Posts
(China Daily မှ 14 Feb 2011 ရက်စွဲပါ "China premier Wen seeks people's advice on government work" သတင်းကို ဘာသာ ပြန်ဆိုသည်။)
တရုတ် ဝန်ကြီးချုပ် ဝမ်ကျားပေါင်က အစိုးရ၏ လုပ်ငန်း အစီရင်ခံစာနှင့် လာမည့် ငါးနှစ် အတွက် တိုင်းပြည်၏ စီးပွားရေးနှင့် လူမှု ဖွံ့ဖြိုး တိုးတက်ရေး စီစဉ် ရေးဆွဲမှု မူကြမ်းများ အပေါ် ထင်မြင်ချက်များ ပေးကြရန် လုပ်ငန်း အလွှာစုံမှ သာမန် ပြည်သူ တစ်စုကို ဖိတ်ခေါ်ခဲ့သည်။
လယ်သမား၊ ရွှေ့ပြောင်း လုပ်သား၊ ကျေးလက် ဆရာဝန်နှင့် လူထု လုပ်သား အပါအဝင် ကိုယ်စားလှယ်များကို ဘေဂျင်း မြို့လယ် အစိုးရ ခေါင်းဆောင်များ ရုံးစိုက်ရာ ဇောင်နင်ဟိုင်သို့ ဇန်နဝါရီလ ၂၅ ရက်တွင် ဖိတ်ခေါ်ခဲ့ခြင်း ဖြစ်ပြီး အစည်းအဝေး၏ အသေးစိတ် အချက်အလက် အချို့ကို တနင်္ဂနွေနေ့က လူသိရှင်ကြား ထုတ်ပြန်ခဲ့သည်။
အစည်းအဝေးတွင် ဝန်ကြီးချုပ် ဝမ် က "သာမန် ပြည်သူတွေဟာ အစိုးရရဲ့ လုပ်ငန်း ဆောင်တာကို အကဲဖြတ် စိစစ်ဖို့ အကောင်းဆုံး နယ်ပယ်တစ်ခု ဖြစ်ပြီး ပြည်သူလူထု အသံကို နားထောင်ခြင်း အားဖြင့် အစိုးရရဲ့ မူဝါဒတွေဟာ အောက်ခြေ အလွှာအထိ အလုပ်ဖြစ်ရဲ့လား၊ ပြည်သူတွေ ဘယ်လို အခက်အခဲတွေနဲ့ ရင်ဆိုင်နေရသလဲ ဆိုတာတွေကို သိခွင့် ရစေမှာ ဖြစ်တယ်" ဟု ပြောကြားခဲ့သည်။
အရှေ့ မြောက်ပိုင်း ဟီလုံဂျန် ပြည်နယ်မှ လယ်သမား လူဟောင်ဝေက တရုတ်မြောက်ပိုင်း၌ ယခု ဆောင်းရာသီ ဆိုးရွားစွာ မိုးခေါင် ရေရှားမှု ကဲ့သို့သော သဘာဝ ဘေးအန္တရာယ် ကိစ္စများတွင် အစိုးရက စိုက်ပျိုးရေး ရရှိ ထိန်းသိမ်းရေး စီမံကိန်းများတွင် ရင်းနှီးမြုပ်နှံမှု တိုးမြှင့်နေခြင်းကို ညွှန်ပြခဲ့သည်။
လူနေအိမ် သုံးစွဲမှုနှင့် စိုက်ပျိုးရေ သွယ်ယူမှု နှစ်ခုစလုံး အတွက် လျှပ်စစ်ဓါတ်အား ဖြည့်ဆည်းမှု လုံလောက်စေရန် ကျေးလက်ဒေသ ဓါတ်အားလိုင်းများကို ပြန်လည် ပြုပြင် တပ်ဆင်မှု စတင်နေသည့် အချိန်တွင် ရေထိန်းသိမ်းမှု စီမံကိန်းများ၌ အစိုးရက ရင်းနှီး မြုပ်နှံမှုများကို ယခုနှစ် တိုးမြှင့်သွားမည်ဟု ဝမ်ကျားပေါင်က ပြောကြားသည်။
အစိုးရက ကောက်ပဲသီးနှံ ဝယ်ယူသည့် ဈေးနှုန်းကိုလည်း တိုးမြှင့်ပေးမည် ဖြစ်ကြောင်း ဝန်ကြီးချုပ်ဝမ်က လယ်သမား လူဟောင်ဝေကို အာမခံ ပြောကြားခဲ့ပြီး ကောက်ပဲသီးနှံ စိုက်ပျိုးသူ လယ်သမားများ၏ အကျိုးစီးပွားကို ကာကွယ်ပေးရာ ရောက်စေမည် ဟု သိရှိရသည်။
--Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.