Posts
Relief Web, By Alex Ellgee, 19th February 2010
ကြာသပတေးနေ့က ထိုင်းအမျိုးသား လူ့အခွင့်အရေး ကော်မရှင် NHRC သည် ကရင် ဒုက္ခသည်များ နေထိုင်ရာ Naung Bwa နှင့် Mae U Su ယာယီ စခန်းများသို့ အချက်အလက် ရှာဖွေရေး မစ်ရှင်ဖြင့် သွားရောက်ခဲ့ကြသည်။
တာဝန် ရှိသူများသည် အဆိုပါ စခန်းနှစ်ခုတွင် နေထိုင်သူများ အနက်မှ အချို့ကို တွေ့ဆုံ မေးမြန်းကာ တစ်နာရီခန့် အချိန်ယူခဲ့သည်။
ယခု အပတ်တွင် ထိုင်း အစိုးရသည် ကရင် ဒုက္ခသည် ၃၀၀ဝ ခန့်ကို ၎င်းတို့၏ မူရင်းဒေသသို့ ပြန်လည် ပို့ဆောင်ရေး အစီအစဉ်ကို ပယ်ဖျက်ထားသည်။ ၎င်းတို့၏ ဒေသတွင် ကရင် သူပုန်များနှင့် မြန်မာ စစ်တပ်တို့ တိုက်ပွဲများ ဖြစ်ပွားလျက် ရှိသည်။ အဆိုပါ အစီအစဉ် ရပ်ဆိုင်းထားရခြင်းမှာ NGO များနှင့် နိုင်ငံတကာ အသိုင်းအဝိုင်းက ပြင်းထန်စွာ ဝေဖန်သောကြောင့် ဖြစ်သည်။
မိမိတို့ တွေ့ရှိရသော အချက်မှာ အဆိုပါ ဒုက္ခသည်များသည် ၎င်းတို့ ဒေသသို့ ပြန်သွားလိုကြ ကြောင်း၊ သို့သော် ယခု လောလောဆယ်တော့ မဟုတ်သေးကြောင်း NHRC မှ Boonthat Verawonswe က ဧရာဝတီ သို့ ပြောကြားခဲ့သည်။
ယခု လောလောဆယ် အားဖြင့် ၎င်းတို့ အရပ်သို့ ပြန်ရန် မလုံခြုံသေးဟု ထင်နေ ကြသေးကြောင်း၊ DKBA တို့၏ မြေမြှုပ်မိုင်းများနှင့် လတ်တလော တိုက်ပွဲများကို စိုးရိမ် ကြောက်ရွံ့ နေကြကြောင်း ၎င်းက ပြောသည်။
မည်သည့် ဒုက္ခသည်များကိုမျှ ၎င်းတို့၏ အလိုနှင့် ဆန့်ကျင်ပြီး ၎င်းတို့ နေရပ် ကရင်ပြည်နယ် သို့ ပြန်ပို့လိမ့်မည် မဟုတ်ကြောင်း မကြာသေးမီက ထိုင်း အာဏာပိုင်များက ပြောကြားခဲ့သည်။
မိမိတို့ အတင်းအကျပ် ပြန်လည် ပို့ဆောင်ခြင်း မရှိကြောင်း၊ ပြန်ပို့ရေးမှာ မိမိတို့၏ မူဝါဒ မဟုတ်ကြောင်း ဗိုလ်မှူးကြီး Noppadol Watcharajitbawom က AP သတင်းဌာနသို့ ပြောသည်။
Boonthat Veraongse က ဆက်လက် ပြောကြားရာတွင် ထိုင်း အာဏာပိုင်များသည် ဒုက္ခသည်များ ပြန်ပို့ရေးကို ရပ်ဆိုင်းထားပြီဟု ယုံကြည်ကြောင်း၊ သို့သော် နေရပ် ပြန်ပို့ရေးအတွက် အချို့ ဖိအားပေးမှုများ ရှိနေဆဲ ဖြစ်ကြောင်း ဆိုသည်။
"ဒုက္ခသည်တွေက ထိုင်း အာဏာပိုင်တွေ အတင်း ဖိအားပေးတယ်လို့ ကျွန်တော်တို့ကို တိုက်ရိုက် လာမပြောခဲ့ပါဘူး။ သူတို့ ပြောတာက အရာရှိတွေက မင်းတို့ ထိုင်းနိုင်ငံမှာ နေတာ ရှစ်လလောက် ရှိပြီ ဆိုတော့ ပြန်ဖို့ အချိန်တန်ပြီလို့ ပြောတယ်လို့ပဲ ပြောကြပါတယ်" ဟု Boonthat က ပြောသည်။
Boonthat က ဒုက္ခသည်များ ကျန်းမာရေး စောင့်ရှောက်မှုနှင့် ရေ သန့်ရှင်းမှုမှာ အရေးကြီးသော ကိစ္စ ဖြစ်ကြောင်း၊ Mac U Su စခန်းသည် မြစ်နှင့် ဆက်သွယ်၍ ရသော်လည်း၊ Nu P Oh တွင် မကြာခဏ ရေပြတ်လပ်မှုနှင့် ကြုံတွေ့နေရသည်ဟု ဆိုသည်။
ယခု အပတ်တွင် ထိုင်း စစ်တပ် နိုင်ငံခြား ရေးရာ ပြောခွင့်ရ ပုဂ္ဂိုလ် Rachanan Thananand က ပြောကြားရာတွင် နယ်စပ်ရှိ မြန်မာဘက်မှ သတင်း ပေးပို့မှုအရ ၂၀၀၉ ခုနှစ် ဇွန်လက ဒုက္ခသည်များ ပြေးလာသည့် ဒေသများတွင် မြေမြှုပ်မိုင်းများ ရှင်းလင်းပြီး ဖြစ်ကြောင်း ထည့်သွင်း ပြောကြားသွားခဲ့သည်။
တနင်္လာနေ့က International Campaign to Ban Land Mines မှ တာဝန်ရှိသူ ပုဂ္ဂိုလ်က ပြောကြားရာတွင် မိမိတို့ ဒုက္ခသည်များအတွက် စိုးရိမ် နေရခြင်းမှာ ၎င်းတို့ ရွာနှင့် အနီး ပတ်ဝန်းကျင်တွင် မြေမြှုပ်မိုင်းများ ရှိနေခြင်း ဖြစ်ကြောင်း ပြောကြားခဲ့သည်။
Boonthat က မြေမြှုပ်မိုင်းများနှင့် ပတ်သက်၍ မှတ်ချက် ပေးရာတွင် မိုင်းများ၏ အခြေအနေမှာ မရှင်းလင်းသေးကြောင်း၊ သို့သော် အဆိုပါ ကိစ္စမှာ ဒုက္ခသည်များအတွက် အဓိက စိုးရိမ် ပူပန်နေရသော အချက်ဖြစ်နေဆဲ ဖြစ်သည်ဟု ဆိုသည်။
မိမိတို့ Mae Tao ဆေးခန်းမှ လူများနှင့် တွေ့ဆုံရာတွင် ၂၀၀၈ ခုနှစ်က မိုင်းထိ၍ ဒဏ်ရာ ရသော လူအရေအတွက်မှာ ငါးဆယ်ဦးထက် မကျော်ကြောင်း၊ သို့သော် မနှစ်က ဒဏ်ရာရသည့် လူဦးရေ ၁၀၀ ကျော်ကြောင်း၊ ထိုအချက်မှာ မြေမြှုပ်မိုင်း၏ အခြေအနေမှန်ကို ပြသခြင်းပင် ဖြစ်ကြောင်း Boonthat က ပြောကြားခဲ့သည်။
ထိုင်းအစိုးရသို့ NHRC မည်သည့် ထောက်ခံချက်များ ပေးမည်နည်းဟု မေးမြန်းသောအခါ ၎င်းက မိမိတို့သည် နောက်ထပ် ပြန်လည် မှားယွင်းမှု မရှိရေး မူဝါဒနှင့် ဒုက္ခသည်များ အထွေထွေ လုံခြုံရေးနှင့် ကောင်းကောင်း နေနိုင်ရေးကို အာရုံပြုရန် လိုအပ်သည်ဟု ပြောကြားခဲ့သည်။
NHRC သည် ၎င်း၏ ထောက်ခံချက်ကို ထိုင်း အစိုးရသို့ အင်္ဂါနေ့တွင် တင်ပြမည် ဖြစ်သည်။
NHRC သည် အစိုးရအား မိမိတို့နှင့် သတင်း ဖလှယ်နိုင်ရေးအတွက် အခွင့်ပေးမည် ဖြစ်၍ မိမိတို့ အရာရှိများသည် လုပ်သင့်သည်ဟု ထင်မြင်သည်များကို ပြောပြမည် ဖြစ်ပြီး၊ အစိုးရမှလည်း ၎င်းတုို့ လုပ်ပေးနိုင်သည်များနှင့် လုပ်မပေးနိုင်သည်များကို မိမိတို့အား ပြောပြနိုင်မည် ဖြစ်ကြောင်း၊ ဒုက္ခသည်များ လုံခြုံစွာ နေထိုင်နိုင်ရေး သေချာရန် လိုအပ်ကြောင်း Boonthat က ပြောသည်။
ဖေဖော်ဝါရီလ ၅ ရက်နေ့က ကရင် မိသားစု သုံးစုအား ၎င်းတို့ရွာ ဖြစ်သော ကရင်ပြည်နယ် တောင်ပိုင်းရှိ Ler Per Her သို့ ပြန်ပို့ခဲ့ရာ၊ မြေမြှုပ်မိုင်းများကို ကြောက်သောကြောင့်ဟု ဆိုကာ ပြန်ရောက် လာကြသည်။
ထိုင်း စစ်တပ်သည် ဖေဖော်ဝါရီလ ၁၅ ရက်နေ့တွင် ကရင် ဒုက္ခသည် ၃၀၀၀ အား ပြန်ပို့ရန် စီစဉ်ခဲ့ရာ နိုင်ငံတကာ အသိုင်းအဝိုင်းနှင့် လူအခွင့်အရေး အဖွဲ့များက ဝေဖန်မှုကြောင့် အဆိုပါ အစီအစဉ် ရပ်ဆိုင်းသွားခဲ့ရသည်။
ဒုက္ခသည် ၃၀၀ ခန့်မှာ Mae U Su ယာယီစခန်းမှ ၎င်းတို့၏ ဒေသသို့ ပြန်သွားပြီး ဖြစ်ကြောင်း TBBC ၏ သတင်း ပေးပို့ချက်အရ သိရှိရသည်။
ဖေဖော်ဝါရီလ ၄ ရက်နေ့က အမေရိကန် ကွန်ဂရက်မှ အဖွဲ့ဝင်များက ထိုင်းဝန်ကြီးချုပ် အဘီဆစ်ထံသို့ ဒုက္ခသည်များ ပြန်ပို့ရေးကို ရပ်ဆိုင်းရန် စာပေးပို့ခဲ့သည်။ အဆိုပါ စာတွင် ဒုက္ခသည် များသည် ပြန်ပို့ခြင်း ခံရပါက ကြောက်စရာကောင်းသော လူ့အခွင့်အရေး နှိပ်စက်မှုများကို ခံစားရလိမ့်မည် ဖြစ်ကြောင်း ရေးသားထားသည်။
--Yangon Chronicle သည် မြန်မာနိုင်ငံ အတွင်းရှိ ဖတ်သူများ ဒေါင့်စုံ သတင်းရအောင် ဖော်ပြခြင်းသာ ဖြစ်ပြီး ဘာသာပြန် ဆိုဖော်ပြချက် အားလုံးသည် မူရင်းမီဒီယာ များ၏ အာဘော်သာ ဖြစ်၍ Yangon Chronicle ၏ သဘောထား မဟုတ်ပါကြောင်း။
The information from this group yangonchronicle2010 were allowed to be reposted on the website named http://transparencymyanmar2010.blogspot.com/ upon their request.