Transparency Myanmar

transparency.myanmar@gmail.com

သီရိလင်္ကာ၊ အီရန်၊ မြန်မာ စသည့် နိုင်ငံအစိုးရများနှင့် အလွမ်းမသင့်သော သတင်းထောက်များသည် မကြာခဏဆိုသလို ဖမ်းဆီးခြင်း၊ နှိပ်စက် သတ်ဖြတ်ခြင်း ခံရလေ့ ရှိသည်။ ယခုအခါ စင်ကာပူအစိုးရသည်လည်း သတင်းသမားများအပေါ် ခပ်ကြမ်းကြမ်း ကိုင်တွယ်မည့် အရိပ်အယောင်များ ပြသနေပြီ ဖြစ်သည်။

စင်ကာပူ အခြေစိုက် ဗြိတိသျှလူမျိုး သတင်းစာဆရာတစ်ဦးကို စင်ကာပူအစိုးရက ဗီဇာသက်တမ်း ထပ်မံ တိုးမြှင့်ပေးခြင်း မရှိတော့ကြောင်း သိရသည်။ အရှေ့တောင်အာရှ၏ မြို့တော် နိုင်ငံငယ်ကလေးတစ်ခု ဖြစ်သော စင်ကာပူက နိုင်ငံတွင်း သတင်း လွတ်လပ်ခွင့်များ ပေးရန် အတော်အတန်ပင် တင်းတင်းကျပ်ကျပ် ပြုလုပ်လာသည်။ စင်ကာပူတွင် တစ်နှစ်တာမျှ ဗြိတိန်နိုင်ငံမှ The Guardian သတင်းစာ၏ Correspondent အဖြစ် လုပ်ကိုင်ခဲ့သူအား အစိုးရက နောက်ထပ် ဗီဇာသက်တမ်း တိုးမပေးတော့ပေ။

ဗြိတိသျှကော်မရှင် (British High Commission) က ဗီဇာသက်တမ်း ပြန်လည် တိုးပေးရေးနှင့် သက်တမ်းတိုးရန် ငြင်းပယ်ရသည့် အကြောင်းအရင်းကို ထုတ်ဖော်ရန် တောင်းဆိုသော်လည်း စင်ကာပူအစိုးရက ငြင်းပယ်ခဲ့သည်။ အမေရိကန်ပြည်ထောင်စု၊ နယူးယောက် အခြေစိုက် သတင်းစာဆရာများ ကာကွယ်ပေးရေးကော်မတီ (CPJ) က ယခု ဖြစ်ရပ်သည် စင်ကာပူအစိုးရက သတင်းစာ လွတ်လပ်ခွင့်နှင့် အရေးကြီးသော သတင်းပေးပို့မှုများ ပြုလုပ်ခြင်းကို လုံးဝ လိုလားခြင်း မရှိသည်ကို ထုတ်ဖော် ပြသလိုက်သကဲ့သို့ ရှိသည်ဟု ပြောကြားသည်။ စင်ကာပူနိုင်ငံတွင်း အခြေအနေများ၊ အစိုးရကိစ္စများကို နိုင်ငံခြား သတင်းထောက်များ ရေးသားဖော်ပြနေမှုအား လက်သင့် မခံနိုင်သောကြောင့် ယခုလို ပြုလုပ်ခြင်း ဖြစ်သည်ဟု CPJ က ဆိုသည်။

ဗီဇာသက်တမ်း တိုးရန် ငြင်းပယ်ခြင်း ခံခဲ့ရသူသည် စင်ကာပူနိုင်ငံတွင်း ရာဇဝတ်မှုများ တိုးပွားလာခြင်း၊ သက်ကြီးရွယ်အိုများ များပြားလာခြင်း၊ စင်ကာပူနှင့် မြန်မာစစ်အစိုးရတို့ စီပွားရေး ချိတ်ဆက် လုပ်ကိုင်နေခြင်းတို့အား ထုတ်ဖော် ရေးသားခဲ့သည်။ ၎င်းသည် စင်ကာပူ၏ ခေါင်းကိုင်ဖခင်ကြီး ဖြစ်သော လီကွမ်ယူအပါအဝင် လက်ရှိ ဝန်ကြီးချုပ် လီရှန်လွန်း (လီကွမ်ယူ၏သား) တို့အား တိုက်ခိုက် ဝေဖန်သည့် အရေးအသားမျိုး ပြုလုပ်ခဲ့ခြင်း မရှိပေ။

ယခုနှစ်များအတွင်း နိုင်ငံတကာ သတင်းမီဒီယာနှင့် စာစောင်ကြီးများ ဖြစ်ကြသော The Economist၊ International Herald Tribune၊ Wall Street Journal နှင့် Far Eastern Economic Review တို့မှာ စင်ကာပူအုပ်ချုပ်ရေးတွင် အဓိက ဦးဆောင်နေသော လူတန်းစားများ ဖြစ်ကြသော လီကွမ်ယူမိသားစုကို ပြင်းပြင်းထန်ထန် ဝေဖန် ရေးသားခဲ့သောကြောင့် လျော်ကြေးငွေပေါင်း မြောက်မြားစွာ ပေးရန် ဖိအားပေးခြင်း ခံခဲ့ရသည်။

 

နိုင်ငံတကာ သတင်း မီဒီယာကြီးများက စင်ကာပူအစိုးရနှင့် တရားရင်ဆိုင်မည့် ကိစ္စကို အရေးမစိုက်ကြသော်လည်း စင်ကာပူနိုင်ငံသား ဂျာနယ်လစ်များမှာမူ အစိုးရ၏ ခြိမ်းခြောက်မှုများကို ခါးစည်းခံနေကြရသည်။ စင်ကာပူတွင် ထုတ်ဝေသော သတင်းစာကြီးများ၊ ရုပ်သံမီဒီယာများအားလုံး၌ အစိုးရက အစုရှယ်ယာ အများဆုံး ထည့်ဝင်ထားသည်။ စင်ကာပူ မီဒီယာများမှာ အစိုးရနှင့် ပြဿနာ မဖြစ်စေရန် ကိုယ့်ဘာသာကိုယ် စိစစ် တည်းဖြတ်ကြရသည့် အလေ့အထနှင့် ယဉ်ပါးနေပြီ ဖြစ်သည်။ အာရှဒေသတွင် သြဇာကြီးသော နိုင်ငံတကာ သတင်းစာကြီးတစ်စောင်မှ စီနီယာ အယ်ဒီတာတစ်ဦးက ၎င်းအနေဖြင့် စင်ကာပူအစိုးရကို ထိခိုက်စေမည့် သတင်းမှန်သမျှကို ဂရုတစိုက် တည်းဖြတ်ရကြောင်း ပြောပြသည်။

 

စင်ကာပူ အခြေစိုက် ဝါရင့် နိုင်ငံတကာ သတင်းထောက်တစ်ဦးက မီဒီယာများ အနေဖြင့် စင်ကာပူအစိုးရနှင့် ထိပ်တိုက်တွေ့မည့် အရေးအသားမျိုး မဟုတ်ပါက ရေးသားနိုင်ကြောင်း၊ ဥပမာ အစိုးရခေါင်းဆောင်များ၏ ပုဂ္ဂိုလ်ရေးကို မရေးသားဘဲ အစိုးရ ပေါ်လစီကို ဝေဖန် ရေးသားပါက ပြဿနာ မဖြစ်နိုင်ကြောင်း ပြောဆိုသည်။

The Guardian သတင်းစာ၏ Ejected from Singapore ကို ဆီလျော်အောင် ဘာသာပြန်ဆိုသည်။

--
Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
 
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.

0 comments:

Post a Comment