Posts
 | yangonchronicle2011 Op-Ed |
၁၃.၁၂.၂၀၁၁
ဆောင်းပါးကဏ္ဍ
- ဖွံ့ဖြိုးရေးအကူအညီ အကူအညီများ ပိုမိုလာခဲ့
**********************************************************************************
ဆောင်းပါးကဏ္ဍ
ဖွံ့ဖြိုးရေးအကူအညီ အကူအညီများ ပိုမိုလာခဲ့
ဦးသိန်းစိန်အစိုးရနှင့် လွှတ်တော်တွင်းရှိ ဖွဲ့စည်းပုံအခြေခံဥပဒေကို နားလည်သော လူအနည်းငယ်ကြောင့် မြန်မာနိုင်ငံ၏ နိုင်ငံရေး ပြုပြင်ပြောင်းလဲမှုများ မြန်မြန်သွက်သွက် အကောင်အထည်ဖော်ဆောင်ရွက်နေသည့် ယခုလို အသွင်ကူးပြောင်းရေး အခါကာလတွင် နိုင်ငံတကာမှ မြန်မာနိုင်ငံအပေါ် သံသယဖြင့် စောင့်ကြည့်အကဲခေတ်မှုများ တဖြည်းဖြည်း အရည်ပျော်စပြုလာသည့် အချိန်အခါလည်း ဖြစ်သည်။ ထိုအတွက်ကြောင့် ဒီမိုကရေစီအသွင်ကူးပြောင်းရေးနှင့် ဖွံ့ဖြိုးတိုးတက်မှု အရှိန်မြင့်မားလာစေရန် နိုင်ငံတကာမှ ဖွံ့ဖြိုးရေးတရားဝင်အကူအညီများ (Official Development Aid) ပေးအပ်မှုများကို ယခင်ထက်ပိုမိုလာခဲ့ပါသည်။ ရွှေဝါရောင်သံဃာ့ အရေးအခင်းအပြီးတွင် မြန်မာနိုင်ငံကို နိုင်ငံတကာ အကူအညီအများဆုံး ပေးခဲ့သည့် ဂျပန်နိုင်ငံမှာ အပြည့်အဝပေးနေမြဲဖြစ်သော အကူအညီများကိုရပ်နားကာ ယင်းမှ တစ်စိတ်တစ်ပိုင်းသာ ပေးအပ်ရန်ဆုံးဖြတ်ခဲ့ပြီး ယခုမှ တဖန် ယခင်အတိုင်း အပြည့်အဝအကူအညီများ ပေးအပ်ရန် ကမ်းလှမ်းလာခဲ့သည်။ ထို့အပြင် အမေရိကန် နိုင်ငံခြားရေးဝန်ကြီး ဟီလာရန် ကလင်တန် လာရောက်သည့်အခါမှာလည်း အမေရိကန်အနေဖြင့် မြန်မာနိုင်ငံအားကျေးလက်ဒေသဖွံ့ဖြိုးရန် ရည်သန်၍ အသေးစားချေးငွေလုပ်ငန်းများတွင် ငွေအားနှင့် နည်းစနစ်များပေးအပ်ဖို့ရှိကြောင်းနှင့် ပြည်သူ့ကျန်းမာရေးနှင့် အင်ဂျင်နီယာပညာရပ်များအတွက် အမေရိကန် John Hopkin တက္ကသိုလ်တွင် သွားရောက် ပညာသင်ကြားနိုင်ရန် ပညာသင်ဆုများ ပေးအပ်သွားများဖြစ်ကြောင်း ကတိပြု ပြောသွားခဲ့သည်။
လက်ခံသည့်နိုင်ငံ၏ အရပ်ရပ်အခြေအနေ
မြန်မာနိုင်ငံသည် ဖွံ့ဖြိုးဆဲနိုင်ငံတစ်နိုင်ငံဖြစ်သည်နှင့်အညီ ယခုရင်ဆိုင်ကြုံတွေ့နေရသော ပညာရေး၊ ကျန်းမာရေး၊ စီးပွားရေးကဲ့သို့ ပြဿနာ အရပ်ရပ်ကို နိုင်ငံတော်၏ ဘတ်ဂျက်တစ်ခုတည်း တာဝန်ယူဖြေရှင်းဖို့ရန်ငှာ မစွမ်းသာပေ။ ထို့ကြောင့် နိုင်ငံတကာမှ အကူအညီ ရယူရေးမှာ ခေတ်မီ ဖွံ့ဖြိုးသည့် နိုင်ငံဖြစ်လာဖို့ အရေးကြီးသည့်အခန်းကဏ္ဍမှ ထည့်သွင်းစဉ်းစားလာရသည့် အချက်ဖြစ်သည်။ သို့နှင့် လှူဒါန်းသည့်နိုင်ငံမှ လက်ခံသည့် နိုင်ငံအား နိုင်ငံတကာ အကူအညီများ ပေးအပ်ရာတွင် ယင်းနိုင်ငံ၏ အဖွဲ့အစည်းဆိုင်ရာအရည်အသွေး (Institutional Capcity)၊ မူဝါဒချမှတ်နိုင်စွမ်း (Policy Capacity)နှင့် လက်တွေ့အကောင်အထည်ဖော်ဆောင်ရွက်မည့် အခြေအနေ(Operational Situation) အစရှိသည်တို့ကို လေ့လာအကဲဖြတ် ကြသည်။ ထိုသို့ဆိုလျှင် မေးစရာရှိလာသည့်မေးခွန်းမှာ မြန်မာနိုင်ငံမှာရောအထက်ပါ အရည်အသွေး များ၊ အကောင်အထည်ဖော်ဆောင်ရွက်နိုင်သည့် အခြေအနေများအသင့်ရှိနေပြီလောဟူ၍ ပင်ဖြစ်သည်။
အစိုးရသစ်၏မူဝါဒနှစ်ခု
အစိုးရသစ်တက်လာပြီးနောက်ပိုင်း သမ္မတဦးသိန်းစိန်မှ နိုင်ငံဖွံ့ဖြိုးရေးအတွက် အဓိကချမှတ်ခဲ့သည့် မူဝါဒနှစ်ခုမှ ကျေးလက်ဒေသဖွံ့ဖြိုးရေးနှင့် ဆင်းရဲမွဲတေမှု လျှော့ချရေးတို့ ဖြစ်သည်။ အစိုးရမှလည်းယင်းမူဝါဒများကို အကောင်အထည်ဖော် ဆောင်ရွက်နိုင်ရန် အသေးစားချေးငွေ ဥပဒေကို ပြင်ဆင် ပြဋ္ဌာန်းပြီးရုံမျှမက မြေယာပိုင်ဆိုင်ခွင့်ဥပဒေကို ပြင်ဆင်ရန် လွှတ်တော်၏သဘောတူညီမှုကို ရယူဖို့ ကြိုးစားနေပြီဖြစ်သည်။ မြန်မာနိုင်ငံ၏ လူဦးရေ ၇၀ ရာခိုင်နှုန်းမှာ ကျေးလက်ဒေသတွင်နေထိုင်ပြီး နိုင်ငံ၏ အဓိကကုန်ထုတ်လုပ်မှုဖြစ်သော လယ်ယာစိုက်ပျိုးရေးလုပ်ငန်းနှင့် ယင်းနှင့် ဆက်စပ် သည့် လုပ်ငန်းများကိုသာ လုပ်ကိုင်ကြသည်။ အစိုးရကသာ လယ်ယာစိုက်ပျိုးရေး ထုတ်ကုန်ဈေးကွက်ကို မက်လုံးများပေးအပ်နိုင်ပါက တနိုင်တပိုင် စိုက်ပျိုးထုတ်လုပ် မည့်သူများယခင်ကထက်ပိုမိုလာမည်ဖြစ်သည်။ ထိုကြောင့် အသေးစားချေးငွေနှင့် ပုဂ္ဂလိကလယ်ယာပိုင်ဆိုင်ခွင့် ဥပဒေများမှာ နိုင်ငံ၏ GDP မြင့်မားရေးအတွက် အဓိကအရေးကြီးသည့်ဥပဒေ၊ စည်းမျဉ်းစည်းကမ်းဆိုင်ရာများ ဖြစ်လာသည်။ထိုအတွက်ကြောင့် နိုင်ငံတကာမှ အသေးစားချေးငွေလုပ်ငန်းများ ဖြစ်ထွန်းရေးအတွက် အကူအညီများ လိုလိုလားလားနှင့် ပေးအပ်လိုခြင်းဖြစ်သည်။ ထို့အပြင် ကျေးလက်ဒေသတွင် ပညာရေးကဏ္ဍမြှင့်တင်ခြင်းနှင့် ကျန်းမာရေးစနစ်ကောင်းများရှိခြင်းသည်လည်း ကုန်ထုတ်လုပ်မှု တိုးတက်မှုကိုဖြစ်ပေါ်စေမှာ ဖြစ်သည့်အပြင် ကျေးလက်ဒေသဖွံ့ဖြိုးရေးကို ဆောင်ကြဉ်းသွားမှာ ဖြစ်သည်။
ငြိမ်းချမ်းရေးတွင်လည်း
ထို့အပြင် ပြည်တွင်းငြိမ်းချမ်းရေးနှင့် ဖွံ့ဖြိုးတိုးတက်မှုသည့် များစွာဆက်စပ်လျက်ရှိသည့် အရာပင်ဖြစ်သည်။ ငြိမ်းချမ်းမှုရှိမှ ဖွံ့ဖြိုးတိုးတက်မှုကို ရနိုင်မည်၊ ငြိမ်းချမ်းမှုမရှိလျှင် ဖွံ့ဖြိုးတိုးတက်မှုမရှိနိုင်ပေ။ (No peace, No development) ထိုအတွက်ကြောင့် နိုင်ငံ၏ တာဝန်ရှိပုဂ္ဂိုလ်များက ပြည်တွင်းငြိမ်းချမ်းမှုရရှိရန် အလေးထားကြိုးစားလာခဲ့ခြင်း ဖြစ်သည်။ ပြည်တွင်းငြိမ်းချမ်းမှုလုပ်ငန်းစဉ်တွင်လည်း နိုင်ငံတကာမှ အကူအညီများမှာ အထူးအရေးပါသည့်အခန်းကဏ္ဍမှ ပါဝင်နေသည်သာဖြစ်သည်။ ပြည်တွင်းငြိမ်းချမ်းရေးကိုအကောင် အထည်ဖော်ဆောင်ရွက်သည့် cazer တစ်ဦး ဖြစ်သူ ပြည်ထောင်စုဝန်ကြီးဦးအောင်မင်းက ငြိမ်းချမ်းရေးလုပ်ငန်းစဉ်တွင် နိုင်ငံတကာအကူအညီ၏ အရေးပါပုံကိုအင်တာဗျူးတစ်ခု၌ “ငြိမ်းချမ်းရေး လုပ်ငန်းစဉ်ကြီးတစ်ခုလုံးနဲ့ ပြောရရင် နိုင်ငံတကာအကူအညီလိုပါတယ်။ အထူးသဖြင့် ပြန်လည်တည်ဆောက်ရေး အပိုင်းတွေမှာပေါ့။ မြေ မြှုပ်မိုင်းတွေ ရှင်းလင်းရေးမှသည် အဲဒီဒေသကိုဝင်လာမယ့် နိုင်ငံခြားရင်းနှီးမြှုပ်နှံမှုအဆုံးပေါ့။ အဲဒီငြိမ်းချမ်းရေးလုပ်ငန်းစဉ်များကို ထာဝရငြိမ်းချမ်းရေးသဘော တည်ဆောက်မှာ ဖြစ်တဲ့အတွက် ရန်ပုံငွေများစွာ လိုအပ်ပါတယ်။ နိုင်ငံတကာအလှူငွေမပါဘဲ ဒီလုပ်ငန်းစဉ်တွေကို အကောင်အထည်ဖော်ဖို့ မဖြစ်နိုင် ပါဘူး။ မြေမြှုပ်မိုင်းရှင်းလင်းရေး အလုပ်တစ်ခုတည်းတင် ဒေါ်လာသန်းပေါင်းများစွာလိုအပ်ပါတယ်။ အဲဒီအတွက် မြန်မာနိုင်ငံမှာအခုရှိနေတဲ့ 3D Fundလို၊ LIFT လို ငွေပဒေသာပင်တွေ လိုအပ်နေပါတယ်။ မြန်မာနိုင်ငံမှာတိုင်းရင်းသားတွေနဲ့ Reconciliation ဖြစ်စေချင်တယ်လို့ ပြောနေတဲ့ နိုင်ငံ အားလုံး ပါဝင်ထည့်ဝင်ကြဖို့ မျှော်လင့်ပါတယ်” ဟူ၍ ပြော ကြားသွားခဲ့ပါသည်။
အကြိမ်ကြိမ်ကစားရမည့် ဂိမ်း
ထိုသို့ နိုင်ငံတကာအကူအညီများ ပေးအပ်ရာတွင် ဦးသိန်းစိန်အစိုးရမှ တာဝန်ယူမှုရှိသည့် စနစ်တကျ ပူးပေါင်းအကောင်အထည်ဖော်ရမှသာ ထိရောက်မှုရှိမည်ဖြစ်သည်။ အထူးသဖြင့် အစိုးရဗျူရိုကရေစီထက်မြက်ရေးနှင့် အကျင့်ပျက်ခြစားမှု လျော့ချရေးတို့ပင်ဖြစ်သည်။ အစိုးရမှ အဆိုပါ ကိစ္စရပ်များကို ပူးပေါင်းအကောင်အထည်ဖော်ရန် ပျက်ကွက်ခဲ့ပါက အကူအညီများမှာထိရောက်မှု ရှိမည်မဟုတ်ပါ။ ဘောဂဗေဒစကား နှင့်ဆိုရလျှင်မူ Principle – agent problem ဖြစ်ပေါ်လာမည်ဖြစ်သည်။ အကူအညီပေးအပ်သည့်နိုင်ငံ (Principle)၏ ဘဏ္ဍရေး၊ နည်းစနစ်အစရှိသည်တို့ကို လက်ခံ သည့်နိုင်ငံ (agent) မှ ထိထိရောက်ရောက် အကောင်အထည်ဖော်ရန် ပျက်ကွက်မှုမျိုးဖြစ်သည်။ ပေးအပ်သည့်နိုင်ငံမှလည်း လက်ခံသည့်နိုင်ငံ ရင်ဆိုင် ကြုံတွေ့နေရသည် ပြဿနာကိုဖြေရှင်းပေးခြင်း ဖြစ်သလို ယင်းသို့ ပေးအပ်လိုက်ခြင်းအတွက် ၎င်းတို့နိုင်ငံ၏ ကိုယ်ကျိုးစီးပွားလည်း ဖြစ်ထွန်းမှာ ဖြစ်သည်။ လက်ခံသည့်နိုင်ငံမှလည်း မိမိတို့နိုင်ငံ ကိုယ်ကျိုးစီးပွားကိုအခြေခံ၍ နှစ်ဦးနှစ်ဘက် အမြင့်ဆုံးအကျိုးအမြတ် ဖြစ်ထွန်းအောင် ကစားရသည် ဖြစ်ရာ ဖွံ့ဖြိုးရေးအကူအညီများသည် လက်ခံသည့်နိုင်ငံမှ ဖွံ့ဖြိုးတိုးတက်မှု မရရှိမခြင်း အကြိမ်ကြိမ်ကြုံတွေ့ရနိုင်သည့် ဂိမ်းတစ်ခုပင်ဖြစ်သည်။
***************************************************************************************
Google Docs makes it easy to create, store and share online documents, spreadsheets and presentations.
