Transparency Myanmar

transparency.myanmar@gmail.com

BBC News, 15th July 2010

မြောက်ကိုးရီးယားသည် ၎င်း၏ ပြည်သူများအတွက် လိုအပ်နေသော အခြေခံ ကျန်းမာရေး စောင့်ရှောက်မှု အများစုကို ဖြည့်ဆည်းရန် ပျက်ကွက်နေသည် ဟု  Amnesty International  က သတိပေး ပြောကြားလိုက်သည်။

လူ့အခွင့်အရေး စောင့်ကြည့်ရေး အဖွဲ့၏ စုံစမ်းမှုတွင် လည်ပတ်ရုံမျှသာ ဖွင့်ထားသော ဆေးရုံများ၊ ပတ်ဝန်းကျင် သန့်ရှင်းရေး နှိမ့်ကျမှုများ၊ တိုင်းပြည် အနှံ့ အာဟာရ ချို့တဲ့မှုကြောင့် ဆိုးဝါးလာသော ရောဂါ ပြန့်ပွားမှုများကို တွေ့ရှိခဲ့သည်။

ပြည်သူ အများစုမှာ ဆေးကုသခပေးရန်ပင် မတတ်နိုင်ကြဟု မြောက်ကိုးရီးယား ပြည်သူများနှင့် ကျန်းမာရေး ဝန်ထမ်းများ၏ ပြောကြားမှုကို ကိုးကား၍ အစီရင်ခံစာ ကဖော်ပြသည်။

ပြုံးယမ်းသည် လူတစ်ဦးချင်း ကျန်းမာရေး စောင့်ရှောက်မှု အတွက် တစ်နှစ်လျှင် ၁ ဒေါ်လာပင် သုံးစွဲခြင်းမရှိဟု  WHO   ကိန်းဂဏန်းများက ညွှန်ပြနေသည်။

Amnesty ၏ "မြောက်ကိုးရီးယားမှ ပြိုလဲတော့မည့် ကျန်းမာရေး စောင့်ရှောက်မှု စနစ်'' အစီရင်ခံစာသည် ၂၀၀၄ မှ ၂၀၀၉ အတွင်း တိုင်းပြည်ကို စွန့်ခွာလာသော မြောက်ကိုးရီးယား လူမျိုး ၄၀ ကျော်နှင့် အင်တာဗျူးများကို  အခြေခံထားခြင်း ဖြစ်သည်။

မြောက်ကိုးရီးယားများနှင့် အတူ လုပ်ကိုင်နေသော ကျန်းမာရေး ကျွမ်းကျင် ပညာရှင်များကိုလည်း တိုင်ပင်ခဲ့သည်ဟု သိရသည်။

အစာရေစာ ပြတ်လတ် ငတ်မွတ်မှု

ပြုံးယမ်းက ၎င်း၏ ပြည်သူများ အတွက် အခမဲ့ ကျန်းမာရေး စောင့်ရှောက်မှု ပေးနေသည်ဟု ပြောကြားခဲ့သော်လည်း သက်သေများကမူ လွန်ခဲ့သော နှစ်၂၀ အတွင်း ဝန်ဆောင်မှု အားလုံး အတွက် အခကြေးငွေ ပေးခဲ့ရသည်ဟု Amnesty သို့ ပြောကြားသည်။

"လူတွေက သူတို့မှာသာ ပိုက်ဆံ မရှိဘူးဆိုရင် ဆေးရုံကို သွားဖို့ မစဉ်းစားတော့ပါဘူး၊ ပိုက်ဆံပေးရမယ် ဆိုတာ လူတိုင်း သိနေတာပဲ'' ဟု မြောက်ပိုင်း ဟန်ဂျောင်းပြည်နယ်မှ အသက် ၂၀ အရွယ် မိန်းကလေး တစ်ဦးက ဆိုသည်။

၂၀၀၈တွင် မြောက်ကိုးရီးယားကို စွန့်ခွာခဲ့သော အမျိုးသမီး တစ်ဦးက "ပိုက်ဆံ မရှိရင်တော့ အသက်သာ အသေခံပေတော့'' ဟု ပြောကြားသည်။

နောက်တစ်ယောက်ကလည်း "ဆေးရုံတွေမှာ ဆေးမရှိပါဘူး၊ တကယ်လို့ တစ်စုံတစ်ယောက်က ဆေးကုသ ခံတော့မယ်ဆိုရင် ဆရာဝန်တွေ လိုတဲ့ ဆေးတွေကို ဈေးမှာ သွားဝယ်ရပါတယ်'' ဟု ပြောဆိုသည်။

ဆေးကုသဆောင်များ၏ ညစ်ပတ်မှု၊ ဆေးဝါး အလွန်အမင်း ချို့တဲ့မှုများသည် အသက်ပေါင်း များစွာကို ခြိမ်းခြောက်နေသည် ဟု Amnesty ကသတိပေးခဲ့ပြီး ပြည်သူများသည် ဆေးကုသ စရိတ်အတွက် စီးကရက်၊ စားသောက်ကုန်နှင့် အရက် တို့ကို ပုံမှန်ရောင်းဝယ် ကုန်သွယ်ကြရသည်ဟု ဆိုသည်။

အသက် ၅၆ နှစ် အရွယ် အမျိုးသမီးကြီး တစ်ဦးကလည်း "သူမ၏ အူအတက်ရောင် ဝေဒနာကို မေ့ဆေးမပါဘဲ ခွဲစိတ်ခဲ့သည်'' ဟု ထုတ်ဖော် ပြောကြားသည်။ "ခွဲစိတ်မှုက တစ်နာရီနဲ့ ၁၀ မိနစ်လောက် ကြာပါတယ်၊ နာလွန်းလို့ သေပြီလို့တောင် ထင်ခဲ့တာရှင့်။ ခြေထောက်တွေ၊ လက်တွေကို မရုန်းနိုင်အောင် ကြိုးနဲ့ တုပ်ထားကြတာပါ'' ဟု သူမက ဆိုသည်။

၁၉၉၀ ခုနှစ်များ အတွင်း လူပေါင်း တစ်သန်းခန့် အထိ သေဆုံးခဲ့ရသော ငတ်မွတ်မှု ကပ်ဘေး၏ နောက်ဆက်တွဲ အဖြစ် မြောက်ကိုးရီးယားတွင် စားနပ်ရိက္ခာ မလုံလောက်မှုနှင့် ရင်ဆိုင်နေရပြီး နိုင်ငံတကာ ကယ်ဆယ် ထောက်ပံ့မှုများကို မှီခိုနေရသည်။

၂၀၀၉ ခုနှစ် အတွင်း မိုက်မိုက်မဲမဲ ငွေတန်ဖိုး ပြင်ဆင်ခဲ့ခြင်းကြောင့် တစ်ညအတွင်း ဆန်ဈေး ၂ ဆ တက်သွားကာ ယခုနှစ် ဇန်နဝါရီလနှင့် ဖေဖော်ဝါရီလ အတွင်း ပြည်နယ် တစ်ခုထဲမှာပင် အစာငတ် သေဆုံးသူ ထောင်ချီ၍ ရှိခဲ့သည်ဟု NGO တစ်ခုကို ကိုးကားကာ အစီရင်ခံစာတွင် ဖော်ပြထားသည်။

မြောက်ကိုးရီးယားသည် အဆုတ် တီဘီရောဂါ ပြန့်ပွားမှုကို နှိမ်နှင်းနေရဆဲ ဖြစ်ပြီး ပြည်လုံးကျွတ် အာဟာရ ချို့တဲ့မှုကြောင့် ပိုမိုဆိုးဝါးလာသည်ဟု Amnesty ကပြောကြားသည်။

"မြောက်ကိုးရီးယား ပြည်သူတွေဟာ ဆေးဝါးနဲ့ စားနပ်ရိက္ခာ ကယ်ဆယ် ထောက်ပံ့မှုကို အရေးတကြီး လိုအပ်နေပါတယ်'' ဟု Amnesty ၏ အာရှပစိဖိတ် ဆိုင်ရာ လက်ထောက်ညွှန်ကြားရေးမှူး  Catherine Baber ကဆိုသည်။

"ဒါဟာ သေရေးရှင်ရေး ကိစ္စဖြစ်တဲ့ အတွက် အလှူရှင်နိုင်ငံတွေ အနေနဲ့ နိုင်ငံရေး ဘောလုံး တစ်လုံးလို အသုံးပြုလို့ မရပါဘူး'' ဟု သူမက သတိပေးသည်။

မြောက်ကိုးရီးယားသည် နိုင်ငံရေးအရ အပယ်ခံ ဘဝရောက်အောင် သူ့ကိုယ်သူ ပြုလုပ်ခဲ့သည်။ ၎င်း၏ အငြင်းပွားဖွယ် နျူကလီယာ အစီအစဉ်များနှင့် ပတ်သက်သည့် နိုင်ငံတကာ ဆွေးနွေးပွဲများမှ နုတ်ထွက်သွားခဲ့သည်။

ပြုံးယမ်းက နျူကလီယာနှင့် ဒုံးပျံ စမ်းသပ်မှုများ ပြုလုပ်ခဲ့ပြီးနောက် အမေရိကန်က ပိတ်ဆို့ အရေးယူမှုကို ထပ်မံ တင်းကျပ်လိုက်သည်။

မြောက်ကိုးရီးယားသည် ပြီးခဲ့သော မတ်လ ကလည်း တောင်ကိုးရီးယား စစ်သင်္ဘောကို အလစ် တိုက်ခိုက်ခဲ့သဖြင့် ရေတပ်သား ၄၆ ဦး သေဆုံးကာ သင်္ဘော နစ်မြုပ်သွားခဲ့သောကြောင့် ဆိုးလ်နှင့် ဆက်ဆံမှု အားလုံးကို ရပ်ဆိုင်းထားသည်။

အထက်ပါ ဖြစ်ရပ်တွင် မြောက်ကိုးရီးယားက တိုပီဒိုဖြင့် ပစ်ခတ်ခဲ့ခြင်း ဖြစ်ကြောင်းကို နိုင်ငံတကာ စုံစမ်းရေး အဖွဲ့က ဖော်ထုတ်နိုင်ခဲ့သော်လည်း ပြုံးယမ်းက မျက်နှာပြောင်တိုက် ငြင်းဆိုခဲ့သည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

0 comments:

Post a Comment