန်တကယ် ပြောင်းလဲမှုများကို နောက်ဆုံးအဆင့်တွင်သာ တွေးထားသည်။
သို့သော်လည်း ဗိုလ်ချုပ်များသည် ဒီမိုကရက်တစ် ပြောင်းလဲမှုအတွက် မျိုးစေ့ကိုမူ စိုက်ပျိုးလျက် ရှိသည်။ တစ်ချိန်တည်းမှာပင် သဘာဝ ဓာတ်ငွေ့၊ သတ္တုများနှင့် နိုင်ငံပိုင် ပစ္စည်းများကို ပုဂ္ဂလိကပိုင် ပြုလုပ်ခြင်းမှ ရသော ၀င်ငွေများကို ယင်းတို့၏ စစ်တပ် ဆိုရှယ်လစ် အတွင်းမှာပင် ရအောင် စုတ်ယူနေသည်။ အကျင့်ပျက် ခြစားမှုများ ပြုပြီးမှ တဖြည်းဖြည်း နောက်ဆုတ်သွားမည့် သဘော ဖြစ်သည်။
အတိုချုပ် ဆိုရလျှင် မြန်မာနိုင်ငံသည် ရွေးကောက်ပွဲ ပြီးသွားလျှင် ယခုထက် ပိုမို ဆိုးသွားနိုင်သည်ဟု ငြင်းချက် ထုတ်ရန် ခက်ခဲသည်။ ပိုမို၍ ကောင်းမွန်သော လမ်းကြောင်းသို့ စတင် ရောက်သွားဖွယ် ရှိသည်။
အဓိက အတိုက်အခံပါတီ ဖြစ်သော ၁၉၉၀ ရွေးကောက်ပွဲတွင် အနိုင်ရခဲ့သော ဒေါ်အောင်ဆန်းစုကြည် ခေါင်းဆောင်သော အမျိုးသား ဒီမိုကရေစီ အဖွဲ့ချုပ်ကလည်း ရွေးကောက်ပွဲကို သပိတ်မှောက်ရန် အကြောင်းပြချက် ကောင်းကောင်း ရှိခဲ့သည်။ ယင်း၏ ခေါင်းဆောင် မှာလည်း နေအိမ် အကျယ်ချုပ် ကျနေ၍ ပါဝင် လုပ်ကိုင်နိုင်ခြင်း မရှိပေ။ ဖိနှိပ်သော အစိုးရ၏ လက်တံများနှင့် ချုပ်ကိုင်ထားသော မီဒီယာကလည်း ရွေးကောက်ပွဲကို သပိတ်မှောက်ခြင်းသည် အန္တရာယ် ရှိကြောင်း ပြောကြားလျက် ရှိပါသည်။ ၂၀၀၇ ခုနှစ် ဆန္ဒပြမှုတွင် ပါဝင်သော ရဟန်းများ အပါအ၀င် နိုင်ငံရေး အကျဉ်းသားများလည်း ရာနှင့်ချီ၍ ထောင်ထဲတွင် ရှိနေဆဲ ဖြစ်ပါသည်။
အစိုးရ ကျောထောက် နောက်ခံ ပြုသော ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီနှင့် တိုင်းရင်းသား နယ်မြေများရှိ ယင်း၏ မဟာမိတ် ပါတီများမှာ အနိုင်ရရန် သေချာသလောက် ရှိနေသည်။ စစ်တပ်ကလည်း ၂၅ % နေရာကို ရရှိထားပြီး ဖြစ်သည်။
ရေရှည်တွင်မူ NLD သည် ယင်း၏ သပိတ် မှောက်မှုအတွက် အကောင်းဆုံး အကျိုးဆက်ကို ရရှိနိုင်သည်။ သို့သော်လည်း မြန်မာနိုင်ငံ အနေဖြင့် ၀င်ရောက် အရွေးခံသော အခြား အတိုက်အခံ ပါတီများ ပါလီမန်တွင် အချို့ နေရာရပြီးး ဒီမိုကရေစီ လက်တံတစ်ခု ဖန်တီးနိုင်မည့် အလားအလာ ရှိနေပသည်။
အင်ဒိုနီးရှားတွင် ဆူဟာတို အုပ်စိုးခဲ့သော နောက်ဆုံး ဆယ်စုနှစ်များကို လက်ရှိ မြန်မာ နိုင်ငံနှင့် နှိုင်းယှဉ် စဉ်းစားနိုင်သည်။ ထိုအချိန်က အင်ဒိုနီးရှား နိုင်ငံတွင် ဗိုလ်ချုပ်ကြီးများ၏ သားသမီးများသည် အစိုးရနှင့် ပတ်သက်သော ကန်ထရိုက်များ၊ ပုဂ္ဂလိကပိုင် ပြုလုပ်ရေးများမှာ ချမ်းသာကြွယ်ဝမှုများ၊ စီးပွားရေး လုပ်ငန်းများ ထူထောင်နေချိန်တွင် အချို့ အတိုက်အခံများ ပါလီမန်တွင် နေရာရလာသည်။ လူ့အဖွဲ့အစည်း တစ်ခုအတွင်း သဘောထားအမြင် မတူသူများ ငြိမ်းချမ်းစွာ ပေါင်းစည်း လုပ်ကိုင်မှု၊ (Pluralism) နှင့် ပြိုင်ဆိုင်မှုများ စတင် ပေါ်ပေါက်လာသည်။
မတူသည့် အချက်များးသည်လည်း ရှိနေနိုင်သေးသည်။ ဆူဟာတိုသည် စီးပွားရေး တံခါးကို အတော်အတန် ဖွင့်ခဲ့သည်။ သို့သော် မြန်မာနိုင်ငံတွင်မူ ဗိုလ်ချုပ်များသည် ယူနီဖောင်း ချွတ်၍ အရပ်သား ၀န်ကြီးများ လုပ်ရန် ကြိုးစားနေသည်။ ယင်းတို့၏ မိသားစုများနှင့် ယင်းတို့နှင့် ဆက်နွယ်နေ သူများသည် ပုဂ္ဂလိကပိုင် ပြုလုပ်ရေး၏ အသီးအပွင့်များကို ကောင်းကောင်း ခံစားနေကြသည်။ စင်္ကာပူတွင် ဘဏ်စာရင်းများ ဖွင့်နေကြသည်။
တရုတ်က ရွေးကောက်ပွဲကို တရားဝင် ကြိုဆိုလာသောအခါ မြန်မာ နိုင်ငံအတွင်း တရုတ်သြဇာ လွှမ်းမိုးမှုကို ဆန့်ကျင်မည့် အမျိုးသားရေး ၀ါဒ၏ ပြင်းထန်သော တုန့်ပြန်မှုကို စိုးရိမ်ရသည်။
မြန်မာနိုင်ငံတွင် ရွေးကောက်ပွဲများ၏ တိုင်းရင်းသား သူပုန်များအပေါ် သက်ရောက်မှုများသည် တရုတ်အတွက် အရေးကိစ္စတစ်ခု ဖြစ်လာသည်။ မြန်မာနိုင်ငံတွင် ၇၀ % ကသာ မြန်မာများ ဖြစ်ရာ တိုင်းရင်းသားများကလည်း မြန်မာ နိုင်ငံ၏ စုစည်းမှုတွင် အရေးပါနေသည်။
ခြုံ၍ ပြောရလျှင် မြန်မာနိုင်ငံတွင် ဗိုလ်ချုပ်များသည် ယင်းတို့၏ ချုပ်ကိုင်ထားမှု စနစ်ကို ခေတ်မှီအောင် ပြုပြင်ပြောင်းလဲရန် ကြိုးစားနေသော်လည်း ရေရှည်၌ ပြောင်းလဲမှု အပေါ်တွင် ဆက်လက် ချုပ်ကိုင် ထားနိုင်မည်လား ဆိုသည်ကို မေးခွန်း ထုတ်ရမည် ဖြစ်သည်။ ထိုအချက်ကပင် မျှော်လင့်ချက် အတွက် လမ်းစပင် ဖြစ်ပါတော့သည်။
--Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.